PITAS 24
24
Pinganang Bijak adi numbor Simŭng Prii
1Dŭhnyah sina di daya adi arap, ka dŭhnyah suba bijerā ngga ngara. 2Ngara kaŭs-i bipikir an nyusah daya; tiap kari ngara kuka baba-i marar agi adŭ daya adi kinaman.
Pinganang Bijak adi numbor Duwŭh Puru
3Ramin arŭn dog pijog di tunduh pimŭnŭs pinyibijak ngga pinyimirati. 4Di yŭn agi pinyipuan, birit dog ngisi ngga kayuh adi brega ka adi grua.
Pinganang Bijak adi numbor Duwŭh Puru-Ndi
5Pinyibijak kana dŭ so pinyibake; sawŭ, pinyipuan inŭh biguna dŭ so pinyibake. 6Amai sawŭ, kuu dŭh siŭn dŭh bisatur nakit diŭ so kuu matak biperang, ka kambŭi kuu trima bagŭ pinyitayan, kuu re biyŭn rabis bagŭ aran ngga mu re manang.
Pinganang Bijak adi numbor Duwŭh Puru-Duwŭh
7Pinganang bijak inŭh raru tŭrŭp re daya adi budo mirati. Ngara dŭh biyŭn kayuh re-i nang kan kayuh adi biguna dog kirakar.
Pinganang Bijak adi numbor Duwŭh Puru-Taruh
8Kambŭi kuu ari bisatur an ndai kayuh adi arap, kuu re trima dŭn arap daya adi pimito. 9Kayuh adi daya adi arap pikir inŭh kayuh adi bidosa. Daya adi kaŭs-i ngamun daya, inŭh tiru daya kiris.
Pinganang Bijak adi numbor Duwŭh Puru-Pat
10Kambŭi kuu ramah darŭm susah, kuu taŭn sawŭ ramah.
Pinganang Bijak adi numbor Duwŭh Puru-Rimŭh
11Nyiramat daya adi dŭh sarah kan ngara re dog nggen ukum kabŭs. 12Kuu bisa nang anŭ dŭh har mu, pak Tapa puan ka kiris isi atin mu. Ayŭh nyibatŭh kuu; Ayŭh puan. Ka Ayŭh re maras kuu nanyam kraja pingandai mu.
Pinganang Bijak adi numbor Duwŭh Puru-Nŭm
13Nak, man ju#24.13 man ju: tingga di susud bang piminyu ngga rati-i di punok buk ati. banyis, amai ju banyis inŭh kana. Ka nimun ju banyis so sarin banyis inŭh nyibanyis di jura mu, 14kuu bisa puan ngga tatu-i pinyibijak inŭh kana yŭn simangi. Tambit pinyibijak, ka kayuh adi kuu gruwŭn an dapŭd dŭh re piasa kuu jŭ.
Pinganang Bijak adi numbor Duwŭh Puru-Ju
15Dŭhnyah mun daya adi ginaka adi bipekat an mirupak daya adi kana puan kah sirapas ramin arŭn ngara. 16Munki masam daya adi kana rabu, ngara ari makat; pak pinyirusag nyatŭk daya adi ginaka.
Pinganang Bijak adi numbor Duwŭh Puru-Mai
17Dŭhnyah gaŭn kan pinganyu mu dog nyatŭk pinyusah, ka dŭhnyah angan kan ngara rabu. 18TUHAN re tatu puan kambŭi kuu tawŭh, ka Ayŭh dŭh suka urah adi mun anŭ; ka dŭh meh ngukum ngara.
Pinganang Bijak adi numbor Duwŭh Puru-Prii
19Dŭhnyah tandah daya arap nyusah kuu; dŭhnyah sina di ngara. 20Daya ginaka re rikas mating; ngara dŭh biyŭn pingarap yŭn pimudip ngara jŭ.
Pinganang Bijak adi numbor Taruh Puru
21Stabi ka taru di TUHAN, nak, ka stabi di raja. Dŭhnyah bigaur ngga daya adi rawan ngara; 22daya adi mun anŭ agi andu-i re binasa. Puan mu kah pinyirusag adi Tapa, bait raja, bisa ndai?
Pinganang Bijak adi Bŭkŭn
23Daya bijak agi gŭh nang kayuh ati:
Dŭh-i batur akim marad di kraja-i. 24Kambŭi ngara kadŭn daya adi sarah dŭh sarah, ngara re dog mangu ka dog tiru barang naan daya. 25Akim adi ngukum daya adi sarah, re mujur darŭm pimudip-i ka dapŭd dŭn kana.
26Pinyinam adi batur inŭh tandā jerā adi sawŭ.
27Dŭhnyah pijog ramin mu sibayuh ŭmŭh mu mbŭh jadi. Dŭhnyah pijog rawang mu sibayuh kuu mbŭh pandai nyiran adŭp mu.
28Dŭhnyah nggen taksi rawan daya ngga sabab adi dŭh patut, puan kah kadong pasar daya anŭ. 29Dŭhnyah nang, “Aku re ndai di ayŭh kayuh adi ayŭh ndai di aku! Aku re maras ayŭh!”
30Aku panu mutas ŭmŭh ngga teya anggor daya adi tibanga ka budo. 31Sopŭrŭg-i mbŭh birasu, puno ngga tŭngŭn reja ka uduh. Sindung batuh adi maning-i mbŭh rubuh. 32Aku tingga, bipikir, ka birajar so dieh: 33#Pit 6.10-11 Mŭnyŭp ka bŭŭs kambŭi kuu raan. Dakŭp sudo mu ka rŭŭ-paya nyitiro, 34pak darŭm kuu bŭŭs udip sirata re nyerang kuu mun pirupak adi bisinyata.
Currently Selected:
PITAS 24: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
