ROOM DIMA 5

1Tɔ; ka dizugu tin niŋi yɛdda la zugu kyɛ ka Naawunni deaai ti, ni, yɛlimaŋni dima. Ka lala kyɛ ka nangbanyinni bɛ ni tin ni Naawunni sunsukkuni, ti Dugma Yisa Kirisita Masiiya zugu. 2Dama ŋɔn Yisa zugu daa kyɛ ka ti nya yɛdda niŋbu soori nti kpɛ n‑zɛ tin bɛ zaazisunseaa wa ni. Di nyɛ la Naawunni ŋɔn daa tum lala tunsuma n‑ti ti maa. Dizugu ka ti mari sufupeelli, dama ti mari tama, ni, ti nin nya Naawunni gyirima veelim. 3Din paasi maa, ti mari sufupeelli halli ti wahala diibu puuni gba, dama ti mi, ni, wahala diibu paasiri ti sugru ni sufukpeemni. 4Sugru mun paasiri ti beesisuŋŋu, ka beesisuŋŋu mun paasiri ti tama. 5Ka tama maa paasigu ku kyɛ ka ti di vi, dama Naawunni zaŋŋi u Siiya n‑ti ti ka ti baŋŋi u wurilim ŋɔn zoaai seem di zugu. 6Kirisita muna - sahanseaa ti daa na ka yaa la, lala saha maa deede ka u daa kpi n‑ti tirim tumbeeri dima maa. 7Ya bu nya? - Di tɔ pam ni sɔ sakki n‑kpi n‑ti ninvugsɔa - halli n‑ti yɛlimaŋni daansɔ gba. Amaa di bu ya'ai ka nira yi mari sufukpeemni n‑sakki n‑kpi ninvugsuŋŋu zugu. 8Amaa Naawunni ŋɔna - ŋɔn daa niŋi seem n‑wulisi ti, ni, u wuri ti pam nŋɔa#:- tin daa na bɛ tumbeeri ni sahanseaa la, Kirisita daa kpi n‑ti ti. 9Tɔ, ka di yi bɛ lala maa, ka Naawunni pun deaai ti, ni, yɛlimaŋni dima, Yisa Masiiya ziim maa zugu, dinŋɔna ti mi halli, ni, ŋɔn Yisa zugu ka ti nin laa n‑yi Naawunni sugyeaa ni gba. 10Dama tin daa nyɛ Naawunni dindaandima sahanseaa la, u Bii Yisa kum maa zugu daa kyɛ ka Naawunni deaai ti taalli sindaani maa. Di zugu ti mi halli, ni, Yisa nyɔvuri zugu nin kyɛ ka ti nya tuliginsim. 11Amaa pa dinŋɔ kɔkɔ gba. See ka ti mari sufupeelli pam Naawunni saani, ka gyeemni u ti Dugma Yisa Kirisita zugu dama ŋɔn Yisa n daa zɔ sindaani n‑ti ti ka u Ba deaai.

12Dinzugu ya teesima Adam yɛla: ŋɔn nira yinni zugu ka tumbeoo ni ala'akyi daa kpɛ duniya wa na, ka tumbeoo zugu muna ka kum bɛ ni. Lala zugu ka kum daa pun laai m‑paai sɔkam, dama sɔkam zaa tum la tumbeoo. 13Tumbeoo siri daa pun bɛ la duniya wa puuni pɔi, ka Musa na bu deaai zaaligu maa yɛla Naawunni saani. Amaa di zaa yɔri, ba daa bu nyaŋŋi n‑tɔ'asiri tumbeoo galinsi yɛla, zaaligu la ŋɔn daa na ka ni la zugu. 14Amaa kum daa pun su ba zaa fukumsi n‑yi Adam saha halli nti paai Musa. Sɔkam daa kpi, halli ban daa bu tum tumbɛseelli kan ŋmanni Adam dinni la nti za'asi Naawunni noori zaaligu. Ŋɔn Adam muna - u nyɛ la sɔ ŋɔn daŋŋi tooni n‑wulisiri sɔ ŋɔn nin naayi kyɛ na la yɛla ŋɔn ti ya bɛ seem.

15Amaa Naawunni piini yiiko bu ŋmanni tumbeoo dinni. Ay! - di gaari lala zugu pam. Ti mi halli, ni, ninvugyinni taalli zugu ka niriba pam daa kpi; amaa Naawunni piini zoaari m‑paasiri n‑suŋŋni niriba pam, ka lala gba yiiri la ninvugyinni zugu ni na - di nyɛ la: Yisa Kirisita Masiiya zugu. 16Din laa m‑paasi: Naawunni piini siri bu ŋmanni la ninvugyinni maa tumbeoo la yɛla: dama tumbeoo yinni kɔkɔ zugu ka Naawunni daa kari sɔkam sariya n‑lusi ba, amaa Naawunni piini zugu daa kyɛ ka tumbeeri pam yɛla daa kpiisi, ka ba yiisi niriba maa, ni, ba mari yɛlimaŋni. 17Ya bu nya? - Tumbeoo yinni taalli zugu daa kyɛ ka kum su sɔkam fukumsi, ka di daa yi lala tumbɛdaana yinni maa saani na. Tɔ, ka dinŋɔna ti mi halli, ni, seeba ban deaai Naawunni yɛlimaŋni u piinisuŋŋu pam zugu la nin ti su nyɔvuri naam fukumsi, ka di mun nyɛ la tunsuŋŋu daana yinni zugu, ŋɔn nyɛ Yisa Kirisita. 18Dinŋɔ zaa kyɛ ka ti baŋŋi, ni, nira yinni tumbeoo zugu kyɛ ka niriba zaa yɛttɔ'a lu Naawunni saani, ka ba zaa nya taalli u saani. Lala yaasa ka nira yinni maa tunsuŋŋu zugu kyɛ ka niriba zaa yi taalli ni, ka ba mari yɛlimaŋni Naawunni saani nti nya nyɔvuri. 19Ninvugyinni maa daa za'asi Naawunni noori, ka di zugu niriba pam daa nya taalli, ni, ala'akyi dima n nyɛ ba. Lala yaasa ka ninvugyinni ŋɔnla daa sakki Naawunni noori, ka di zugu niriba pam daa yi taalli ni, ni, yɛlimaŋni dima n nyɛ ba. 20Zaaligu muna - ba daa mari ka na ni ba ti kyɛ ka taalli tumpu maali m‑paasira. Amaa taalli ŋɔn maali m‑paasiri seem la, Naawunni piini gba daa paasi n‑gaari lala zugu. 21Tumbeoo zugu n‑daa la, dama tumbeoo daa mari kum yiiko n‑su niriba fukumsi, amaa lala ka Naawunni piinisuŋŋu mari yɛlimaŋni yiiko n‑su ba fukumsi, halli ka ba ti nya nyɔvuri kan ka tɔriga, Yisa Kirisita Masiiya zugu.

Currently Selected:

ROOM DIMA 5: maw

Highlight

Copy