Daniele 5
5
Tapangiakaneanane ki talialalai ka Bilesazare
1Yakai sakamaungu, ku talialalai ka Bilesazare la dawlu ki takudrulu ka latabebelenge kainganai kipaelre ki nitwadravane pangiakaneane, la kanekane ungungulu si kapeapeaperau. 2Sa icengecenge kirararagai ngiakanekaneane, ku Bilesazare wadrekase malra salri putaluvaivai kudra malra ki tamaini ka Nibukadenezere patwalai Yerusalrime ki daane ki Twaumase ku lakingi ka kupu gingi ka lakisi, ku lrika arakaiyane ungulu ku bava ki latabebelengeini, lataelrelreini, drumane ka lalabaibaini. 3Ku taramarasikaikai la makakaai malra salri kwini lagingi si kingi ka kupu si kisi, si parakai liniane ungulu ku bava. 4Kwi lalasu la takuungungulu, si takudrengedrengedrengere kwini nitutwaumasane arakai ku kingi, gingi, lriwlu, adreme, angatu, si lrenege.
5Ala pangitutuluku, yakai ku vaeva ku alrima ku adrelane, la arakai ku dadiputhane ikai ki balingibingi ki daane ki talialalai ki takamalealedranenga pacase. Kwi talialalai wadrele kwini ki alrima sa pacapacase, 6la makakaai kalrapungu ku lringau, si manugiligili ku paculru. 7Kwi lasu la akwadrau karaleale, la drekase dawlu ki lataraivigi, taratulrisi, si tarakithingale ki latariau. Kwini lalasu sa kela, ku talialalai la iya kai liniane, “Ku aneane ku wathingale silrigu ka yakai ki balingibingi ka pacase, si lalrwai ku pacuganeini, lri patarumaraku pasilaimai iniane ku thilalatadhane ka malragi ka laimai ki talialalai, la pasisilu ku lrigu ka silu ka kingi, ikai kai ki kuni lri musaka tulru ku taabelengane ku taetalane.” 8Ku latakivagane ki talialalai la katwase mucucubungu; ai kadrwa ku umawmase ku wathingale silrigu kwini lapacase, laka kadrwa ku umawmase ku wadulru lalrwai ku pacuganeini. 9Ku Bilesazare ka talialalai masulri turamuru, ku lringau la aru kalraapungu; ku latabebelenge la kai thingale makanaelre ku apangimiane.
10Ku taelrelre ki talialalai kialalra sa karalealeale ku talialalai si latabebelenge, la mudaane mwa ki tangiakanekaneanane, la iya kai ki talialalai, “Talialalai banzai! Madha ukuludru mia kai kadraaselre. 11Ikai kai ki cekelesu yakai ku tangeea ku umawmase, ku ri ki sanianiangenga ka latwaumase#5.11 “latwaumase” ku wahunyake madu iya kai “Twaumase”. yakai iniane tapalra. Sa itaetaalaneana ku tamasu, kikai umawmase napathingalanenga ku walriibate ki umawmase ku thingalane si mia ki latwaumase ku lrigilane. Ku tamasu ka talialalai ka Nibukadenezere pakamani iniane atamatama ki latarakithingathingale ku angimiane, taraivigi, taratulrisilrisi si tarakithingathingale ki ngwakai ki latariau. 12Kwi lasu maelane ku pukuini, yakai ku lrigilane si mwakalrivili ku thingalane, wathingale lalrwai ki sipi, lalrwai ki anazu, lalrwai ki kaika athingalane ka matiasamaimali. Lakamani, sikawla ki umawmase dawlu iniane. Kwi lasu sia Daniele; ku talialalai la sunagane iniane pasi Beletisazare. Kwi lasu lri thingale pasikai muswane lalrwai kilakikai pacase ku pacugane.”
Ku Daniele walalrwai kwini yakai ki balingibingi ka pacase
13Ku Daniele la makakaai kiiluku mwa cucubungu ki talialalai. Ku talialalai la kivaga iniane, “Danilesu, ka ravase ki ama ka talialalai patwalai ka Yuda kainganai ka swa Yuda? 14Kialalraku yakai ku Ri ki sanianiangenga ki latwaumase#5.14 “latwaumase” ku wahunyake madu iya kai “Twaumase”. tapalra muswane; yakai ku pukusu, ku thingalane, ku lrigilane. 15Wadawlaku kikai ki latakivagane si taraivigi kainganai, ku lrika asilrigwane lini kikai yakai ki balingibingi ka pacase, si pasikai nakwane lalrwai ku pacuganeini; ai kai lalasu kai wathingale makanaelre. 16La kilalraku wathingale lalrwai ki kaika athingalane ka matiasamaimali, la thingale tubalre ki lamakucingalre amia muswane. Alaiyasi dulrusu silrigu kikai pacase, la pasikai nakwane lalrwai ku lapacugane, lri malrasu ku pakalreva, la silaimai ku thilalatadhane ka malragi ka laimai ki talialalai, la sisilu ku lrigu ka kingi ka silu, ikai kai ki kuni mwasakatulru ku taabelengane ku taetalane.”
17Ku Daniele la tubalre, “Talialalai pikaiya kwini pakalreva, ku patarwamarasu baai ki palrapalra. Lri pasikaiyaku muswane silrigu kikai pacase, si pelaela ku lapatharevane.
18“Ku Abebeelengenga ka Twaumase paatalialalai ka sanianiangenga ki tamasu ka Nibukadenezere, la patarumara baai iniane ku lrigu si akiukuludrane; 19ngwalai kikai, sanaka kuni, zuku, si makaelaela ku vaga ka umawmase mwakuludru iniane makanaelre. Ku apapanianiakane ku apapacadhane yakai iniane ku puku, lai lri dulru ngisasingikaai tuabelenge tualebe ku taetalane ki umawmase. 20Ai, kwi lasu sa ngikalrilrigu, katheelrale, matiangeange ku ngikarakacanane, kwi lasu kiamwalra ku taatalialaladhane, si kawlrau ku lrigu. 21Kwi lasu twalai ki laumawmase kipakatwase, kai yakainga ku takidremedremane ki umawmase, mianga ki waudriwdripi sikakathane. Kwi lasu la taelrelre panianiake ki yaububulane ka laruba, mia ki lwange kanekane ku laubulu, apece ikai ubulane, kadapedapenge ki lamu. Ki bibilrilinga, kwi lasu wathingale ki Abebeelengenga ka Twaumase ka yakai ku puku magagemegeme marasikai ki lakuni ki umawmase, ka yakai ku puku malra ku puku ki lakuni si patarumara baai ki lapilrini ka umawmase.
22“Bilesazare ka talialalai, tamasu ki Nibukadenezere, unu wathingalesu kikai patuelre, la kaisu thingale ngitatualebe, 23ngiakalrilriigulringasu, si kitubadha ki Tamatama ka yabelenge. Wamalrasu salri putaluvaivai kudra ribicini patwalai ki daane ki Twaumase ku lakupu si lakisi, la arakaisu ungulu si paarakai ki latabebelengesu, lataelrelresu, si drumane ka lalabaibaisu, si drengedrengedrengere kwini ki laniarakaiyane ku kingi, gingi, lriwlu, adreme, angatu, si lrenege tu twaumase, ka amani kudra la kai maka wadulru drele, kai maka wadulru kilalra, ka kadrwa ku thingale ka samiamiange. Kaisu mwasakene kudra amani ka wakelrete ki apanianiakane si apacadhanesu, ka magagemegeme ki tangivelevelanesu ka Twaumase. 24Lakamani, ku Twaumase siakawlu ki vaeva ka alrima kainganai pacase kikai lapacase.
25“Kilakikai pacase yai:
‘Asipa, asipa, tintinga, mauavagai,’
26‘Asipa’ ku pacugane yai: Ku Twaumase waasipinga ku caili si vai ki kunisu, lri alikainga ku angimiane ki kunisu.
27‘Tintinga’ ku pacugane yai: Kia pibelengengasu ki tintingi si kitintingi, la kai mamamwa ki tintingi.
28‘Mauvagai’ ku pacugane yai: Ku kunisu lri mauvagai, si baai ki swa Media si swa Perisia#5.28 “swa Perisia” si vaga ki Arame “mauvagai” lu iya, nau mangangimia amia ku lingau..”
29Ku Bilesazare la makakaai drekase ki twapapapalra marasikaikai baai ki Daniele pasilaimai ku thilalatadhane ka laimai ki talialalai ka maelrenge, si pasisilu ku lrigu ka silu, la pelaela pathingale kai lasu ikai ki kuni lini ka mwasakatulru ki abebeelengenga ku taetalane. 30Sakamaungu, ku talialalai ki Babilunia ka Bilesazare la kipapacai. 31Ku swa Media ka Dariuse tara 62 ku cailini waribici ku sarathudane ki kuni ka puku.
Currently Selected:
Daniele 5: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
