Lom 10

1Buamɛ eé, ya mɛ́ŋa na ɛcaná ciéŋí anyía Bandɔ́mɛsɛ́ é nohí bɔnyɛ *Islayɛ́l. Asana eéyé ɛ ŋa mɛ́ hɛ́nyɛ́na ɔbɛ́cɔ́kɔ́lɛ́na Bandɔ́mɛsɛ́ e yiíyi. 2A nyiámɛ nyɛlɛca, bá bɔ́ŋa bebíínjíénú e nyiwééné anyía bábɔ́ látákɛ́na Bandɔ́mɛsɛ́ mbá bé ti ŋé bú menyi bɔmbányɛ bɔmbányɛ ciayɛ́ taaká ci ohónyí. 3Yááŋa anyía bé tí ómó bú ményi bɔmbányɛ bɔmbányɛ ohónyí awɔ́ Bandɔ́mɛsɛ́ ŋe híite baacɔ háyɛ bɛtálɛ́mánánɔ́ bɛ́ baacɔ eeyé eé buúse ; ɛ́ɛhɛ́ bá ŋa bɔ́ bɔlɔkɔ úúbú ohónyí ú bɛ́muátá, bá ŋá bɛ́sáŋɔ́na ohónyí awɔ́ Bandɔ́mɛsɛ́ ŋé hiíte baacɔ háyɛ bɛtálɛ́mánánɔ́ eeyé eé buúse. 4Yááŋa anyía nyɛfaaya nyí *Kilís ŋa fɛ́nda ohónyí a baacɔ a bá ŋa bɔ́ aamba ɔbá bɛtálɛ́mánánɔ́ bɛ́ baacɔ a asana na nyɛlátɛ́na nyí bikotí bí *Moyís. U ŋaá kɛ́láka aáná anyía baacɔ bekime a bá ŋa bɔ́ háya mɔŋɔlɛ́ nááyá, Bandɔ́mɛsɛ́ é beébe hiitéke háyɛ bɛtálɛ́mánánɔ́ bɛ́ baacɔ eeyé eé buúse.

Muháya mɔŋɔlɛ́ ná Bandɔ́mɛsɛ́ káá bá ne olíhe

5A asana na baacɔ a bá ŋa bɔ́ bɛ́táá anyía Bandɔ́mɛsɛ́ áŋa wu ɔkɛla anyía bá bámɔ́kɔ́na bɛtálɛ́mánánɔ́ bɛ́ baacɔ eeyé eé buúse a nyɛlátɛ́na nyí *bikotí nyiínyi ne nyiínyi, *Moyís ŋɔ yɔɔ́ŋɔ́kɔ́ ɔsɛ : « Ɔɔcɔ okime awɔ́ u ŋa látɛ́na bɔmbányɛ bikotí bikime káá bá ne olíhe e biíbi. »#Lef 18.5 6Mbá a asana na baacɔ abá Bandɔ́mɛsɛ́ ŋá kɛla anyía bá bámɔ́kɔ́na bɛtálɛ́mánánɔ́ bɛ́ baacɔ anyía bá ŋa bɔ́ háya mɔŋɔlɛ́ nááyá, yááŋa yɔɔ́ŋɔ́kɔ́nɔ́ anyía : « Atɛ bɛ́báta asɛ́ : Mbá aányɛ́ u káá báátáka ɔ Ɔmuaná e ? » Búáŋa osúúnyítune *Kilís. 7Atɛ bɛ́báta tɔ́na asɛ : « Aányɛ́ u káá sɔ́ɔ́náka a haála hé biwéewé e ? » Búáŋa okohéenyutune Kilís e biwéewé. 8Ciɔɔ́ŋɛ́ cɛ́ Bandɔ́mɛsɛ́ ŋa kɔ́ɔna cɛ́sɛ : « Bɛsana bɛ́ Bandɔ́mɛsɛ́ áŋa hoóhi na kuɔŋɔ́ ; bɛ́áŋa ne oówo e nyuúté na ɔɔ́wɔ ɔ ɔtɛ́má noómi. »#Tet 30.12-14 Bí ŋeé húle o olumitinine, biíbi tu ŋe sú húlinyi baacɔ. 9Yááŋa anyía mbɔ́kɔ ɔ ŋɔɔ́ kɔɔna na nyiɔ́wɔ nyuúté nyɛ́ bɛ́muátá anyía Yésus áŋa Otéŋí a Waáŋá u baacɔ bekime, e lumitekinine tɔ́na e úúwu ɔtɛ́má noómi anyía Bandɔ́mɛsɛ́ ŋeé wuúci heényi e biwéewé, ɔ kɔ́ɔ́ nɔhɔ. 10Menyi anyía ɔɔcɔ ewú u ŋe lúmitinine e úúyé ɔtɛ́má noómi, Bandɔ́mɛsɛ́ ŋeé wuúci hiíte háyɛ atálɛ́mánánɔ́ yɛ́ ɔɔcɔ eeyé eé buúse. Ooci awɔ́ u ŋaá háya ɛmbasɔ́ na nyíáyɛ́ nyuúté, Bandɔ́mɛsɛ́ ŋeé wuúci nohi. 11Háyɛ yááŋa yɔɔ́ŋɔ́kɔ́nɔ́ anyía : « Ɔɔcɔ awɔ́ u káá háya mɔŋɔlɛ́ nááyá tɛ káá lɔ́kɔ́ma aatɔ́ ɔlama ta buɔ́sɛ́. »#Ɛsa 28.16 12Aáná, bú ŋo tóŋínyi anyía nyɛálɔ́nána tɛ á bá ɛ ɛkatɛ́katɛ́ ci ne *Besuif ne eebe a bá tɛ ábɔ́ bá Besuif, anyía beébe bekime bá bɔ́ŋa ne Otéŋí a Waáŋá hú ɔmɔtɛ́ ; wuúci u naŋa we yiínjíékíne bɛmbányɛ́kɛ́ bɛ́ bɛnyɛ́ma a baacɔ bekime e bé ŋe bú wuúci bata ɔ ɔbɛ́cɔ́kɔ́lɛ́na noómi. 13Yááŋa yɔɔ́ŋɔ́kɔ́nɔ́ anyía : « Ɔɔcɔ okime awɔ́ u kɔ́ɔ́ lɔ́ŋɔ́kɔ Otéŋí a Waáŋá o o wuúci ɔ́ɔ́lɔ kɔ́ɔ́ nɔ́hɔ ».#Sɔɛ 3.5

14Mbá anyána bá bɔ́ŋa bé o wuúci lɔ́ŋɔ́kɔ, mbɔ́kɔ bɔ́ tɛ́ ɔmɔ́ bɔ́ háya mɔŋɔlɛ́ nááyá e ? Anyána bá bɔ́ŋa bá ɔháya mɔŋɔlɛ́ nááyá, mbɔ́kɔ bá tɛ ɔ́mɔ́ bɔ́ lɔ́kɔ́ma ɔɔcɔ á táŋáka yááyɛ́ asana e ? Anyána bá bɔ́ŋa bá ɔlɔ́kɔ́máka yááyɛ́ asana, mbɔ́kɔ ta ɔɔcɔ ti ŋgeé beébe yiíyi hulínyi e ? 15Mbá anyána aná bá bɔ́ŋa bé okohúlikinyi baacɔ yááyɛ́ asana mbɔ́kɔ bé tí omó beébe tɔ́mɔ́kɔ́na e ? Aáná yááŋa yɔɔ́ŋɔ́kɔ́nɔ́ anyía : « Bú ŋa hɔ́la ɔhɛka anyía ɔ́ɔ lɛcáka baacɔ a bá bɔ́ŋa na bɛmbányɛ́kɛ́ bɛ́ ɛsɔ́ma ábɔ́ fáakɔna. »#10.15 Ɛsa 52.7 16Mbá ta híáná, hú bɛtaŋalaka bí Besuif ŋe lumitinine Ambányɛ yɛ́ Ɛsɔ́ma. *Ɛsayí ŋaá bɛ́cɔ́bɔ́kɛ́na Bandɔ́mɛsɛ́, ɔsɛ : « Ééʼ, Otéŋí a Waáŋá, aányɛ́ u ŋe lúmitinine úúsú ɔtáŋa e ? »#Ɛsa 53.1 17Olumitinine ŋeé húle a bɛsana abɛ́ bá ŋá lɔ́kɔ́ma ; bɛsana eébí ŋa lɛca Kilís. 18Ɛ́ɛhɛ́ ɛ ŋa mɛ́ bata ɛsɛ́ : Mbá bɔ́ tɛ ɔ́mɔ́ bɔ́ lɔ́kɔ́máka bɔmbányɛ Ambányɛ yɛ́ Ɛsɔ́ma, ayɛ́ʼ ? #10.18 Baacɔ a bɔ́mɔtɛ́ ŋa bɔ́ bɛ́táá anyía baacɔ a bá tɛ ábɔ́ bá Besuif ; bɔ́mɔtɛ́ báyɛ Besuif. Ɛ́ɛ, bé ŋe bú yiíyi lɔ́kɔ́máka, anyía yááŋa yɔɔ́ŋɔ́kɔ́nɔ́ anyía : « Bá ŋaá lɔ́kɔ́máka cííbú ikelú ɔ ɔmɛsɛ́ okime ; maabɔ́ mehúnyi mɔ́ bɛ́átábɔ́tɔ́kɔ́na ɔ ɔkɔɔ́háma hú o nyióndi nyɛ́ ɔmɛsɛ́. »#Maŋ 19.5 19Aáná ɛ ŋa mɛ́ bata tɔ́na anyía : Yaŋɔ́ ɛsɛ, bɔnyɛ *Islayɛ́l ŋa bɔ́ lɔ́kɔ́máka bɔmbányɛ bɛsana eébí e ? Ɛ́ɛ, mbá bó tí omó bú lúmitinine. Yááŋa anyía Moyís ŋaá cáŋa ɔkɔɔna ɔsɛ : « Bandɔ́mɛsɛ́ ɔsɛ : “Ɛ ká mɛ́ kɛla nú aákákɛ́na baacɔ a bá tɛ ábɔ́ bá baacɔ bá taaká cɛ bunɔŋɔ, nuó líŋekine eebe bá bunɔŋɔ e bé ti ŋe bú menyi ta bɔkɔ.” »#Tet 32.21 20E elime eécí, Ɛsayí ŋaá bɛ́kándɔ́na ɔkɔɔna ɔsɛ : « Bandɔ́mɛsɛ́ ɔsɛ : “Ba-tɛ-mɛ-aamba ŋa bɔ́ mɛ lɛcáka, mío bítóŋínyi né eebe a bɔ́ tɛ ɔ́mɔ bɔ́ mɛ bɛ́cɔ́kɔ́lɛ́na.” »#Ɛsa 65.1 21Mbá, a asana na baacɔ bé Islayɛ́l eébé Ɛsayí ŋaá kɔɔna ɔsɛ : « I ŋeé mi bísúékíne buamɛ buɔ́sɛ́ bukimekime, i beébe késíkínyi na aabá anyía bá faáya, mbá bá bɔ́ŋa na bɛɛtɔ́ ɔnata, bá tɛ mɛ háyɛ́na. »#Ɛsa 62.5

Currently Selected:

Lom 10: lem

Highlight

Copy