Tiito ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
TIITO
Uvaʼs toq qootzaqitaʼ jaʼl tzʼibʼan u uʼ Tiito
Aʼetz u uʼe uvaʼ Tiito ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Tiito 1.1.
Uvaʼs toq qootzaqitaʼ kam s-tuul tzʼibʼal u uʼ Tiito
Aʼetz itzʼibʼavat Paʼp u uʼ Tiito tixeʼtebʼal u yaʼbʼ kajvaʼl imutxʼ (64) m.t.J., atz maq tiyaʼebʼal u yaʼbʼ vajqil imutxʼ (66) m.t.J. Tul aʼ itzʼibʼavat Paʼp u tuʼ tu tenam Eefeso tuulbʼal Aasia Menoor.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Tiito
Aʼetz u taqʼil viyol Paʼp uvaʼ itzʼibʼa bʼen te Tiito tuulbʼal u txʼavaʼ Kreeta, tiʼ uvaʼ kam itxumbʼal u iqʼon iviʼ laʼ ilixi uvaʼs yeʼnaq okoq s-iqʼon iviʼ. Tul aʼ Tiito laʼich chʼexon el jabʼil u iqʼon iviʼ laʼ ok xoʼl inqʼa niman tetz Jesuus.
Atz nikat tal Paʼp te Tiito, tiʼ uvaʼ aʼxh laʼ itxhus Tiito xoʼl inqʼa niman tetz Jesuus jankʼale inqʼa bʼaʼnla txhaq yol tiʼ Jesuus, uvaʼ itxhus Paʼp s-te. Tul yeʼ laʼ iyuj Tiito tuchʼ jolt txhusbʼal uvaʼ jit aʼ inqʼa bʼaʼnla txhaq yol tiʼ Jesuus.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Tiito
U uʼ Tiito, uvaʼ itzʼibʼa ka Paʼp, tan kajvaʼl tanul elnaʼq inqʼa yol uvaʼ nik tal s-tuul.
Tiito 1.1-4
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul Tiito.
1. Tiito 1.5-9
U bʼaxa tanul yol, tan aʼ tal Paʼp, tiʼ uvaʼ laʼ toksa Tiito iqʼon iviʼ xoʼl inqʼa niman tetz Jesuus t-junun inqʼa tenam tuulbʼal u txʼavaʼ Kreeta. Tul tal Paʼp te Tiito uvaʼ kam itxumbʼal u iqʼon iviʼ laʼ ilixi uvaʼs yeʼnaq okoq s-iqʼon iviʼ. Aʼetze inqʼa txumbʼal inqʼaa: Kʼuqlebʼalxh kʼuul tatin kʼatz tixqel; niman tetz Jesuus inqʼa initxaʼa; jit kuxh aʼ laʼ toksa u tetz; jit kuxh nal laʼ ilakp iviʼ; atz jit bʼiitxhaqul kuxh tuul tukʼat qʼuʼich taʼl uuva. Tul jit kuxh txhokol txhʼaʼo. Atz jit kuxh een taanima tiʼ txʼakoʼm uvaʼ tuchʼ subʼuʼm laʼ ibʼanvat. Pet aqʼol ivatbʼal xaol. Tul een taanima tiʼ ibʼanax u bʼaʼn. Atz itzʼamalxh tatineʼ. Tul aʼ nik ibʼan uvaʼ yeʼl txhʼoj yeʼl nim s-vatz. Atz txʼakel vet ok taanima tiʼ quBʼaal Tiuxh. Tul junt nik itxʼol imaqt tibʼ tiʼ yeʼ ibʼanax inqʼa kantxhaq. Atz aʼxh nik iqej inqʼa bʼaʼnla txhaq yol tiʼ quBʼaal Jesuus, inqʼa txhusel vet s-te. Tul antxh inqʼa yol uvaʼ nik tijbʼixsan tatineʼ laʼ ibʼanbʼe tiʼ taqʼax itial imol, atz antxh inqʼae laʼ ibʼanbʼe tiʼ ibʼokʼtziil inqʼa vaʼlen nik tal tiʼ inqʼa bʼaʼnla txhaq yol.
2. Tiito 1.10-16
Vikaʼv tanul yol, tan aʼ tal Paʼp tiʼ uvaʼ laʼ toksa Tiito inqʼa niman tetz Jesuus t-bʼey tiʼ inqʼa kantxhaq uvaʼ nikich motx ibʼaneʼ. Tan at niman tetz Jesuus uvaʼ antxh tij imam Israeel, inqʼa jeqlich tuulbʼal Kreeta nikich toksa Tiito t-bʼey. Tan aʼ kuxh nikich motx ikʼaq inqʼa niman tetz Jesuus inqʼae, uvaʼ laʼich motx itxʼak ipuaq tiʼ iyolbʼal Tiuxh. Tul at jolol inqʼa aj Kreeta nimanich tetz Jesuus nikich bʼanon kantxhaq. Tan antelich kuxh itzʼeqt tzij. Tul aʼ kuxh eenich taanima tiʼ etxhbʼuʼm. Tul yeʼaq nikich motx isaʼ aqʼon. Tul nikich motx tal tibʼ s-ootzaqin tetz quBʼaal Tiuxh, poro aʼ inqʼa ibʼanoʼm nikich kʼutxhun uvaʼ tira yeʼ ootzaqimalich Tiuxh taʼn. Tan tira yeʼl invaʼq bʼaʼn nikich talax tiʼ jankʼal inqʼa nikich motx ibʼaneʼ. Tan tira txoqebʼalich kʼuul inqʼa itxumbʼal vatz quBʼaal Tiuxh. Tul palsanaqich kuxh yol.
3. Tiito 2.1-15
Vitoxv tanul yol, tan aʼ tal Paʼp, tiʼ uvaʼ nik ibʼekʼ bʼen Paʼp te Tiito uvaʼ tinuqulxh laʼ txhusunk Tiito xoʼl inqʼa iqʼon iviʼ. Echetz jikxh laʼich motx itxʼolt inqʼa iqʼon iviʼ tiqʼol viyolbʼal quBʼaal Tiuxh. Atz laʼich itxhus Tiito inqʼa qʼesla txhaq ixoq uvaʼ jikxh laʼich motx itxʼolt tiqʼol viyolbʼal quBʼaal Tiuxh. Atz echat kuxh laʼich itxhus Tiitoe te inqʼa chelem xaak, atz te inqʼa chelem ixvaak, atz te jolt inqʼa niman tetz Jesuus inqʼa jeqlel tu txʼavaʼ Kreeta. Tan tiʼ tabʼit viyolbʼal quBʼaal Tiuxh laʼ itxhabʼavat inqʼa xaol uvaʼ tira yeʼl vet tokebʼal tiʼ ibʼanax inqʼa yeʼbʼaʼn, atz yeʼ ibʼanax tatxhaʼv vitxhiʼoʼl uvaʼ kantxhaq. Tul tiʼ tootzaqit inqʼa xaol viyolbʼal quBʼaal Tiuxh, tul itzʼamoqxh tatin laʼ ibʼana, atz aʼxh u jik laʼ ibʼan vatz quBʼaal Tiuxh. Tul txʼebʼoʼmoq kuxh al tuchʼ chiibʼichil tiʼ tul u quBʼaal Jesuus, u Chitol qetz. Tan aʼ u quBʼaal Jesuus tzaj s-kʼuul, tul ul taqʼ tibʼ kamoq tiʼ ibʼant quvatzil tiʼ qeesal el vatz u kʼaxkʼo tiʼ inqʼa qupaʼv. Tan oʼ vet itenam quBʼaal Tiuxh, oʼ inqʼa niman tetz. Tul aʼetz nik isaʼe uvaʼ laʼ qaqʼ ka inqʼa yeʼbʼaʼn. Tul nikat isaʼ quBʼaal Jesuus uvaʼ laʼxh tzaj t-qaanima ibʼanax inqʼa bʼaʼnla txhaq bʼanoʼm.
4. Tiito 3.1-11
Vikajv tanul yol, tan aʼ tal Paʼp, tiʼ uvaʼ nima tel kuxh yol ibʼekʼ bʼen Paʼp te Tiito, tiʼ uvaʼ laʼich tal te inqʼa aj Kreeta. Jankʼal eche vinimal inqʼa iqʼesal tenam. Tan kam u bʼaʼnla bʼanoʼm uvaʼ laʼich motx tal inqʼa iqʼesal ibʼanaxeʼ, tul laʼich ibʼan inqʼa niman tetz Jesuus. Tul jit kuxh txhokol txhʼaʼo inqʼa niman tetz Jesuus laʼ ibʼana, pet tzʼuʼkinla txhaq aanima laʼ ibʼana, atz yeʼ laʼ motx itxhiʼkʼuula tibʼ s-vatzaq. Tan chitel vet oʼ vatz inqʼa kʼaxkʼo tiʼ inqʼa qupaʼv taʼn vikam u quBʼaal Jesuus. Tan qat itxum quBʼaal Tiuxh quvatz. Qatetz ijalpu u qatineʼ tuchʼ kam uvaʼ qat ibʼan viTiuxhil tu qaanima. Tan txʼael vet u qaanima taʼn. Tul tira qat toksa quBʼaal Tiuxh viTiuxhil tu qaanxelal. Tan aʼ isaʼ laʼ qetzan tiʼ u bʼaʼnil s-kʼatza. Aʼetz inqʼa, kam nik qutxʼebʼeʼ uvaʼ kʼuqlel vet qukʼuul s-tiʼ; aʼe, uvaʼ yeʼl iyaʼebʼal imotxebʼal u qʼij qusaq toq ibʼaneʼ.
Tiito 3.12-15
Tiyaʼtebʼaletz vet iyol Paʼp, tul nik tal Paʼp inbʼiil yol tiʼ vibʼen Tiikiko tuchʼ Arteemas. Atz nik tal Paʼp yol tiʼ ilotxhox Seenas tuchʼ Apoolos tiʼ kam uvaʼ nik motx isaʼon s-te. Tul jankʼalxh inqʼa niman tetz Jesuus, inqʼa atich kʼatz Paʼp aqʼon bʼen bʼaʼnil ikʼuul inqʼa niman tetz Jesuus uvaʼ imolich tibʼ tuchʼ Tiito tuulbʼal Kreeta. Tul nik tal bʼen Paʼp bʼaʼnla yol te Tiito.
Currently Selected:
Tiito ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.