PITAS 6
6
Pinyibakan adi Bŭkŭn
1Mbŭh kah kuu bijanji an tanggong utang daya, nak? 2Mbŭh kah kuu dog nakap sitagar pinganang adŭp mu, tikapung bada janji adi adŭp mu ndai? 3Kambŭi simŭnŭ, nak, kuu mbŭh darŭm kuasa daya anŭ, pak simuti inŭh kuu dapŭd pirupas adŭp mu: rikas di ka yŭn-i, ka mite ayŭh pirupas kuu. 4Dŭhnyah kuu bŭŭs puan kah rŭŭ-paya. 5Ruah so jarat anŭ mun manuk bait mun peyu rupas so pingasū.
6Daya tibanga patut birajar so gaya pimudip subi. 7Ngara dŭh biyŭn pinguru, pingubak, puan kah pimritah, 8pak ngara nguruk pinguman di tipuh paras, sidia yŭn tipuh madud. 9Ndŭg sinde daya tibanga anŭ guring? Sinde ayŭh re makat so ambok-i? 10#Pit 24.33-34 “Aku re mŭnyŭp nyitiro,” ayŭh nang; “Aku re kŭkŭn tangan ku ka guring nyitiro.” 11Pak sitadŭn ayŭh bŭŭs, ayŭh re dog nyatŭk udip sirata adi re nyerang ayŭh keya ka pirupak adi bisinyata.
12Daya ginaka, adi dŭh biguna, kadong daya digiti diginŭ. 13Ngara main batŭh ka main tangan ngga nipu kuu, 14buang darŭm pikir-i adi bidikok, bipikir kayuh adi arap, kiruyok daya digiti diginŭ. 15Sabab anŭ, pinyirusag re gŭgŭh nyatŭk ngara, ka ngara re binasa ndŭg ka kabŭs.
16-19Agi ju masam kayuh adi TUHAN tiru ka dŭh an tandah:
udip gambung,
baba adi kadong,
tangan adi an siŭ daya adi dŭh sarah,
pikir adi mirasang pingandai ginaka,
kaja adi rikas ndai kayuh arap,
Saksi adi ari nggen taksi kadong,
daya adi ndai kaii di dupan jerā.
Pinyibakan pasar Tanggah
20Ndai anŭ adi sama mu kidaan di kuu, nak, ka dŭhnyah kambŭt ajar so sindŭ mu. 21Ari nŭh ingat pinganang ngara, nyikŭn nŭh darŭm atin mu. 22Ajar ngara re nguru kuu darŭm pimanu mu, grindung kuu singarŭm, ka pitayan kuu sandu. 23Ajar ngara inŭh prita adi jawa; pinganang ngara inŭh adi dapŭd ngajar kuu munki kuu patut udip. 24Ajar ngara dapŭd pijo kuu so dayung adi arap, so pinganang nyikuro adi ruah so baba sawŭn daya. 25Dŭhnyah ripong di pinyiramus ngara; dŭhnyah rakat bada kidap batŭh ngara. 26Daya tungang bayar dayung sundar ngga rega ndi baru ruti, pak tanggah ayŭh re bayar ngga asŭng adŭp-i. 27Bisa kah kuu taban apui di sudo mu ka piraka mu dŭh sau? 28Bisa kah kuu panu di tunduh bam apui ka kaja mu dŭh raus? 29Mun anŭ gŭh bisā-i nŭŭh bŭŭs ngga sawŭn daya. Asi asi adi ndai simŭnŭ re sangsara. 30Daya dŭh ngamun pinaku kambŭi ayŭh naku pinguman darŭm ayŭh sibŭrŭk;#6.30 Daya dŭh ngamun...sibŭrŭk; puan kah: Dŭh kah daya ngamun...sibŭrŭk? 31pak kambŭi ayŭh dog dapŭd, ayŭh dŭh siŭn dŭh bayar ju rupet rabis; ayŭh dŭh siŭn dŭh gati ngga sopŭrŭg kayuh adi-i biyŭn. 32Daya adi tanggah dŭh biyŭn pikir. Ayŭh pirusak adŭp-i. 33Ayŭh re dog pimangŭh ka dog pukong; dŭn-i re adu adu arap. 34Baji banŭh daya re bisā di tika ayŭh mise; ayŭh re raru baji buang mating atin masi-i kan ayŭh maras dendam. 35Ayŭh dŭh an trima pinyibayar; mating kayuh re dapŭd nyikadud atin baji-i.
Currently Selected:
PITAS 6: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
