Lrivi 4
4
Kakudhane ki Balrithane ki pasalrivane ka lrisi ki kai waranau pasalriu
1Ku Tamatama la drekase ki Musi, 2cunu iniane pelaela ki mapapangale ki swa Iseraylri: Lwiyasi kikai ku umawmase ka kai waranau pasalriu, la balre ku drekase ki Tamatama, lri tara pasusu kikai kakudhane.
3Lwiyasi ka abebeelengenga ki barakalai ka amanini ku pasalriu, la sacepe ki mapapangale, lri tara pakavaeva ku mwadringadringai ku lrulai ka sawvalai ka lwange patarumara ki Tamatama tu Balrithane ki pasalrivane ka lrisi. 4Lri iluku ku lrulai ka sawvalai ka lwange mucucubungu ki Alrivilrivi ka balrawbau, la pubelenge ki awlru ki sapatarumarane, ikai cucubungu ki Tamatama culu. 5Ku abebeelengenga ki barakalai lri malra ku erai ki lrulai ka sawvalai ka lwange, iluku mwadringi ki Alrivilrivi ka balrawbau, 6ara galawgau depe ki erai, si ikai ki makalrilau ki Alrivilrivi ka taikaikaiyane cucubungu paralikiliki kingipitulu, 7ala malra ku erai sakidri pibelenge ki supate ka twalaungu ka piyu ki Alrivilrivi ka balrawbau ara taliane. Lalri malra ku tedrane ku erai iluku mwa ki lrawlrawdru ki alrivilrivi ka balrawbau si gugu pikai tali drapale ki tapatarumaramarane ku Lama ka lrisi. 8Lri patwalai kwini ki Balrithane ki pasalrivane ka lrisi ka lrulai ka sawvalai ka lwange kwini lamace patuelre, paelre ki tali adringi si lamace ki tali adringi, 9drusa ka pede si lamace ki pede si takatharirane ki athai gelregelre, 10la pwa ki tapatarumaramarane ki Lama ka lrisi belenge si lama, mararaamau lu lama ku lamace ki Sulivatane ka lrisi. 11Ai lri malra ku lrangici ki kiu, nguelre ku beate, awlru, vagisi, tali adringi paelre ki buru ki lrulai ka sawvalai ka lwange, 12iluku patuelre mwa ki nitumabulane ka taikaiyane ki lrisi ka latadre ki tasuladhane, kwini amani kudra tacilricilriane ki abu, la pibelenge ki angatu si lama.
13Lwiyasi la kai ranau pasalriu ku mapapangale ki swa Iseraylri, pasalriu ki drekase ki Tamatama, 14lu thingalenga ka yakai ku pasalrivane, ku mapapangale lri tara patarumara ku lrulai ka sawvalai ka lwange tu Balrithane ki pasalrivane ka lrisi. Lri iluku kwini lrulai ka sawvalai ka lwange mucucubungu ki Alrivilrivi ka balrawbau ki Tamatama; 15ku lamarudrange ki mapapangale lri pubelenge ku alrima lini ki awlru ki lrulai ka sawvalai ka lwange, icucubungu ki Tamatama culu. 16Ku abebeelengenga ki barakalai lri malra ku erai ki lrulai ka sawvalai ka lwange, iluku mwadringi ki Alrivilrivi ka balrawbau, 17si arakai ku galawgau depe ku erai, ikai ki makalrilau ki Alrivilrivi ka taikaikaiyane paralikiliki kingipitulu, 18ala malra ku erai si sakidri ki tatulawngane ka piyu ki tapatarumaramarane ki taliane, ala malra ku tedrane ku erai gugu pikai belenge ki tapatarumaramarane ku Lama ka lrisi ka yacucubungu ki Alrivilrivi ka balrawbau. 19Ala lri malra nguelre ku lamace ki lrulai ka sawvalai ka lwange, pubelenge ki tapatarumaramarane lama. 20Lri tuthadalrane ku tapangimiane marasikai ki Balrithane ki pasalrivane ka lrisi ku lrulai ka sawvalai ka lwange si marasikai kwini ki lrulai ka lwange. Ku barakalai lri pangimia kikai tapiane si pasikai ki mapapangale patarumara kikai samupasalrivanane ka sapatarumarane patarumara, kwini lalasu lalri kipacepe ku pasalrivane. 21Ala lri malra kwini lrulai ka sawvalai ka lwange iluku mulatadre si lama, pangimia lu ngipapasikai ki pasalrivaneini patarumara ku lrulai ka sawvalai ka lwange. Kikai nipasikaiyane ki mapapangale patarumara ku Balrithane ki pasalrivane ka lrisi.
22Lwiyasi ku tabebelenge ala pasaalriu si kaika waranau, la pasalriu ki padradrekase ki Tamatama ka Twaumaseini, 23kwi lasu sana thingale ala ka yakai ku pasalrivaneini, lri tara malra ku vaeva ku mwadringadringai ku balase ka kiu tusapatarumarane. 24La lri pubelenge ku alrimaini ki awlru kwini ki kiu, si ikai ki tali dradha ki tapatarumaramarane ka taculuculwane ku apatarumarane ki Lama ka lrisi si culu kwini kiu. Kikai yai Balrithane ki pasalrivane ka lrisi. 25Ku barakalai lri depe ku galaugawini ku erai ki sapatarumarane, la drisisi pwa ki nitulawngane ki tapatarumaramarane ki Lama ka lrisi, ala malra ku tedrane ku erai gugu pwa ki taikaiyane ki tapatarumaramarane. 26Kwini lasu lri pakanaelre kwini lamace ki sawvalai ka kiu pubelenge ki tapatarumaramarane si lama, pangimia lu lama ku lamace ki Sulivatane ka lrisi. Ku barakalai lri pangimia kikai tapangimiamiane si pasikai ki kiacapili patarumara ku Balrithane ki pasalrivane ka lrisi, kwini lasu lai lri kipacepe.
27Lwiyasi ikai ku langumawmase la kaika waranau pasalriu, si pasalriu ku padradrekase ki Tamatama, 28sana pulringau ala ka pasalriu, lri tara patarumara ku vaeva ku mwadringadringai ku tina ka kiu tusapatarumarane. 29Lri tara pubelenge ku alrimaini kwini ki awlru ki sapatarumarane, si ikai ki tali dradha ki tapatarumaramarane ka taculuculwane ku apatarumarane ki Lama ka lrisi si culu kwini kiu, tu Balrithane ki pasalrivane ka lrisi. 30Ku barakalai lri arakai ku galawgau depe ki erai, si drisisi ki nitulawngane ki tapatarumaramarane, la malra ku tedrane ku erai gugu pubelenge ki taikaiyane ki tapatarumaramarane. 31Ala, kwi lasu lri malra kwini lamace ki tina ka kiu patuelre, pangimia ku tapangimianeini ki Sulivatane ka lrisi malra gelregelre. Ku barakalai lri malra demedeme kwini lamace pubelenge ki tapatarumaramarane si lama, pasangulreme ka sapatarumarane patarumara ki Tamatama. Ku barakalai lri arakai kikai kakudhane pasikai ki pasalrivane ki langumawmase patarumara ku Balrithane ki pasalrivane ka lrisi, kwini lasu lri kipacepe.
32Lwiyasi la patarumara ku tikiane ka nikiubawbalane ka kiu tusatulrisiane ka waudriwdripi ki Balrithane ki pasalrivane ka lrisi, kwini lasu lri tara patarumara kudra kadrwa ku takatumanane ka tina ka nikiubawbalane ka kiu. 33Kwini lasu lri malra ku alrimaini pubelenge kwini ki awlru ki satulrisiane ka waudriwdripi ka Balrithane ki pasalrivane ka lrisi, si ikai ki tali dradha ki tapatarumaramarane ka taculuculwane ki Lama ka lrisi culu kwini ki waudriwdripi. 34Ku barakalai lri arakai ku galaugawini dapenge pwa kikai ki erai ki satulrisiane ka waudriwdripi, si drisisi pwa ki tapatarumaramarane ka bwakuthungane ka supate ka piu belenge, la malra kudra tedranenga ku erai gugu pubelenge ki tapatarumaramarane. 35Ala, kwi lasu lri malra kwini lamace ki nikubawbalane ka tina ka kiu nguelre, mararaamau ku tamalraneini ku lamace ki lrulai ka nikubawbalane ka kiu ki sapatarumarane ki Sulivatane ka lrisi. Ku barakalai lri malra pakanaelre kwini lamace pwa ki tapatarumaramarane, si pakarededele kwini ki sapatarumarane ki Tamatama lama. Ku barakalai lri arakai kikai tapangimiane pasikai ki pasalrivane ki langumawmase patarumara ku Balrithane ki pasalrivane ka lrisi, kwini lasu lai lri kipacepenga.
Currently Selected:
Lrivi 4: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
