Husia 8
8
Ku Tamatama maelaela ki swa Iseraylri ku tasukubane ki samiamiange
1Ku Tamatama amia kai, “Ngirapa pakipapawlringau! Ku badha mia ki takanga patumiamikace kela kikaruburu ki kadaenganeli.” Ku lakawkawluli wabalrenga ki takiketeketane nakwane, si kalrase ki sabulrwaneli. 2Kwi lalasu adravane tu Twaumase nakwane, si wathingale nakwane iya, 3ai kwi lalasu wacilri ki mathariri. Ngwalai kikai, ku badha lri kurisi liniane.
4Kwi kawkawluli ngiasasingikaai ku takidremedremane lini pilri ku latalialalai; lu pilri ki abebeelengenga ka tarasangililuku la mialri kai singikai ku tapalrainganeli. Kwi lalasu arakai ku kingi si gingi darepe tusamiamiange, ngidadawdawlu ku angikakamudane. 5Mavalracevacaku ku sukusukubu ki Samaria ka nitulwangane ka kingi, kalrase liniane. Kwi lalasu lri pakela lwigane ala lri cilri ki samiamiange? 6Ku taradarepe ki swa Iseraylri wadarepe tusamiamiange, ai kikai samiamiange kaika twaumase. Ku nitulwangane ka kingi ikai cekele Samaria lri kitatithiri. 7Kwi lalasu ku paivai lini yai valrigi, ku kitaleke lini yai umuku. Ku kai mabea ka mugi kaidu maka twapange; adravane ka mabea, lu tupangenga, lri kikane ki maelane ka kuni. 8Kai swa Iseraylri kadrwanga ku tamakakaelane ki lakuni, mia ki cwacuake ka kindralumu, ka kadrwa ku paluludane. 9Kwi lalasu mia ki thelraelrale ka yaubulane ka ruba, ngiasasingikaai katwase ku kadalrananeini. Kwi lalasu wamwa kusange si aswa Asirianga, la pavangalre ki maelane ka kuni, kitubi ku lrika akipalakebane. 10Ai lri sarubwaku si pataelre liniane, la pathavungu liniane. Ku talialalai ki swa Asiria lu drepedrepete liniane, kwi lalasu lri kwalri turamuru.
11Pakai ku angimamwalrane ku pasalrivane, ku swa Iseraylri twakaalra pia ku tapatarumaramarane; ai lu aru kakalra ku tapatarumaramarane, arwa driima kakalra ku pasalriu. 12Pasiakaiyaku liniane pacase ku makaalra ku sabulrwane, kwi lalasu ani ka maelaelane la iya si kalrase. 13Kwi lalasu madalame papia nakwane patarumara ku waudriwdripi, si karau ku akaneane ku sangu patarumarane ka beate; ai kwaku ka Tamatama kainaku ka malrase kilakikai sikakathane, lri pulriingawlringa naku ku pasalrivane lini, si pathavungu liniane; lri pasiwlriaku liniane pwa ka Izipiti.
14“Kai swa Iseraylri talukalrale ku tudaane lini ku daane ki talialalai, si karimurunga kudra wabekace ka Tamatama lini. Ku swa Yuda talukalrale ku tucekele lini ku makecenge ka nikepalane ka cekele. Ai lri pulebeaku ku apwi si lama ki ladaane ki talialalai si lanikepalane ka cekele.”
Currently Selected:
Husia 8: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
