Lom 11

Bandɔ́mɛsɛ́ tɛ ɔ́mɔ bɛ́yuáta buayá : Islayɛ́l

1Ɛ́ɛhɛ́ ɛ ŋaá mɛ bɛ́bátɔ́tɔ́na ɛsɛ́ : Ɛ́cɛ anyía Bandɔ́mɛsɛ́ na maá bɛ́yuáta buayá : Islayɛ́l e ? Eéʼeé, yɛ́ tɛ á bá aáná, ta buɔ́sɛ́ ! Yááŋa anyía yaŋɔ́ bɛ́muátá ooci, ɔɔcɔ u *Besuif, u bɔnyɛ *Abɛ́laham, u hɛnyɛ́nɔ́ hɛ́ *Bɛnsamɛ́ŋ. 2Bandɔ́mɛsɛ́ tɛ́ ŋa bɛ́yúáta buayá, anyía u ŋa cáŋa e buúbu lɔtɔ́ feeké. Nu ŋe nú ményi bɔmbányɛ aátɛ́ Ciɔɔ́ŋɛ́ cɛ́ Bandɔ́mɛsɛ́ ŋá kɔ́ɔna haála ehé Éli ŋɔ́ sɔ́mɛ́na baacɔ bé *Islayɛ́l ná Bandɔ́mɛsɛ́, ɔsɛ : 3« Otéŋí a Waáŋá, baacɔ eebe á bɔ́ŋa bakɛlákánɔ́ anyía : Bá ŋá ɔɔ́nɔ́kɔ bɔ́ɔ́wɔ *behémúnyi bɛsana, bá ŋá katáka endúme cá ɔ kuɔŋɔ́ nyemikinyi. Hú yaŋɔ́ bímuócí ya mɛ́ŋa ɔlɔbɔ́nɔ́ ; aáná bá ŋa bɔ́ aamba tɔ́na ɔ mɛ ɔ́ɔ́nɔ. »#1Bt 19.10 4Mbá aátɛ́ Bandɔ́mɛsɛ́ ŋeé wuúci laána e ? U ŋeé wuúci laána ɔsɛ : « Ya mɛ́ŋa ɔlɔtɔ́nɔ́ baacɔ tɔ́sɛ́na ítíndétú nɔ́mɔ. Bé tí ŋe bú túmíne Baal#11.4 Bandɔ́mɛsɛ́ cɛ baacɔ bá Kanaáŋ, bé ŋe bú buúbu híke bɛ́mɔtɛ́ bikúlú na bandɔ́mɛsɛ́ Asɛtáaté. eŋéndu. »#1Bt 19.18

5*Híáná yááŋa tɔ́na aámbáya : Tua sɔánáŋa hɔ́á, basɔ́ bɛtaŋalaka bɛ́ baacɔ abɛ́ Bandɔ́mɛsɛ́ ŋɔ lɔ́tɔ́kɔ a yááyɛ́ yaála yí nuubo. 6U ŋaá basɔ́ lɔtɔ́kɔ, basɔ́ Besuif, a yááyɛ́ yaála yí nuubo, mbá tɛ́ cáŋa a maasɔ́ mekilíkínyí. Mbɔ́kɔ yá bá anyía a maasɔ́ mekilíkínyí, keyé yááyɛ́ yaála yí nuubo tɛ á bá taaká cɛ yaála yí nuubo. 7Mbá aátɛ́ aná e ? Yááŋa anyía bɔkɔ abɔ́ baacɔ bé Islayɛ́l ŋa bɔ́ bá bábɔ́ aambaka, bé ti ómó bú buúbu bɔ́ŋɔ ; mbá hú eebe abá Bandɔ́mɛsɛ́ ŋɔ lɔ́tɔ́kɔ bá ŋa bɔ́ bɔ́ŋɔ buátɛ́ bɔkɔ. U ŋaá kɛ́la anyía bɔsɔ́ɔ́kɔ́ bé etémbí tɛ lɔ́kɔ́ma bɔmbányɛ bíáyɛ́ bɛsana. 8Aáná yááŋa yɔɔ́ŋɔ́kɔ́nɔ́ anyía : « Bandɔ́mɛsɛ́ ŋe nétísi cííbú ɛtɛ́má anyía bá tɛ lɔ́kɔ́ma bɔmbányɛ bɛsana, yó beébe hákɛ́na bibúté e eése, yó beébe cúáka eetú. Ɔ ɔkɔɔ́háma aámbáya eeci, bá búánáŋa híáná. »#11.8 Tet 29.3 ; Ɛsa 29.10 9Híáná Otéŋí Táfit ŋaá kɔ́ɔna ɔsɛ : « Maabɔ́ manáka á bámɔ́kɔ́na, bíábɔ́ bɛbɔka bɛ́ bɛ́muátá, meéme tɔ́na tukolí tɔtɔ́ɔ́lɛ́ákánɔ́ ; biíbi eébí bí ŋeé beébe kúfítínyi anyía bá kuakɔ́na ɔ bɔ́nɔ́sɛ noómi. 10Bandɔ́mɛsɛ́ beébe hákɛ́na bibúté e eése, bá kúakɔna indímé, wé beébe kunyíéke elime bikúlú bikime. »#Maŋ 69.23-24

11Ɛ́ɛhɛ́ ɛ ŋa mɛ́ batá aná ɛsɛ́ : Mbá baacɔ bé Besuif ŋe bú kúfétékéné, bɔ́ kúákɔna buúse bukime a asana na maabɔ́ maabɛ́ e ? Eéʼeé, tɛ́ caŋa aánáʼo. Yááŋa hú anyía baacɔ a bá tɛ ábɔ́ bá Besuif ŋa bɔ́ bɔ́ŋɔ ohónyí wú ɔnɔhɔkɔ ; buúbu bú ŋeé héléníne Besuif yaáká ɛ ɛtɛ́má. 12Yááŋa anyía, mbɔ́kɔ nyɛnana nyí Besuif ŋe yiínjie bɔnɔ́mɛ a baacɔ bá ɔmɛsɛ́ ooci, nyíábɔ́ nyɛkua a asana na búábɔ́ bucɔ́ɔ́cɔ́ o olumitinine iínjíékíne baacɔ a bá tɛ ábɔ́ bá Besuif bɔnɔ́mɛ, mbá anyána aná na nyɛkahálɔ́mɔ́na o olumitinine tɛ́ káá bá na bɔnɔ́mɛ buéŋí ɔ ɔhɔla e ?

Bóol ŋá táŋa na baacɔ a bá tɛ ábɔ́ bá Besuif

13Aámbáya, náánɔ́ ɛ ŋa mɛ́ táŋa, banɔ́ abá nu tɛ anɔ́ bá *Besuif. Énu menyí anyía ya mɛ́ŋa ɔtɔ́mánɔ́ náánɔ́, i menyukune anyía búámɛ buólí bɔ́ ɛndɔ́ma áŋa buáŋá ɔ ɔhɔla. 14Aáná ɛ ŋa mɛ́ aamba ɔnyiɔ buólí eébú bɔmbányɛ anyía baacɔ ɔ bɔ́mɔtɛ́ bá buamɛ á hákɛ́na mɔŋɔlɛ́ né Yésus, bá nɔ́hɔkɔ ; bé bísúékíne bɔsɔ́ɔ́kɔ́ o o búle mɛ áákɛ́na. 15Yááŋa anyía, Bandɔ́mɛsɛ́ ŋaá bɛ́yuátaka Besuif ananyía wáá latákána ne wuúci na baacɔ bé etémbí bá ɔmɛsɛ́ ooci. Mbá, ekúlú ayɛ́ Bandɔ́mɛsɛ́ ké túné é beébe káháka, anyána bú káá bá aná e ? Bú káá bá ambányɛ́kɛ́ yɛ́ asana ɔ ɔhɔla anyía bú ké yiínjíékíne olíhe e biwéewé. 16Yááŋa anyía, mbɔ́kɔ bé ŋeé tómísí Bandɔ́mɛsɛ́ bɛtɔ́mɔtɔ́mɔ o o wuúci nyemi, bɛnyɛ́ma bikime a bɛ́ ɔ́ lɔ́bɔ áŋa tɔ́na bíáyɛ́. Mbɔ́kɔ bé ŋeé wuúci iínjíe akaŋá yɛ́ bɔɔtɛ́ a bɔ́mɔtɛ́ o o wuúci nyemi, ɛndáfɛ tɔ́na ŋeé wuúci bɛ́lɔ́kɔ́mɛ́na ikime.#11.16 Fanáka Ɛmb 15.19-21. Na bɛtɔ́mɔtɔ́mɔ na akaŋá yɛ́ bɔɔtɛ́ áŋa tubílícínyínyí tú cííbú sɔ́kɔ́nɔ́ (bik. 28). 17Bá ŋa sáŋɔ́náka ɛndáfɛ a cɛ́mɔtɛ́ cɛ́ atɔ́kɔ́, bó híiteke ɛndáfɛ cɛ́ alɔalɔa yí eciké o otúmékíne háyɛ bɛcɔ́kɔ́ i indíné cɛ atɔ́kɔ́ eéyé. Banɔ́ abá nu tɛ anɔ́ bá Besuif nua nɔ́ŋa háyɛ ɛndáfɛ cɛ́ alɔalɔa eéyé. Aámbáya nu ŋa nɔ́ lɛca bɔmbányɛ ebú Besuif ŋaá bá bábɔ́ lɛcaka, bɔkɔ búmɔtɛ́ háyɛ ɛndáfɛ ŋá lɛca bɔmbányɛ e menyífé e me ŋée húle i indíné cɛ bɔɔtɛ́. 18Asana ɔ́mɔtɛ́, nɔtɛ bábákɛ́na ɛndáfɛ acɛ́ bá ŋa sáŋɔ́náka#11.18 Nyɛkɔ́ŋɔ́na a nyɛ́mɔtɛ́ : « ɛndáfɛ cí nyitúme » anyía, mbɔ́kɔ ɔtɛ́má ŋɔ yɔ́ɔ hámɛ́na wú obíbéétíki aáná, menyí anyía tɛ́ cáŋa banɔ́ nua nɔ́ŋa betímbíékénú bɛkaŋá, mbá bɛkaŋá biíbi bɛ́áŋa bɛ́ banɔ́ timbiekenu.

19Yáakɛlá nua nɔ́ŋa nú ɔkɔɔnaka anyía bá ŋaá sáŋɔ́náka ɛndáfɛ cɛ́ atɔ́kɔ́ ɔ ɔkɛla anyía bá basɔ́ túméke háyɛ bɛcɔ́kɔ́ a ciayɛ́ indíné. 20Ɛ́ɛ, yááŋa taaká aáná. Bé ŋeé ciíci aáláka ananyía cí tí omó lúmitinine. Mbá banɔ́, nua nɔ́ŋa aáhá anyía nu ŋe nú lumitinine. Nuti bíbéétíki aná ! Énu kékéke bu kékéke Bandɔ́mɛsɛ́. 21Yááŋa anyía, háyɛ Bandɔ́mɛsɛ́ tí ómo kékenyi ɔsáŋɔ́náka ɛndáfɛ cɛ́ bɛ́muátá cɛ́ atɔ́kɔ́, híáná u tɛ́ ká banɔ́ kékenyi.#11.21 Cɛ́mɔtɛ́ Ciɔɔ́ŋɛ́ cɛ́ buáyá áŋa na « bíkékényíki ɔ ɔkɛla anyía te wuúci tɔ́na u ti o kekényí ». 22Énu menyí anyía Bandɔ́mɛsɛ́ áŋa na ambányɛ yɛ́ ɔtɛ́má, u saamakɛna baacɔ tɔ́na. U ŋaá sáámɛna eebe bekime a bá ŋa bɔ́ bɛ́yuáta úúyé ohónyí, mbá u ŋaá banɔ́ tóŋínyi yááyɛ́ ambányɛ yɛ́ ɔtɛ́má ekúlú ekime ayɛ́ nu ŋa nɔ́ kɛla bɛsana e bí ŋeé wuúci bíléníne. Mbɔ́kɔ tɛ́ cáŋa aáná, u káá banɔ́ sáŋɔnaka tɔ́na. 23Mbá a aháŋá ne Besuif, mbɔ́kɔ bá ŋá bɔ́ bɛ́kɔ́tɔ́kɔ maabɔ́ maabɛ́, bó lúmitekinine, Bandɔ́mɛsɛ́ kéé beébe túmútúkune háyɛ bɛcɔ́kɔ́ a nyíábɔ́ nyilimíné anyía wáŋa na makɛ́nda ma ɔkɛlaka aáná. 24Yááŋa anyía, mbɔ́kɔ banɔ́, bá ŋaá banɔ́ sáŋɔ́náka a alɔalɔa yí eciké a nyíánɔ́ nyɛbá, bɔ́ banɔ́ túméke háyɛ bɛcɔ́kɔ́ a atɔ́kɔ́, mbá anyána aná Bandɔ́mɛsɛ́ ti ké túmútukune taaká cɛ́ ɛndáfɛ cɛ́ atɔ́kɔ́ e ?

Bandɔ́mɛsɛ́ kéé nóhi baacɔ bekime bé Islayɛ́l

25Banɔ́ báámɛ benyíinyí, ɛ ŋa mɛ́ aamba anyía núénú menyi asana yí indiitie eeye, anyía nu ti bíkéti anyía nua nɔ́ŋa ne injiŋé ciéŋí ɔ ɔhɔla : Yááŋa anyía baacɔ ɔ bɔ́mɔtɛ́ bé *Islayɛ́l ká bɔ́ cɔ́cɔbaka ne buúse ɔ ɔkɛlɛna Bandɔ́mɛsɛ́ aatɔ́ ɔnata ɔ ɔkɔɔ́háma ekúlú ayɛ́ baacɔ bá mɔnɔŋɔ me etémbí bekime ké bú lúmitekinine. 26Ekúlú eéyé u kóó nóhi baacɔ bé Islayɛ́l bekime, háyɛ yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía : « Mukétúnyi baacɔ kéé húle a bálɛ́ka ci Síon, yó ményisi aatɔ́ ɔnata ekime yɛ́ bɔnyɛ Yákɔb. 27Buúbu eébú bú káá bá nyɛlatana nyí bumbénú na yaŋɔ́ ne beébe ɛ́cɛ í me mí beébe nyɛanakɛnɛna máábɔ́ maabɛ́. »#11.26-27 Ɛsa 59.20-21 ; 27.9. Fanáka tɔ́na Sel 31.33-34. 28A aháŋá na Ambányɛ yɛ́ Ɛsɔ́ma, bá bɔ́ŋa beliŋine Bandɔ́mɛsɛ́ anyía bɔ́ tɛ́ ɔmɔ́ bɔ́ háya mɔŋɔlɛ́ nááyá, mbá yááŋa a búánɔ́ bɔmbányɛ. Mbá a aháŋá na nyɛlɔtɔ anyɛ́ Bandɔ́mɛsɛ́ ŋeé beébe lɔtɔ́kɔ a nyíáyɛ́ nyɛháŋa, bá búanáŋa bááyɛ́ baacɔ bá ɔtɛ́má a asana na bɛsana abɛ́ u ŋaá bɛ́tánákɛ́ná cííbú sɔ́kɔ́nɔ́. 29Yááŋa anyía Bandɔ́mɛsɛ́ ti ŋé híitutune bɔkɔ ebú wé yíínjie ɔɔcɔ, u tɛ hɛŋɛ́na yááyɛ́ ɔlɔ́ŋɔlɔ́ŋɔ. 30Yááŋa anyía ta banɔ́, nu ŋa nɔ́ kɛ́lákɛ́na Bandɔ́mɛsɛ́ ɛndɔ́kɔ́ buáyá, mbá aámbáya ú maá hɔ́lɛna e elime cɛ aatɔ́ ɔnata yí *Besuif ɔ ɔ banɔ́ bɛ́cáma mahana. 31*Híáná yááŋa tɔ́na náábɔ́. Yáábɔ́ aatɔ́ ɔnata yɛ́ aámbáya ŋaá banɔ́ ɔ́ɔ́lɔ anyía Bandɔ́mɛsɛ́ á banɔ́ bɛ́cáma mahana, wé beébe bɛ́cáma mahana tɔ́na [aámbáya]. 32Ɛ́ɛhɛ́ u ŋe nétísíki baacɔ bekime ɛtɛ́má anyía bé ti wuúci lɔ́kɔ́mɛ́na ɔ ɔkɛla anyía wé beébe bɛ́cámáka mahana beébe bekime.

33Ɔ́ɔ lɛca nyɛnamá nyɛ́ ambányɛ yɛ́ ɔtɛ́má yɛ́ mahana ayɛ́ Bandɔ́mɛsɛ́ áŋa ne yiíyi. Ciayɛ́ injiŋé áŋa ciáŋá ɔ ɔhɔla, u menyukune bɛsana bikime. Ta ɔɔcɔ ti ŋéé ményi nyíáyɛ́ nyɛtákɛ́na nyɛ́ bɛsana, u tɛ lɔ́kɔ́ma bɔmbányɛ injibí ci cííyé ihényí. 34Aáná yááŋa yɔ́ɔ́ŋɔ́kɔ́nɔ́ anyía : « Ta ɔɔcɔ ti ŋéé ményi aátɛ́ Bandɔ́mɛsɛ́ ŋá bɛ́táá. Ta ɔɔcɔ tɛ á bá wu o wuúci lébéke tɔ́na.#Ɛsa 40.13 35Ta ɔɔcɔ ti ŋéé wuúci íínjie bɛnyɛ́ma o o wuúci foli, mbá wáŋa wu o wuúci biíbi bataka. »#Sob 41.3 36Yááŋa anyíaʼo, bɛnyɛ́ma bikime ŋeé húle nááyá, bí líhéke anyía wuúci, na a yááyɛ́ asana áyá. Tué wuúci nyemíki ; nuúmi á bámɔ́kɔ́na ná Bandɔ́mɛsɛ́ ciasɔ́ Síkíne ekúlú ekime. Híáná yááŋa !

Currently Selected:

Lom 11: lem

Highlight

Copy