Matai 23

Maelaela ki swa Palrisai si tarabulrubulru ki Sisiu

(Maruku 12.38-40; Luka 11.37-52; 20.45-47)

1Ku Yesu kawariva ki mapapangale si lasituini iya kai, 2“Kai tarabulrubulru ki Sisiu si swa Palrisai acegecege ikai ki taikaiyane ki Musi si lalrwai ki hulrice, 3kunumi paluluda kudra tabulrwane lini, ai madha twalralralrau ki kakwakudhane lini; asi lwiyane kwini lalasu amiamia sikakathane, la kai piapia. 4Kwini lalasu waerece ku matelrege ku atukudrane ka amece si paangeale ki palrapalra, ai kai mwabangalre velevele ku dadiputhane si paarukaliapai ku amece ki palrapalra. 5Kwini lalasu adravane pia sanaka maneemane padredrele ki umawmase pia patueelre. Kwini lalasu waelrai ku maadrau ku thuthubungu ki pacase ki Sisiu, la drima pakalragi ku papwalelebe ku laimai; 6kwini lalasu madalame ki tangiakanekaneanane ki sacucucubungunga ka taetale si mwakalrivili irarubwane ku taneneane; 7kwini lalasu la murikai ku akisukubane ki umawmase ikai rarubwane ki swa Yuda, si kitu ‘Sinsi’ liniane. 8Ku patengatengane, nai kai numi kitu ‘Sinsi’; asi lwiyane kunumi maretetese numi, ka vaeva ku ‘Sinsi’ numi. 9Kunumi ‘Ama’ madha iyaiya ikawmasane sanaka aneeanenga, asi lwiyane vaeva ku yasubelebelenge ku ‘Tama’ numi.

10“La kai numi udringai kipasi ‘Saniange ka Sinsi’, asi lwiyane kathane ku Kirisitu ku ‘Saniange ka Sinsi’ numi. 11Ikai numiane aneane ku sanianiyangenga, lrika amani ku sasiakawlu numiane. 12Ku Twaumase lri alra pulebe paalebenga ki ngiatatwabelenge ku umawmase, lai parwabelenge kudra ki ngiatatwalebe ku umawmase.”

Maelaela ki ngiakathaithariri ka umawmase

(Maruku 12.40; Luka 11.39-42, 44, 52; 20.47)

13“Kunumi ka sakaredelane ka ngiakathaithaithariri ka latarabulrubulru ki Sisiu si la swa Palrisai lri kipadradresenge numi ku amatikurwane! Kunumi pia cucubungu numi ki laumawmase elebe ku lrawlrawdru ki kuni belenge, kai numi apia mudaane, la kai numi pawdaane kudra ki apia mudaane ku umawmase!#23.13 Yakai ku sidrumane ka hungu ku wadrima kai mwasaka 14 ka vaga “Kunumi ka ngiakathaithaitharirane ka tarabulrubulru ki Sisiu si swa Palrisai lri sulisinga numi! Kunumi paasipunu numi ki walibakane ka ababai, ravase ku tacekecekelane lini, la ikai numi cucubungu ki umawmase tulragi inulrinulri, lakamani lri tara kipakilringau ku akipathavungane numi!” (Drela ki Maruku 12.40; Luka 20.47.)

15“Kunumi ka sakaredele ka ngiakathaithaithariri ka latarabulrubulru ki Sisiu si swa Palrisai lri kimwa numi ku amatikurwane! Pakai numi ku akawrivane ki tangeea ka umawmase si pakisusu, la kai numi taulra ku akatwasane salraelre mwinu kidruanga, kudra lu tupapalranga, la alra numi darepe iniane ka malilisi turamuru ku akipathavungane ikai swadriadringi.

16“Kunumi ka sakaredele ka wailililuku ka lamukimukici lri kimwa numi ku amatikurwane! Amia numi kai, ‘Alaiyasi ikai ku umawmase ku papia ki daane ki Twaumase kiketekete, kikai niketeketane lri dulru madu kai paasipi; alaiyasi kwini lasu la papia ki yadaane ki daane ki Twaumase ka kingi kiketekete, lri tara paluludu.’ 17Kunumi ka langanganga ka maru ngumamacaanenga! Makuciacingalre ku kingi? Makuciacingalre kudra amani ku waalra ki kingi tusaniange pikai ki daane ki Twaumase? 18La iyana numi kai, ‘Alaiyasi ikai ku umawmase ku papia ki tapatarumaramarane ki Twaumase kiketekete, lri dulru kai paasipi; alaiyasi kwini lasu la papia ki yabelenge ki tapatarumaramarane ki Twaumase ka sapatarumarane ka lamanemane kiketekete, lri tara paluuludu.’ 19Kunumi ka sakaredele ka la maru ngumamacaanenga! Makuciacingalre ku sapatarumarane ku lamanemane? Makuciacingalre kudra tapatarumaramarane ki Twaumase ku twasaniange ki sapatarumarane ka lamanemane? 20Thingala, ku umawmase lu papia ki tapatarumaramarane ki Twaumase kiketekete papianga ki tapatarumaramarane ki Twaumase si kwidra yakai belenge ka sapatarumarane ka lamanemane kiketekete; 21ku papia ki daane ki Twaumase kiketekete papianga ki daane ki Twaumase si yakai adringi ka Twaumase kiketekete; 22Ku papia subelebelenge kiketekete papianga ki taetalane ki Twaumase si wanene ikai subelebelenge ka Twaumase kiketekete.

23“Kunumi ka sakaredelane ka ngiakathaithaithariri ka latarabulrubulru ki Sisiu si la swa Palrisai lri kipadradresenge numi ku amatikurwane! Adravane kudra saarakaikaiyane pasangulreme ki akaneane, maru athape, madradrau ka lalikange, titikiane ka lalikange wamalra numi patarumara tuziwbunuici baai ki Twaumase, ai ikai ki hulrice kapatengatengane ka makucingalre ka sabulrwane, maru dringelresane, thalradhane, patengatengane, kilakikai wabalre numi kai paluludu. Kilakikai makucingalre ka sabulrwane ala amani ku lrika atara pangimiane numi, kudra drumanenga, la mialri madha tudrekase. 24Tarailililuku ka lamukimukici, patwalai numi ki awngulane kirarakete silape ku thalikatangetangelre, ai waalra numi lrede pubarangane ku vaeva ka lrakeda!

25“Kunumi ka sakaredelane ka ngiakathaithaithariri ka latarabulrubulru ki Sisiu si la swa Palrisai lri kipadradresenge numi ku amatikurwane! Waalra numi sinau pakabuula ku belenge ki lakupu si usara, ai ku adringi swaeete ku ravane si apangilralraingane ki kinawmasane. 26Mukimukici ka swa Palrisai! Paswala sinau bula ku adringi ki kupu, ku belenge lri kabulanga.

27“Kunumi ka sakaredelane ka ngiakathaithaithariri ka latarabulrubulru ki Sisiu si la swa Palrisai lri kipadradresenge numi ku amatikurwane! Maru amaaninga numi kudra nipaderavane ka tadralredralrekane, ku belenge mathariri lu drelane, ai ku adringi culrale ki wapacai ka umawmase si maburau ka lamanemane. 28Thadaalrane, lu drelane numiane mapapedrenge ulecege, ai swaete adringi ki kidremedreme ku ngikathaithaitharirane si ngialisiane.”

Wayugingi ku lrika akipathavungane lini

(Luka 11.47-51)

29“Kunumi ka sakaredelane ka ngiakathaithaithariri ka latarabulrubulru ki Sisiu si la swa Palrisai lri kipadradresenge numi ku amatikurwane! Pasiakai numi ki layuginsia tutadralredralrekane, si pasikai ki lamwalecege pudriadringai ku tadralredralrekane, 30si la iya kai, ‘Alaiyasi panianiaketa ikai ki zidai ki cucungulaneta, nai kaita pakela ku ngialrau liniane pia kwidra papacai ki yuginsia.’ 31Lumia kikai ngiapapelaelanga numi ka amani numi ku mwabaibalrithi kudra ki papacai ki yuginsia ka laumawmase! 32Lu pia kudra nau pia iya numi, lu katwasa tulrepenge ku matiangeangane ku ngikarakacanane ki cucungulane numi! 33Siduduku ka sulrau si mwabaibalrithi ki siduduku ka sulrau, lri tumane numi ubere ku sapathavungane ki swakai swadriadringi? 34Kunumi kilalra, lri sikawlaku ki layuginsia, ki malrigili, si tarabulrubulru mwa numiane kai, yakai ku lri kipapacai numiane, yakai ku lri kikedrekedre pwa ki ziwzika, yakai ku lri ikai ki rarubwane ki swa Yuda numi ka swa Yuda kilrumai, lri twalai ki taingeane si kipakatwase mwa ki taingeane. 35Miyaiya kai, kudra akipathavungane ki sanaka papaacai vutha lri makakai ki kinawmasane numi, kamani ku twalai ki kadrwa ku pasalrivane ka Abele, pakeela ku taikaiyane numi ki daane ki Twaumase si tapatarumaramarane ki Twaumase ikai kabicelrakane kipapacai ku Zakaria ka lalake ki Berekia ka kiame ka erai. 36Nau pudriadriingai pelaela numiane, kikai sapathavungane lri papia kai ki zidai kai ki umawmase patueelre.”

Pasiakai ki Yerusalrime tubi

(Luka 13.34-35)

37“Swa Yerusalrime, swa Yerusalrime, papacaisu ki layuginsia, la arakaisu ku lrenege papacai ku sikawlu ki Twaumase ku nisikawlane mwa muswane kikai! Kingipialenga naku nau palribulu iya ki lalalakesu, mia ki tina ka kuka ka waalra sarubu ki lakiakiau pilebe ki sapakepake. Ai kai numi mwabangalre! 38Drela, ku daane ki Twaumase numi lri kadrwa ku umawmase ku yakaikai matiisepele aubulane. 39Nau pelaela numiane, twalai kaikameane kai numi lri drelenga nakwane, pakeela ku aiyane numi kai, ‘Ku Twaumase ani subulrubulru kudra ki pangwakai ku nagane ki Tamatama si kela!’ ”

Currently Selected:

Matai 23: NDV

Highlight

Copy

Compare