ROOM DIMA 4

1Tɔ: ka Ibrahim muna? - sɔ ŋɔn nyɛ ti butiri zaa yaaba la: bɔ ka ti yɛ n‑yɛli, ni, ŋɔna n daa baŋŋi? 2Ka di yi daa nyɛ la tunsuma zugu ka Naawunni daa yɛli, ni, u nyɛ la yɛlimaŋni daana, dinŋɔna u da mari seelli ni u kuuli di zugu, amaa pa Naawunni saani ka u daa kuuli. 3Litaafi yɛliya, ni, “Ibrahim daa sakki n‑niŋi Naawunni yɛdda, ka u yɛdda wa zugu daa kyɛ ka Naawunni daa yɛli, ni, u nyɛ la yɛlimaŋni daana.” - bee, di pa lala? 4Nira ŋɔn tumni maa, see ka u deaai u yoori: u tuma samni dɔli la u tuma daana la: di pa la ba ‘yɛli’, ni, ba nin zaŋŋi n‑ti u piini. 5Amaa ŋɔn bɛ ni u yɛdda zugu la, ka pa u tuma zugu, dama u niŋni Naawunni yɛdda, ni, u nyɛ la sɔ ŋɔn zaŋŋni tumbeeri daana taalli yɛla zaa m‑pɛŋŋni u, di daama mun yɛttɔ'a maa ni ka ba ‘yɛli, ni, u nyɛ la yɛlimaŋni daana’. 6Halli NaaDauda gba daa pun yɛli lala nira yɛla - di nyɛ la: ninvugsɔ Naawunni ŋɔn yɛli, ni, u nyɛ la yɛlimaŋni daana, ka di pa la u tuma zugu. U daa tɔ'asi di daama zugsuŋŋu yɛla, ni#:-

7“Zugsuŋŋu bɛ ni n‑ti ba -

Ninvugseeba Naawunni ŋɔn kyɛ ba taalli m‑pɛŋŋi la,

Ka ba tumbeeri laa n‑ka teaari u saani.

8Zugsuŋŋu gba n‑ti seeba Naawunni sariya ŋɔn bu lusi ba

n‑yɛli, ni, ba galim n‑tum la taalli.”

9Tɔ: ka NaaDauda ŋɔn daa tɔ'asi zugsunseaa wa nyɛ la ban guni la kɔkɔ dinni? Bee, ban bu guni su ka gba? Ay! - ban bu guni la gba nin mara, dama Litaafi yɛliya, ni, “U yɛdda zugu ka Naawunni daa yɛli Ibrahim, ni, u nyɛ la yɛlimaŋni daana.” 10Ka wula saha ka Naawunni daa yɛli lala? Di saha maa ka Ibrahim guniya, bee, u daa na bu guni? - Ay! di saha ka u na bu guni. 11Di nyaaŋŋa ka ba daa naayi guni u, ka u gunibu wa daa wulisi la, ni, Naawunni pun yɛli, ni, u nyɛ la yɛlimaŋni daana u yɛdda zugu; yɛdda wa mun ka u daa pun niŋi ka ba daa na bu guni u. Dinzugu ŋɔn Ibrahim nyɛ la yɛdda niŋniba zaa ba - baseeba ban niŋi Naawunni yɛdda ka na bu guni la - ka di nin kyɛ ka Naawunni yɛtti, ni, ba nyɛ la yɛlimaŋni dima. 12Ka u laa n‑nyɛ la seeba ban guni la zaa ba m‑paasi - baseeba ban pa la ban guni kɔkɔa, amaa ba yɛdda niŋbu gba dɔli la ti zaa ba, Ibrahim, soori maa, dama ŋɔn daa niŋi Naawunni yɛdda pɔi, ka naayi guni.

13Naawunni ŋɔn daa ti u nangbambasiri n‑ti ‘Ibrahim ni u nyaaŋŋa’ maa, u daa yɛli, ni, u nin kyɛ ka u di duniya wa hoo u faari; u daa niŋi lala maa, pa la Ibrahim ŋɔn daa dɔli zaaligu la zugu, amaa ŋɔn daa niŋi ŋɔn Naawunni yɛdda la zugu. 14Ka di yi nyɛ la zaaligu zugu ka Naawunni nangbambasiri paari ninvugseeba ban dɔli ka, dinŋɔna yɛdda nyɛ la yɔri, ka Naawunni nangbambasiri gba nyɛ yɔri. 15Zaaligu la tumni la sufuyisigri zugu, amaa zaaligu yi ka ni, zaaligu galiŋŋu gba ku bɛ ni. 16Nangbambasiri maa daa kyɛ na la yɛdda zugu, ka ka zɛ la deede, ni ka ti leebi piini n‑tiri Ibrahim nyaaŋŋa zaa, pa la seeba ban dɔli zaaligu la kɔkɔa, amaa ni seeba ban niŋni yɛdda hoo Ibrahim gba. Ka ŋɔn Ibrahim nyɛ la ti zaa ba. 17Litaafi yɛliya, ni, “N nin kyɛ ka i leebi bura pam yaaba.” - ŋɔn daa niŋi Naawunni yɛdda maa zugu nla. U daa niŋi yɛdda, ni, Naawunni tisiri la nyɔvuri, ka u yɛligu daa kyɛ ka din daa ka ni la yi ti bɛ ni. 18Ibrahim daa niŋi yɛdda ka mari tama, halli din daa ti paai ni u ti koaai tama maa zaa u daa kpalim m‑mari tama, ka di zugu u daa leebi ‘bura pam yaaba’, dama Litaafi daa pun yɛli lala, ni, “Lala ka i nyaaŋŋa nin ti bɛ ni.” 19Halli ŋɔn daa paai yuunkɔbga maa zaa yɔri, u yɛdda daa bu baligi ŋɔn daa kurigi la zugu, u ningbina ŋɔn daa gyaari seem la, ka u pɔ'a Zaraatu gba ningbina gyaari nti kɔŋŋi puuwa gbaari yaasa. 20Ii - anŋɔ zaa yɔri u yɛdda daa bu basi u, ka u daa bu birisi Naawunni nangbambasiri la; u yɛdda wa daa ti u la yiiko, ka u daa pɛ'ai Naawunni. 21U daa maali n‑kpamsi u sufu ni yɛdda, ni, Naawunni ŋɔn basi u nangbambasiri maa seem la, di siri nin niŋi lala. 22Ka dinŋɔna, ŋɔn Ibrahim yɛdda maa zugu ka ‘Naawunni daa yɛli, ni, u nyɛ la yɛlimaŋni daana’. 23Ni, u ‘yɛtti, ni, u nyɛ la yɛlimaŋni daana’ - ba daa bu sɔbi lala ŋɔn Ibrahim zugu kɔkɔa. 24Ay! - ba daa sɔbi di lala maa n‑ti la tirima, dama ba nin yɛli ti gba lala, ti seeba ban niŋi yɛdda n‑tiri Naawunni, ni, u daa yisigi ti Dugma Yisa kum ni la. 25Ti tumbeeri zugu ka ba daa zaŋŋi ŋɔn Yisa n‑tisi ni u kpi; ka u mun yisigi kum ni, ni ti ti yi na hoo yɛlimaŋni dima.

Currently Selected:

ROOM DIMA 4: maw

Highlight

Copy