ƐFƐSUSI DIMA 4

1Man bɛ sarika ni ti Dugma yɛla zugu, ka n bɛlimni ya ni, ni, ya mari beesiseaa din sumsi ya, dama ŋɔn Naawunni booli ya u saani na. 2Ya bɛ baalimm n‑sigsi ya mansi, m‑mari sugru ni taaba, ka kyɛri taaba taalli wurilim zugu. 3Ya kpaŋŋma ya mansi m‑mari nangbanyinni, hoo Naawunni Sii maa ŋɔn yi zaŋŋi u bansi m‑ba ya ni taaba. 4Ti zaa nyɛ la ningbiŋŋu yinni niriba, sii yinni dima, hoo ban daa booli ya na la ni ya ti mari tama yinni. 5Ya Dugma yinni ka ya gyeemna, yɛdda yinni ka ya niŋna, Naawunni kɔsuubu yinni ka ba daa su ya. 6Naawunni yinni mun n nyɛ ti zaa Ba, ka u gaari sɔkam, ka tumni sɔkam ni, ka bɛ sɔkam zaa ni.

7Amaa ti sɔkam deaari u piini u piini, hoo Kirisita ŋɔn putti a n‑tisiri seem la. 8Lala zugu ka di sɔbi n‑dooli, ni#:-

“Ŋɔna n daa du saazugu;

Di saha ka u daa gbaasi niriba pam,

Ka daa zaŋŋi piini n‑tisi niriba.”

9Tɔ. Daŋŋni, ni, ‘U daa du saazugu’: di gbinni nyɛ la bɔa? - di pa la, ni, u daa daŋŋi n‑sigi la duniya wa tiŋni na gba? 10Ninvugsɔ ŋɔn daa sigi na maa, di daama n daa nyɛ sɔ ŋɔn daa laa n‑du saazugu n‑gaari halli nti kpɛ arizana puuni la, ni u ti paali ya'ari kam zaa. 11Din pa, ni, ‘u daa zaŋŋi piini n‑tisi’: di mun gbinni nyɛ la bɔa? - ni, ŋɔna n daa ti seeba tuumudima tuma, ka laa n‑ti seeba anabi tuma, seeba mun moonni la lahabasuŋŋu maa, seeba yaasa n niŋi kpamma ni karimbadima. 12Ba deaari la piini wa, ni ba ti sɛ'asi Naawunni niriba ni ba tumna, ka Kirisita ningbiŋŋu maa nin ti mɛa. 13Halli nti paai sahanseaa ti zaa ŋɔn ti ya niŋi nangbanyinni ti yɛdda niŋbu maa ni, ka naayi baŋŋi Naawunni Bii maa yɛla. Lala ka ti nin kyɛ biilim n‑la'am n‑leebi ninvugkurigu m‑bɛ hoo Naawunni ŋɔn boori zaa, ka naayi ŋmanni la Kirisita ŋɔn bɛ seem la zaa. 14Ka ti ku laa n‑nyɛ bileesi, ti ku laa n‑dɔli wulisigu balibubalibu hoo pɛsigu ŋɔn zɛ ti yɔriyɔri seem; ti ku laa n‑kyɛ ka yɔsimyɔmsiriba nin ma'ai ti ziri n‑yɔmsiri ti. 15Ay! - Ti nin lee n‑yɛtti yɛlimaŋni, wurilim zugu. Ti nin zoaai na m‑paai ŋɔn Kirisita ŋɔn sa'ai seem, dama u nyɛ la ti zaa zuguraana. 16Ŋɔn siri nyɛ zugu maa, ka tirim mun nyɛ la u ningbiŋŋu tuga. Ŋɔn zugu ka ti zaa la'am n‑nyɛ yimmu, dama u siri nyɛ la ti zugu. Ŋɔn saani ka ti zoaari m‑meeri taaba ka nyari yaa ni kpeeŋŋu di zugu. Ningbiŋŋu wa ya'ari ni tugri kam zaa mari yiiko n‑tumni ka tuma ŋɔn nyɛ seem. Ka di zaa nyɛ la lala wurilim zugu.

17N yɛtti ya la nŋɔa#:- n kukɔri ka n yɛtti ni, Naawunni zugu, ni, yan di kyɛ ka ya beesigu na bɛ la hoo ban bu mi Naawunni la ŋɔn bɛ seem, ba sufu ni teesiyɔya ziilinsi zugu. 18Dama ban bu mi din m bɛ ni; ba bɛ la yɛla ni, ka na zi Naawunni nyɔvuri ŋɔn nyɛ seem, ba ziilinsi ni ba tuppuwumni zugu. 19Ba ba'a laa n‑ka ba soori ni, ka yi tuusi, bee, ka bu tuusi? Ba zaŋŋi ba mansi n‑ti yɛlibeeri balibu kam n‑kpalim m‑boori m‑paasi, dama ba sufu boorimma nla. 20Amaa pa lala ka yarima n daa bamsi Kirisita soori maa! 21Ay! - Yan daa wum u yɛla ka daa deaai u wulisigu maa, yɛlimaŋni din bɛ Yisa saani la zugu n‑daa la. 22Ba daa wulisi ya, ni, yan daa nyɛ ninvugseeba sahanseaa la, lala niriba daa bɛ la baasiyɔri soori ni, kɔribeeri ni yɔmsa zugu; ni, ya zaŋŋma lala ninvugkura beesigu maa m‑basi. 23Ni, ka kyɛ ka ya teesa leebi teesipaala. 24Ni, ka lala ya nin maali n‑naam n‑leebi ninvugpaala Naawunni zugu. Halli ya nin leebi ninvugveela, yɛlimaŋni dima kasikasi.

25Dinzugu see ka ya kyɛli ziri; ni, “sɔkam yɛtti yɛlimaŋni n‑tiri u taraana”, dama ti zaa nyɛ la ningbiŋŋu yinni tuga. 26Ni, “Halli ni ya sufu yi yisigi, yan di tum putoo.”; yan di kyɛ ka ya sugyeaa yuui halli ka wuntaŋŋa ti lu. 27Yan di tiili dariga n‑ti Sintaani. 28Ŋɔn yi zuuri zaa kyɛli zuubu ka zaŋŋi u nuusi n‑tumni tunsuma: di nin kyɛ ka u mari bunseesi ka u nin toaai n‑zaŋŋi n‑suŋŋi ban kɔŋŋni la. 29Yan di tɔ'asiri yɛttɔ'abeeri; ya tɔ'asim yɛttɔ'asuma an nin suŋŋi yan tɔ'asiri n‑tiri seeba maa, ni seelli din nin niŋi ba anfaani. 30Yan di kyɛ ka Naawunni Sii Kasi maa sufu sa'am ya beesiyɔri zugu, dama ŋɔn daa daalim ya n‑wulisi, ni, ya nyɛ la Naawunni dinni, ni, ya maali la siri nti fa-m‑basi dabsiri daari. 31Ya yim putoo ni, ni sufu yisigri ni sufugyeaa zaa ni, ni yɛttɔ'abeeri ni nyaanzum ni; halli ya kyɛli yɛlibeeri zaa yɛla. 32Amaa ka ya wuri taaba, ka mari nirilim ni taaba, n‑zɔri taaba namboo, ka kyɛri taaba taalli hoo Naawunni ŋɔn kyɛ ya taalli m‑pɛŋŋi ya seem la, Kirisita zugu.

Currently Selected:

ƐFƐSUSI DIMA 4: maw

Highlight

Copy

Compare