Dutuuc 24

1Na ɣɔn aci akol keedhiec thok, ke bɛny diit de ka ke Nhialic Anania ke bɔ kene roordit kɔk, ku ducir ye wel ciir cɔl Tertulo; goki Paulo guɛɛl ne gabana nom. 2Na wen ci Tertulo cɔɔl, ke gɔc Paulo ne gueel, jiɛm,

Ye wɔ ye naŋ dɔɔr piath ne yin, ku nyinydu ee karɛc ke yejure jɔc, 3keeka yuukue loom ne nyindhia ku ne ɣan kedhia ne lɛc yi wɔ yi leec, yin Pelik piath areet. 4Yin caa dhal ne wel juec, yin laŋ ba welkuɔ liek piŋ ke ne kac kɔc yin piɔu. 5Yerane acuk yok ne ye ran rac, ee Juda cuɔth piɔu ebɛn ne piɛny ebɛn, ee ran diit de rem de Nadharani: 6ee yekalu them ne nyuun: goku dɔm, ku nɔŋ wɔ piɔth buk luɔkluk ne looŋkuɔ. 7Go bɛny diit de rɛm Luthia go bɛn, ku dom bei ne wɔcin ne riɛr dit, ku yook kɔc eke gueel e bik bɛn ne yinom: 8ba caar ne guɔpdu, ba yith nyic, yith ke ka eke gueeleke yen kedhia. 9Go Judai goki mat ne yegueele, yi kayinya.

10Go Paulo nieu ne gabana bi bɛr ciir, go jam,

Ye an kony rɔt ne yinom emane ne piɔn mit ne nyiny nyiɛc an yin, ke yin ye duluŋ de yejure ne run juec: 11yin leu duɔr can lɔ duur Jeruthalem ne nyic, nin aaken guɔ ya thiɛr ku rou nin eke la an ke: 12aaken an yok ne yekalu, ku ne luek yic luek ke gueer, ku ne bɛi yic kedhia, yokki an ke an teer wel wɔ raan ku ca kɔc cɔk guer a. 13Aace yi leu ne guut nyin ne gueel guel kek an. 14Kene eka ba gam ne yinom, ya ɣan ye Nhialiny de kuarkuɔ door ne Dhol yiki cɔɔl awac, ku gam kaŋ kedhia ka cike gɔɔr ne looŋ yic ku ne nebii: 15ku an nɔŋ ŋɔth de Nhialic, ci man yen tɔ ke kɔc gueel a, bii jon de rɔt de kɔc ci thou ben ya tɔ, kɔc rac ku kɔc lajik. 16Ku yeneka thɛm eya, bi nyiny de ɣapiɔu ya piath nenɔŋ Nhialic ku ne raan. 17Na ɣɔn ca run juec thol, ka bɔ ba miɔcdie ben yiɛn jurdie. 18Goki ɣa yok ne yeluɔineic ne yekalu ku ca waak, ku cin kɔc guer ɣɛn ne ajaak: kɔc ke Judai ke Athia aake tɔ — 19te nɔŋ en ke e gueele ɣɛn, e ke te cik bɛn ne yinom eene, ku gueelki ɣɛn. 20Cɔk luel keekɔcke ne gupken, lan nɔŋ en kerɛɛc cik yok enɔŋ an, waar kaac an ne luk nom, 21te cen ber ya wɛt waar ca luel, ke an kaac ne keciɛl yic, Ya jon bii kɔc roth bɛr jɔt ne thouic, yeneka cɔk ɣa car ne wenhiim ne yekole.

22Go Pelik, ran nyic Dhol areet, go ke juɛr, yook ke, Ye na ci Luthia bɛny diit de rɛm bɛn, ke an bi keduɔn luk. 23Ku yook bɛny de rem bi muk, ku cii muk ne muŋ rir, ku ce pene mɛɛthke bik kede ya loi.

24Na ɣɔn aci akol kɔk lɔ, ke Pelik bɔ kene Duruthila tiŋde, nyan Juda, ku thɔnki Paulo, bik welke bɛn piŋ ne gam de Yecu Kritho. 25Go ye teer wel ke luɔi lajik, gel de rɔt, ku luŋ bi bɛn, go Pelik riɔc, a jiɛm, Ye dhuɔkne tedu loko; yin ba bɛr tuɔc ne kol de ɣapiɔu ca tak. 26Ee ŋath miɔc bii Paulo ye miɔc ne weu: yenekee yen e cɔɔl ne thon, bik gɔk ke yen. 27Na ɣɔn aci run keerou thok, ke Pelik looke nyinde ne Porukio Petheto; ku nɔŋ piɔu bi Judai piɔth ya miɛt ne yen, yenekee nyiɛŋe Pelik nyiɛŋ en Paulo ɣon de dom.

Currently Selected:

Dutuuc 24: LEKJOT

Highlight

Compare

Copy