Amuse 5
5
Wadawlu ki swa Iseraylri pangitatupela
1Kilalra, swa Iseraylri, lri silringavaku numiane:
2Ku tawvailekete ka swa Iseraylri twabakebakenga,
kai maka ngidrakalenga!
Kwi alisu kia patubakebake pikai cakena,
kadrwa ku umawmase ku lri dulru drakale iniane!
3Ku abebeelengenga ka Tamatama amia kai, “Ku cekele ki swa Iseraylri, lu pakatwase ku takudrulu ku kwapingi, taidaidainga ku panianiake siwlri kainganai; ku nipataruidadhane ku kwapingi, tamangeangeealenga ku siaulri kainganai.”
4Ku Tamatama papia ki swa Iseraylri iya kai, “Silapaili! Lu ngibangulu siwlriwlri lri ikaai ku apanianiakane. 5Madha mwamwa kavai Bereseba drihai. Madha mwamwa kavai Bithele silape nakwane; kai swa Bithele lri kawlrau. Madha mwamwa Gilegale; kai swa Gilegale lri acaicali kaamudu.”
6Lu silape numi ki Tamatama, lri panianiake numi. Alaiyasi kai numi silape iniane, lri mia ki taliwlare lama ki swa Iseraylri. Kikai taliwlare lri lama ki umawmase ki swa Bithele, kadrwa ku umawmase ku lri dulru edrepe. 7Kunumi lri matikurunga numi! Asi lwiyane pathiavalrau numi ki madringelrese, la ribici numi ku nipasudalepanenga ka akaesadhane ki mapapangale!
8Ku Tamatama wabekace ki latariau,
wabekace ki Peleadese ka tariau si Silrawlrabu ka tariau.
Paamaungu ki vaiyane,
la paaledra ki dradrimitane.
Wadrekase ki laveke,
si gugu pikai cakena daedae.
Lri kipasi Tamatama.
9Pakamudu ki garagarange,
la pakikabebetethe buruku ku kepale ki cekele.
10Kunumi ka miyaiya kai ka laumawmase malrase numi ki palrapalra lu arakai ku dringelresane saibange. 11Twasinalrelreme numi dredrepete ki matiakukuru ka umawmase, la ribici numi ku taleke lini; lakamani kunumi lri kai numi maka ikai ki raedre numi si tudaane, lai kai numi maka ungulu ku ngitatubava numi patwalai ki babudwane numi. 12Maadrawnga turamuru ku pasalrivane numi, makaalranga turamuru ku pasalrisalriu numi. Wadrepete numi ki mathariri ka umawmase, la tarumara ku pavangalre, ikai ki tasaibaibangane la telenge numi ku akiparamaramavane kisaibange ki matiakukuru ka umawmase. 13Ikai kai ki ngialisianenga ka zidai, tharepane kikai talrilrigili kai umawmase kai avavagavaganga.
14Silapa ki mathariri, la cilri ki ngialisiane, lani ikai ku angukaiyane numi panianiake. Lukamiyaiya kikai, lri singikainga ku taiyane numi, ku Tamatama ka abebeelengenga ki sanaka kwapingi ka Twaumase ala lrika patengatengaanenga ikai tapalra numiane. 15Kalrasa ki ngialisiane mia ki badha, si kadalame ki mathariri, ikai ki tasaibaibangane la arakaiya ku dringelresane. Lukamiyaiya kikai, ku Tamatama ka abebeelengenga ki sanaka kwapingi ka Twaumase alau lri tukalithaneana kudra ki waudripi ka laumawmase kai ki kuni.
16Lakamani, ku abebeelengenga ka Tamatama ka abebeelengenga ki sanaka kwapingi ka Twaumase amia kai, “Ikai ki lakadalranane ki cekele lri ikai kidruanga ku watubitubi ku lingau. Kiangulrenga kidawlu ku latarasilringau tubi, lai lri daaulunga ki tarakawaungu pawbalrithi. 17Ikai ki babudwane kathane ku lingau ki tubi ku kilalralalra madu. Ki kikai ngimiyaiya kilakikai lri tara ngimia, asi lwiyane lri pathavungaku numiane.” Ku Tamatama amia kikai pelaela.
18Ku mwakalavalava ku akelane ki Tamatama ku vai, lri matisalregesege numi! Ku vai ki Tamatama manemane ku apakaesadhane numiane? Ku vai ki Tamatama papia numiane dradrimitane sikakathane, kaika ledra. 19Kudra vai lu kelanga, kadrwa ku amwane numi mubere, lri mia kudra ki umawmase ku tau mubebere ki raiyungu, ala kipadradreesengenga ki cumai! Lai lri mia kudra ki tangeea ka umawmase ka kiadulru turamuru, sa darurunga tavanane, la sutalu ki raedre ku alrimaini, ala kikaace ki sulrau! 20Ku vai ki Tamatama lri mailuku ku dradrimitane, kaika ledra; amani kudra awlisiane ka vai sikakathane, kadrwa ku natikiyanenga ku sidramane.
21Ku Tamatama amia kai, “Mavalracevacaku ki la tatulrisisisiane numi, kainaku wabeserenga ki tayelrelrelreane numi! 22Kainaku lri tarumara ku sapatarumarane numi ku Lama ka lrisi si Taleke ka lrisi, kainaku lri tumanemanenga kudra patarumara numi ku maricuru ka waudriwdripi tu Sulivatane ka lrisi. 23Kainaku madalame kwini ngariangiane ki senai numi, la kainaku kadalame kilalra ku lingau ki lebere numi. 24Ku patengatengane, nai mia numi ki walrialriau ka kadravane, ka kadrwa ku pathimithimane putaluvaivai ku dringelresane! Mia ki vaalru ka mwalwaludru palralrawthu ku acilai, kai takidulrudulru arakai ku aparamaramavane!
25“Swa Iseraylri! Ikai ubulane ki minakamasupatelane ka caili, kadrwa ku patarumara numi baai nakwane ku waudriwdripi ku lamaneemanenga! 26Kikai asasane aba kwi ngitatu samiamiange numi, ka twaumase numi ka Sakuthe, si twaumase numi ka Kaiwane, la karedele katwase acaicaicali. 27Lri pakatwasaku numiane puadaili turamuru papia tali dradha kavai Damasekuse.” Ku Tamatama ka abebeelengenga ki sanaka kwapingi amia kai pelaela.
Currently Selected:
Amuse 5: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
