ROOM DIMA 16

1Tɔ, ka m boori ni ya ti deaai ti tunzɔpɔ'a wa ŋɔn yuuri boonni Fiibi. U nyɛ la sɔ ŋɔn tumni Naawunni tuma n‑tiri u niriba ban la'amni Kyɛnkyiriiya tiŋŋa puuni. 2Ya deaam u hoo din sumsi ni ya deaai ya mabii seem la, ti Dugma yuuri zugu. U yi ti boori seelli ya saani, ya suŋŋma u yan nin toaai seem zaa, dama ŋɔn gba suŋŋi niriba pam halli ni man gba.

3Ya puusima Prisila ni Akwila n‑ti ma, dama ba n nyɛ n tuntuntaaba la, Kirisita Yisa saani. 4Ba daa zaŋŋi ba nyɔvuya m‑pa talima man zugu, ka di pa la man kɔkɔ m pɛ'ari ba, see ninvugseeba ban pa Yɛhudiyadima ka la'amni ti Dugma yuuri zugu la gba - ban zaa paasi man zugu m‑pɛ'ara. 5Ya puusima ban mun la'amni ban Akwila ni Prisila yiri maa puuni n‑gyeemni Naawunni maa. Ka puusi n zɔsuŋŋu Ɛpeenɛtusi; ŋɔna n nyɛ Ɛseaa tingbaŋŋu ni ninvugsɔ ŋɔn daa daŋŋi ba zaa n‑leebi Yisa nyaandɔla la. 6Ka puusi Mariama, dama u tum pam n‑ti ya. 7Ni Andirɔnikusi ni Gyuniyasi: n dɔ'ariba n nyɛ ba, ka man ni ban n daa la'am m‑bɛ dansarika ni. Yisa tuumudima maa tiri ba gyirima, halli ni ba daa daŋŋi ma n‑leebi Yisa nyaandɔliba gba. 8Ka laa m‑puusi Ampiliyatusi n‑ti ma, dama n wuri u hoo Naawunni biiya: 9ni Yuribanusi ti tuntunkpeaa Kirisita Masiiya zugu, ni Siteekyusi n zɔsuŋŋu. 10Apɛliisi gba n nyɛ gyirima daana Kirisita yuuri zugu, ya puusima u n‑ti ma; ŋɔn ni Arisitɔbulusi yiri dima la zaa. 11Ka puusi n dɔ'ara Hɛroodiyɔni n‑ti ma, ni Naasisusi yiri dima, ban nyɛ ti Dugma niriba la, m‑paasi. 12Tirifeena ni Tirifoosa n nyɛ pɔ'aseeba ban tum tunkara n‑ti ti Dugma, ya puusima ba n‑ti ma; ka puusi Pɛrisisi man wuri sɔ la - ŋɔn gba tum tunkara n‑ti ti Dugma. 13Ka puusi Ruufusi dama ti Dugma pun yiisi u: ka laa m‑puusi u ma la, ŋɔn nyɛ man gba ma. 14Ka puusi Asinkyiratusi, ni Filɛgɔni, ni Hɛrimiisi, ni Patirɔbaasi, ni Hɛrimaasi, ni ti mabiisi ban bɛ ba saani maa zaa. 15Ka laa m‑puusi Filɔlɔgusi, ni Gyuliya, ni Neeriyusi ni u tunzɔpɔ'a la, ni Ɔlimpaasi ni Yisa nyaandɔliba ban bɛ ba saani zaa. 16Ya puusima taaba suŋŋasuŋŋa ti wurilim puusigu ni. Kirisita Masiiya nyaandɔliba la zaa puusiri ya na.

17N kpaamni ya ni, ni, ya baŋŋma seeba ban wulisiri wulisiseesi an sa'amni yan pun bamsi wulisigu la; ba kur taasiri la nangbankpeemni na, ni ba ti lusi ya. Ya yim lala niriba maa yɛla ni. 18Dama lala niriba bu gyeemni ti Dugma Kirisita, amaa ba maŋtoori kɔrisi yɛla ka ba gyeemna. Ka ba zaŋŋi ba yɛttɔ'anya'asa ni nangbammalisim la n‑yɔmsiri ninvugseeba ban teesa bu zulima. 19Yarim muna - sɔkam mi, ni, ya deaari Naawunni noori, ka dizugu n sufu maasi ya yɛla zugu. M boori ni ya teesa ti zulima zaŋŋi n‑kyaŋŋi bunsuma, amaa ka laa m‑boori ni a ti kɔŋŋi bumbeeri bamsim, halli fiiŋ. 20Naawunni n su sufudoaa yɛla zaa, ka di ku yuui ka u nin kyɛ ka ya nɔ n‑tɔm Sintaani zugu n‑ŋmirigi u. Ti Dugma Kirisita Masiiya wurilim kpalim m‑bɛ ya ni.

21Timɔti, n tuntunkpeaa la, puusiri ya suŋŋa, ni n dɔ'ariba m‑paasi - Luusiyusi, ni Gyeesɔni ni Soosipata nla. 22(Man Tɛritiyusi, ŋɔn sɔbri gbaŋŋu wa n‑tiri Pɔla la, man gba puusiri ya suŋŋa ti Dugma yuuri ni.) 23-24Gayusi gba puusiri ya ni; n yirikpɛdaana n nyɛ u, ka laa n‑kyɛ ka Yisa niriba la'amni u yiri maa ni. Ɛrasitusi gba puusira - ŋɔn su ti tiŋŋa wa ligri yɛla fukumsi la - ni ti mabii Kuwaatusi m‑paasi.

25Ya kyɛ ka ti pɛ'ari Naawunni! Ŋɔna nin toaai n‑kyɛ ka ya nya yaa, ka di yi la man wulisiri lahabasuŋŋu maa ni na, ni Yisa Kirisita yɛla mooligu ni na. Di nyɛ la din wulisi yɛlisɔ'ara gbinni n‑tiri ya la. Ba daa sɔ'ai yɛla wa, piiligu ni halli ni zuna, 26amaa pampaŋŋɔ ba kasigi a gbinni n‑wulisi ti. Hoo anabidima ŋɔn daa pun sɔbi n‑dooli seem la, lala lahabaari maa ka Naawunni, saha din ka naari la Daana, yɛtti, ni, ba yiisima na n‑wulisiri ya'ari kam, ni duniya zaa niriba ti deaai u noori n‑niŋi Yisa yɛdda. 27Naawunni siri bɛ la u kɔkɔ m‑mari yɛm; gyirima zaa nyɛ la u dinni halli ni saha din ka tɔriga. Ti pɛ'ama u, Yisa Kirisita Masiiya zugu! Ammi.

Currently Selected:

ROOM DIMA 16: maw

Highlight

Copy