Matai 22

Ngiakanekaneane ki marudrarudrange ka pathalrilriku

(Luka 14.15-24)

1Ku Yesu la peelanga arakai ku pathalrilriku iya kai liniane, 2“Kai kuni subelebelenge maru amaaninga kudra tangea ka talialalai ka pasiakai ki akarudrangane ki lalakeini padulru ku angiakaneanane. 3Kwi lasu la sikawlu ki lasasiakawlu pakatwase pakisamula kudra ki nidawlane ku badhabadha ku akelane kipaelre ngiakaneane ki marudrawdrange, ai kwini lalasu kai mwabangalre kainganai. 4Kwi lasu la peelanga sikawlu ku drumane ku sasiakawlu pakatwase, si cunu liniane ku apelaelane lini ki badhabadha iya kai, ‘Kai apangiakaneananeli nipadulrwanenga, la ka niculwanenga kai sawvalai ka lwange si la tariicucuru ka waudriwdripi, nipadulrwanenga patuelre, bwala kela kipaelre ngiakaneane.’ 5Ai, kwini lanidawlane ku badhabadha la kai tuthengete, maupupupungu ku awngane lini sikakathane: Ku tangea matwase ngudalrane, ku tangea matwase drele ku siwbaini. 6Kudra drumane la ruthuku kwini ki lasasiakawlu, si lrumai tatetere, la papacai liniane. 7Kwini talialalai la kalisi turamuru, si pakatwase ku kwapingi papacai kwini ki latanganganga, la lama ki cekele lini. 8Kwini lasu ala kirimu iya kai ki sasiakawlu, ‘Kai angiakaneanane maka padulrunga naku, ai kudra nipaswalane dawlu ku laumawmase kai swadalepenga kisupilri. 9Kaiasasane lu mwa kadalranane ki cekele, ku kipadradresenge numi ku umawmase la dawla liniane pakainganai ngiakaneane.’ ” 10Lakamani ku lasasiakawlu la katwase mwa kadalranane ki cekele, ku dreele lini ku umawmase, kai susu ka mathariri ka manganga ka umawmase wa dawlu patueelre, la suete nene ku labadhabadha kwini ki ngiakaneane ki takarudrarudrangane.

11“Ku talialalai sa kainganai kikawriva ki badhabadha, la drele ku tangeea ku kai ngiaragelane, 12la kivaga iniane iya kai, ‘Talragi, ku takelanesu mwa kikai asu kai ngiragelane?’ Kwini umawmase la kai tubalre ku naniakuvalanenga. 13Ku talialalai la kawriva ki sasiakawlu iya kai, ‘Alra kerenga kwini alrima si drapaleini, la cilri pulatadre kadradridrimitane. Ikai kwini, kwi lasu lri tubitubi, si apararitaitaiti.’ ”

14Ku bibiilrilinga, ku Yesu amia kai, “Ku kiadawlu ku umawmase takaalra, ai ku nipilriane ku umawmase tabeekele!”

Patharwakai ki wakazilu baai ki tinuhika ki swa Ruma ka mundai

(Maruku 12.13-17; Luka 20.20-26)

15Ku swa Palrisai matwase, si madrekadrekase ku lrika apangimiane patwalai ki vaga ki Yesu kidringai ku atakaiyane tulisi iniane. 16Kwi lalasu siakawlu ki lasitu lini, si madredresenge kielrelreane ki la swa Hiruditu si katwase kikawriva ki Yesu, si kivaga iniane, “Sinsi, wathingale nai amanisu ku twakapatengatengane ka umawmase; kai tuthengete ku takidremedremane ki umawmase, tara pangiamiyasu ku vaga ki Twaumase si bulru ki umawmase, asi lwiyane kaisu wadrele ku tangimiane ki umawmase. 17Ala pelaela naiane ku kidremedremesu, lu kazilwane baai ki tinuhika ki swa Ruma#22.17 “tinuhika ki swa Ruma” ku pacase ki Gurike yai, “Kaisare” amia, kaika nagane ki umawmase. kaika wabaebalrenga ki hulriceta?”

18Ku Yesu wathingale ka ngialisiane ku takidremedremane lini, la iya kai, “Tara ngikathaithaithariri ka umawmase, anu kisanu tulisiliisi nakwane? 19Malra ku vaeva ku sarakaikaiyane kazilu ka paisu padrele nakwane!”

Kwi lalasu la baai iniane ku vaeva ku paisu. 20Ku Yesu la kivaga liniane, “Kikai belenge kai nituumawmasane si kai nagane aneanane?”

21La tubalre kwini lalasu, “Tinuhika ki swa Rumane” iya.

Lakamani ku Yesu iya kai liniane, “Lakamani ku tinuhika ki swa Rumane ku lamanemane baadha ki tinuhika ki swa Ruma, ku lamanemane ki Twaumase la baadha ki Twaumase.”

22Kwini lalasu sa kilalra kai vaga, la kasamaali turamuru, la kidaili iniane si katuasenga.

Patharwakai ki siela panianiake ka mundai

(Maruku 12.18-27; Luka 20.27-40)

23Thadaalrane ka vai, la ikai kudra kai masalru ku patharwakai ki wapacai si siela panianiake ka la swa Sadukise kaiyanganai kikawriva ki Yesu, la kivaga iniane iya kai, 24“Sinsi, ku Musi wabulru naiane, yakai ku tangea ku wapacainga ku umawmase, la kakadrwa ku lalake, ku agini la musururu sitaelrelre ki sakadaneini, lri pasikai ki takaini tulalake ku lri ucungulu. 25Kunadruma, ikai naiane yakai ku tapitu ku lamatakataka ka lasawvalai, ku takataakanga la karudrange, si pacai, ka kadrwa ku lalake, la suru kwini ki walibakane baai ki agini; 26ku mwasaka drusa, mwasaka tulru laka miyaiya kikai, pakeela ki mwasaka pitu, maramaraamau ku tangimiane. 27Ku bibiilrilinga, kwini alisu la mialri pacai. 28Nai kivaga, Sanaka siataelrelrenga iniane kwini lalasu, ikai ki tasielane ka vai, kwini alisu lai lrika taelrelre ki aneane? Kwini lalasu marudrangenga mwa iniane makanaelre!”

29Ku Yesu la tubalre liniane, “Pasalriu numi! Kai numi pwalringalringau ki Sisiu, la kai numi thingale ku puku ki Twaumase. 30Ikai ki tasielane panianiake ki wapacai ku umawmase, kwini lalasu lri mia ki sasiakawlu ka belenge, kai lri karudrangenga kai lri kitharevenga. 31Pangukai ki siaelane panianiake ku wapacainga, kai numi sialrigwana ku pelaela numiane ki Twaumase ku vaga? 32Amia kai ku Twaumase, ‘Amaniaku ku Twaumase ki Aberahame, Twaumase ki Isake, Twaumase ki Yakubu.’ Ku pacugane kikai amia kai, ku Twaumase yai Twaumase ki panianianiake ka umawmase, kaika Twaumase ki wapacai ka umawmase.”

33Ku mapapangale sa kilalra kikai miyaiya kai ka sabulrwane, masamali turamuru.

Madraadrawnga ka padradrekase

(Maruku 12.28-34; Luka 10.25-28)

34Ku swa Palrisai sa kilalra ki Yesu ka pakametemete ku ngudui ki swa Sadukise, kiarimu yelrelre irubu. 35Ikai kwini la ikai ku tangeea ku tarabulrubulru ki hulrice ku kiasanu arakai ku taingeane ka mundai tulisi ki Yesu. 36Kwini lasu la kivaga iniane iya kai, “Sinsi, ikai ki hulrice ki Musi, laka mwasakapia ku padradrekase ku makuciaciingalrenga?”

37Ku Yesu la iya kai, “ ‘Kusu arakaiya patueelre ku takidremedremanesu, ku kalithanesu, ku lrigilanesu kilibake ki Tamatama ka Twaumasesu.’ 38Amani kai kudra aswalaalanga ka makuciaciingalrenga ka padradrekase. 39Ku mwasakadrusa la ka mialri kakucingalre, ‘Kusu kialibake madu ki pasiagiagisi, mia lu ngikakilibaakane.’ 40Ku hulrice ki Musi patueelre si sabulrwane ki yuginsia siatangadrane patueelre kai ki drusa ka padradrekase.”

Patharwakai ki Kirisitu

(Maruku 12.35-37; Luka 20.41-44)

41Ku swa Palrisai sa irubu taelre, kiavaga ku Yesu liniane iya kai, 42“Ngitwatumane ku tadrelane numi ki Kirisitu? Kwi lasu mwabaibalrithi ki aneane?”

Kwini lalasu la tubalre iya kai, “Kwi lasu mwabaibalrithi ki Davidi.”

43Ku Yesu la iya kai, “Ku Siri ani kandu ki Davidi ‘Tamatama’ iya iniane? Amia kai ku Davidi:

44Ku Tamatama amia kai ki Tamatamali:

Nenea ikai ki tali vanaleli,

si ukalava nakwane ku lrika amalebeane ki badhasu ikai tailebeane ki drapalesu.

45Alaiyasi ku Davidi la pasudalepe iniane ka ‘Tamatama’, ku Kirisitu ara kiriimu ka mwabaibalrithi ki Davidi?”

46Laka kadrwa ku umawmase ku wadulru akuvale tubalre ku kivagavaga ki Yesu. Twalainga kwini ki vai, kadruanga ku umawmase ku wathuru peela kivaga iniane ku makucingalre ku mundai.

Currently Selected:

Matai 22: NDV

Highlight

Copy

Compare