Dutuuc 23

1Go Paulo kecigueer ɣoi, ku jiɛm, Ye wɛɛt ke awa, an ceŋ ne Nhialic nom ne piɔn piath agut ci emane. 2Go Anania bɛnydiit de ka ke Nhialic kɔc kaac ne yelɔɔm yɔɔk bik maŋ thok. 3Go Paulo yɔɔk, Ye yin bii Nhialic maŋ, yin pany ɣer biyic: nyuɔce ba a luk ne looŋ ke Nhialic, ku yook yook yin kɔc bik ɣa maŋ yene ce cath ke looŋ? 4Go kɔc kaac kec goki jam, Yi laate bɛnydiit de ka ke Nhialic? 5Go Paulo jam, Ye kee kuɔc, wɛɛt ke awa, lan yen bɛnydiit de ka ke Nhialic: ee gɔɔr, Ya duɔne bɛny de kɔcku ye laat. 6Na ŋem Paulo biak dɛ ne ye Thadoka, ku baŋe ne ye Paritha, ke cot ne duutic, Ye an ye Paritha, ku an ye wen de muɔny Paritha: ŋath jon bii kɔc roth bɛr jɔt ne thouic yeneka cɔk ɣa car. 7Go teer bɛn ne kaam de Parithai kene Thadokai wen cen ekene luel yeya: ku tek duut yeyic. 8Thadokai aaye jam yi ce kɔc roth beer jɔt, ku cin malaika, ku cin tip; ku kaaye Parithai ke gam kedhia. 9Go ajaak tɔ: go dugɛɛr ke baŋ de Paritha roth jɔt, ku teerki, jamki, Yi kacin kerɛɛc cuk yok enɔŋ yerane: na ci tip jam kene yen, ka ye malaika, ke ŋo yide? 10Ana ye teer dit ye bii, ke bɛny diit de rɛm riɔc lan bik kek Paulo rɛt, go lathkeer yɔɔk bik lɔ piny, bik lɔ wuɔth bei enɔŋ keek, ku bik laar ne kalic.

11Ɣɔn ɣɔkɔu ke Bɛnydit ke bɔ, bii ku kɛɛc e elɔɔm, ku yook, Ye duɔne piɔu lɔ rirwei: acit man cin kɔc kan lɛk ne ɣɛn ne Jeruthalem, yenekee lek bin kɔc bɛr lɛk ne Roma.

12Ɣɔn miak ke Judai e ke mɛɛt roth, macki kethook kueŋki roth yi cik ciɛm ku cik dek, te ŋoote Paulo ke kene guɔ nɔk. 13Aawɛr thiɛrŋuan kek kɔc ci roth meel. 14Goki bɛn enɔŋ banydit ke ka ke Nhialic ku roordit, bik ku jamki, Yi wɔ ci roth kueeŋ ne kueŋ dit, wuu kacin kethin buk thiep, te ŋoot wɔ ke wɔ ken Paulo nɔk. 15Yen week wene buluuk, yɔɔkka bɛny diit de rɛm, bi cɔk biie piny ne wenhiim, ye nom ke bak ben cok ne lukluk, ku buk tiɛt dholic buk nak wei, ke ŋoot ke ken guɔ ɣeet. 16Go wen de nyankene e Paulo go piŋ ne thianic, go lɔ ne kalic, le lɛk Paulo. 17Go Paulo go bɛny de rem cɔɔl, ku yook, Ye laare yeranthine nenɔŋ bɛny diit de rɛm: anɔŋ keden bi lɔ lɛk e. 18Go laar leer enɔŋ bɛny diit de rɛm, ku yook, Ye Paulo, ran tɔ ɣon de dome, ee ɣa cɔɔl, ku yook a ba yeranthine bɛi enɔŋ yin, ye nɔŋ keden bi lɛk yi. 19Go bɛny diit de rɛm dɔm ciin, ku leer kec te cin kɔc, lee thiec, Ye yeŋo nɔŋ yin piɔu lek a? 20Go jam, Ye Judai kaa roth maat bik yi thiec ba Paulo cɔk biie piny ne buluuk nhiim miak, ye nom ke bik ben cok ne lukluk. 21Yen duk pɛl: atiit kɔc wɛr thiɛrŋuan ne thianic, kɔc ci roth meel, yi cik ciɛm ku cik dek, te ŋoot kek e ke ken Paulo nɔk: aajɔl wɛtdu tiit emane. 22Go bɛny diit de rɛm go ranthi jal cɔk lɔ, ku yook, Ye duɔne cɔk piŋ ran dɛ ye lek cin e lɛk a. 23Ku cɔɔl bany ke rɛm keerou, ku yook ke, Ye cakka lathkeer keethiɛrnyɛny rou lɔ Kaithareia, ku kɔc ke ajɔŋkor keethiɛrdherou, ku kɔc ke tɔɔŋ keethiɛrnyɛny rou, ne thaa dheŋuan kau. 24Ku beer ke yɔɔk bik ajɔŋkor bɛi, bi Paulo lɔ ne kekɔth, ku bik laar yinki Pelik gabana. 25Ku gɛɛr thon yela,

26Ye Kulaudio Luthia yeneka thiec Pelik gabana piath areet. 27Yerane ee ci dɔm ne Judai, ku derki yi nakki, guɔ bɛn wɔne lathkeercie ku luak, ne piŋ can e piŋ ke ye Roma. 28Ku naŋ piɔu ba ke e gueele yen cok ne nyic, guɔ bɛi piny ne buluuk nhiim: 29guɔ yok ne gueele ne looŋ ke gupken, ku cin ke yɔk bi e cɔk thou ku rek. 30Te cene ɣɛn nyuɔth mɛɛt ci kɔc roth maat ne yen, guɔ tuɔc enɔŋ yin, ku yɔɔk kɔc eke gueel e eya, bik lɔ jam ne yinom.

31Go lathkeer goki Paulo loom, ne luɛl enhia cene e luel, ku leerki Antipatiri wɔkɔu. 32Ɣɔn miak ke nyiɛŋki kɔc ke ajɔŋkor, ku dhukki ne kalic: 33Ɣɔn yi cik ɣet Kaithareia, e ke gɛm thon, ku Paulo eya, yineke gabana. 34Ana ye ci thon ŋem, ke thiec, Ye ye ran e pinyo? Go piŋ ne ye ran de Kilikia, 35go yɔɔk, Ye wɛtdu aba piŋ, te cii kɔc eke gueel yin bɛn. Ku yook kɔc bik mac ɣon diit de Kerod.

Currently Selected:

Dutuuc 23: LEKJOT

Highlight

Compare

Copy