Matai 15
15
Kakwakudhane ki cucungulane
(Maruku 7.1-13)
1Yakai ku tapiya ku swa Palrisai si tarabulrubulru ki Sisiu twalai Yerusalrime kainganai kikawriva ki Yesu, la kivaga iniane iya kai, 2“Kai lasitusu ani kai paluludu ku kakudhane ki cucungulaneta? Sa lri kane kwidra kai wasusu ku tinukakudhane paswalana tawlrima!”
3Ku Yesu la tubalre, “Anu ngwalai ku apaluludane ki nakakwakudhane, si baebalre ku padradrekase ki Twaumase kamani? 4Ku Twaumase kawariva, ‘Musakena ki tamasu si tinasu’; la iyana kai, ‘Ku wapusu kaelaela ki tamaini si tinaini, lri kipathavungu kipapacai.’ 5La iyalringa numi kikai, alaiyasi ikai ku umawmase ku amia kai ki marudrawdrange, ‘Wamalranga naku ku salapwane numiane ku lamanemane tusapatarumarane baai ki Twaumase’, 6kwi lasu lri kai katumanenga kai musakene ki marudrawdrange. Wamalra numi ku sidrwadrumane ka kakwakudhane si amudu ku vaga ki Twaumase. 7Kunumi ka langiakathaithaitharirane ka laumawmase, ku Isaiya ku tapapiane numiane yugingi pacengecenge turamuru! Kwi lasu amia kai:
Ku Twaumase amia kai:
8Kikai mapapangale arakai ku bibiane lini musakene nakwane;
ai ku kidremedreme lini wadailinga nakwane.
9Kai lalasu kiariimulringa alra ku nitukakudhanane ki umawmase si drekaseini iya nakwane;
kai lalasu lu sukubu nakwane kadrwanga ku palululudane!”
Ku lri pakakudrulru ki umawmase ka lamanemane
(Maruku 7.14-23)
10Ku Yesu la sarubu ki mapapangale pucucubungu iniane, si iya kai liniane, “Kunumi kilalra, si pulringalringava! 11Kudra twalai ki ngudui ki umawmase mwadringi ku lamanemane kai lri pakakudrulru ki umawmase; ala kudra twalai ki ngudui ki umawmase ngibwale ala amani ku lri pakakudrulru ki umawmase.”
12Sakabilrilinga ku lasitu peaelaela ki Yesu iya kai, “Ku swa Palrisai sa kilalra kai vagasu, kai palraingi, wathingalesu?”
13La tubalre ku Yesu iya kai, “Sanaka kaika lredreke ki Ama ku lawacebecebe lri tara akucu patala baalace. 14Madha thethengete liniane! Kwi lalasu amaninga kudra mukimukici ka wasangililuku; ku mukimukici yai kiasangililuku ki mukimukici, kwini tadrusa lri tara mwadreke mucilri mulrubangane.”
15Ku Pitiru la iya kai, “Ala lalrwadha naiane ku pacugane kikai pathalrilriku.”
16Ku Yesu la iya kai, “Kunumi pakelanga kaikameane mararamau numi ki palrapalra ka kai pulringalringau? 17Bekace numi kai thingale, ki maneemanenga ku ngwakai ki ngudui ki umawmase mwadringi ku lamanemane, mwabarangane si la pakatwase? 18Ai kudra twalai ki ngudui ngibwale twalai ki kidremedreme, kwini ala amani kudra lri kai paalrivilrivi ki umawmase. 19Asi lwiyane ku twalai ki kidremedreme ki umawmase kainganai, makaelaela ku ngilisianane ku takidremedremane; kilakikai ngialisiane ka takidremedremane lri papasalriu iniane ki papacai, ki pasalriu ki sawvalai ki ababai, ki padralra, ki kwaupa, ki draedrangelre siwmi, ki twalilisi. 20Ki kikai patuelre ala amani ku patengane ka kai pakabula ki umawmase. Ala kwidra kai paswalana tawlrima si kane ku aga ki kwini kai ka lri pakabula ki umawmase.”
Salrwane ki tangea ka ababai
(Maruku 7.24-30)
21Ku Yesu la katwase kwini, si mwa kwini ki ngwadadethe ki Tayre si Sidune ka cekele. 22Ku swakai kwini ka tangea ka swa Kanange ka ababai la kainganai drele ki Yesu, si tawtau iya kai, “Tamatama, ka Lalake ki Davidi, kakurwaili! Ku lalakeli ka ababai kiaikai ki aidridringane, la kipakwalrialri kiangeange turamuru!”
23Ku Yesu la kai tubalre ku niakuvalane. Ku lasitu la kainganai kitubi iniane iya kai, “Pakatwasa kai ki ababai! Mabibibilrili mitane, si takutawtawtau!”
24Ku Yesu la tubalre iya kai, “Kiasikawlaku mwa ki swa Iseraylri silape ku amuli ku kiu sikakathane.”
25Kwini ababai sa kilalra kikai vaga, la pidruru icucubungu ki Yesu, si iya kai, “Tamatama, paralubaili!”
26Ku Yesu la tubalre iya kai, “Lu malrane ku akaneane ki vavalake si baai pakane ki kukulu ka tawpungu kai pacengecenge.”
27Kwini ababai la iya kai, “Unu, Tamatama, ai ku kukulu ka tawpungu wakaane ku pawcilri ki tawki twalai ki cukui ku dukace!”
28Ala iya kai ku Yesu, “Ababai, ala maadrau kwi salrwanesu! Singikai ku urikaisu, si baai pakitulrepenge muswane!” Ku lalakeini ka ababai la udriingainga ikai kwini ki zikange.
Pawadringai ki lacaemane
29Ku Yesu matwase kwini, si kainganai mwa babiabila ki Galrilri ka baiyu. Ku Yesu la mulregelrege, si nene ikai kwini. 30Ku lamapapangale la kainganai silape iniane, si mailuku ku pilapilai, mukimukici, ku kai kiatulrepenge ku takaumawmasane, menemenene, si takaalra ku macaeme ku drumane ka caemane, la sarare pikai cucubungu ki drapale ki Yesu; ku Yesu la pawdringai liniane makanaelre. 31Kwini lamapapangale sadrele sa kawrivanga ku menemenene, siwlrianenga ku kai kiatulrepenge ku takaumawmasane, dadavacenga ku pilapilai, drelenga ku mukimukici, la makitu kasamali turamuru, si mialri drengedrengere ki Twaumase ki swa Iseraylri makanaelre.
Wapakane pakabucuku ki ta 4,000 ku umawmase
(Maruku 8.1-10)
32Ku Yesu la dawlu ki lasitu, si iya kai liniane, “Twakalithanaku kai ki laumawmase, kwi lalasu makatulrulunga ku tatupapalrane nakwane, kai asasane la kakadrwa ku akaneane, kainaku palraingi ku apakasilravane liniane pakatwase, amani lu tubakebake ikadalranane.”
33Ku lasitu la kawriva, “Ikai kai ki tadailane ki lacekele, lri muinu nai makakidringai ku amukesane ku akaneane si pakabucuku kai ki takalra ka laumawmase?”
34Ku Yesu la kivaga liniane, “Thaininu ku pikai numi ku pange?”
Kwi lalasu la tubalre, “pitu kai pange si luka piya kai tatitiki ka kange.”
35Ku Yesu la cunu panenea ki laumawmase, 36la malra kwini pitu ka pange si luka piya ka tatiitiki ka lakange, si kiaseasene ki Twaumase, la apapipithingi, si baai ki lasitu; ku lasitu ala apavalavala baai ki mapapangale. 37La kanenga makanaelre, si kabucukunga. Ku lasitu la sarubu ku lapapithipithingane ka tedrane, la pasuete ki akupitu ka karadrare. 38Ku mabucuku, kai paelre ki labaibai si lavavalake, ta 4,000 ku laumawmase.
39Ku Yesu ala pasawvagavagai ki mapapangale, si mubelenge ki varukuru, katwase papia tali kai Magadane.
Currently Selected:
Matai 15: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
