1 Kɔrɛ̃tɛ 11

1Kwěnə àmyɛ́ Pwəə nà ǹdə à gə́ nʼâ kwè Kristə nà nɛ́.

Bala bɛ́ ǹdə́ kana bɛ́ gə́ mə̂ sə bə zə bə̀ cìn ní Yi-co yi ní

2À nʼâ cèrhé ába á gə́ nʼá lyǐrh à yò twéé gakó mó yilə, á jʼâ nʼá zwẽ kɔn dɛ́ dɛ̀bɛ́ à cèrhè ába mó, á nʼá wɛ̀rhɛ́ ǹdə à gə́ byili ába né. 3Sə à nʼâ yâl bʼâ lwar kɔn rə̀dù: wɔ́ Kristə ń wɔ́ lò gakó yó-cə́bal, bal wɔ́ kɛ̃ yó-cə́bal, Yi zɛ̃̀ rə̀ wɔ́ Kristə yó-cə́bal. 4Bal gə pú yə́-pú ń mə́ ń wɛ̀rhɛ́ Yi-co, ráá ń mə́ ń zɔ̀m zɔ̀mà nyɛ̀bɛ́ Yi yʼà byili mu, sə́ nyǐ ń tá ń nyàm Kristə mó ń wɔ́ ń yó-cə́bal mɔ́ yé. 5Kɛ̃ gə yẽ̌ ń yó ne nánfò ń mə́ ń wɛ̀rhɛ́ Yi-co, ráá ń mə́ ń zɔ̀m zɔ̀mà nyɛ̀bɛ́ Yi yʼà byili mu, sə́ nyǐ ńmyɛ tá ń nyàm ń yó-cə́bal mɔ́ yé. Kɔn nyɛ̌ ǹdə ń yó w wɔ́ nánfò ta. 6Kɛ̃ gə tá ń yâl n bə ń yó ǹdə́ kàmə̀-jɛ̃̀, sə n fɔ̃̀ wà. Sə yó fɔ̀n ráá ò kwar gə wɔ́ cìzhìl kɛ̃ yilə, sə n bə w ǹdə́ kàmə̀-jɛ̃̀.

7Bal myɛ bə mə̂ sə n pú yə́-pú yé, bə̀ Yi wɛ̀rhɛ́ mɔ ǹdə rə̀ cìcì ta, mùnì ga rə̀ còrhó w tó ńmyɛ̌ dɛnnɛ o du. Bal còrhó zɛ̃̀ ò nʼô tó kɛ̃ dɛnnɛ ò dwi. 8Nə́ yě bə̀ Yi yə̀ kɛ̃ yala nɛ́ fɔ́n rə mʼe wɛ̀rhɛ́ bal yé. Wɔ́ bal yala nɛ́ Yi fɔ́n rə mʼe wɛ̀rhɛ́ kɛ̃. 9Yi wɛ̀rhɛ́ kɛ̃ bal yilə. Rə̀ yə̀ bal wɛ̀rhɛ́ kɛ̃ yil yé. 10Wɔ́ rə̀myɛ́ è ce, kɛ̃ mə̂ sə n bə ń yó w màlɛ́kabá yilə; rə̀myɛ́ nʼê byili bə̀ ń zhe yó-cə́bal. 11Sə è gə wɔ́ nə́myɛ̌ byɛ̀bɛ́ nə́ zù Cinu mú yilə, bal gə yà ń tɛ̀nɛ́, kɛ̃ yà ń tá ń la nɛ́ yál yé. Èta, kɛ̃ myɛ gə yà ń tɛ̀nɛ́, bal yà tá ń la nɛ́ yál yé. 12Wɔ́ bal yala Yi fɔ́n rə mʼe wɛ̀rhɛ́ kɛ̃, kɛ̃ zɛ̃̀ ń nə́ ń lùl bal, bə̀myɛ́ ga wɔ́ Yi sõ bə̀ shí ní.

13Ámyɛ cìcì tɛ́rɛ́na á nyì. Kɛ̃ mə̂ sə n wɛ̀rhɛ́ Yi-co ǹdə́ ń yə̀ ń yó bɛ ǹdə́ kàmə̀-jɛ̃̀? 14Á cìcì yě bə̀ bal gə yẽ̌ ń ywə́rh ne sə̀ byìl nándə̀dwààlɛ̀ ǹdə kɛ̃ ywə́rh ne, wɔ́ cìzhìlə̀. 15Sə kɛ̃ ywə́rh gə byìl nándə̀dwààlɛ̀, wɔ́ ńmyɛ còrhó, bə̀ Yi pɔ mɔ ywésé nándə̀dwààlɛ́ mùnì ga sə yə̀ ǹdə ńmyɛ yó kàmə̀-jɛ̃̀ ta. 16Sə lò gə nə́ ń yâl n mà nyə̀-pɔ̌ yò w òmyɛ́ shò-kwã nɛ́ gwẽ̌, sə n nyǐ nə́myɛ̌ yə̀ nyə̀-pàárɛ́ rə̀myɛ́ myɛ̀rhɛ̀ yé. Yi gùúlí lyì bí myɛ yə̀ rə̀myɛ́ myɛ̀rhɛ̀ yé.

Nə́ gə́ mə̂ sə nə́ zə nə́ cìn ní Cinu kùjú yi ní

(Məco 26.26-29; Markɛ 14.22-25; Lwiki 22.14-20)

17Kɔn dɛ̀bɛ́ à la ába byilu èlâsɛ̃´ mɔ́, à pwírí à wàr à bʼa cèrhé ába yé. À pwírí á dwã-gùúlí tɛ̀bɛ́ á nʼá wɛ̀rhɛ́ mɔ́, wɔ́ lwɛlɛ dúdú á nʼá nɛ rə̀ wẽ́. Á tʼá nɛ cɛ̀nɛ̀ rə̀ wẽ́ yé. 18Tɛ̀bɛ́ à nʼâ yâl a jɛ̀rɛ̀ a byili ába mó, à nyɛ̀ɛ̀ bʼâ gə gùlí dwã gakó, pɔrá nʼê yàl á cəcəl wə. Sə à nʼâ bùl bə̀ dɛ̀ga rə̀myɛ́ wɔ̌ rə̀ yàl zhə̀nà. 19Pɔrá mə̂ sʼe yə̀ á cəcəl wə, mùnì ga bə lwar byɛ̀bɛ́ bə̀ ŋwɛ́nɛ́ á wẽ́ ǹdə́ zhə̀n mɔ́ párá.

20Á gə gùlí dwã, è də̀ Cinu kùjú w á nʼá jí yé. 21Á gə la kùjú jú, lò gakó nə́ ń jí ń sə̀pwà kùjú w kɔ̀bɔ́ ń zə n mə n bə̀ mɔ́, nɔrh zɛ̃̀ mə̀ nʼê gwi jàlà, jàlà jʼà nʼê nywɛ̀ bə̀ tətwi tɛ̃´. 22È gə wɔ́ èta, á wàr á jòm á sõ kâlsɛ́ wẽ́ á jí sʼá nyɔ̀ nà? Ráá wɔ́ yál á nʼá yâl á fulsi Yi gùlú w sə á ce byɛ̀bɛ́ bə̀ bə kaka zhe mó cìzhìlə̀? Á nʼá yâl bʼà cèrhé ába? À wàr à bʼa cèrhé ába yò w òmyɛ́ yil yé.

23Kɔn dɛ́ dɛ̀bɛ́ à cèrhè ába mó, wɔ́ Cinu sõ à zwẽ de né. Cəcɛ̃ y kɛ̀bɛ́ bə̀ myìnì Cinu Yezu bə pə bə zə mɔ́, ń kwè búrú, 24n ce Yi nə̀báná, n kə́ w dwã wa, n wɔ̀: “Zwẽnə á dɔ̃̀. Tɛ̀bɛ́ wɔ́ àmyɛ́ yala, à nʼâ pɛ á yilə. Wɛ̀rhɛ́na èta, á mʼá lyǐrh à yò.” 25Èta myɛ, bə̀ gə́ jú kùjú w bə zhɛ̀, n kwè sɛ̃´ kâ-zɔ̌m, n wɔ̀: “Kâ-zɔ̌m mɔ́ mɔ̀bɔ́ nʼê byili bə̀ dɔbrɛ́ nándùl lé Yi tó à jal mɔ́ mə̀ ló tɛ̃´ mɔ́ dɛnnɛ rə zə ǹdʼába mɔ́ wɔ́ zhə̀nà. Á gə tú á la mɔ nyɔ́ gakó, sʼá wɛ̀rhɛ́ èta, á mʼá lyǐrh à yò.” 26Rə̀myɛ́ ce, á gə tú á nʼá dɔ̀m búrú w òmyɛ́, á nʼá nywɛ̀ sɛ̃´ mɔ́ mə̀myɛ́, wɔ́ Cinu cu mú á nʼá bwə̀l kɔn la bʼe yí n ká n bà.

27Rə̀myɛ́ ce, lò mɔ̀bɔ́ ǹ nə́ ǹ dɔ̀m Cinu búrú wə́, ǹ nə́ ǹ nywɛ̀ ń sɛ̃´ mɔ́ yààyàà, ǹ nə́ ǹ gwar Cinu yala nɛ́ ǹdə́ ń jal mɔ́. 28Sə lò mɔ̀bɔ́ gakó ǹ gə la búrú w òmyɛ́ dɔ́m, ǹ gə la sɛ̃´ mɔ́ mə̀myɛ́ nyɔ́, ǹ mə̂ sə́ jɛ̀rɛ̀ ń tɛ́rɛ́ ǹ wẽ́ náàcɛ̀nɛ́ sə́ zɛ̃̀ ń mə́ jí ri. 29Lò mɔ̀bɔ́ ǹ gə nə́ ǹ dɔ̀m búrú w òmyɛ́, ǹ nə́ ǹ nywɛ̀ sɛ̃´ mɔ́ mə̀myɛ́, ń jà ǹ yə̀l Kristə yala nɛ́ gə́ wɔ́ kɔn ná-dwí yilə, wɔ́ yò ǹ nə́ ǹ cĩ́ ǹ cìcì yó w ǹdə́ ǹ gə nə́ ǹ jí ri. 30Wɔ́ rə̀myɛ́ è ce, á nánzhəzhɔ̌ wɔ́ nə̀bwànà, jàlà jàn bə já yé, nánzhəzhɔ̌ myɛ cì. 31Nə́myɛ̌ cìcì mú gə yʼâ nʼé nyǐ nə́ tùntwə̃̀ə̃̀ né, Yi yʼà tʼâ la nə́ bùrsì bǔr yé. 32Sə Cinu nə́ ń bùr nə́ bùrsì ń mə́ ń zwə́r nə́ba, mùnì ga ń gə tú ń la lũ w lyì bí bùrsí kɔ́, sə nə́ twə́r bə̀kʼa yə̀ gàà yé.

33Da-byâ, è gə wɔ́ èta, á gə gùlí dwã nɛ Cinu kùjú w jú yilə, sʼá dɛ̃̀ dwã. 34Lò mɔ̀bɔ́ nɔrh zhe, sə n jí kùjú jẽ̌, mùnì ga Yi bə̀kʼa tó á dwã-gùlú w dɛnnɛ rə cĩ́ dóó á yó w yé.

È gə wɔ́ ywẽ̀ né nyɛ̀bɛ́ nə̀ dàl mɔ́ yilə, à gə tú á sõ, à bʼa kwɛrhɛ nɛ.

Currently Selected:

1 Kɔrɛ̃tɛ 11: lee

Highlight

Copy

Compare