Daniele 4
4
Sakadrusa ka sipi ki Nibukadenezere
1Ku tapapiane pelaela pasalraelre kai kawmasane ki sanaka lakuni, lazuku, si kudra makaelaela ku vaga ka umawmase ki talialalai ka Nibukadenezere amani kai lebenga:
“Anu kasulivalivate katharithariri ku kinawmasane! 2Mwabangalraku pelaela ku tapapiane nakwane padrele ku matiasamali ku pinangu Twaumasane ka puku ki Abebeelengenga ka Twaumase.
3Ku tapadrelane ku pinangu Twaumasane ka puku ki Twaumase ala saniyange!
Ku tapianeini ku matiasamali sapukwane turamuru!
Ku pukuini kadrwa ku taalikaiyane;
ku sarathudaneini lrika nipawcucucungulane!
4“Mathariri kai taikaiyaneli kai daaneli ka talialalai, si kisupisupilri kai takaesadhane kiwsakenane; 5ai sa kasipelrengaku wasipiaku ku vaeva ku maliisi ka sipi, si drele ku matikikiwcu ka maburusi. 6La dawlaku ki takivagane ki daane ki talialalai ka Babilunia makanaelre mucucubungu nakwane, ku lrika apelaelane lalrwai nakwane kwini sipi. 7Ku latarakithingale ku angimiane, taraivigi, taratulrisi, si tarakithingale ki tariau makanaelre kaiyanganai. La pelaelaku ku tasipianeli, ai kwi lalasu kai wadulru lalrwai nakwane. 8Sakabilrili ku Daniele la kainganai mudaane, (ku naganeini mialri si Beletisazare, ka kiasunagane ki twaumaseli.) Kwi lasu yakai ku ri ki sanianiangenga ka latwaumase tapalra iniane. Lakamani ku pelaelali iniane ku sipili, iya kai, 9‘Abebeelengenga ki tarakithingathingale ka Beletisazare, wathingalaku ku ri ki sanianiangenga ka latwaumase#4.9 “latwaumase” ku wahunyake madu iya kai “Twaumase”. tapalra muswane, wathingalesu patuelre ku kaika athingalane ka matiasamaimali. Kikai yai amani ku tasipianeli, ala pasikaiyaili lalrwai.’
10“Sa apecaku si ererereke, wadrelaku ku vaeva ka maburusi: Kai ki kadaengane kabicelrakane yakai ku maadrau ka angatu, 11lu aru kadrau arwa abelenge, wakela ki taalikaiyane belenge; kai kawmasane sanaka umawmase wadrele makanaelre. 12Ku vasauini masalese kathariri, ki angatu belenge la pumadru suete, lri dulru pawkesa pakane ki kiacaebe belenge sanaka umawmase. Ku lawaudriwdripi yakai ki lrilrianeini isadra, ku langiapalapalai ka adhadhame yakai ki ricingini tulisisuku, sanaka panianianiake wakaane ku madruini makanaelre.
13“Sa kidredredremaku kikai ki maburusi, la drelaku ku tangea ku taradrangalrungalru ka sasiakawlu belenge ku twalai ka belenge kainganai mulebe. 14Kwini lasu la akwadrau tawtau, ‘Pwa pulebe kwi angatu, si lisisi kwi la ricingi, la velevele pulebe kwi vasau, sititi pulebe kwi lamadru. La pakatwase kwini yakai tailebe ki angatu kwi lawaudriwdripi, pathirakupa kwini ki yabelenge ki laricingi kwi laadhadhame. 15Suranga sikakathane kwini cebe ka angatu pikai cakena, la arakai ku vavaeva ku lriwlu ku adreme pangithalringulu ravadre, pataelrea ki ubulu suru pikai ubulane.
“ ‘Kikai ki umawmase sura pikai ubulane; pataelrea iniane ki lawaudriwdripi pakapakane ku ubulu, lani kadapenge ki lamu. 16Lri tarapitu ka caili, kwi lasu lri kakadrwa ku lrigilane ki umawmase, lai kai lri ikainga ku takidremedremane ki umawmase; lri mianga ki waudriwdripi. 17Kikai yai taiyane kalrithethe kwidra ki taradrangalrungalru ka sasiakawlu belenge, ku lrika athingalane ki yakawmasane ki umawmase, kai kuni ki umawmase amani ku Abebeelengenga ka Twaumase ka wagemegeme marasikai; ku Twaumase yakai ku puku malra ku kindri ki kuni si patarumara baai ki pilrini ka umawmase, adravane ka kaika sapatumatumane ka umawmase, ku Twaumase lri mialri dulru pagemegeme iniane ku puku.’ ”
18Ku Nibukadenezere ka talialalai amia kai, “Amani kikai ku tasipianeli. Beletisazare, ala pasikaiyaili lalrwai kai ki sipi. Kai la takivagane ki daane ki talialalai kadrwa ku natangeanga ku wadulru pasikai nakwane lalrwai; ai lri dulrusu, asi lwiyane ku ri ki latwaumase#4.18 “latwaumase” ku wahunyake madu iya kai “Twaumase”. yakai tapalra muswane.”
Ku Daniele walalrwai ki sipi
19Ku Daniele, lasi Beletisazare, sa kilalra kikai vaga, la ngituluku si kathathiburu kai maka kawrivanga. Ku talialalai la iya kai, “Beletisazare, kikai sipi si taiyaneini ani kai pangituluku muswane.”
Ku Beletisazare la tubalre, “Talialalai, kikai sipi si pacuganeini anatumane laka amanimani ki badhasu. 20Kwini angatu wakela talikaiyane belenge, kai kawmasane sanaka umawmase la drele makanaelre; 21ku vasauini masalese kathariri, ku madru belenge ki angatu wadulru kane makanaelre kai kiacaebe belenge kai umawmase. Ku waudriwdripi la isadra ikai ki lrilrianeini, ku ngiapalapalai ka adhadhame la ikai ki ricingini tulisisuku.
22“Talialalai, amanisu kwini madradrau ka angatu, maelrenge la ngicaeme. Ku pukusu wadaruru ka belenge; waerecesu ki kiacaebe belenge. 23Ku talialalai sa dredredrele, yakai ku sasiakawlu belenge ku twalai belenge kainganai mulebe, si iya kai, ‘Pulebea kai ki angatu, si kabebetethe iniane, suranga kwi cebe ka angatu pikai cakena sikakathane, la arakai ku vavaeva ku lriwlu adreme ravadre pangithalringulu, lani taelre ki ubulu ikai ubulane, si kidapenge ki lamu, lani taelre ki waudriwdripi panianianiake tarapitu ka caili.’
24“Talialalai, amani kai ku pacugane ki sipi; ku Abebeelengenga ka Twaumase peaelaelanga ku lrika angimiane ikai ki kinawmasanesu: 25Lri kipatwalaisu ki laumawmase kipakatwase, si taelre ki lawaudriwdripi panianianiake. Tara pitu ka caili, lri miasu ki sawvalai ka lwange kanekane ku laubulu, apeapece ikai ubulane, kadapedapenge ki lamu. Lu mianga kwini, lri thingalesu ki Abebeelengenga ka Twaumase ka amani ku magagemegeme marasikai ki umawmase si sanaka kuni; ku Twaumase yakai ku puku patarumara baai ku kindri ki kuni ki pilrini ka umawmase. 26Ku sasiakawlu belenge wadrekase ku asurane kwini cebe ka angatu pikai cakena; kwini peaelaela lalrwai, lu thingalengasu pasudalepe ki Twaumase ka warathudu kawmasane, lri tupelasu atalialalai. 27Lakamani, talialalai, kilalra kai pakipapawlringawli, madha pelaelanga pasalriu, arakaiya ku dringelresane, kakalithi ki matiakukuru ka umawmase; luka ngimiyaiya kikai, lri pacungulusu ngiradhekane.”
28Kilakikai ngiamia ikai ki kinawmasane ki talialalai ka Nibukadenezere patuelre. 29Sa tara mangealenga si drusa ka dramare, kwi lasu sa ikai Babilunia ki daane ki talialalai ka takivavavangane dadadavace, 30Kwi lasu amia kai, “Drela, matiasalrulriinga kai cekele Babilunia! Arakaiyaku ku puku tucekele ka tangadrane ka cekele, padrele ku lrigu si matisalrwaneli.”
31Kwi lasu sakaiyana akulrepenge ku vagaini, kai subelebelenge kaiyanganai ku lingau iya kai, “Talialalai ka Nibukadenezere, kilalra! Kwi takatalialaladhanesu kaiasasane kiaribicinga. 32Lri twalaisu ki laumawmase kipakatwase, si taelre ki waudriwdripi panianianiake, mia ki lwange kanekane ku laubulu, tarapitu ka caili. Lukabilrilinga lri thingalesu si pasudalepe ki Abebeelengenga ka Twaumase ka yakai ku kindri marasikai ki kuni ki umawmase, yakai ku kindri patarumara baai ki pilrini ka umawmase ku kindri ki kuni.”
33Kilakikai vaga makakaai ngimia. Ku talialalai ka Nibukadenezere twalai ki laumawmase kipakatwase, la mia ki lwange kanekane ku laubulu, kadapedapenge ki lamu. Ku isiuini mia ki lalrumu ki takanga, ku kalesekeseini mia ki kalesekese ki adhadhame.
Ku Nibukadenezere wadrengedrengere ki Twaumase
34Ku talialalai amia kai, “Ngialribatenga ku nitara pitwane ka caili, paswabelengaku drele; ku lrigilaneli siaulriwlringa. Lri drengedrengeraku kudra ki sanianiangenga, la malra ku lrigu si kiwsakenane baai papia ki palralrawthu panianiake ka Twaumase.
Ku sarathudaneini kadrwa ku talikaiyane;
ku pukuini lri mapawcucucungulu.
35Ikai ki macaini, kadrwa ku sapatumatumane kai kawmasane kai laumawmase;
kai sasiakawlu belenge si kawmasane kai umawmase amanini ka warathudu patuelre.
Aneane ku lri thuru kiecebe ku takidremedremaneini?
Aneane ku lri thuru kivaga ku takaunganeini?
36“Sa siwlriwlrianenga kai lrigilaneli, ku lriguli, matisalrwane, si thelare ki kuni mialri siwlriwlriane ka nakwane. Ku latabebelenge ka sasiakawluli si latabebelenge ki kunkwane twapapalranga nakwane makanaelre; ku tupelali malra ku puku madradrau ki siaswalane.
37“Kaiasasane, kwaku ka Nibukadenezere wadrengedrengeraku, musakene, lrigu ki talialalai ka yabelenge. Ku takaunganeini madringelrese aparamaramau; ku Twaumase wadulru tutikiane ki ngiakalrilrigu ka umawmase.”
Currently Selected:
Daniele 4: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
