ගීතාවලිය 46
46
ජාතියේ රක්ෂාස්ථානය
නායක වාද්‍යකරුටයි; කෝරාගේ පුත්‍රයන්ටයි; හීන් ශබ්දයෙන් ගායනාකිරීමට ගීතිකාවකි.
1දෙවියන්වහන්සේ අපේ සරණ හා ශක්තියය, දුකේදී ඉතා ළංවූ පිහිටක්ය.
2එබැවින් පොළොව වෙනස්වෙතත්, මුහුද මැද පර්වත සැලෙතත්,
3එහි ජල ගුගුරා කැලඹෙතත්, එහි නගින රැළ වේගයෙන් පර්වත කම්පාවෙතත් භය නොවන්නෙමුව.
4ගංගාවක් ඇත, එහි දියපාරවල් මහෝත්තමයාණන්ගේ මණ්ඩපවල ශුද්ධස්ථානය වන දෙවියන්වහන්සේගේ නුවර ප්‍රීතිමත්කරයි.
5දෙවියන්වහන්සේ ඒ මැද සිටිනසේක;
එය නොසෙල්වන්නේය.
දෙවියන්වහන්සේ අලුයම්හිම එයට උපකාරකරනසේක.
6ජාතීහු කෝලාහල කළෝය, රාජ්‍යයෝ සෙල්වුණෝය.
උන්වහන්සේ ස්වකීය හඬ නිකුත් කළසේක, පොළොව දියවූවාය.
7සේනාවල ස්වාමීන්වහන්සේ අප සමඟය;
යාකොබ්ගේ දෙවියන්වහන්සේ අපේ බලකොටුවය.
8එව්, ස්වාමීන්ගේ ක්‍රියාවන්, එනම් උන්වහන්සේ පොළොවෙහි සිදුකළ විනාශයන්, බලව්.
9උන්වහන්සේ පොළෝ කෙළවර දක්වා යුද්ධ නවත්වනසේක;
දුන්න බිඳ, හෙල්ලය කපාදමා, රථ ගින්නෙන් දවනසේක.
10නිශ්චලවව්, මා දෙවියන්වහන්සේ බව දැනගනිව්.
ජාතීන් අතරේ උසස්වන්නෙමි, පොළොවෙහි උසස්වන්නෙමි.
11සේනාවල ස්වාමීන්වහන්සේ අප සමඟය;
යාකොබ්ගේ දෙවියන්වහන්සේ අපේ බලකොටුවය.
Currently Selected:
ගීතාවලිය 46: SROV
Highlight
Share
Copy
Want to have your highlights saved across all your devices? Sign up or sign in
Ceylon Bible Society