ROOM DIMA 6

1Tɔ; dinŋɔna ti ya yɛli la wula? Ni, ti kpalimma n‑tumni tumbeeri ni ti ti kyɛ ka Naawunni piinisuma zoaari m‑paasira? 2Ay! - di pa lala. Ti nyɛ la ninvugseeba ban pun kpi zaŋŋi n‑kyaŋŋi Tumbeoo yiiko yɛla ni. Ka wula zugu ka ti nin laa m‑bɛ tumbeeri tumpu ni? 3Bee, ya bu mi kɔsuubu gbinni ŋɔn nyɛ seem? Tirim ban daa deaai Naawunni kɔsuubu la zaa, dina n wulisi, ni, ti bɛ la Yisa Kirisita ni. Ka di laa n‑wulisi, ni, ti paasi la u zugu n‑kpi gba. 4Din laa m‑paasi, ban daa su ti koom ni ti ti paasi Yisa zugu n‑kpi maa, ba daa zaŋŋi ti m‑paasi u zugu n‑sɔ'ai. Ka di gbinni nyɛ la nŋɔa: ni, ti Ba Naawunni gyirima yiiko daa kyɛ ka Yisa doaai kum ni; ka di zugu lala kyɛ ka ti gba doaai nti bɛ beesipaalli. 5Dama ti yi ŋmanni la ti Dugma Yisa n‑kpi u kum wa taabu, di kpa, ni, ti nin ŋmanni hoo ŋɔna u kum doaari ni gba. 6Ka ti mi, ni, ti beesikura la ka ba daa zaŋŋi n‑la'am m‑paasi Masiiya zugu n‑kpaasi n‑tabli dɔpulli zugu, ni lala kyɛ ka ti beesikura ningbina nin sa'am m‑basi, Tumbeoo ŋɔn su a yɛla zaa maa zugu. Dinŋɔna ti ningbina ku laa n‑nyɛ seesi Ala'akyi ŋɔn su hoo ban su daaba seem maa. 7Dama ŋɔn kpi zaa pun yi ala'akyi ni. 8Tɔ, ka tirim ŋɔn pun paasi Kirisita zugu n‑kpi maa, dinŋɔna ti mari la yɛdda, ni, ti nin paasi u zugu m‑mari nyɔvuri gba. 9Ti mi, ni, Kirisita daa pun yisigi kum ni, ka di zugu u ku laa n‑kpi, dama kum laa n‑ka yiiko u saani. 10Ŋɔn daa kpi maa, u daa kpi yummu zaŋŋi n‑kyaŋŋi Tumbeoo yiiko saani: ka ŋɔn mari nyɔvuri maa muna, u mari n‑ti la Naawunni saani. 11Tɔ, ka dizugu ya gba teesima ya mansi yɛla lala. Ni, ya gba pun kpi zaŋŋi n‑kyaŋŋi Tumbeoo yiiko ni, ka mari nyɔvuri n‑ti Naawunni, yan la'am m‑bɛ Kirisita Yisa saani zugu.

12Ya ningbina nyɛ la seesi an kpiira, ka di zugu yan di kyɛ ka Tumbeoo su a fukumsi nti kyɛ ka a dɔli Tumbeoo kɔribeeri yɛla. 13Ya di laa n‑zaŋŋi ya ningbina luga zaa n‑tiri Tumbeoo, ka a ti leebi Tumbeoo tuma neema. Amaa ya zaŋŋma ya ningbina luga zaa n‑tiri Naawunni ka a ti leebi u yɛlimaŋni tuma neema, dama ya nyɛ la seeba ban pun neaai kum ni. 14Dinŋɔna Ala'akyi ku laa n‑nyɛ ya dugma, dama zaaligu maa bu su ya yɛla, amaa ka Naawunni piinisuma tuma n su ya.

15Bɔ yaasa? Zaaligu bu su ti, na'ala Naawunni piini n su ti: ammi, ti tumma tumbeeri lala zugu? - Ay! pa lala. 16Ya bu mi daaba yɛla ŋɔn bɛ seem? Ya yi zaŋŋi ya mansi n‑ti sɔ ni ya leebi u daaba ka wumni u noori, ŋɔnŋɔ n leebi ya dugma ka ya kur nyɛ la yan deaai sɔ noori wa daaba. Sɔya ayi m bɛ ni#:- bee, ya nin deaai Tumbeoo noori nti nya kum; bee, Naawunni noori wumpu soori ka ya nin deaai nti paai yɛlimaŋni zaaziiya. 17Amaa ti puusiri Naawunni barika! Dama ni ya daa bɛ Ala'akyi suulinsi ni n‑wumni Tumbeoo yɛligu hoo daaba maa zaa, ya daa wum yɛlimaŋni mooligu la ka doaai n‑takki ya sufu ni teesa ka sakki n‑deaai wulisigu maa. 18Ka ya daa laa n‑yi Ala'akyi suulinsi ni na, ka leebi Yɛlimaŋni ŋɔn su seeba. 19Tɔ, n tɔ'asiri la ninsaala duniya wa puuni beesigu yɛla n‑tiri ya, dama a gbinni bamsim bu tɔa; ka yan bɛ la duniya wa puuni la zugu n kyɛ ka ya na ka yaa zaŋŋi n‑kyaŋŋi yɛlizulima yɛla. Ya daa kyɛ ka ya ningbina luga zaa leebi hoo daaba n‑ti da'ari tuma ni zaaligu za'asigu. Amaa pampaŋŋɔ ya zaŋŋi ya ningbina n‑leebi la daaba n‑ti Naawunni yɛlimaŋni la, n‑tumni tunsuma kasikasi. 20Yan daa bɛ Ala'akyi suulinsi ni hoo daaba sahanseaa la, Yɛlimaŋni maa daa bu su ya fukumsi. 21Ka anfaani bɔ ka ya daa nya di zugu? Ay, zaalim! Lala tumbeeri maa zugu daa kur kyɛ ka ya di vi, ka yɛla wa zaa naari nyɛ la kum. 22Amaa pampaŋŋɔ ba fa ya m‑basi n‑yiisi Ala'akyi fukumsi ni na, ni ya leebi Naawunni suulinsi niriba. Dinŋɔ zugu ka ya nyari anfaani pam ka leebi la Naawunni dinni, din mun naari nyɛ la nyɔvuri kan ka tɔriga. 23Dama Ala'akyi yoori yoori n‑tiri ka tuntumniba, ka lala yoori nyɛ la kum. Amaa Naawunni mun tiri la u piini yɔriyɔri, ka lala piini nyɛ la nyɔvuri kan ka tɔriga, Kirisita Yisa ti Dugma saani.

Currently Selected:

ROOM DIMA 6: maw

Highlight

Copy