Lrivi 10
10
Pasalrivane ki Nadabe si Abihu
1Ku lalake ki Arungu ka Nadabe si Abihu ngiamamalra ku taliane, la puapwi, padalai ku taliane, patarumara ki Tamatama. Ai kikai kaika mabula ka taliane, asi lwiyane ku Tamatama kai wadrekase liniane patarumara kikai taliane. 2La pangitutuluku, pulebe ku apwi ku Tamatama, si ngipapicucubungu lama liniane ku Twaumase. 3Ku Musi la pelaela ki Arungu, “Ku Tamatama naamia kai, ‘Kwidra lri marasikai nakwane ku umawmase lri tara musakene ki sanianganeli; lri papiaku ki kawkawluli padrelane ku lriguli#10.3 “lri papiaku ki kawkawluli padrelane ku lriguli” ku wahunyake madu iya kai “Kai kawkawluli lri tara musakene nakwane”..’ Patwalai kikai ki tangimiane lai lri thingalesu kikai vaga ku pacugane.” Ai ku Arungu la iceelrebe kai avavaga.
4Ku Musi la dawlu ki Misaele si Ilrizapane ka lalake ki agi ki tama ki Arungu ka Uzile, si pelaela liniane, “Malra kwini kinawmasane ki retesane numi bulri pulatadre ki Alrivilrivi ka taikaikaiyane, la iluku mulatadre ki tasuladhane.” 5Kwini lalasu la singikai ku drekase ki Musi kirecenge ki laimai ki kinawmasane, si malra kwini kinawmasane bulri pulatadre ki tasuladhane.
6Ku Musi la pelaela ki Arungu si lalalakeini ka Ilriazare si Ithamare, “Kunumi madha pangipurugucu ku isiu, la madha thuriariace ku laimai, pathingale ala ka malremelreme numi. Lu pia numi kwini, lri tara paacai numi; ku Tamatama la lri kaelaela papia ki mapapangale. Ai, kunumi ka swa Iseraylri makanaelre lri dulru numi tubi ngwalai ku tapulebeane ku apwi ki Tamatama papacai. 7Kunumi madha kidaidaili ki lrawlrawdru ki Alrivilrivi ka balrawbau, lu kai numi kilalra, lri tara paacai numi, asi lwiyane ku saniange ka lawlau ki Tamatama pakabulanga numiane.” Kwini lalasu la singikai ku vaga ki Musi pangimia.
Kakudhane ki barakalai
8Ku Tamatama peaelaela ki Arungu, 9“Kusu si lalalakesu lu ungulu numi ku malrulrupi ka bava ku makecenge ku bava madha mudadaane ki Alrivilrivi ka balrawbau, lu kai numi kilalra, lri tara paacai numi. Ku mwabaibalrithi numiane lri tara ka palralrawthu pasusu kikai kakudhane. 10Kunumi tara patatukudha kwini mabula si kaika mabula, ku tinumabulane si kaika tinumabulane ka la lrisi. 11Kunumi malra kwini pangukaili ki Musi si baai pelaela patuelre ku tinukakudhanane si bulru ki swa Iseraylri.”
12Ku Musi la pelaela ki Arungu si kwini asurwana ka tadrusa ka lalakeini ka Ilriazare si Ithamare, “Kunumi arakaiya kwini tedrane ku nilamane patarumara ki Tamatama ka Taleke ka lrisi tu kaika nipawsemakane ka pange, la ithili ki tapatarumaramarane kane, asi lwiyane kikai sapatarumarane tinusaniange turamuru. 13Kunumi ikaiya ki saniange ka taikaiyane kane. Kikai amani ku sapatarumarane ki Tamatama, ka taingeane ka drulru numi si lagagane numi. Kikai amani ku drekase ki Tamatama nakwane. 14Kunumi si wacekecekele numi lri dulru kane kikai nipatarumarane ki Tamatama ka nipawkalrivilane, amani ku talikai ki tuku si vagisi. Kunumi ikai kwini ki mabula niyane ki lrisi ka taikaiyane kane kikai labeate. Kikai nipatukudhane patwalai ki patarumara ki swa Iseraylri ka Sulivatane ka lrisi si baai numiane si lagagane numi. 15Kwini lalasu lu lama kwini lamace, si patarumara ki Tamatama, lri iluku kwini vagisi si beate ki tuku. La singikai ku drekase ki Tamatama, kikai talikaiyane kai lrika palralrawthu ka tali numiane si lagaganane numi.”
16Ku Musi la kivavaga kwini ki Balrithane ki pasalrivane ka lrisi, ka balase ka kiu, la drele ka kialamanga. La kaelaela ki Ilriazare si Ithamare, si kivaga liniane, 17“Anu kai ikai ki saniange ka taikaiyane kane kikai Balrithane ki pasalrivane ka lrisi,? Kwini tinusaniangane turamuru. Ku Tamatama lri baai kwini kiu numiane, pakai ku amwalrane ku pasalrivane ki mapapangale. 18Kudra kai numi wailuku ku erai ki sapatarumarane mudaane ki Alrivilrivi ka taikaikaiyane, nai singikai numi ku drekaseli ikai kwini kane kwini beate.”
19Ku Arungu la tubalre, “Lwiyasi kaikameane la kaneaku kai Balrithane ki pasalrivane ka lrisi, lri ngitumanaini? Kikai lri pakiragai ki Tamatama? Kaikameane ku mapapangale patarwamara ku sapatarumarane lini ku Balrithane ki pasalrivane ka lrisi, si Lama ka lrisi ki Tamatama, ai la kipadradreesengeana naku kikai amatikurwane.” 20Ku Musi sa kilalra kikai vaga, la ngulwadhane.
Currently Selected:
Lrivi 10: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
