I KƆRINTI DIMA 7

1Tɔ: ka zaŋŋi n‑kyaŋŋi yɛttɔ'aseesi yan daa sɔbi a yɛla la: di veela ni doo bɛ ni ka bu di pɔ'a. 2Amaa zina kɔrisi zugu, ya kyɛ ka doo zaa mari u pɔ'a, ka pɔ'a zaa mari u sira. 3Kyɛ ka doo maa tiri u pɔ'a din sumsi u, ka pɔ'a maa gba tiri u sira, hoo din tuusi seem. 4Dama pɔ'a maa ningbiŋŋu pa la u toori dinni kɔkɔa, amaa u sira gba dinni; ka lala doo maa ningbiŋŋu pa la u toori dinni kɔkɔa, amaa u pɔ'a gba dinni. 5Yan di za'asi taaba, ka di yi pa la ya niŋi la nangbanyinni, ni, ya zaŋŋi lala saha maa n‑susiri Naawunni; ka laa n‑la'am taaba yaasa. Ka di kyɛ ka Sintaani zamsi ya n‑nyaŋŋi, yan ku toaai m‑mari ya mansi zugu. 6Man yɛtti la nŋɔa, di pa la n zaali ya lala zaaligu, amaa ya yi tumni lala, n nin sakki. 7Man saani, n da boori la sɔkam dɔli la n toori soori. Amaa sɔkam mari la u toori soori Naawunni piini zugu: yinni mari la piini kanŋɔa, ka sɔ mari la seaa.

8Tɔ: ka n yɛtti n‑tiri seeba ban na bu di pɔ'a, bee, n‑kuli doowa, ni pukɔya gba, ni, ba yi kpalim m‑bɛ hoo man bɛ seem wa, di sɔa. 9Amaa ba yi ku toaai n‑gbaai ba mansi, ba dim pɔ'aba, bee, n‑kuli dɔppa. Ya yi niŋi lala di veela n‑gaari ya kyɛ ka pɔ'aba bee dɔppa yɛla ti mugsi ya. 10Ban mun mari pɔ'aba, bee, siridima ka n yɛtti wa - amaa pa mani n‑yɛtta, amaa ti Dugma zaaligu nŋɔa - ni, pɔ'a di yi u sira yiri: 11amaa u yi yi, ŋɔn di laa n‑kuli dɔsɔa, bee, ŋɔn labma u sira maa yiri. Ka doo mun di yiisi u pɔ'a. 12Ban kpalim muna ka n yɛtti wa - mani n‑yɛtta, pa ti Dugma zaaligu nŋɔa - ni, Kirisita bisɔ yi mari u pɔ'a ka pɔ'a maa pa la yɛdda nira amaa u sakki ni u kpalim m‑bɛ u saani, tɔ, ŋɔn di yiisi u pɔ'a maa. 13Ka pɔ'a mun yi mari u sira ka sira maa pa la yɛdda nira amaa u sakki ni u kpalim m‑bɛ u saani, tɔ, ŋɔn di yi. 14Dama doo ŋɔn ka yɛdda maa leebi la Naawunni dinni u pɔ'a la zugu, ka pɔ'a sɔ ŋɔn ka yɛdda la gba leebi la Naawunni dinni u sira la zugu: di yi pa lala, ya biisi naa m‑pa la Naawunni dinni, amaa ka ba siri nyɛ la u dinni. 15Amaa ŋɔn ka yɛdda la yi ya bakki, kyɛ ka u bakki. Yɛdda daana la ka taalli dinŋɔ ni: Naawunni m booli ti ni ti bɛ sufudoaa ni. 16I bu nya, pɔ'a? - di bu ta'ai ni i fa i sira m‑basi. Bee nyini bu nya, doowa? - di bu ta'ai ni i fa i pɔ'a m‑basi.

17Di zaa yɔri, ya kyɛ ka sɔkam kpalim m‑bɛ beesiseaa ti Dugma ŋɔn daa zaali u, sahanseaa Naawunni ŋɔn daa booli u maa. N zaaligu n‑kur la, man yi bɛ Naawunni niriba la'aŋŋu kam zaa ni. 18Dɔsɔ m bɛ ni ka ba daa guni u pɔi ka Naawunni naayi booli u? - Tɔ, u di kpiisi gunibu maa. Sɔ mun bɛ ni ka ba daa bu guni u ka Naawunni booli u? - Tɔ, u di laa n‑kyɛ ka ba guni u. 19Gunibu bee bu guni zaa nyɛ la yɔri: din kpa talasi nyɛ la Naawunni zaaligu zaa dɔligu. 20Kyɛ ka sɔkam kpalim m‑bɛ ŋɔn daa bɛ seem sahanseaa Naawunni ŋɔn daa booli u. 21I yi daa nyɛ la daabri i booligu saha maa, nyin di kyɛ ka di mugsi i - amaa i yi ti nya soori ni i ti yi daabtiri maa na, kur dɔla ka n‑yi. 22Yɛlimaŋni, ŋɔn daa nyɛ daabri u booligu maa saha zaa mari la yɔlisim ti Dugma saani, ka ŋɔn mun daa su u maŋŋa u booligu maa saha leebi la daabri n‑ti Kirisita. 23Ba daa da ya ni n‑yɔa; dizugu yan di leebi daaba n‑ti saalidima. 24Dizugu sɔkam ŋɔn daa bɛ seem zaa ka Naawunni daa booli u, u kpalimma m‑bɛ lala, Naawunni zugu.

25Tɔ; ka ban na bu di pɔ'aba muna, ni pɔ'aseeba ban na bu kuli dɔppa gba - n ka ti Dugma zaaligu zaŋŋi n‑kyaŋŋi ba yɛla; amaa man ŋɔn nyɛ sɔ Naawunni ŋɔn zɔ namboo n‑ti ma la, ka u kyɛ ka n niŋi yɛdda daana di zugu, m mari la saawara n‑ti ba. 26Ni, n teesiya, ni, zuna mugsigu ŋɔn bɛ seem zugu, ba yi kpalim m‑bɛ lala, di sɔa. 27Ni, i pun di pɔ'a? - tɔ, di yiisi u. I na ka pɔ'a - tɔ, di bɔ pɔ'a. 28Amaa i yi di pɔ'a, i bu tum taalli; ka pɔ'asariga yi kuli doowa, u gba bu tum taalli. Amaa ban mari pɔ'aba, bee siridima, nin di wahala duniya wa puuni, ka m boori ni n kyɛ ka ya ku di lala wahala. 29Man wulisiri seelli maa nŋɔa, m mabiisi: saha maa ku yuui. Pampaŋŋɔ zaŋŋi n‑wa, see ka ban mari pɔ'aba gba bɛ hoo ban ka. 30Lala yaasa, kyɛ ka ban kumni la bɛ hoo ban bu kumna, ka ban mari sufumaasim bɛ hoo ban mari sufusa'aŋŋu, halli ban daari neema gba bɛ hoo ban bu su marigu. 31M‑paasi lala, ban mari duniya buna n‑tumna, ba di kyɛ ka ba ba'a zaa bɛ a ni. Dama duniya kanŋɔ gatti ni maa. 32M bu boori ni seelli ti mugsi ya. Dakoori ba'a zaa bɛ la ti Dugma yɛla ni; ni u baŋŋi ŋɔn nin niŋi seem ka ti Dugma sufu maai. 33Pɔ'adaana mun ba'a bɛ la duniya yɛla ni; ni u baŋŋi ŋɔn nin niŋi seem ka u pɔ'a sufu maai; 34ka u ba'a puri buyi. Lala ka pukoori, bee, pɔ'asariga ba'a zaa bɛ la ti Dugma yɛla ni; ni u baŋŋi ŋɔn nin niŋi seem ka bɛ kasi n‑ti ti Dugma, u ningbiŋŋu ni, ni u sii ni gba. Pɔ'a sɔ ŋɔn mari u sira muna - u ba'a bɛ la duniya yɛla ni; ni u baŋŋi ŋɔn nin niŋi seem ka u sira sufu maai. 35N yɛtti dinŋɔ la ya suŋŋsim zugu; pa la man ya ta'ari ya yɛla. N ya wulisiya ya ya nin niŋi seem ka ya teesa ku puri, amaa ka ya tumni din tuusi, ka kur gyeemni ti Dugma la suŋŋasuŋŋa.

36Tɔ: ka zaŋŋi n‑kyaŋŋi dɔsɔ ŋɔn su pɔ'asariga yɛla maa: pɔ'a maa yuuma yi paai doo kulibu ka dɔsɔ ŋɔn su u yɛla maa teesi, ni, u bu tumni din tu seem n‑tiri u, kyɛ ka u niŋi u sufu ŋɔn boori seem: ba yi ti niŋi amriya di ka taalli. 37Amaa lala doo maa yi niŋi u sufu ni yɛdda, ka sɔ bu mugsiri u, u yi nyaŋŋi u maŋŋa ka gbaai gbaari kirikiri - tɔ, u yi kyɛ ka pɔ'a maa kpalim la pɔ'asariga, lala gba veela. 38Dinŋɔna pɔ'a maa yi ti kuli doowa, lala dɔli la soori amaa u yi bu kuli doowa, di sɔa.

39Pɔ'a sɔ yi kuli doowa, di sum ni u bɛ la u sira maa saani, halli ni doo maa nyɔvuri tɔriga. Amaa u sira maa yi ti kpi, u mari soori ni u kuli dɔsɔ ŋɔn boora; amaa see ka doo maa nyɛ la ti Dugma nira. 40Di zaa yɔri, u yi kpalim la pukoori u nin mari sufumaasim n‑gaari lala - man teesi seem nŋɔa, ka m mi, ni, n gba mari Naawunni Siiya.

Currently Selected:

I KƆRINTI DIMA 7: maw

Highlight

Copy

Compare