Dutuuc 28

1Ɣɔn acuk poth wuuya, ke jɔlku nyic ne ye tuur cɔl Melita. 2Go kɔc nɔŋ baai ye guɛl goki wɔ nyuɔth piathden: cuɛnyki wɔ mac, ku lorki wɔɔk ke deŋ tueny ku kulor. 3Go Paulo duɔt de tim kuany, ku cuɛt mɛɛc, go keroor go bɛn bei ne alɛɛth de mac, ku kɛc cin, le thok nuat. 4Wen ŋem kɔc ke baai keroor ne nɔɔk ne yeciin, e ke jam neroth, Yi yerane kee ran ci ran dɛ nɔk, a kee poth ne piu yic, ku kacii Luk acii pɛl piir. 5Go Paulo keroor bɛt mɛɛc, ku cin tetok. 6Goki thɔɔŋ yi kabi but, ku kabi yuik thou: dhiacki ke thooŋki yiya, wen cik ye ŋem ke cin ke ci loi ne yeguɔp, e ke wɛɛr tɛŋ wen wei, jamki yi kee nhialic.

7Etene athiak kene dum ke ran diit de tur, ran cɔl Publio, yenekee leer wɔɔk le wɔ gɔɔŋ ne rieu ne akol keediak. 8Ku tɔ, nɛk wun nɛk thiu ku alɛɛth de guɔp: go Paulo lɔ, leer ku lɔŋ, ku kɛn yecin, go cɔk dem. 9Na re ke kɔc ke tur, e ke beer bɛc, goki bɛn, go ke cɔk dem eya: 10keeka eke ye wɔ miɔc apiath ne kajuec; ɣɔn wuu loonyku dhol, e ke tɛɛu kaŋ riɛi ka dɛk wɔ keek.

11Ɣɔn acuk pɛi ya diak, ke wɔ jɔl loony dhol, loku ne riandiit de Alekandariaic, cɔl Wɛɛtacuek, ne ceŋ thin ne mai. 12Goku lɔ kɛɛc piny Thurakoutha, ku dhiɛc wɔ thin ne akol keediak. 13Ku jiɛlku thin, welku roth, lo ɣetku Regio: ɣɔn miak ke yom de rɔɔk ber puɔt, ne kol dɛne ke wɔ jɛl ɣet Puteoli: 14le wɔ mɛɛthkuɔ yok thin, goki wɔ yɔɔk yi buk reer wɔne keek ne akol keedherou, ku jɔl wɔ ɣet Roma wuula. 15Te ciɛth wɔ wuuya, go mɛɛthkuɔ goki wɔ piŋ, goki wɔ loor, luurki wɔ Thuŋ de Apio ku Luek Keediak: ɣɔn ye Paulo ye ŋem ke, ke lec Nhialic, ku jɔl ŋeeny.

16Wen cuk ɣeet Roma, ke Paulo ke cɔk rɛɛr peei kene lathker ye yen tiit.

17Ɣɔn aci nin ya diak, ke cɔl roordit ke Judai: ɣɔn yi cik gueer, e ke yookke, Ye mɛɛthcie, an ye ran ken kerac luɔi kɔc ku ka ke kuarkuɔ, ku an ci gam ne Jeruthalem ne muɔk tɛɛue ɣa ne Romai cin: 18goki ɣa caar, ku nɔŋki piɔth bik ɣa lony, ke cin ke thuɔu an. 19Ku gueel cene ɣa guɛɛl ne Judai acɔk ɣa ɣoi Kaithar; ku kacin ke lan jurdie guɛɛl. 20Yen keekake kaalaŋ an ke week, bak ɣa ŋem, ku jamka wene ɣɛn: ŋath de Yithrael, yenekee cɔk ɣa rek ne yejonhe. 21Goki yɔɔk, Yi cin thon cuk kap ne bɔ ne Judaya ne kaakuke, ku cin mɛthedɛn ci wɔ ben lɛk, ciir wɔ wel rac ne yin. 22Ku wɔ nɔŋ piɔth buk ke ye tak piŋ: yereme kee rem nyicku ne ci kuɛɛth ne bɛi yic kedhia.

23Goki lɛk kol de rɔm, ku gueerki ɣon tɔ en e ke ye kɔc juec; go wel ciir, lek ke ne ceŋ de Nhialic, ku kuem kenhiim ka ke Yecu, ne looŋ ke Mothe ku ne nebii, miakdur agut thei. 24Go kɔk ka cike luel gam, ku jai kɔk. 25Ɣɔn yi cik roth gam, e ke jiɛl, ke Paulo ci wɛt tok luel, Ye Jɔŋdiit Lajik ee kuarkuɔn lɛk apiath ne Yithaya nebi, 26jiɛm,

Ye lɔɔr enɔŋ yejure, luel,

Wu ya na ye piŋ, e kabak piŋ, ku kacak bi cok ne nyic;

Ku ŋem, abak ŋem, ku we ci bi cok yin:

27Piɔn de yejure ee piɔn ci riɛr,

Ku kaa lɔ yith tac,

Ku kaa kenyin niɛn;

Kɛlke bik ŋem ne kenyin,

Ku bik piŋ ne keyith,

Ku mukki ne kepiɔth.

Ku bik kepiɔth bɛr wel,

Ku ba ke cɔk dem.

28Yen nyiɛcka, yeluaŋ de Nhialice aci tuɔc tuc Juurkɔk: bik piŋ eya. 29Ɣɔn ye ci yekene luel, ke Judai e ke jiɛl, ku rirki kenhiim ne riɛr dit.

30Go run thol keerou ɣon ci ɣap, ye ɣɔɔcic, ku ye kɔc nyuɔc kedhia, kɔc ye ye bi neem, 31ye ke lɛk ne ceŋ de Nhialic, ku weet keek ne ka ke Bɛnydit Yecu Kritho ne piɔn ŋɛɛny, ku cin ran gel en.

Currently Selected:

Dutuuc 28: LEKJOT

Highlight

Compare

Copy