Takatwasane Izipiti 7
7
1Ku Tamatama amia kai, “Lu icucubungusu ki talialalai lri pangimiaku muswane ki Twaumase, ku taka ka Arungu la lri papia iniane kawriva, ka amani ku atalingikaiyane muswane avavaga. 2Kai drekaseli muswane ku aiyanesu ka vaga patuelre pelaela ki Arungu, ani kamani ka peaelaela ki talialalai, ku angilralraingane ki swa Iseraylri si katwase kai ki kuni. 3Ai lri pakakawlukulaku ki takidremedremaneini, adravane piaku ku taipiane ku pinangu Twaumasane ka puku papia ki swa Izipiti, kwini lasu lrika sakamia kai kilalra ku vagasu. 4Lukabilrilinga lri pakilringavaku pathavungu ki swa Izipiti; lri sangilukaku ki lakawkawluli ki lazuku katwase kai ki kadaengane. 5Lu segaku ku alrima si pathavungu liniane, lu katwatwase ku swa Iseraylri ki kuni lini, lri makitu thingale ala ka Tamatamaku.” 6Ku Musi si Arungu la pangimia ku tadrekasane ki Tamatama. 7Kwini tadrusa sakikawrivariva ki talialalai, ku Musi taramavalrulunga ku cailini, ku Arungu tara 83 ku cailini.
Ukudru ki Arungu
8Ku Tamatama la kawriva ki Musi si Arungu, 9“Alaiyasi ku talialalai ala pia iya numiane ku taingeane ku pinangu Twaumasane ka puku la pelaela ka aneane numi, kusu cunanga ki Arungu malra kwini ukudruini cilri picucubungu ki talialalai, kwini ukudru lri akabalrithi asulrau.” 10Ku Musi si Arungu la katwase kikawriva ki talialalai, la pangimia ku tadrekasane ki Tamatama: Ku Arungu la pwa cilri ku ukudruini picucubungu ki talialalai si latabebelenge, kwini ukudru la akabalrithi asulrau. 11Ku talialalai la yasasaane sarubu ki silrilrigu ki latariau si taraivigi; si pia ku lrisi lini, mialri pangimia ku thadalrane. 12La pwa cilri ku ukudru lini pwa cakena, la mialri akabalrithi asulrau; ai ku ukudru ki Arungu la thamukulu ki ukudru lini. 13Ai, mia ku taiyane ki Tamatama, ku takidremedremane ki talialalai kakawlukulu; kai kilalra ku vaga ki Musi si Arungu.
Kiakela ki sapapacai ku swa Izipiti
(Aswalalanga) Erai
14Ku Tamatama kawariva ki Musi, “Makawlukulu ku takidremedremane ki talialalai ki swa Izipiti, kai pakatwase ki kawkawluli. 15Luiya ki mialrealre, kwi lasu lu mwa ka kadravane Nile, mwa kikawriva iniane. Mailuka kwidra ukudrusu ka akabalrithi asulrau, la ikaiya babiabila mukalava iniane. 16La iya kai iniane, ‘Ku Tamatama ka Twaumase ki swa Hiburu siakawlu nakwane kela kai, ani pakatwase ki kawkawluini, lani ikai calragulragu sukubu iniane iya, ai tamianeananasu kai kilalra. 17Ku Tamatama amia kai, kikai lri patwalaisu ki tapangimianeini la thingale ala ka amanini ku Tamatama. Drela, lri arakaiyaku kikai ukudru sititi ki acilai kadravane, kai acilai lai akabalrithi aerai, 18kai lakange lri makitu pacai, kai acilai lri sangulisi, ku swa Izipiti lalri kai maka ungulu kikai acilai.’ ”
19Ku Tamatama la iya kai ki Musi, “Pelaela ki Arungu, malra iya iniane kikai ukudru la sege papia ki sanaka kadravane, kadalranane ki varukuru, baiyu si baibaiyu ki swa Izipiti. Ku laacilai la akabalrithi aerai, pasalraelre ki kuni laka eraeradhanenga, adravane ka yabakicwane ka yarangiane aerai patuelre.”
20Ku Musi si Arungu la pangimia ku tacunane ki Tamatama. Picucubungu ki talialalai si lasasiakawluini, ku Musi la ciliki ku ukudru, si sititi ki acilai, ku acilai la makakai akabalrithi aerai. 21Ku lakange drakerale la pacai, ku acilai sangwalisi, ku swa Izipiti la kai maka ungulu kikai acilai. Ka Izipiti kiinunga laka eraeradhanenga. 22Ai ku taratulrisi si taraivigi ki swa Izipiti mialri tulrisi, laka thadalrane pakabalrithi ki acilai aerai. Mararaamau ku taiyane ki Tamatama, ku takidremedremane ki talialalai laka makawlukulukulu ki aswalala, kai mubangalre kilalra ku vaga ki Musi si Arungu. 23La kaika miyaiya kikai sikakathane, arwangibalrelringa sa siwlri mwa ki daaneini, kai tumanemane kikai lu kidremedreme. 24Ku swa Izipiti makanaelre kai maka waungulu ku acilai drakerale, la lruku ithili ki vaalru, si patwalai ki adringi ki daedae malra ku acilai si ungulu.
25Ku Tamatama sa sititi ki acilai drakerale, kikai sapapacai la pacungulu makapitulu.
Currently Selected:
Takatwasane Izipiti 7: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
