2 Latalialalai 17

Talialalai ki swa Iseraylri ka Husea

1Saka tara 12 ka caili ku taatalialaladhane ki Ahaze ki swa Yuda, ku lalake ki Ila ka Husia atalialalai ki swa Iseraylri; kai lasu yakai Samaria rathudu tara bangate ka caili. 2Paiya kudra kai mathariri lu drele ku Tamatama, ai kaika paramia ki aswalala iniane kwini latalialalai ki swa Iseraylri ku ngilisianane. 3Ku tinuhika ki swa Asiria ka Salemanesere wakela kikaruburu iniane; ku Husia la amalebe iniane, luka caili la bulri tuswalupu baai ki Salemanesere. 4Yakai sakacaili, ku Husia siakawlu mwa kidrele ki talialalai ki swa Izipiti ka Su, kitubi iniane ku aparalubane, si kai picailinga bulri tuswalupu si baai ki swa Asiria. Ku Salemanesere la thingalenga, la mwa pwalra ki Husia, si emenge iniane.

Amaki ku swa Samaria

5Sakabilrilinga, ku Salemanesere wamwa kikaruburu ki swa Iseraylri, lringulu Samaria. Ikai ki talringulane ki saka taratulru ka caili, 6mialri ka saka tarabangate ka caili ku taatalialaladhane ki Husia, ku tinuhika ki swa Asiria#17.6 “tinuhika ki swa Asiria” talika mwasakadrusa ka sia Saregunge, ka amani ku mwacungulu ki Salemanesere. pamaki ki swa Samaria, la malra ki swa Iseraylri ravase pwa kavai Asiria, la pikai iniane ka cekele Hala, talikai Guzange ka adeethe kadravane Habure, si lacekele ki swa Media.

7Ku taamakiane ki swa Samaria ngwalai ki tapasalrivane ki swa Iseraylri ki Tamatama ka Twaumase lini. Ku Twaumase nawasangiluku liniane kidaili ki talialalai ki swa Izipiti, sangiluku liniane katwase Izipiti, kwini lalasu la katwasenga mwa ki drumane ka twaumase sukubu. 8Twalralrau ku kakwakudhane ki swakai kwini, ka amani kwidra pakatwase ki Tamatama picucubungu ki kawkawluini ka umawmase, la tarumara ku mailuku ki latalialalai ki swa Iseraylri ku lakakwakudhane. 9Ku swa Iseraylri paiya ku madha piapia iya liniane ki Tamatama ka Twaumase lini. Kwini lalasu yakai ki sanaka cekele, twalai ki tikiane ka cekele kela ki madrau ka cekele, ikai ki lalrelrelrege tudaane ku labiu, 10la ikai sanaka lrelrelrege, ikai sanaka lrilriane ki angatu, cegecege ku sadrengedrenge ka lrenege si nituumawmasane ka ababai ka twaumase ka Asera. 11Kwini lalasu twalralrau kwini ki pakatwase ki Tamatama ka maelane ka umawmase, ikai ki biu lama ku sangwalreme. Kwini lalasu arakai ku ngialisiane ku kakwakudhane lini dawlu ku lisiane ki Tamatama, 12kwini lalasu wamwa sukubu kwini madha sukusukubu iya ki Tamatama liniane ka samiamiange.

13Ku Tamatama nasiakawlu ki yuginsiaini kidrele pakipapawlringau ki swa Iseraylri si swa Yuda iya kai, “Katwasa ki ngialisiane ki kakwakudhane numi, paluludu ku padradrekaseli, ka amani kudra baaili ki cucungulane numi ku hulrice si pangukaili ki sasiakawluli ka layuginsia pakela baai numiane ka hulrice.” 14Ai kwini lalasu kai kialalra; kwini lalasu mararaamau ki cucungulane lini ku kawlukulane, kai kasalru si satalu ki Tamatama ka Twaumase lini. 15Kai lalasu malrase ku sabulrwane ki Tamatama, kai pasusu ku tamakaketeketaneini si cucungulane lini, kai thengete ku sapakipapawlringavane. Kwini lalasu matwase sukusukubu kudra kadrwa ku paluludane ka samiamiange, kwini lalasu la mialri ka kaika patengatenganenga. Kwini lalasu twapapalra ku kakwakudhane ki ngwadadethe liniane ka lakuni, kai kilalra ku drekase ki Tamatama, twalralraulringa ki maelane ka zuku. 16Kwini lalasu matwase si cilri kudra hulrice ki Tamatama patuelre, la darepe ku drusa ku kingi ka lwange si sukubu, la tusamiamiangenga ki ababai ka Asera; kwini lalasu wasukubu ki latariau, sukubu ki Baale ka twaumase. 17Kwini lalasu walama ki lalalake lini si patarumara ki maelane ka takisuswane ka twaumase, la kivavaga ki taraivigi si tarahandange. Kwini lalasu twavaeva ku kidremedreme, pia ku ngialisiane lu drele ku Tamatama, dawlu ku akalisianeini. 18Ku Tamatama la papia ki swa Iseraylri kalisi, patwalai cucubunguini pakatwase liniane, la kakathaanenga ku swa Yuda.

19Ai, ku mapapangale ki swa Yuda mialri kai pasusu ku hulrice ki Tamatama ka Twaumase lini; kwini lalasu twalralrau ku tarumara ki swa Iseraylri ku kakwakudhane. 20Lakamani ku cilri ki Tamatama ki sanaka swa Iseraylri, pathavungu liniane, malra liniane pwa ki alrima ki matiangeange ka badha, sakabilrilinga la malra patwalai ki cucubunguini pakatwase liniane pulatadre.

21Ku Tamatama sa pawvagainga ki swa Iseraylri si swa Yuda, ku swa Iseraylri la cegecege ki lalake ki Nibate ka Yerubuame atalialalai liniane. Ku Yerubuame la iluku liniane cilri ki Tamatama, la malra liniane pawthene ki maadrau ka pasalrivane. 22Kwini lalasu twapapalra ki Yerubuame, kai telrai apapelaelana kwini pasalrisalriwini, 23pakela sakabilrilinga ku Tamatama patwalai cucubunguini pakatwase liniane, mararaamau ku siaswalane ku tapangimianeini pangukai ki sasiakawluini ka layuginsia pakipapawlringau liniane. Ku swa Iseraylri la kiravase pwa kavai Asiria, la ikainga kavai.

Ku swa Asiria talwaela mwa Iseraylri

24Ku tinuhika ki swa Asiria la twalai Babilunia, Kutha, Ava, Hamathe, si Separevaime pataluela ki mapapangale mwa ki lacekele ki swa Samaria#17.24 “Samaria” kikai yai tangadrane ki kuni ka nagane, kikai taikaiyane kai ki pacase amani ki kadaengane palraelre ki swa Iseraylri., mubalrithi ki kiaravase ka swa Iseraylri. Ku swa Asiria wamalranga kai ki lacekele, ikaikai kwini. 25Sa taumwamwa kwini, kwini lalasu kai wasukubu ki Tamatama, ku Tamatama la sikawlu ki raiyungu pakace papacai liniane ku tapia. 26Yakai ku peaelaela ki tinuhika ki swa Asiria, kwini talwaela mwa ka Samaria ka swa Asiria kai wathingale ki kakwakudhane ki twaumase ki swakai kavai, lakamani ku sikawlu ki twaumase ki raiyungu kace papacai liniane. 27Ku tinuhika la drekase iya kai, “Malra kwini niravasane ku tangea ku barakalai pasiwlri, ikaiya kwini iya, lani kamani ku wabulru ku kakwakudhane ki twaumase ki swakai kwini.” 28Lakamani, yakai ku twalai Samaria kiravase ka barakalai la siwlri ikaikai Bithele, la bulrubulru ki mapapangale ku tapangimiamiane madu sukubu ki Tamatama.

29Ai, kwini talwaela mwa Samaria ka laumawmase la pacungucungulu darepe ku samiamiange, la malra kwini samiamiange pwa ki tudaane ki swa Iseraylri ka biu. Kwini vaeva ka zuku la makitu ikai ki taikaiyane lini ka cekele tusamiamiange: 30Ku swa Babilunia twasamiamiange ku twaumase ka Sukuthe Benuthe; ku swa Kuthe twasamiamiange ku Niregale; ku swa Hamathe twasamiamiange ku Asima; 31ku swa Ava twasamiamiange ku Nibehaze si Taretake; ku swa Separevaime la malra ki lalalake lini lama patarumara ki twaumase lini ka Aderemeleke si Anameleke. 32Kikai laumawmase pasilasilange sukusukubu ki Tamatama ka yabelenge, patwalai ki makaelaela pilri ku makaelaela kela abarakalai, ikai ki lrelrelrege ki labiu sukusukubu, si ikai kwini ngitalikaikaiyane liniane patarumara ku sapatarumarane ku waudriwdripi. 33Kwini lalasu wasukubu ki Tamatama, ai mialri singikaikai kudra kakwakudhane ki kuni lini sukubu kwini ki twaumase lini.

34Kai lalasu la kathadaalraneana pikai kudra sidrumane ku kakwakudhane; kai lalasu kai wasukusukubu ki Tamatama, la kai paluludu ku baai ki Tamatama ki lagagane ki Yakubu ku hulrice ka padradrekase. (Ku Tamatama naswanagane ki Yakubu pasi Iseraylri.) 35Ku Tamatama nakiaketekete liniane, cunu liniane iya kai, “Madha sukusukubu ki drumane ka twaumase, madha papiapia liniane pidruru si sukubu, madha marasikaikai liniane, la madha tulrisilrisi patarumara liniane. 36Kunumi musakena mukuludru nakwane ka Tamatama; naarakaiyaku ku maadrau ku puku iluku numiane katwase Izipiti. Kunumi papiaili pidruru sukubu, patarumara nakwane ku waudriwdripi. 37Kunumi kapalralrawthana paluludu patwalai kwini ki pacaseli baai numiane ka hulrice ka padradrekase. Kunumi madha sukusukubu ki drumane ka latwaumase, 38madha karimurimuru ku takiketeketaneli numiane. 39Kunumi musakena mukuludru nakwane ka Tamatama, ka Twaumase numi, lri palribulaku numiane kidaili ki alrima ki labadha.” 40Ai kwini laumawmase kai mwabangalre kilalra, pacungucungulwana sikakudhane kudra sidrumane ku lakakwakudhane lini.

41Kwini laumawmase wasukusukubu ki Tamatama, la mialri sukusukubu ki lasamiamiange lini; pakela kaikameane, ku lamwabaibalrithi liniane thadaalraneana ka ngimiyaiya kai.

Currently Selected:

2 Latalialalai 17: NDV

Highlight

Copy

Compare