I KƆRINTI DIMA 8

1Tɔ; ka zaŋŋi n‑kyaŋŋi bunseesi ban zaŋŋi m‑maali ba'a la yɛla: ni, ‘Ti zaa mari la bamsim.’ - tɔ, ti siri mi lala halli, amaa bamsim lala taabu zugu ka niriba kur duusiri ba mansi; wurilim mun nyɛ la din paasiri niriba beesisuŋŋu. 2Ka nira ŋɔn teesi, ni, ŋɔn mi la seelli la - di daama na ka miilinsi din dɔli soori. 3Amaa nira ŋɔn wuri Naawunni, Naawunni mi u yɛla. 4Tɔ: zaŋŋi n‑kpa ba'a bundira diibu ziiya, ti mi, ni, ba'ari pa la bunseelli kam duniya wa ni, ka wunni ka ni di yi pa la Naawunni kɔkɔa. 5Ba yi tɔ'asi ba'a ni wuna yɛla duniya wa puuni, saazugu bee tingbaŋŋu ni - halli ka ba siri tɔ'asiri la wuna ni dugmadima pam yɛla - 6di zaa yɔri, dama tirima saani ka Naawunni yinni bɛ ni. Ti Ba Naawunni n nyɛ u, ka bunseelli kam yi la u saani na, ka ti gba bɛ ni n‑tiri u. Ka ti Dugma yinni gba bɛ ni: Yisa Kirisita n nyɛ u, ka bunseelli kam bɛ ni ŋɔn Yisa zugu, halli ŋɔn zugu ka ti gba bɛ ni.

7Yɛlimaŋni nla: amaa pa sɔkam zaa m mari bamsim wa. Seeba na kpalim m‑miili la ba'a yɛla, halli ka ba yi ti di lala diibu ba teesiri, ni, ba diri a ni n‑tiri ba'ari maa. Lala ka ban bu mi taalli ni din tu la yɛla galimiya ni. 8Pa diibu zugu ka ti pɔtti Naawunni saani na: ti yi bu di, ti ku pɔsigi seelli; ti mun yi di, lala ku paasiri ti seelli. 9Amaa ya baŋŋma ka ya yuubu niŋbu di kyɛ ka ban yɛdda bu zɛ deede la ti burigi n‑lu. 10Ya bu nya? - ŋɔn bu mi taalli ni din tu la yi ti nya ka nyini bamsim daana wa bɛ la ba'a duri ni n‑diri diibu, ammi, lala ku kyɛ ka u di ba'a diibu? - Ii, u nin di. 11Ka lala nin kyɛ ka ŋɔn na zi yɛla suŋŋa wa baasi yɔri nyin bamsim maa zugu - halli ni u nyɛ la i mabiiya, ka ŋɔn gba zugu ka Kirisita daa kpi. 12Ya yi tum taalli wa taabu n‑niŋi ya mabiisi, ka kyɛ ka ba burigi ban na zi soori deede zugu, ya tumni la taalli n‑niŋi Kirisita. 13Dizugu n numni wa ŋɔppu yi nin kyɛ ka n taraana burigi, dinŋɔna n ku laa n‑ŋɔbi numni yaasa, dama di nin kyɛ ka n taraana burigi n‑lu.

Currently Selected:

I KƆRINTI DIMA 8: maw

Highlight

Copy

Compare