Takatwasane Izipiti 24

Sapatuthingalane ki samakaketeketane

1Ku Tamatama kawariva ki Musi, “Kusu si Arungu, Nadabe, Abihu si kwini tamapitulu ka kiacapicapili ki swa Iseraylri mulregelrega kela kai nakwane; lu yadaailiana numi yai sukubanga. 2Kathanesu kulri tarungeangea kela mucucubungu nakwane, kwini drumane kai lri maka adeethe nakwane; ku mapapangale kai lri maka tupalra muswane mulregelrege.”

3Ku Musi la mulebe lregelrege, si pelaela ki mapapangale patuelre ku drekase si tukakudhane ki Tamatama. Ku mapapangale la masiasilange tubalre, “Ku cunu ki Tamatama sanaka vaaga, lri tara paluludu nai.” 4Ku Musi la malra kwini drekase ki Tamatama nguvavaeva pacase. Sakakaiyane ki mialrealre, la ikai lebe ki lregelrege cegecege ku taluvaale ku tapatarumaramarane, si cegecege ku 12 ka ulrudru; kwini vavaeva ka ulrudru sapatuthingalane ki vavaeva ki tai 12 ka lazuku ki swa Iseraylri. 5Ala sikawlu ku tapiya ku langukathabarane papia ki Tamatama patarumara ku nilapulapwane, tu Lama ka lrisi si Sulivatane ka lrisi. 6Ku Musi la malra kwini erai ki nilapulapwane ku pararamau pwa ki thalange, ku apararamau la paralikiliki pwa ki tapatarumaramarane, 7ala papia ki mapapangale akwadrau silrigu kwini nipacasane ku padradrekase ki Tamatama ka yakai ki tamakaketeketane ka hungu. Ku mapapangale la makitu iya kai, “Ku cunu ki Tamatama patuelre palraingi nai pasalaladha paluludu.”

8Ku Musi la malra kwini yathalangane ku erai si paralikiliki pwa ki kinawmasane ki mapapangale, si iya kai, “Kikai erai yai singiakai ki padradrekase ki Tamatama si kiketekete numiane ka sapatuthingalane.”

9Musi, Arungu, Nadabe, Abihu si tamapitulu ka kiacapili ki swa Iseraylri mwabelenge ki lregelrege makanaelre; 10la makitu drelenga ki Twaumase ki swa Iseraylri. Ikai ki tailebe ki drapaleini, miakau arakai ku salesese ka tinukucingalrane ka lrenege tusadralriane ki kadadalranane, mia ki subelebelenge ku saleseane. 11Ku Twaumase la kai pakadula kikai ki lakiacapili ki swa Iseraylri. Kwini lalasu wadrele ki Twaumase; kwi lalasu la taelre kanekane si ungungulu.

Yakai lregelrege Sinai ku Musi

12Ku Tamatama kawariva ki Musi, “Kusu mulregelrega kela kai nakwane, lu ikaisu kikai lri baadhaku muswane kai drusa kai alibi ka lrenege, ibelenge ki lrenege wapacasaku nguelre ku tinukakudhanane si padradrekase pakai kwidra sabulrwaneli ki kawkawluli.” 13Ku Musi si paraluralubu iniane ka Yesua la maka ngipapadulrunga; ku Musi la pathagili#24.13 “ku Musi la pathagili” ki sidrumane ka pacase yakaai ku “kwi lalasu la pathagili” amia. katwase mwa ki saniange ka lregelrege. 14Ku Musi la kawriva ki kiacapili ki swa Iseraylri, “Kunumi ikaiya kikai ki tasuladhane mukalava naiane, pakeela ku tasiwlriane nai. Kai Arungu si Hure lri taelre numiane; sanaka yakai ku rivwane kai matumane mwa liniane makawrivariva si turathudane.”

15Ku Musi la darurunga lregelrege Sinai, la ikai ku ememe ku wakabungu liniane. 16-17Ku draredrare ki Tamatama mwalebe ikai lregelrege. Ikai ki cucubungu ki mapapangale ki swa Iseraylri, kikai draredrare ki lrigu mia ki yarubu ka wakelrakelrakelrabe ka apwi ikai lregelrege kudaladalai. Ku ememe la makanemele ka takabungane ki lregelrege, saka samakapitulu ku Tamatama la twalai ki ememe akwadrau kawriva ki Musi. 18Ku Musi la mubelenge, mwadringi ki ememe, la ikai kwini isadra makamasupatele ku vaiyane si awngane.

Currently Selected:

Takatwasane Izipiti 24: NDV

Highlight

Copy

Compare