Matai 12

Patharukai ki Taisadrasadrane ka vai

(Maruku 2.23-28; Luka 6.1-5)

1Kaina tarathainu ku tangilribatane, saka Taisadrasadrane ka vai, ku Yesu walribalribate ki mamugimugi. Ku situini la kasilrawnga, la kirimu theredre ku madru ki mugi si kane. 2La ikai ku la swa Palrisai ku wadrele, si iya kai ki Yesu, “Drela, ka situsu paiya ku kaika pinalraingane pia ikai ki Taisadrasadrane ka vai!”

3Ku Yesu la tubalre iya kai: “Ku Davidi si kudra latwapapapalra iniane sa mubaisi yai watumane, kai numi sialrigwana? 4Kwini lasu la mudaane ki daane ki Twaumase, kwi lasu si kudra twapapalra iniane wakane ku nipatarumaranenga ki Twaumase ku pange, ki kwini pasalriu ki tinukakudhanane (asi lwiyane kwini pange kathane ku barakalai ku lri maka dulru kane). 5Bekace numi kaina silrigu ku pinacasane ku hulrice ki Musi? Luka Taisadrasadrane ka vai, ku barakalai ikai ki daane ki Twaumase mabebetethe ku kakudhane ki Taisadrasadrane ka vai, ai kai lalasu kai kiatupasalrivane. 6Nau pelaela numiane, kikai yai yakai kai silrialribate ka makuciacingalre ki daane ki Twaumase. 7Amia kai ku Sisiu, ‘Ku urikaili yai thalradhane, kaika sapatarumarane ka waudriwdripi.’ Alaiyasi ka patengatengane numi thingale ku pacugane kikai vaga, lri kainu tupasalrivane capange ki umawmase. 8Asi lwiyane kai Lalake ki Umawmase amani kudra Tamatama ki Taisadrasadrane ka vai.”

Pawadringai ki malrunai ka alrima

(Maruku 3.1-6; Luka 6.6-11)

9Ku Yesu matwase kwini, si mwa ki rarubwane ki swa Yuda. 10Ikai kwini la ikai ku tangea ku umawmase, malrunai ku vaeva ku alrimaini. La ikai ku laumawmase ku kiasanu silasilape ku tapasalrivane ki Yesu, la kivaga ki Yesu iya kai, “Lu ikaiyane ki Taisadrasadrane ka vai pawdringai ki macaeme kaika wabalrenga ki kakudhane?”

11Ku Yesu la tubalre, “Alaiyasi ikai numiane la ikai ku savaeva ku kiuini, kwini kiu la ikai ki Taisadrasadrane ka vai tuverevere mwa ki lrubange, la nai tumane numi? Kwini lasu kai lri mialri bilibili patamau kwini ki kiu? 12Kai umawmase makuciacingalre ki kiu turaamuru! Lakamani, ikai ki Taisadrasadrane ka vai pia ku mathariri ka awngane amani ku nipalraingane ki hulrice.” 13Lakamani, Ku Yesu la iya kai kwini ki lasu, “Sega kwi alrimasu!”

Kwi lasu sasege ku alrima, la mudringainga kwini alrima, si mararaamawnga kwini ki thili ka alrima. 14Ku swa Palrisai la katwase ulatadre, si kidremedreme ku lrika apangimiane kiecebe ki Yesu, si ku apapacadhane iniane.

Pilri ki Twaumase ka sasiakawlu

15Ku Yesu sa kilalra ki kwini, la katwase kwini, la takaalra ku laumawmase ku twapapapalra iniane. Ku Yesu la pawdringainga ki lacaemane lini, 16La cunu liniane madha pasarasarau kikai iya. 17Kikai ngiamianga ku taiyane kai ki yuginsia ka Isaiya:

18Drela, kwi lasu pilrili ka sasiakawluli;

madalamaku iniane, kiaragadhaku iniane.

Lri baadhaku kai Rili iniane;

kwini lasu lri papia ki sanaka umawmase pelaela ku asaibanganeli.

19Kai kiadrikidrikisi ku vaga, kai akwadradrau kawriva,

la kai ikaikai kadalranane ki maadrau ka cekele karaleale.

20Kwini lasu kai pakiasalru celra kudra ki macelraceelranga ka tirivu;

la kai pakisalru edrepe ku kiasanu kaedreedrepenga ku apwi.

Lri keceengane pasikai ki dringelresane,

pakeela ku asabelengane ki dringelresane.

21Kai kiacaebe subelebelenge kai laumawmase,

lri pikai iniane ku sasiadradrama lini!

Yesu si Belezebulu

(Maruku 3.20-30; Luka 11.14-23)

22Sakamani kwidra, yakai ku umawmase ku mailuku mucucubungu ki Yesu ku tangea ku kiaikai ki aidridringane si ka mukimukici laka menemenene ka umawmase. Ku Yesu la pawdringai iniane, si dulrunga avavaga kwi lasu, si dulrunga drele. 23Ku lamapapangale la kasamali turamuru, si iya kai, “Alau amani kai lasu kudra Lalake ki Davidi?”

24Ku swa Palrisai sa kilalra kwini vaga la iya kai, “Kudra maka pakatwaseini ki aidridringane, amani sa satalu ki talialalai ki aidridringane ka Belezebulu.”

25Ku Yesu wathingale ka manemane ku kidredredreme lini, la iya kai liniane, “Sanaka kuni lu makalilisi, lri tara turaamuru si sipai; kudra vaeva ka cekele si vaeva ka wacekecekele lu makarivurivu, mialri lri tara kasuuburu kamudu. 26Alaiyasi ku Satange la pakatwase ki Satange, amani kudra makakarivurivu, kudra kunini lai lri tumane dulru maka acegecege? 27Alaiyasi ka satalwaku ki Belezebulu pakatwase ki aidridringane, ala, ku lasitu numi lu pakatwase ki aidridringane laka satalu ki aneane? Ku lasitu numi lrika amani ku patwathingale ala ka pasalriu numi! 28Alaiyasi ka satalwaku ku Ri ki Twaumase pakatwase ki aidridringane, kikai amani ku sapatuthingalane ka yakainga numiane ku Twaumase magagemegeme.

29“Yakai ku umawmase ku wadulru mudaane ki daane ki tamagarange si ravase ku lawbubuluini? Kathane lu paswalana kerenge ki tamagarange lri dulru maka malra ravase kwini ki tacekecekelaneini.

30“Kudra kai kiarederedelane nakwane, amani ku wabaebalre nakwane; ku kai kiaelrelre nakwane; amani kudra wasubusuburu pasawvagavagai. 31Lakamani, nau pelaela numiane, ku pasalriu ki umawmase patuelre si taiyane tulilisi ku vaga patuelre lri dulru kipacepe; ai ku twadreadrekase ki Siri ku umawmase. Kailri maka dulrunga kipacepe. 32Kudra kawariva pasalriu ki Lalake ki Umawmase, lri dulru kipacepe; ai ku twadreadrekase ki Siri, adravane kikai asasane lukabibilrili, kailri maka dulrunga kipacepe.”

Cebe si madru

(Luka 6.43-45)

33“Ku mathariri ku angatu, ku madru mathariri; ku malisi ku angatu, ku madru malisi. Wadulru madu patwalai ki madru si thingale ku mathariri ku malisi ka angatu. 34Kunumi ka lasiduduku ka sulrau, sakwa ngilisiane numi, lri dulru tumane putaluvaivai ku mathariri ku vaga? Asi lwiyane ku yakidremedremane suete, ku ngudwini lri avavaga putaluvaivai. 35Ku mathariri ka umawmase patwalai ku ruburubuini ku mulecegane si putaluvaivai ku tharirane; ku manganga ku umawmase patwalai ku ruburubuini ku malisi si putaluvaivai ku ngilisianane.

36“Nau pelaela numiane, ikai ki tasaibangane ka vai, sanaka aneeane ku kawriarivaini ku vaga lri putaluvaivai patuelre. 37Asi lwiyane, ku Twaumase lri arakai ku vagasu si pelaela tupasalrivane muswane, lai lri arakai ku vagasu pelaela ka kadrwa ku pasalrivanesu.”

Kiatubi ku pinangu Twaumasane ka puku

(Maruku 8.11-12; Luka 11.29-32)

38Sakamani kwidra, yakai ku tapiya ku tarabulrubulru ki Sisiu si la swa Palrisai ku kaiyanganai si iya kai ki Yesu, “Sinsi, ana tuumane la padrele naiane ku pinangu Twaumasane ka puku amia nai muswane.” 39Ku Yesu la iya kai, “Kikai zidai kai umawmase ala ngialisianenga turamuru, ala kai saliakavaeva ku kidremedreme turamuru! Kunumi la kitubitubianana numi nakwane ku apadrelane ku pinangu Twaumasane ka puku! Ini, kathaane ku pinangu Twaumasane ka puku ki yuginsia ka Yuna, kadrwanga ku drumane ku pinangu Twaumasane ka puku ku apadrelane numiane. 40Ku Yuna nayakai adringi ki barange ki maadrau ka kange makatulrulu ku vaiyane si awngane, ku Lalake ki Umawmase lai lri mialri ikai adringi ki dae makatulrulu ku vaiyane si awngane. 41Ikai ki tasaibangane ka vai, ku swa Ninivi lri acegecege si kukusu numiane ka zidai kikai, asi lwiyane kwi lalasu sakilalra ku tabulrwane ki Yuna makakaai cilri ku ngialisiane si ngitatupela. Nau pelaela numiane, kikai yakai kai madradrau ki ngwakai ki Yuna ku awngane. 42Ikai ki tasaibangane ka vai, ku swa tali lrawdru ka ababai ka talialalai lri acegecege si kukusu numiane ki kai zidai kai ka umawmase, asi lwiyane kwini alisu singiadaili turamuru kainganai kilalalra ku thingalane ku vaga ki talialalai ka Sulumungu. Nau pelaela numiane, kikai yakai kai madradrau ki Sulumungu ku awngane!”

Ku aidridringane wakela siwlri

(Luka 11.24-26)

43“Ku aidridringane sa kidailinga kwini ki ikaini ka umawmase, la salraelre dadavace ki takameamealane, si silasilape ku lrika taisadraneini, la kai maka kidringai, 44la iya kai, ‘Lri siwlriwlriaku mwa kudra ki nataikaiyaneli ka daane.’ Sa katwase siwlringa, la drele kwini ki daane ka kadrwana ku manemane, si ka madeemele si kabula ku talripethelane. 45Lakamani kwi aidridringane la katwasenga mulatadre, si kainganai mailuku ku tapitu ka ngiliilisiane iniane ka aidridringane, si ikai taelre iniane. Sakabilrilanenga kwini umawmase laka pakilrialringau ngilisiane kudra ki natangimiamianeini ku paswalala. Kikai ngialisiane ka zidai ka umawmase ku tangimiane laka miyaiya kikai.”

Tina si betakane ki Yesu

(Maruku 3.31-35; Luka 8.19-21)

46Ku Yesu sakikawrivarivana ki laumawmase kwidra, ku tinaini si labetakaneini wakela. La acegecege ikai latadre, kisanu kikawriva iniane. 47La ikai ku umawmase ku peaelaela ki Yesu, “Wi, ka tinasu si betakanesu yalatadre acegecege, kiasanu kikawriva muswane!”

48Ku Yesu la tubalre iya kai, “Aneane ku ina? Aneane ku labetakaneli?” 49La ngibangulu papia ki lasituini si iya kai, “Kunumi drela, kikai laumawmase ala amani ku ina, ku labetakaneli! 50Sanaka pangiamiamia ku takidremedremane ki Ama ka yasubelebelenge, ala amaninga ku betakaneli, ku ina.”

Currently Selected:

Matai 12: NDV

Highlight

Copy

Compare