Matai 14

Tapacadhane ki tarapabanau ka Yuhani

(Maruku 6.14-29; Luka 9.7-9)

1Sakamani kwidra, ku Hirudi ka talialalai ki swa Galrilri kialalra ku ngwakai ki Yesu, 2la iya kai ki lakiacapili, “Kikai umawmase amani kudra tarapabanau ka Yuhani ka siaela panianiake, alakamani ku ikai ku puku pia ku pinangu Twaumasane ka puku.”

3Ku pathagilane, ku Hirudi ngwalai ki Hirudia ka taelrelre ki betakaneini ka Pilripi si drekase pwalra ki Yuhani iya, la kerenge iniane si emenge putaememengane. 4Asi lwiyane ku Yuhani kingikalrale kaelaela ki Hirudi iya kai, “Lri kaisu maka sitaelrelre ki Hirudia!” 5Ku Hirudi la kisanu papacai iniane, ai makiwcu ki laumawmase, asi lwiyane kwi laumawmase lu kidremedreme yuginsia amia ki Yuhani.

6Saka takitulalakane ki Hirudi ku vai, ku lalake ki Hirudia ka ababai la ikai cucubungu ki labadhabadha dralradralrai, la kikiragai ki Hirudi turamuru. 7Ku Hirudi la kiketekete kwini ki alisu iya kai, “Adravane kitubisu ku manemane, lri tara baadhaku muswane.”

8Kwini lalake ka ababai kiacunu ki tinaini, si kitubi iya kai, “Makakaiya alra ku awlru ki tarapabanau ka Yuhani si pikai ki usara baai nakwane!”

9Ku talialalai la kwalri kidremedreme turamuru, ai kudra yakainga cucubungu ki badhabadha kiketekete, la kiriimunga drekase singikai ku takitubiane kwini ki alisu si baai iniane. 10Ngwalai kikai ku Hirudi la sikawlu ki umawmase katwase mutaememengane, si vathale ku awlru ki Yuhani, 11la pikai ki usara, si baai ki lalake ki Hirudia; kwini alisu la baai ki tinaini. 12Ku lasitu ki Yuhani la kela, malra kwini kinawmasane katwase, si dralreke, ala pelaela ki Yesu ku tangimiane.

Pakabucuku ki ta 5,000 ka umawmase

(Maruku 6.30-44; Luka 9.10-17; Yuhani 6.1-14)

13Ku Yesu sa kilalra kikai, matwase ubelenge ki varukuru, si tarungeangea mwa ki lrilringulu. Ku lamapapangale la thingale, si twalai ki lacekele dadavace tupapalra iniane. 14Ku Yesu la ukameamealane si drele kai ki laumawmase, la kirimu kakuru liniane, si pawdringai ku caemane lini.

15Saka miauawbunga, ku lasitu la kela kikawriva ki Yesu, si iya kai iniane, “Maungunga, la ikaita ki ta adailane ki lacekele kikai, ala pasawvagavagadha ki laumawmase, lani ngikakamani katwase mwa ki ngwadadethe ki cekele si langai ku akaneane.”

16Ku Yesu la tubalre iya kai, “Madha pasawvagavagai liniane, kunumi pakana liniane.”

17Kai lasitu la iya kai, “Kai yakai naiane kai lrialriima kai pange laka drwadrusa kai kange.”

18Ku Yesu la iya kai, “Ta baadhaili.” 19Ala kawriva ki mapapangale si panene, ala malra kwini lrima ka pange si drusa ka kange, la drele paswabelenge, si kiaseasene ki Twaumase, ala apapipithingi kwini pange, si baai apavalavala ki lasitu, ku lasitu la baai ki mapapangale. 20La kane makanaelre, si kabucukunga. Ku lasitu la malra sarubu ku la tedrane ka la papithipithingane, la pasuete ki 12 ka karadrare. 21Ku wakane ku umawmase, kai paelre ki labaibai si lavavalake, lri ikai ku ta 5,000 ku umawmase.

Ku Yesu ngwababelenge ki acilai dadavace

(Maruku 6.45-52; Yuhani 6.15-21)

22Sangilribatenga kwini, ku Yesu pakaracange ki lasitu paubelenge ki varukuru, si paswalala talubalre mubalrealreanane, la pasawvagavagadhana ki mapapangale. 23Ku mapapangale sa mawvagavagainga, ku Yesu la tarungeangea mulregelrege inulri; pakela sakamaungu la asurwana ikai kwini. 24Ikai kikai, kudra varukuru wadailinga kameamealane, la kipadradresenge ki valrigi, si bikabiki. 25Sa lri padalrunga si kaliare, ku Yesu la ikai belenge ki baiyu dadadavace, papiapia ki lasituini. 26Ku lasitu sadrele iniane sa ibelenge ki laveke dadadavace, la kakiwcu turamuru, si iya kai, “Galrale!” Kwi lalasu la karaleale ki kiwcane lini.

27Ku Yesu la makakai iya kai liniane, “Madha mukuludru, amaniaku!”

28Ku Pitiru la iya kai, “Tamatama, alaiyasi ka amanisu, padadavacaili pangubabelenge ki acilai, mwa muswane kwini!”

29Ku Yesu la iya kai, “Bwala!” Ku Pitiru la twalai ki varukuru ulebe, si dadavace ibelenge ki acilai papia ki Yesu. 30Ai sadrele ki valrigi sa pakilringalringau makiwcu ku kidremedreme, ala murenere, la karaleale iya kai, “Tamatama, palribulaili!”

31Ku Yesu la makakai taale ku alrimaini si bilibili iniane, si iya kai, “Aningithanga ka tikiyane kai salrwanesu, asi kalrikiilriki?”

32Ku Yesu si Pitiru sa mubelengenga ki varukuru, la idrengere ku valrigi. 33Ku yabelenge ki varukuru ku lasitu la sukubu iniane, si iya kai, “Patengatenganelringasu ka Lalake ki Twaumase.”

Ku Yesu yakai Genisarete pawdringai ki macaeme

(Maruku 6.53-56)

34Kwi lalasu matwase talubalre ki baiyu, la ikai Genisarete ubila mukameamealane. 35Kwi swakai kwini ku laumawmase makakaai thingale ala ka Yesu, la sikawlu ki umawmase, si mwa malra iluku ku ngwadadethe kwini ku lamacaeme pucucubungu ki Yesu. 36Kwi lalasu la kitubi ki Yesu ku akirecengane ki lamacaeme pababiabila ki sapakabelebelengane ki laimaini; sanaka kiarecenge ku laumawmase mwadriingai makanaelre.

Currently Selected:

Matai 14: NDV

Highlight

Copy

Compare