ROOM DIMA 15

1Tɔ; ka dizugu di sumsi ni tirima ban mari yaa ti yɛdda zugu la ti mari sugru n‑tiri ban ka yaa la: see ka ti maari ba sufu, ka ti di boori ti maari ti mammansi sufu. 2Sɔkam niŋma din nin kyɛ ka u taraana sufu maai ka u tumni tunsuma, ka kyɛnni tooni Naawunni saani. 3Halli Kirisita gba daa bu maai la u mammaŋŋa sufu, amaa di daa bɛ la hoo din daa sɔbi n‑dooli seem, ni, “Ban n daa boori la Naawunni tuubu la daa tu la mani.” 4Dama an daa pun sɔbi maa zaa daa sɔbi la ni di wulisi tirima, ni lala zugu ti kyɛ ka ti diri sugru, ka nya kpamsima Litaafi maa ziiya zugu nti mari tama. 5Dama Naawunni siri su sugru ni kpamsigu yɛla, ka u nin kyɛ ka ya dɔli Yisa Kirisita ka kpalim m‑mari nangbanyinni ni taaba. 6Ka ya nin la'am n‑zaŋŋi nangbanyinni m‑pɛ'ai Naawunni ŋɔn nyɛ ti Dugma Yisa Kirisita Ba la.

7Dinzugu ya deaama taaba hoo Kirisita ŋɔn pun deaai ya seem la, Naawunni pɛ'abu zugu. 8Dama n yɛtti ya, ni, Kirisita daa leebi la Yɛhudiyadima maa daabri ni u ti wulisi Naawunni yɛlimaŋni ŋɔn nyɛ seem, ni u ti zaali nangbambasiri maa deede - nangbambasiseesi ŋɔn Naawunni ŋɔn daa pun basi n‑ti ti yaadima la. 9Ka laa n‑kyɛ ka ban pa Yɛhudiyadima la mun pɛ'ari Naawunni u nambɔzoaa zugu, hoo din sɔbi n‑dooli seem, ni#:-

“Dinzugu n nin pɛ'ai nyin Naawunni,

N nin pɛ'ai i ban pa Yɛhudiyadima la saani.

N nin yuumni n‑tiri i yuuri.”

10Ka di laa n‑sɔbi yaasa, ni#:-

“Ya mari sufupeelli, yan pa Yɛhudiyadima wa,

Ya paasim u niriba zugu m‑mara.”

11Yaasa, ni#:-

“Ya pɛ'ama ti Dugma, yan pa Yɛhudiyadima wa,

Ka kyɛ ka sɔkam zaa tiri u gyirima.”

12Ka Aizaaya gba daa yɛli, ni#:-

“Gyɛsi tuŋŋu ni dɔsɔ nin ti bɛ ni

n‑doaai na n‑su ban pa Yɛhudiyadima la naam;

Ŋɔna zugu ka ba nin ti nya tama.”

13Naawunni siri su tama yɛla, ka n susiri u, ni, u kyɛ ka sufumaasim ni sufudoaa ti paali ya sufu, yan niŋni yɛdda maa zugu. Ka Sii Kasi la yiiko nin kyɛ ka ya mari tama pam halli nti yakki.

14M mabiisi, m mi halli, ni, ya mari yɛlisuma zaa, ka bamsim kur paali ya ni, ka ya nyaŋŋi n‑kpaamni taaba. 15Amaa yɛttɔ'aseesi ziiya ka n niŋi sufukpeemni n‑sɔbi n‑ti ya na beela n‑teaari ya. Di yi la n yɛlimaŋni piini maa ni na, piiniseaa Naawunni ŋɔn zaŋŋi n‑ti ma la. 16U ti ma, ni, n niŋi Yisa Kirisita tuntumna ban pa Yɛhudiyadima maa saani. N tuma mun nyɛ la Naawunni lahabasuŋŋu tuma, nti kyɛ ka ban pa Yɛhudiyadima la ti la'asi na ka Naawunni Sii Kasi kyɛ ka Naawunni deaai ba la kasikasi. Ka tuma wa ŋmanni la ŋɔn maanni sara tuma, hoo ban la'asi la puri ni antaam na, m‑maali n‑ti Naawunni seem la. 17Dizugu Yisa Kirisita zugu ka m mari soori ni n nyu bara zaŋŋi n‑kyaŋŋi Naawunni yɛla. 18Dama n ku ma'asi ni n tɔ'asi seelli di yi pa la Kirisita ŋɔn zaŋŋi ma n‑tum tunseesi la; ka laa n‑yɛli yɛttɔ'aseesi la, ni di kyɛ ka ban pa Yɛhudiyadima maa ti sakki n‑ti Naawunni. 19U zaŋŋi lala tunkara ni alahazibu tuma yiiko n‑tum tuma wa n nuu ni, ni Sii Kasi yiiko. Ka di nyɛ la Gyɛrusalɛm zaŋŋi n‑gyiligi wa'aligu sa, halli nti paai Illirikum tingbaŋŋu ni, ka n mooli Naawunni lahabasuŋŋu maa yɛla zaa. 20Ya bu nya? - M ba'a kur bɛ la timpaala ni, ni n ti mooli lahabasuŋŋu maa luginseaa niriba ban na bu wum Kirisita yuuri la ni. Lala ka n ku meeri n‑tɔmni sɔ nyeebri zugu. 21Amaa di bɛ la hoo din pun sɔbi n‑dooli seem la, ni#:-

“Ban na zi n‑wum u lahabaari la,

Ban nin nya ka baŋŋi:

Ban na zi n‑wum u yɛla maa,

Ban nin baŋŋi di gbinni.”

22Dinŋɔ zugu ka di yuui ka m boori soori ni n ti kyɛ ya saani na n‑guui. 23Amaa pampaŋŋɔ n laa n‑ka tunseelli luga wa puuni, ka n yi boori ni n kyɛ ya saani na yuuma seem nŋɔa, 24m mari tama, ni, n yi ya gaari n‑kyaŋŋi Sipeen tingbaŋŋu ni, n nin nya ya. Ka n yi ti kaai ya n‑niŋi daba ayi pɔi, ka ti la'am m‑maai taaba sufu, ya nin naayi toaai n‑zaali ma soori ni ka n kyaŋŋi n kyɛnni la. 25Pampaŋŋɔ ŋɔna, n wa la Gyɛrusalɛm tiŋŋa, ni n ti suŋŋi Naawunni niriba bɛni. 26Dama Masidoonya dima ni Akaaya dima daa gbaai toosigu ni sufupeelli, ni, ba ti toosi n‑suŋŋi fara dimseeba ban bɛ Naawunni niriba sunsukkuni, Gyɛrusalɛm timpuuni la. 27Ba daa gbaai lala ni sufupeelli, halli Gyɛrusalɛm dima samni n dɔli ba gba. Dama Gyɛrusalɛm dima daa zaŋŋi ba Naawunni bunsuma n‑tɔri n‑ti ban pa Yɛhudiyadima maa nti suŋŋi ba siisi, ka lala zugu kyɛ ka di sumsi ni ban ti zaŋŋi ba duniya wa bunsuma n‑tɔri n‑ti Yɛhudiyadima wa n‑suŋŋi ba ningbina. 28Dizugu n yi tum dinŋɔ maa, n‑zaŋŋi ban bɔ seelli maa nti ti Gyɛrusalɛm dima maa n‑naai, n nin dɔli ya saani n‑gaari n‑kyaŋŋi n Sipeen la. 29M mi halli, ni, n yi kyɛ ya saani na, n ya mari Kirisita bunsuma zaa n‑kyɛ na.

30N susiri ya ni, m mabiisi, ti Dugma Yisa Kirisita zugu, ni Sii Kasi wurilim zugu gba, ni, ya suŋŋi ma ka ti susi Naawunni nimmoosi man yɛla zugu. 31Ya susima, ni, n nin yi Gyuudii dimseeba ban bu niŋi yɛdda la nuusi ni na, ka Gyɛrusalɛm puuni Naawunni niriba la nini nin tigi n suŋŋsim maa. 32Ka lala zugu Naawunni nin ti ma soori ni n kyɛ ya saani na ni sufupeelli, ka man ni yarima nin la'am taaba m‑maai taaba sufu. 33Naawunni siri su sufudoaa yɛla; ŋɔn Naawunni bɛ ya zaa saani. Ammi.

Currently Selected:

ROOM DIMA 15: maw

Highlight

Copy