Matai 11

Ku situ ki tarapabanau ka Yuhani wakela kidrele ki Yesu

(Luka 7.18-35)

1Sa maka pelaelanga kawriva ki ta 12 ki situ ku Yesu, matwase ki kwini, si pacungulu papia ki la ngwadadethe ka lacekele bulrubulru ki umawmase si pelaela ku hukuingi.

2Ku tarapabanau ka Yuhani sa ikai taememengane kialalra ku patharukai ki takaungane ki Kirisitu, la sikawlu ki situini mwa kikawriva ki Yesu, 3si kivaga iniane iya kai, “Amanisu kudra iyaiya ki Yuhani kudra lri kainganai, lrika mwakalavana nai kudra ki maelane ka tangea?”

4Ku Yesu la tubalre iya kai, “Kunumi lu siwlria, kudra kilalra numi kudra drele numi, la pelaela ki Yuhani, 5amani kwidra: ku mamukici wadrelenga, ku mapiapilai wadadavacenga, ku maraibiu la kabulanga, ku macele kialalranga, ku wapacai ku umawmase siaelanga panianiake, ku matiakukuru kialalranga ku hukuingi. 6Kudra kai malrikilriki nakwane ku umawmase ala mwaesai!”

7Ku lasitu ki Yuhani sakatwasenga, ku Yesu la cubungu ki laumawmase matikai ki Yuhani iya kai: “Ku paswalala sa mwa numi calragulragu; si kipasilape ki Yuhani, manemane ku tadrele iya numi? Amani ku adrelane ku tavaivaivalrigane pangivelevele ki tirivu? 8Maneemanelringa kudra pia numi mwa kwini? Amani ku adrelane numi ku sialaimai ku papacasane ka umawmase? Ku sialaimai ku miyaiya kai ku laimai yakai ki daane ki talialalai! 9Ala, laka manemane ku katwase numi drele? Drele ki yuginsia? Unu, ai nau pelaela numiane, kwi lasu silrialribate ka madraadrawana ki yuginsia. 10Kikai lasu ikai ki Sisiu amani kwidra nimatikaiyane kudra tangeea. Amia kai ku Twaumase, ‘Drela! Lri sikawlaku ki sasiakawlu ku aswala muswane; kwi lasu lri pasikai muswane sudalrane.’ 11Nau pudriadriingai pelaela numiane, ikai kawmasane kadrwa ku lrika silrialribate ka sanianiange ki Yuhani ku umawmase, ai ikai ki kuni subelebelenge, kudra tangea ku titikiyanenga lrika silrialribateana ka masanianiange ki Yuhani! 12Twalai ku tapathagilane ki tarapabanau ka Yuhani dindu pakela kaikameane, kai kuni belenge kiakikaruburu turamuru#11.12 “kai kuni belenge kiakikaruburu turamuru” ku wahunyake madu iya kai “kai subelebelenge arwa adiadili”., ku malilisi ku umawmase kiasanu malramalra ribici kwini kuni belenge. 13Pakela ki Yuhani, ku hungu ki yuginsia patueelre si hulrice ki Musi matiakaikai ki kuni subelebelenge; 14alaiyasi ubangalre numi tarumara ku tayugingane lini, ku Yuhani amani kudra lri kela ka Ilria. 15Ku yakai ku calringa, makitu kilalra!

16“Kikai zidai kai umawmase, lri malraku ku manemane si pakiramau? Kwi lalasu mararaamau kudra yakai kadadalranane ki maci kivavavange ka lavavalake, kwini taingeane irurubu la papia ki taingeane irurubu tawtau iya kai, 17‘Lu pasikai nai numiane kulralru ku sakarudrarudrangane ku senai, kai numi wadralrai! Lu senai nai ku sasilringavane ki matiathalithi, la kai numi tubi!’ 18Ku Yuhani sakela, kai wakane kai waungulu, la iya numi kai makanaelre, ‘Ka lasu kiamwa ki aidridringane!’ 19La kela kai Lalake ki Umawmase, la kane la ungulu, la iya numi kai makanaelre, ‘Ka lasu taraungulu ka mapikaekane, ka talragi ki tarakikaziluzilu si manganga ka umawmase!’ Ai, ku lrigilane ki Twaumase twalai ki madru ki lrigilaneini si utaluvaivai.”

Kai masalru ka cekele

(Luka 10.13-15)

20Sakamani kwidra, ku Yesu maelaela kudra ki cekele ku nawadrelenga sa pia ku makaalra ku pinangu Twaumasane ka puku, asi lwiyane kwini la swa talikaiyane kwini ka laumawmase kai ngiatatupelana. 21Ku Yesu la iya kai, “Swa Kerazine, lri kipadradresengesu ku amatikurwane! Swa Bithesaida, lri kipadradresengesu ku amatikurwane! Ku taikaiyaneli numiane si pia ku pinangu Twaumasane ka puku, ana piane ikai ki swa Tayre si swa Sidune, kwi swakai kwini ku laumawmase nai ngikakabungunga ku kaimadhane si ngicacabungunga ku abu, ka sapelaelane kwini ki lalasu ala ka wacilringa ki ngialisiane si papianga ki madringelrese. 22Nau pudriadriingai pelaela numiane, ikai ki tasaibangane ka vai, ku akipathavungane ki swa Tayre si swa Sidune lrika maliapapaiyana ki akipangimiane numi! 23Ala kusu, ka swa Kaperenawme, lri ngitatwabelengesu keela subelebelenge? Lri kipatubakebakesu pulebe mwa swadriadringi! Ku taikaiyaneli numiane kwini pia ku pinangu Twaumasane ku puku, ana piane ikai Sudume, nai tara ikaiyana kaikameane! 24Lakamani, lri pelanaku pelaela numiane, ikai ki tasaibangane ka vai, ku akipathavungane ki swa Sudume lrika maliapapaiyana ki akipangimiane numi!”

Kela mwa nakwane

(Luka 10.21-22)

25Sakamani kwidra, ku Yesu la iya kai, “Ama ka yabelenge, ka Tamatama ki belenge si kawmasane! Kiaseasenaku muswane; asi lwiyane kudra balabalaisu papia ki malrigili, ki yakai ku thingalane ka umawmase, padrelengasu putaluvaivai papia kudra ki la kadrwa ku thingalane ka umawmase. 26Unu, Ama ka yabelenge, kudra takangimiyaiyane kai ku kelretesu patueelre twalai muswane ka mathariri!

27“Ku Ama wabaainga nakwane patueelre. Kathane ku Ama, kadrwa ku umawmase ku wathingale ki Lalake; kathane ku Lalake si kudra palraingi ki Lalake padrele ka umawmase, kadrwa ku umawmase ku wathingale ki Tama.

28“Bwala! Kudra kwalrialrialri makanaelre, ku watukudru ku matelrege ka amece, bwala mwaili kai, lri paisadraku numiane. 29Kunumi lri siamece numi ku tikunguli, si twalralrau nakwane, asi lwiyane masulrapele kai kidremedremeli si ngitatualebe. Lu kangimiyaiya kwini, ala lri dulru numi maka isadra. 30Kai tikunguli maduai angeale; kai ameceli maliapai.”

Currently Selected:

Matai 11: NDV

Highlight

Copy

Compare