Dutuuc 21

1Ɣɔn wuu cuk ke waan, ku ciɛthku riɛi, ke wɔ lɔ ne dhol lacith loku Koth. Ɣɔn miak ke wɔ lɔ Roda, ku beerku lɔ Patara. 2Goku riai yok thin, rian ye bar tɛɛm kɔu Poinike, kɛɛc wɔ thin, ku loku. 3Ana wuu ɣetku te yene Kupurio ŋem, ke wɔ nyiɛŋ cam wei, ku leuku Thuria, ku kɛɛcku piny ne Turo, pan yene riai napic thin. 4Goku kɔcpiocke yok thiin, ku dhiɛc wɔ thin ne akol keedherou. Goki Paulo yɔɔk ne Jɔŋdit, yi kace Jeruthalem kɛcic. 5Na ɣɔn ci akol thok, ke wɔ jiɛl loonyku dhol. Goki wɔ ruac kedhia kene diarken ku mith, ɣeetki wɔ ne biak biyic. Goku wɔnhiɔl tuk lɔŋku, 6ku tɔŋku roth; ku kɛɛcku riɛi, ku dhukki bei.

7Ɣɔn wuu cuk kaam de Turo teek, ke wɔ ɣet Potolemai, goku mɛɛthkuɔ thiec, ku tɔku wɔne keek ne kol tok. 8Ɣɔn miak ke wɔ jiɛl ɣetku Kaithareia. Goku lɔ ɣon de Pilip duluel de thook piath, ran de kɔc keedherou: ku ceŋku wɔne yen. 9Yerane ee nɔŋ nyirke keeŋuan, e ke ye dhueec, ku yiki wel luel. 10Ana wuu tɔku thin ne akol juec, ke nebi bɔ ne Judaya, ran cɔl Agabo, 11bii enɔŋ wɔ, bii ku dɔm laŋ de Paulo, ku der e ecin ku yecok, ku jiɛm, Ye kaluel Jɔŋdiit Lajik yela, Ye Judai kaabi ran de yelaŋe duut ci yemane, ku bik taau ne Juurkɔk cin. 12Ana wuu cuk keekake piŋ, ke wɔ lɔŋ Paulo wɔne kɔc ke baai kɛlke bi lɔ Jeruthalem. 13Go Paulo dhuk, Ye yeŋo luɔika wuɔya, dhiɛu we cɔk we ɣa wupic? An ce duɔt jiɛi, agut thou eya ne Jeruthalem, ne rin ke Yecu Bɛnydit. 14Kuemku nom, ku cii gam; goku puɔl, ku luelku, Wuu ne bii Nhialic loi ne piɔnde.

15Ɣɔn ye keeakolke yi cik thok, ke wɔ nɛp, ku loku Jeruthalem. 16Go wɔ ruac ne kɔc ke Kaithareia, kɔcpiocke, ku biki kene ran cɔl Manathon, ran de Kupurio, ran thɛɛr pioce, bii wɔ lɔ ceŋ enɔŋ en.

17Ɣɔn wuu cuk ɣet Jeruthalem, ke wɔ lorke ne mɛɛthkuɔ ne piɔth mit. 18Ɣɔn miak ke Paulo lɔ enɔŋ Jakob kene wɔɔk, ku tɔ roordit thin kedhia. 19Ɣɔn ye ci ke thiec, ke cir kaŋ cok ka ci Nhialic ke loi ne Juurkɔk yic ne luɔide. 20Ana yi cik ke piŋ, e ke lec Nhialic; ku yookki, Yi nyic, wanmaathda, kɔc juec aatɔ ne Judai yic kɔc juec ci gam, ku kaamuk looŋ areet. 21Ku kaacike lɛk ne yin, ya piɔce Judai tɔ ne Juurkɔk yic wu pɛlki looŋ ke Mothe, ku cik mithken beer cɔk ye aŋuɛlɛɛi, ku cik beer ya cath ne looŋ yic. 22Yen buk ŋo loi? Kabik piŋ ke yin ci bɛn. 23Yen loi yekelekku yine. Wɔ nɔŋ kɔc keeŋuan, kɔc ci roth week ne luɔiden; 24lom ke ku cɔk rɔt ɣer we keek, ku ɣɔc kaken, bik kek kenhiim leu ne muɔt. Yeneka bii kɔc kedhia ye nyic e ke cie wel yith, kek wel cik piŋ enɔŋ yin; bik nyic ke yin cath apiath, ku muk looŋ. 25Ku Juurkɔk ci gam, aacukke gɔɔr lukku luk, bik roth ya pɛn ka ye nak eidool, ku riɛm, ku ke ye dec, ku bɛɛl. 26Go Paulo keekɔcke loom. Ɣɔn miak ke cɔk rɔt ɣer ke keek, ku leer yekalu, ku lek kɔc thok cii ɣɛɛr de rɔt thok enɔŋ keekɔcke, ku dhiɛc thin agut thok thooke kocden de roth kedhia.

27Ɣɔn ye akol keedherou yi cik duɔr thok, ke Judai eke bɔ ne Athia, e ke ŋem en ne yekalu. Goki dun de kɔc cuɔth piɔu, ku dɔmki, 28ku cotki, Yi we kɔc ke Yithrael, kuɔnyka wɔɔk. Yenekee kene ye ran ye kɔc piɔc kedhia ne piny ebɛn, yejure aye lom, ku looŋ ku yeluaŋe: ku kee Giriki bɛi yekalu eya, ku yetelɔjiŋne aci cɔk rac. 29Aake ci Toropimo, ran de Epetho, kan ŋem kene yen baai, goki cɔɔl yi ye Paulo e leer e yekalu. 30Go baai rɔt liap ebɛn, ku riŋ kɔc netok, ku dɔmki Paulo, ku thelki bei ne yekalu: ku dɔcki thook thiɛk. 31Ku kɔrki bik nɔk, ku ci wel lɔ enɔŋ bɛny diit de rɛm, ya Jeruthalem ee rɔt liap ebɛn. 32Go lathkeer ku banyken dac loom, ku riŋki te de kɔc. Ana ye kɔc yi ŋemki bɛny diit de lathkeer, goki Paulo puɔl ne dui. 33Go bɛny dit ɣet tethiɔk, ku dɔm, ku cɔk rek ne joth keerou, ku thiec ye yeŋa, ku ci ŋo loi. 34Go kaka ya coot ne cɔt toŋden, ku cot kaka ne cɔtden, ne yen ye duut. Go cuɔk piŋ apiath ne ajaak de kɔc, go cɔk leere ne kalic. 35Ku na ci ye ɣɛɛt dhol de yith, ke jɔt lathkeer ne piŋ diit de duut. 36Ku kuany cok ne kɔc juec, ku leki e ke cot, Yi nakka.

37Na ci Paulo duɔr laar ne kalic, ke yook bɛny dit, Ye kanɔŋ kedien ba lɛk yi. Go thiec, Ye nyic thoŋ de Giriki? 38Cie yin ran de Yijep ɣɔn coth kɔc piɔth, ku laare kɔc keebianabur ŋuan roor, kɔc ye kɔc nɔk? 39Go Paulo jam, Ye an ye Juda, de Tartho de Kilikia, an cie ran de pan koor; yin laŋ, ya ne an jam wɔ kɔc. 40Ɣɔn ye ci ye gam, ke Paulo kaac dhol de yith, ku nieu kɔc ne yeciin. Go piny lɔ diu, ku yook ke ne thoŋ de Eberuu, jiɛm,

Currently Selected:

Dutuuc 21: LEKJOT

Highlight

Compare

Copy