ROOM DIMA 7

1Tɔ. M mabiisi, ya kyɛ ka n tɔ'asi n‑ti yaseeba ban baŋŋi zaaligu la. Ya na zi zaaligu yɛla ŋɔn nyɛ seem deede, bee? Ni, nira ŋɔn na kpalim m‑bɛ u nyɔvuri ni sahanseaa maa kɔkɔ ka zaaligu maa dɔli u: bee bɔa? 2-3Ya bu nya? - Zaaligu wulisiya, ni, pɔ'a yi kuli doo, di kpa ni, ni, u sira maa su u yɛla sahanseaa lala doo maa yi na bɛ u nyɔvuri ni. Amaa u sira maa kum nyaaŋŋa, zaaligu basi pɔ'a maa taalli ka u su u maŋŋa, halli ni u nin toaai n‑kuli siripaalli. Pɔ'a wa yi bɔ dɔsɔ, ka u sira na bɛ u nyɔvuri ni, ba boonni u, ni, pɔ'agoorli; amaa u sira maa yi kpi, zaaligu maa bu laa n‑dɔli u, ka u pa pɔ'agoorli, ni ŋɔn kuli siripaalli maa zaa. 4Tɔ, ka di daa nyɛ la lala n‑ti ya, m mabiisi. Ba daa kyɛ ka ya paasi Kirisita ningbina zugu ka ku ya, di zugu ya laa n‑ka ni n‑ti zaaligu yɛla. Ka dizugu ya nya soori ni ya ti leebi sɔ dinni, ŋɔn yisigi kum ni - di nyɛ la Yisa; ni di niŋi anfaani n‑ti Naawunni. 5Sahanseaa la, ti beesigu daa dɔli ti ningbinkɔrisi yɛla. Di saha ka tumbeeri tumpu boorimma daa dɔli zaaligu maa n‑nya yaa n‑tumni ti ningbina luga zaa ni; ka ti daa bu nya anfaani di zugu - ay! kum kɔkɔ ka ti daa nya. 6Amaa pampaŋŋɔ ti kpiya ni n‑ti zaaligu maa, ka di zugu zaaligu wa bu laa n‑su ti yɛla. Lala yi kyɛ ka ti bu laa n‑dɔli sɔkurigu kan nyɛ zaaligu sɔppu maa dinni la, amaa sɔpaalli kan nyɛ Sii maa dinni.

7Dinzugu, ti ya yɛli la wula? - ni, Naawunni zaaligu maa nyɛ la ala'akyi, bee? Ay! pa lala. Amaa di yi da pa la zaaligu la zugu, n naa n‑ku baŋŋi ala'akyi ŋɔn nyɛ seelli. Dama zaaligu maa yi da bu yɛli, ni, “Di kyɛ ka i sufu kɔrisi kpɛ i kpeaa buna zugu.”, n naa n‑ku baŋŋi niriba neema boobu yɛla. 8Ala'akyi daa dɔli zaaligu la n‑nya zaazisuŋŋu pɔi, ka naayi kyɛ ka neema boobu teesibeeri balibu pam kpɛ n sufu ni. Amaa zaaligu yi ka ni, Ala'akyi mun gba kpi ni. 9Sahanseaa la, n daa mari nyɔvuri, ka na zi zaaligu yɛla maa. Amaa zaaligu la ŋɔn daa ti paai ma na, ka daa kyɛ ka Ala'akyi neaai ni, 10ka man kpi. Zaaligu la gbinni nyɛ la nyɔvuri, amaa man saani ka daa zi la kum na. 11Zaaligu maa zugu ka Ala'akyi daa nya soori n‑yɔmsi ma, n‑zaŋŋi zaaligu maa yɛla n‑kyɛ ka n kpi. 12Ka di zaa wulisiri, ni, Naawunni zaalikpana maa nyɛ la kasi, ka zaaligu kam zaa yinniyinni nyɛ la bunveelli; a zaa mari la yɛlimaŋni kasikasi.

13Ka bunsuŋŋu dinŋɔ n kyɛ ka kum paai ma la, bee wula? - Ay, pa lala! Ala'akyi n nyɛ din ziiri kum na, ka ka daa dɔlisi bunsuŋŋu wa n‑tum lala maa; ka di zugu ka ti baŋŋi ala'akyi beeri ŋɔn nyɛ seem la. Lala zugu ka zaaligu la kyɛ ka tumbeeri zaa yiiri paalu. 14Ti mi halli, ni, zaaligu la nyɛ la seaa kan dɔlisi ni siiya; amaa man mun nyɛ duniya wa ni ninsaala, ka ba koosiri ma ni hoo daabri n‑ti Ala'akyi. 15Halli n ku toaai m‑baŋŋi man tumni seelli. Dama m bu tumni man boori tunseesi. Ay! - tunseesi man bu boori la zaa ka n tumna. 16Lala zugu, n yi tum taaliseaa ka yɛli, ni, m bu boori lala, n yɛttɔ'a wa wulisiya, ni, zaaligu la veela, ka n sakki lala. 17Ka dinŋɔ pa la mani n tumni taalli maa, amaa Ala'akyi m bɛ n saani n‑tumna. 18M mi, ni, bunsunseelli ka m beesigu ni, halli beela - di nyɛ la n duniya wa ni ningbina la ni beesigu ni. M boori tunsuma tumpu, amaa n kɔŋŋi la a tumpu. 19M boori la tunsuŋŋu tumpu n‑kɔŋŋi, ka laa n‑tumni tumbɛseelli man bu boori maa. 20N yi tum taaliseaa ka yɛli, ni, m bu boori lala, dinŋɔ pa la mani n tumni taalli maa, amaa Ala'akyi m bɛ n saani n‑tumna. 21N yi baŋŋi yɛlimaŋni nŋɔa: ni, n yi kur boori ni n ti tumni din veela, lala saha maa ka tumbeoo tumpu bɛ n saani. 22Dama n sufu ni teesa zaa kur sakkri ni n‑tiri Naawunni zaaligu tuma, 23amaa m baŋŋiya, ni, zaaliseaa n bɛ n ningbiŋŋu luga ni. Ka lala zaalibeoo tuusiri tɔppu n‑niŋni n sufu ni teesa zaalisuŋŋu la, ka nyaŋŋi ma n‑gbaai ma nti kpari n ningbiŋŋu luga ni teesibeoo ziiya. 24Waay, waay, waay! Man wahala daana wa! Ŋɔni n lee n‑ya fa ma m‑basi, n‑yiisi ma duniya wa ni ningbina beesigu wa ni, din taasiri ma kum ni? 25Ay! M pɛ'ari Naawunni ka puusiri u barika, dama ŋɔn pun fa ma m‑basi, Yisa Kirisita Masiiya ti Dugma zugu.

Ah, tɔ! M mammaŋŋa sufu ni teesa puuni ka n dɔli la Naawunni zaaligu sɔsuŋŋu, amaa n duniya wa ni ningbina beesigu puuni ka n na dɔli la Ala'akyi sɔbeoo.

Currently Selected:

ROOM DIMA 7: maw

Highlight

Copy