2 Timoteeo 4

Uvaʼs ibʼekʼt Paʼp Timoteeo tiʼ ipaxsal viyolbʼal quBʼaal Tiuxh

1Toqetz inbʼekʼ see, Timoteeo, uvaʼ tetxhal laʼ apaxsa viyolbʼal quBʼaal Tiuxh. Tul ech ivatz quBʼaal Tiuxh, atz ech ivatz quBʼaal JesuKriisto nik val see. Tan toq ul taqʼ kuʼ quBʼaal JesuKriisto yol tinuqul tiʼ inqʼa itzʼlele, atz tiʼ inqʼa kamnaʼq veteʼ, tiʼ taqʼax jabʼiste uvaʼ ikʼulel laʼ aqʼax s-te. Tan aʼ vet u quBʼaal JesuKriisto laʼ ul bʼanon iqʼesalil. 2Echetz tiʼ kam uvaʼ toq ul ibʼan u quBʼaal JesuKriisto, tul tetxhal kuxh laʼ apaxsa viyolbʼal quBʼaal Tiuxh xoʼl inqʼa xaol, kʼuxh laʼ isaʼ tabʼileʼ, atz kʼuxh yeʼ laʼ isaʼ tabʼileʼ. Tul laʼ ooksa t-bʼey jabʼiste uvaʼ jit aʼ vinuqul nik ibʼaneʼ. Tul laʼ amaq inqʼa nik ipaʼvin tele. Tul aqʼ itial. Tul tibʼaʼnil laʼ aaqʼvat tootzaqi jabʼiste u bʼaʼn, atz u yeʼbʼaʼn. Tul tira yeʼ laʼ pal akʼuul tiʼ ibʼanax inqʼa qat val see. Tul aʼ inqʼa bʼaʼnla txhaq txhusbʼal laʼ abʼanbʼe tiʼ itxhusuxeʼ. 3Tan laʼ opoon vaʼl qʼij uvaʼ yeʼ laʼ saʼax vet tabʼil inqʼa bʼaʼnla txhaq txhusbʼal uvaʼ nik tijbʼixsan inqʼa xaol tiʼ u tatineʼ. Pet aʼ kuxh laʼ isaʼ vet u xaol tabʼil kam uvaʼ laʼ isaʼ s-te. Tan laʼ motx itxhok txhusulaq tetz. Tul aʼ kuxh laʼ txhusux vet s-te taʼn inqʼa txhusunal taqʼt tatxhaʼv vitxhiʼoʼl. 4Echetz laʼ motx tel vet kae tiʼ vinuqul viyolbʼal quBʼaal Tiuxh, tul aʼ kuxh vet laʼ bʼenk ikʼuul tiʼ tabʼil txhulim yol.

5Pet axh, Timoteeo, tan bʼaxoqxh avitzʼabʼal savatz tiʼ ibʼanax inqʼa aqʼon s-kaqaayil. Tul kotxʼ avatz t-inqʼa itzaʼlal, inqʼa nik palk axh. Atz aqʼonven tiʼ ipaxsal inqʼa bʼaʼnla txhaq yol tiʼ Jesuus. Tul nal atxʼakoʼk tiʼ ibʼanax kam vavaqʼon uvaʼ aqʼel taʼn quBʼaal Tiuxh.

6Pet in, tan il vet in toq yatzʼaxoq el in. Tan ech toq ulbʼeloq in, eche toksal vaʼq oya viʼ u natxhkʼuulabʼal vatz quBʼaal Tiuxh. Tan il vete toq opoonoq uvaʼ toq kamoq vet el in. 7Qatetz oleʼvy vet in tiʼ ipaxsal inqʼa bʼaʼnla txhaq yol tiʼ Jesuus. Tul qat vaqʼl ichʼexel iyol inqʼa nik eesan iqʼij inqʼa bʼaʼnla txhaq yol. Tul ech qat inbʼan tiʼ voleʼv, eche vaʼq u xaol uvaʼ nik tetxha tibʼ iyakʼil tiʼ itxʼakax vaʼq txʼaqaʼm. Atz ech qat inbʼan tiʼ voleʼv, eche vaʼq xaol uvaʼ nik tetxha tibʼ tiʼ qʼexchil tiʼ itxʼakax vaʼq oya. Tul kʼuqlebʼxh kʼuul in qat inbʼan tiʼ inimal inqʼa bʼaʼnla txhaq yol. 8Echetz s-tiʼile il vet invaʼl intxʼaqaʼm nik itxʼebʼoneʼ, eche itxʼebʼon vet ikoroona vaʼq xaol uvaʼ laʼ txʼakoni. Aʼetz u quBʼaal Jesuus toq aqʼon vintxʼaqaʼm. Tan jikxh toq ul taqʼt kuʼ u quBʼaal Jesuus inqʼa yol tinuqul tu qʼij uvaʼs laʼ tul inpaqte. Tan aʼe u jikla aqʼol kuʼ yol tinuqul. Tan jit kuxh taʼn in laʼ taqʼ intxʼaqaʼm, pet laʼat taqʼ itxʼaqaʼm jankʼal inqʼa xaol, inqʼa aʼxh nik itxʼebʼ u tulebʼal quBʼaal Jesuus.

Uvaʼs talt Paʼp taqʼbʼ Timoteeo s-kʼatza tu mam tenam Rooma

9Poro nal atzajeʼ Timoteeo, tul ul eel in. 10Kam s-tiʼil nik val see s-eche, tan qat taqʼl vet ka in Deemas. Tan aʼ qat bʼenk vet taanima Deemas tiʼ tatxhval inqʼa tetz vatz txʼavaʼ. Tul il Deemas maʼt vet tu tenam Tesaloonika. Pet il Kreseente qat intxhaq tuulbʼal Galaasia. Pet Tiito, tan il Tiito qat intxhaq tuulbʼal Dalmaasia. 11Taʼnetz kuxh vet Luk qat kaj sinkʼatza. Pet iqʼo tzaan Kuxh seʼe. Tan toq ilotxh in tiʼ ibʼanax u taqʼon quBʼaal Tiuxh tzitza. 12Tul qatat intxhaql bʼen Tiikiko tu mam tenam Eefeso.

13Pet laʼ eeqʼo tzaan inqʼa kam vetz, inqʼa at ka xeʼ Kaarpo tu tenam Trooas, vinpaʼtebʼal, tuchʼ inqʼa uʼ, atz tuchʼ inqʼa tzʼuʼm, inqʼa tzʼibʼamal yol s-tuul inqʼa ile aʼl bʼaltxʼumal.

14Poro toq val see, Timoteeo, uvaʼ sibʼax kuxh yeʼbʼaʼn ibʼan Alejaandro s-ve, u txetol txhʼitxhʼ. Pet quBʼaal Tiuxh laʼ kʼaxbʼisan Alejaandro tiʼ jankʼal inqʼa yeʼbʼaʼn uvaʼ nik tulbʼe in. 15Tul aaqʼch kuxh eebʼ ikʼaxbʼisa Alejaandro. Tan tira nik teesa Alejaandro iqʼij inqʼa bʼaʼnla txhaq yol inqʼa nik motx qupaxsa.

Uvaʼs talt Paʼp te Timoteeo uvaʼ taʼn kuxh quBʼaal Tiuxh kolon Paʼp

16Poro yeʼxhabʼil vaʼq atich vet sinkʼatza tiʼ inlotxhoxeʼ uvaʼs inkolt vibʼ vatz inqʼa yol uvaʼs vok s-bʼaxa xoʼl inqʼa aqʼol kuʼ yol tinuqul. Tan tira kaqaayil aqʼon ka in sinjunal. Tul quBʼaal Tiuxh laʼ kuyun ipaʼv inqʼa aqʼon ka in. 17Pet aloq taʼnxh quBʼaal Tiuxh lotxhon in. Tul taqʼ intial tiʼ talax inqʼa bʼaʼnla txhaq yol xoʼl inqʼa jit tij imam Israeel, inqʼa motx aqʼon kuʼ yol tinuqul s-viʼ. Tul ech teesat el in quBʼaal Tiuxh tiqʼabʼ u kamchil, eche laʼ teesal el itxhibʼ bʼalam s-vatz. 18Echetz aʼ u quBʼaal Tiuxh toq kolon in tiʼ yeʼ inkʼaxbʼisaleʼ. Tul toq ixee in, tetxhal vopoon tu amlikaʼ tal uvaʼ nik ibʼanvat quBʼaal Tiuxh iqʼesalil. Echetz laʼ qoksat iqʼij quBʼaal Tiuxhe s-txheel, atz tinjattanulxh inqʼa yaʼbʼ uvaʼ bʼenaʼl kuxh ibʼen toq tuleʼ. Tul echxh laʼ ibʼane.

Uvaʼs taqʼt bʼen Paʼp bʼaʼnil ikʼuul Timoteeo, tul yaʼ vet tiʼ itzʼibʼal bʼen viyol

19Tul aqʼ bʼaʼnil ikʼuul ixoq u Prisiila. Atz aqʼat bʼaʼnil ikʼuul Akiila, vitzumel ixoq. Atz aqʼat bʼaʼnil ikʼuul inqʼa at t-totzotz Onesiiforo. 20Pet toq val see uvaʼ, aʼ kajk Eraasto tu tenam Koriinto. Pet aʼ vaqʼvat kaj Troofimo tu tenam Mileeto, tan oybʼalich Troofimo. 21Pet bʼan yaʼl tiʼ avul sinkʼatza, Timoteeo, loqʼe yeʼx uloq viqʼiil u txheʼv. Tul nik taqʼ bʼen Euvuulo bʼaʼnil akʼuul. Atz nik taqʼ bʼen Pudeente bʼaʼnil akʼuul. Atz nik taqʼ bʼen Liino tuchʼ ixoq Klaaudia bʼaʼnil akʼuul. Atz nikat taqʼ jankʼal inqʼa qumol s-niman tetz Jesuus tzitza bʼaʼnil akʼuul.

22Tul aʼ u quBʼaal Jesuus laʼ lotxhon vavaanxelal. Tul aʼ vibʼaʼnil u quBʼaal Jesuus laʼ atin sexoʼl, ex inqʼa niman tetz Jesuus tzitzi.

[Tul echxh laʼ ibʼane.]

Currently Selected:

2 Timoteeo 4: ixlC

Highlight

Copy

Compare