PITAS 23
23
Pinganang Bijak adi numbor Nŭm
1Kan kuu guru re man ngga daya bās, dŭhnyah kambŭt asi daya anŭ.#23.1 dŭhnyah kambŭt...anŭ; puan kah: ngatin ani anŭ adi di jawin mu. 2Kambŭi kuu daya adi pirusong, nakit ngga adŭp mu munki kuu man. 3Dŭhnyah pirusong ngga pinguman adi ayŭh ngidang; kadŭ ayŭh an kudog kuu.
Pinganang Bijak adi numbor Ju
4Kuu an sukup bijak dŭh pijera adŭp mu gruwŭn an kaya. 5Duit mu bisa miyap ngga ndi kidap batŭh, mun kah duit anŭ biyŭn urad ka mikabur bu mun beuh.
Pinganang Bijak adi numbor Mai
6Dŭhnyah man ayō daya adi bidagis bait pirusong man pinguman sidi anŭ adi ayŭh ngidang. 7“Bah nambah,” ayŭh nang, pak dŭh ngga siabo atin-i. Pinganang-i mandis pak isi atin-i bŭkŭn. 8Kuu re nguta kayuh adi kuu man, ka sopŭrŭg pinganang puji mu re jadi au-tarun.
Pinganang Bijak adi numbor Prii
9Dŭhnyah minyu bijak ngga daya adi budo; ayŭh dŭh biguna di pinganang mu.
Pinganang Bijak adi numbor Simŭng
10Dŭhnyah ngana tandā baat adi amba puan kah sirapas tana anak tumang. 11TUHAN adi bikuasa inŭh pingibān ngara, ka Ayŭh re turung ngara rawan kuu.
Pinganang Bijak adi numbor Simŭng Ndi
12Nakit dingah gurū mu ka birajar sikiang kuu dapŭd birajar.
Pinganang Bijak adi numbor Simŭng Duwŭh
13Dŭhnyah abah disiplin anak. Pasut dŭh re siŭ ngara. 14Sibatur-i, kuu nyiramat asŭng ngara.
Pinganang Bijak adi numbor Simŭng Taruh
15Nak, kambŭi kuu bijak, atin ku gaŭn. 16Aku re mingangŭn kan aku dingah kuu minyu pinganang bijak.
Pinganang Bijak adi numbor Simŭng Pat
17Dŭhnyah sina di daya adi bidosa; bada atin taru ka atin stabi di TUHAN biguna dŭ darŭm pimudip mu, 18isa jŭ pimudip mu mujur.
Pinganang Bijak adi numbor Simŭng-Rimŭh
19Dingah, nak, kuu an bijak ka an nakit bipikir pasar aran pimudip mu. 20Dŭhnyah bigaur ngga daya adi nok raru bagŭ wain puan kah daya adi gira man. 21Daya pimabuk ngga daya adi pirusong re jadi daya sirata. Kambŭi kuu man ka bŭŭs adŭ, kuu re rikas pakai jamut ndu piraka.
Pinganang Bijak adi numbor Simŭng Nŭm
22Dingah pinganang pitayan sama mu; kambŭi dŭh sabab ayŭh kuu mating di ong. Kan sindŭ mu mbŭh minyamba, dŭhnyah dŭh piduri ayŭh.
23Pinyawŭ, pinyibijak, ajar, ka pinyimirati; sopŭrŭg-i bisa dog miris pak raru brega re nŭŭh jua.
24Sama daya gaŭn kan anak-i tŭnggŭn. Kuu bisa mingangŭn yŭn anak adi bijak.
25Bada sama ngga sindŭ mu mingangŭn di kuu; bada sindŭ mu adi biranak kuu sanang asŭng.
Pinganang Bijak adi numbor Simŭng Ju
26Nakit ngatin, nak, ka tunda suto danding pimudip ku. 27Dayung sundar ka dayung adi arap mbŭh keya ka jarat adi bisa siŭ. 28Ngara kajŭn kuu mun pirupak ka mbŭh bada bagŭ dari bikandak.
Pinganang Bijak adi numbor Simŭng Mai
29-30Puan mu kah ani jadi di daya adi daras nok wain ngga nok adi bisā adi bŭkŭn. Daya adi mun anŭ jera buang sangsara pimudip-i ka ari mingungut. Batŭh-i bireh ka pŭrŭng ganan-i bagŭ tawan; pŭn ka anŭ inŭh kayuh adi dapŭd-i mangān. 31Dŭhnyah bada wain piripong kuu, sunggu-i wain adi bireh ka adi grua, sunggu-i mikirib darŭm saker mu, ka sidi dog tŭrŭn. 32Andu jawa ndi kuu re kinyam adŭp mu mun adi ko dog nyingŭt jippŭh adi bisā. 33Batŭh mu re kiris kayuh saruh, ka kuu re dŭh dapŭd bipikir bait minyu ngga tirase. 34Kuu re kinyam adŭp mu mun adi mabuk di rawŭt, tibabeu bada kapar dog sabak ribut. 35“Aku mbŭh dog pukong,” kuu re nang; “Aku mbŭh dog ani', pak aku dŭh ingat. Sinde aku re burah. Aku babŭ an nok.”
Currently Selected:
PITAS 23: TBVONT
Highlight
Copy
Compare
Share
Want to have your highlights saved across all your devices? Sign up or sign in
Hakcipta - Today's Biatah Version New Testament © The Bible Society of Malaysia, 2003.
