Takatwasane Izipiti 6
6
1Ku Tamatama la iya kai ki Musi, “Lri drelengasu kai apangimianeli kiecebe ki talialalai ki swa Izipiti. Lri rututaku ku apakatwasane ki kawkawluli. Lri rutututaku iniane ku kaika apikakwaneini kai pakatwase ki kuni lini.”
Ku Twaumase wadawlu ki Musi
2Ku Twaumase la pelaela ki Musi, “Tamatamaku, 3ka amani ku wadulru sanaka manemane ka Twaumase. Adrelanengaku ki Aberahame, Isake, Yakubu. Ai, kadrwana ku takirimwaneli pelaela liniane kikai saniange ka naganeli ka Tamatama. 4Nakiaketeketaku liniane, pukawnu ku abaadhane liniane kudra natasalikaikaiyane lini ka Kanange. 5Kikai kialalraku ku tubitubi lini ki swa Iseraylri ku tapakwalriane ki swa Izipiti liniane, ngwalringavaku ku kiketeketeli. 6Lakamani kusu lu mwa pelaela ki swa Iseraylri, iya kai liniane, ‘Tamatamaku; lri palribulaku liniane, patwalai ki takituduriane ki swa Izipiti mukerenge liniane. Lri arakaiyaku kai sapukwane ka alrima pathavungu ki swa Izipiti, lri palribulaku numiane. 7Lri malraku numiane tukawkawluli, lri mialriaku a Twaumase numiane. Lu twalainga numi ki tapakwalriane numiane ki swa Izipiti kipangilralraingi, lri thingalenga numi ala ka amaniaku ku Tamatama, ka amani ku Twaumase numi. 8Napwavagaku ki Aberahame, Isake, Yakubu, lakamani lri tara ilukaku liniane mwa kwini ki kadaengane, kwini kadaengane lri kamani ku tacekecekelane numi. Kunaku Tamatamaku.’ ” 9Ku Musi la malra kikai si pelaela ki swa Iseraylri, ai kai kialalra ku vagaini, asi lwiyane kwini takitusinalremeane lini tuduri masulringa tubi ku kidremedreme lini.
10Ku Tamatama la iya kai ki Musi, 11“Lu mwa pelaela ki talialalai, ani tara pakatwase ki swa Iseraylri kidaili Izipiti.”
12La iya kai ku Musi, “Adravane ka swa Iseraylri kai kialalra ku vagali, ku talialalai lri kilalra nakwane? Amaniaku kudra kai wathingale kawriva ka umawmase.”
13Ku Tamatama la drekase ki Musi si Arungu, “Lu mwa pelaela ki swa Iseraylri si talialalai ki swa Izipiti, ka amaniaku ka wadrekase, ka lrika amani kulri ililuku ki swa Iseraylri katwase Izipiti.”
Tamacucungulane ki Arungu si Musi
14Kikai la tapacasane kikai lebe yai amani ku latamatama ki zuku ki swa Iseraylri. Takatakanga ku lalake ki Yakubu ka Riwbingi tasupate ku sawvalai ku lalakeini: Hanuke, Palu, Hezerunge si Karemi; kikai amani ku tasingikaiyane ki zuku ki Riwbingi. 15Kai Simiune taeneme ku lalakeini: Yemuele, Yamingi, Uhade, Yakingi, Zuhare si Saule ka tulalake ki swa Kanange; amani lini ku tasingikaiyane ki zuku ki Simiune. 16Kai Lrivi tatulru ku lalakeini: Geresune, Kuhathe si Mirari; amani ku tasingikaiyane ki zuku ki Lrivi. Ku Lrivi pakela ki tara 137 ka caili. 17Kai Geresune tadrusa ku lalakeini: Lribini si Simi; la tara ikai ku takalra ku lagagane lini. 18Kai Kuhathe tasupate ku lalakeini: Amerame, Izehare, Hiburungu si Uzile. Kai Kuhathe pakela ki tara 133 ka caili. 19Kai Mirari tadrusa ku lalakeini: Maheli si Muse. Kikai amani ku zuku ki Lrivi si cucungulane kai ki zuku.
20Ku Amerame marudrange mwa ki tinaini ka Yukebide ka betakane ki tamaini; twalalake ki Arungu si Musi. Ku Amerame pakela ki tara 137 ka caili. 21Ku Izehare tatulru ku lalakeini: Kura, Nipege si Zikeri. 22Ku Uzile tatulru ku lalakeini: Misaele, Ilrizapane si Sitheri.
23Ku Arungu marudrange ki Ilriseba; lalake ki Aminadabe, agi ki Nahasunge. Ku Ilriseba twalalake ku lalake ki Arungu ku tasupate: Nadabe, Abihu, Ilriazare si Ithamare. 24Ku Kura twalalake ku tatulru: Asire, Ilekana si Abiasape; amani lini ku lalalake ki Kura ka cucungulane ki maretetese si ladadaane. 25Ku lalake ki Arungu ka Ilriazare marudrange mwa ki lalake ki Putile; twalalake ki Pinehase. Kilakikai patuelre amani ku tamatama ki ladadaanane ki lamaretetese si ladadaanane ki zuku ki Lrivi.
26Ku Arungu si Musi kwini tadrusa ala amani kudra napangwakai ki drekase ki Tamatama, iya kai, “Lu mwa malra ki swa Iseraylri kwini ki lazuku apasakaikai iluku liniane katwase Izipiti”. 27Kwini lalasu la mialri kamani kudra nawamwa ki talialalai ki swa Izipiti kitubi mukerenga ki swa Iseraylri iya.
Ku Tamatama wadrekase ki Musi si Arungu
28Ku paswalala ku Tamatama sa kawriva ki Musi ikai Izipiti, 29amia kai, “Tamatamaku; malra kikai takawrivaneli muswane si pelaela patuelre ki talialalai ki swa Izipiti.”
30Ai, ku Musi la icucubungu ki Tamatama tubalre iya kai, “Wathingalesu kai kulrunganeli, ku talialalai lri tumane kilalra ku vagali?”
Currently Selected:
Takatwasane Izipiti 6: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
