Romaanos 8

Uvaʼs talt Paʼp uvaʼ, aʼ laʼ ibʼan inqʼa niman tetz Jesuus kam uvaʼ nik tal viTiuxhil Tiuxh

1Echetz, tiʼ uvaʼ vaʼl quyol tuchʼ quBʼaal JesuKriisto, tul yeʼl vet yol laʼ jaʼp s-qiibʼa tiʼ qubʼen tu kʼaxkʼo tiʼ inqʼa qupaʼv, [oʼ, inqʼa jit vet aʼ u tatxhaʼv u qutxhiʼoʼl nik bʼekʼon oʼ, pet aʼ vet viTiuxhil Tiuxh nik bʼekʼon oʼ]. 2Tiʼetz uvaʼ vaʼl vet quyol tuchʼ u quBʼaal JesuKriisto, tul vaʼtenetz vet bʼekʼbʼal nik bʼekʼon oʼ. Tan aʼ vet inqʼa kam uvaʼ nik ibʼekʼ viTiuxhil Tiuxh uvaʼ nik aqʼon qʼij qusaq vatz quBʼaal Tiuxh nik bʼekʼon oʼ. Tul qat ichit oʼ tiʼ inimal inqʼa bʼekʼbʼal uvaʼ nik kʼutxhun inqʼa paʼv s-qe uvaʼ kamchil kʼaqel vet vatz quBʼaal Tiuxh taʼn.

3Aʼetz nik tale uvaʼ yeʼl oʼ qat oleʼv vet oʼ tiʼ inimal inqʼa bʼekʼbʼal uvaʼ itzʼibʼa ka Moisees, tan yeʼ qutxʼol inimaleʼ. Tan aʼ nikich bʼanon oʼ inqʼa oʼtla txumbʼal tetz bʼano paʼv uvaʼ txhabʼamich tatin s-qukʼatza s-jatxhaq tzaan. Pet aʼetz vet quBʼaal Tiuxh lotxhon oʼ. Tan qat itxhaq tzaan u quBʼaal Tiuxh viKʼaol, uvaʼ taʼnxhte, eche vaʼq alam aanima tilixeʼ, eche oʼ, inqʼa bʼanol tetz paʼv. Tan aʼ isaʼ quBʼaal Tiuxh laʼ bʼen quBʼaal JesuKriisto s-oya tiʼ itxhoox inqʼa qupaʼv s-vatz, eche vaʼq oya nik itzʼeʼsal ok vatz quBʼaal Tiuxh. Tul tiʼetz kam inqʼa ipalebʼe u quBʼaal JesuKriisto, tul teesa vet el quBʼaal Tiuxh u kʼaxbʼichil uvaʼ atich vet jaʼp tiibʼa inqʼa xaol tiʼ inqʼa ipaʼv, inqʼa nikich ibʼan taʼn u oʼtla txumbʼal tetz bʼano paʼv uvaʼ txhabʼamich tatin s-kʼatza. 4Echetz ibʼan quBʼaal Tiuxhe tiʼ ikuyt ikʼaxbʼisal quBʼaal JesuKriisto, tan ech uvaʼe nik tal inqʼa bʼekʼbʼal. Tan aʼ nik tal u bʼekʼbʼal uvaʼ, tetxhal laʼ kameʼl u aj paʼvom. Tul aʼetz vet ex, elkaʼpun tiʼ u qatin s-txheel, oʼ, inqʼa yeʼl vet oʼ nik qaqʼ qibʼ bʼekʼloq taʼn u oʼtla txumbʼal tetz bʼano paʼv uvaʼ txhabʼamich tatin s-qukʼatza, pet aʼ vet iqʼomal qaʼn kam nik ibʼekʼ viTiuxhil Tiuxh.

5Tan jatvaʼl inqʼa xaol uvaʼ, aʼ kuxh nik ibʼan u oʼtla txumbʼal tetz bʼano paʼv uvaʼ txhabʼamal kuxh tatin s-kʼatza, aʼetz inqʼae, een kuxh titzʼabʼal tiʼ ibʼanax kam nik isaʼ u oʼtla txumbʼal tetz bʼano paʼv. Pet jatvaʼl inqʼa xaol uvaʼ, aʼ iqʼomal taʼn kam nik ibʼekʼ viTiuxhil Tiuxh, aʼetz inqʼae, eenxh titzʼabʼal tiʼ ibʼanax kam uvaʼ nik isaʼ viTiuxhil Tiuxh.

6Pet koq u itzʼabʼal u tetz bʼano paʼv uvaʼ iqʼomal taʼn inqʼa xaol, tan aʼ u kamchil kʼaqel taʼn vatz quBʼaal Tiuxh. Pet koq u itzʼabʼal uvaʼ nik taqʼ viTiuxhil Tiuxh, tan qʼij saq kʼaqel taʼn, atz bʼaʼnla atinchil tuchʼ quBʼaal Tiuxh kʼaqel taʼn.

7Pet koq u itzʼabʼal tetz bʼano paʼv uvaʼ iqʼomal taʼn inqʼa xaol, tan tira kuxh nik ibʼan txhʼaʼo tuchʼ kam uvaʼ nik isaʼ quBʼaal Tiuxh. Tan yeʼ nik toksa tibʼ tiʼ inimal kam uvaʼ nik tal inqʼa ibʼekʼoʼm quBʼaal Tiuxh. Tul jitoq laʼ oleʼv inqʼa xaol, inqʼa bʼanol tetz paʼv tiʼ inimaleʼ.#Gaalatas 5.16-26 8Tan jatvaʼl inqʼa xaol, inqʼa iqʼomal kuxh u oʼtla txumbʼal tetz bʼano paʼv taʼn, uvaʼ txhabʼamal kuxh tatin s-kʼatza, tul yeʼ nik toleʼv tiʼ ibʼanax kam uvaʼ nik isaʼ quBʼaal Tiuxh s-tiʼ.

9Pet ex, inqʼa s-txheel, tan jit vet aʼ iqʼomal etaʼn u oʼtla txumbʼal tetz bʼano paʼv uvaʼ txhabʼamich kuxh tatin sekʼatza. Pet aʼ vet iqʼomal etaʼn kam uvaʼ nik isaʼ viTiuxhil Tiuxh. Aʼetz nik valvat te jaʼl inqʼa at vet viTiuxhil Tiuxh t-taanima. Pet jaʼl u xaol uvaʼ yeʼl viTiuxhil Tiuxh tu taanima, uvaʼ, ex itxhaq tzaan u quBʼaal JesuKriisto, tul jitetz tetz u quBʼaal JesuKriistoe. 10Pet, tiʼetz uvaʼ at vet u quBʼaal JesuKriisto tetaanima, tul at vet qʼij esaq uvaʼ yeʼl iyaʼebʼal imotxebʼal kʼatz quBʼaal Tiuxh. Tan yeʼl vet u kʼaxbʼichil tetz paʼv at jaʼp setiibʼa. Tan aʼ viTiuxhil Tiuxh qat bʼanon, kʼuxhetz at vet ikamebʼal vetxhiʼoʼl iqʼaqʼal u paʼv. 11Tan oqetz itzʼlel vet viTiuxhil Tiuxh sekʼatza, tul echatetz laʼ titzʼeʼv vetxhiʼoʼle taʼn viTiuxhil Tiuxh, vetxhiʼoʼl uvaʼ kamchil vet kʼaqel taʼn. Tan een viTiuxhil tu qaanima, u quBʼaal Tiuxh uvaʼ itzʼeʼvsan u quBʼaal JesuKriisto inpaqte, kʼuxh maʼtich ikam veteʼ. 12Pet tiʼ uvaʼ at viTiuxhil Tiuxh tu qaanima, tul aʼetz vet qiqatz inimal viTiuxhil Tiuxh. Pet jit vet aʼ qiqatz uvaʼ, aʼ laʼ qunima u oʼtla txumbʼal tetz bʼano paʼv uvaʼ txhabʼamal kuxh tatin s-qukʼatza. 13Tan oq aʼ laʼ qunima u oʼtla txumbʼal tetz bʼano paʼv, bʼantan laʼetz kam oʼ vatz u quBʼaal Tiuxh. Pet oqetz tuchʼ viTiuxhil Tiuxh uvaʼ at s-qukʼatza, tul tira laʼ qutanbʼa ibʼanax inqʼa kantxhaqla bʼanoʼm uvaʼ, aʼ kuxh nik qubʼane txhaqpaq. Oqetz ech laʼ qubʼane, tul atetz qʼij qusaq yeʼl iyaʼebʼal imotxebʼal kʼatz quBʼaal Tiuxh. 14Tan jankʼalxh inqʼa nik taqʼ tibʼ ibʼekʼ viTiuxhil Tiuxh, tul kʼaol imeʼaletz quBʼaal Tiuxhe.

15Tan jit aʼ itxaʼk viTiuxhil Tiuxh qat ekʼula, uvaʼ laʼ kuxh ixoʼvisa ex, eche vaʼq xaol uvaʼ loqʼel tok tiʼ aqʼon. Pet aʼ qat ekʼul viTiuxhil Tiuxh uvaʼ ayaʼl ikʼuul qat toksa ex s-kʼaol imeʼal quBʼaal Tiuxh. Tul nik qutxʼol vet quyolon te u quBʼaal Tiuxh. Tan ech nik qal vet s-eche: —Bʼaali, —chich vet oʼ s-te.

16Antetzxh vet viTiuxhil Tiuxh nik alon te u qaanxelal uvaʼ, oʼ vet kʼaol imeʼal quBʼaal Tiuxh. 17Tiʼetz uvaʼ, oʼ vet kʼaol meʼal, atetz vet qokebʼal tiʼ qetzan tiʼ txʼaqaʼm kʼatz quBʼaal Tiuxh. Toqetz qukʼul qutxʼaqaʼm te quBʼaal Tiuxh, tul tzumetz vet toq qetzan tuchʼ u quBʼaal JesuKriisto. Tan tiʼ uvaʼ nik qupal titzaʼlal s-txheel tiʼ inimal quBʼaal JesuKriisto, eche uvaʼ ipal titzaʼlal vatz txʼavaʼ, echetz vet s-tiʼile ant vet oʼ laʼ bʼen oʼ atinoq s-kʼatza tu nimla tatineʼ.

Uvaʼs talt Paʼp kam laʼ ibʼan inqʼa niman tetz Jesuus tiʼ itxʼebʼon tiʼ tul u quBʼaal Jesuus inpaqte

18Poro vootzaqle uvaʼ kʼuxh laʼ pal oʼ titzaʼlal s-txheel, tan sibʼ ibʼaʼnil laʼ bʼen taqʼ s-qe, tan tira jalpinaʼq vet oʼ laʼ ibʼan taʼn u quBʼaal Tiuxh. Tul tira josqʼil laʼ qatin vet taʼn. 19Jankʼal inqʼa kam uvaʼ viinqixsamal taʼn quBʼaal Tiuxh, tan ayaʼl ikʼuul txʼebʼoʼmy vet tiʼ u qʼij uvaʼs laʼ ikʼutxht quBʼaal Tiuxh jabʼil inqʼa niman tetz, inqʼa kʼaol imeʼal veteʼ. 20Tan ant inqʼa iviinqixsaʼm quBʼaal Tiuxh ok kaj jaqʼ inqʼa yol uvaʼ tal ka quBʼaal Tiuxh s-tiibʼa, tiʼ uvaʼ tira tzaʼl kuxh laʼ motx atink veteʼ. Echetz tira inatxh vet inqʼa viinqixsaʼm kam inqʼa itzaʼlal tal ka quBʼaal Tiuxh s-tiʼ. Tul jit aʼ saʼon tok ka jaqʼ u yol uvaʼ taqʼ jaʼp quBʼaal Tiuxh s-tiibʼa. Pet quBʼaal Tiuxh saʼon tok ka s-jaqʼ, tan ech uvaʼe isaʼ u quBʼaal Tiuxh. Tan aʼ isaʼ quBʼaal Tiuxh uvaʼ ant inqʼa iviinqixsaʼm tiʼ itxʼebʼex 21u chitpichil tuchʼ inqʼa kʼaol imeʼal quBʼaal Tiuxh, uvaʼ toq topoon vijalp inqʼa viinqixsaʼm. Pet kʼuxhetz qitzel inqʼa viinqixsaʼm s-txheel taʼn inqʼa yol uvaʼ alel ka s-tiibʼa, tul laʼ jalpi, atz toq chitpoq. Tul niim vet tatin laʼ ibʼana, eche u nimla tatin inqʼa kʼaol imeʼal quBʼaal Tiuxh.

22Tan qootzaqle uvaʼ jankʼal inqʼa viinqixsaʼm nik ikʼaxbʼ taʼn inqʼa iyol quBʼaal Tiuxh uvaʼ tal ka s-tiibʼa, eche ijiqʼjotxh vaʼq xaol t-txumuʼm nik ibʼaneʼ. Pet tetxhal tel s-tuul, eche laʼ tel vaʼq ixoq titxhoʼm tiʼ talal vineʼ. 23Tul jitetz kuxh taʼn inqʼa viinqixsaʼm nik ikʼaxbʼ taʼn inqʼa iyol quBʼaal Tiuxh uvaʼ tal ka, pet antat oʼ nik ijiqʼjotxh u qaanima taʼn txumuʼm taʼn inqʼa iyol quBʼaal Tiuxh uvaʼ tal ka s-qiibʼa. Pet ayaʼl qukʼuul nik qutxʼebʼeʼ uvaʼ, tetxhal laʼ itzoqpisa quBʼaal Tiuxh ijalput u qutxhiʼoʼl, jankʼal uvaʼ alel taʼn te inqʼa niman tetz, inqʼa motx toksa s-kʼaol imeʼal. Xaʼtetze toksa quBʼaal Tiuxh viTiuxhil tu qaanima uvaʼ, eche bʼaxa oya taqʼt quBʼaal Tiuxh s-qe, aʼetz u etxhlale uvaʼ, tetxhal laʼ ijalpu u qutxhiʼoʼl, tan ech uvaʼe alel taʼn.

24Ayaʼx tzaanetz quxeʼt tiʼ itxʼebʼexeʼ uvaʼs ichitt oʼ quBʼaal JesuKriisto t-inqʼa qupaʼv uvaʼs qok s-niman tetz. Tan aʼ nik qutxʼebʼ u nimla tatin quBʼaal Tiuxh uvaʼ yeʼx qileʼtaʼ. Pet inqʼa xaol, inqʼa kʼulel vet taʼn kam uvaʼ nik itxʼebʼeʼ, tan jit vet ayaʼl ikʼuul nik itxʼebʼon tiʼ ikʼuluxeʼ. 25Pet koq oʼ, tan ayaʼl qukʼuul nik qutxʼebʼon, tiʼ uvaʼ altziimal s-qe taʼn, kʼuxh yeʼ nik qileʼ. Poro oʼ yeʼ laʼ pal qukʼuul tiʼ itxʼebʼexeʼ.

26Tuulbʼaletz uvaʼ nik qutxʼebʼoneʼ, tul nik quqleʼ. Pet nik tul viTiuxhil Tiuxh tiʼ qulotxhoxeʼ. Tan at uvaʼ yeʼ nik qutxhabʼa veteʼ kam laʼ qujaq te quBʼaal Tiuxh. Pet aʼ vet viTiuxhil Tiuxh nik lotxhon oʼ tiʼ qoksat u quyol te quBʼaal Tiuxh. Tan jiqʼjotxhxh vet viTiuxhil Tiuxh, tul aʼ nik tal vet te quBʼaal Tiuxh inqʼa kam uvaʼ yeʼl yol laʼ txhej vet tiʼ talaxeʼ. 27Tan tootzaq u quBʼaal Tiuxh kam inqʼa yol nik isaʼ viTiuxhil talaxeʼ. Tan tira nik til quBʼaal Tiuxh kam at tu taanima inqʼa xaol, inqʼa natxhkʼuulan tetz quBʼaal Tiuxh. Tan aʼ viTiuxhil Tiuxh nik oksan viyol inqʼa niman tetz quBʼaal Tiuxh s-vatz. Tul antxh nik toksa viTiuxhil Tiuxh tiʼ kam titzʼabʼal quBʼaal Tiuxh s-tiʼ.

Uvaʼs talt Paʼp uvaʼ tiʼ jankʼal inqʼa laʼ palk inqʼa niman tetz Jesuus, tan aʼ itxaʼk uvaʼ laʼ motx chʼij kʼatz quBʼaal Tiuxh taʼn

28Tul qootzaqle uvaʼ at qaanima tiʼ quBʼaal Tiuxh. Tul, tiʼetz uvaʼ at qaanima s-tiʼ, tul nik titzʼa oʼ. Echetz jankʼalxh inqʼa nik ikuy qupal s-tuul, tan aʼ itxaʼk uvaʼ tibʼaʼnil laʼ elkaʼp s-qe tiʼ quchʼij s-kʼatza, oʼ inqʼa at qaanima tiʼ quBʼaal JesuKriisto. Tan at titzʼabʼal s-qiʼ uvaʼ s-qat isaʼt tzaan oʼ tiʼ qok s-niman tetz. 29Tan naʼye isaʼt tzaan quBʼaal Tiuxh inqʼa ok s-niman tetz. Tul qatetz itxaj vet el tiʼ ibʼen s-eche vitxumbʼal viKʼaol, tiʼ uvaʼ laʼ jalpul vet vitxhiʼoʼl taʼn quBʼaal Tiuxh. Tan jalpinaʼq vet vitxhiʼoʼl u quBʼaal JesuKriisto, tul aʼ u quBʼaal JesuKriistoe uvaʼ jalp vitxhiʼoʼl s-bʼaxa xoʼl mamala niman tetz. 30Jatvaʼletz inqʼa qat itxaj vet el, inqʼa ootzaqimalich vet taʼn quBʼaal Tiuxh, inqʼa laʼich qeon, ayaʼletz inqʼae qat isaʼ tzaan quBʼaal Tiuxh. Jatvaʼletz inqʼa qat isaʼ tzaan quBʼaal Tiuxh, ayaʼletz inqʼae qat tal vet s-jit aj paʼvom. Jatvaʼletz inqʼa jit vet aj paʼvom vatz quBʼaal Tiuxh, ayaʼletz inqʼae laʼ jalpi, atz niim vet tatin laʼ ibʼana.

31¿Kametz toq qal vet tiʼ inqʼa bʼaʼnla iyol quBʼaal Tiuxh s-qiʼ? Aʼetz toq qale uvaʼ at u quBʼaal Tiuxh s-qiʼ, echetz s-tiʼile yeʼxhabʼil invaʼq laʼ oleʼv s-qiʼ. 32Tan yeʼl u quBʼaal Tiuxh ibʼan kaʼl ikʼuul tiʼ taqʼax viKʼaol. Pet qat taqʼ viKʼaol kamoq s-qiʼ s-qukaqaayil. Aʼatetz kol yeʼ laʼ taqʼ quBʼaal Tiuxh inqʼa kam s-qe, inqʼa nik isaʼon s-qe tiʼ u qatin s-vatz. Pet aʼl sibʼ toq taqʼ s-qe. 33Tan taʼn kuxh u quBʼaal Tiuxh qat aqʼon bʼen inqʼa ichʼexich s-jit vet aj paʼvom s-vatz. Xaʼtetze yeʼxhabʼil vet invaʼq laʼ xeʼtisan vaʼtoʼq yol tiʼ inqʼa ichʼexich quBʼaal Tiuxh.{*}#8.33 Aʼ nik tal u versiikulo uvaʼa: —Yeʼxhabʼil vet invaʼq laʼ xeʼtisan vaʼtoʼq yol tiʼ inqʼa ichʼexich quBʼaal Tiuxh, —chiche. Aʼetz nik elkaʼpun uvaʼ yeʼl inqʼa niman tetz Jesuus laʼ xoʼv tiʼ ikʼaxbʼisal tiʼ inqʼa ipaʼv, tan tira kuyel vet taʼn u quBʼaal Jesuus. Ech kuxhte uvaʼ jun qʼij laʼ ixoʼva ipaʼvin vet vatz quBʼaal Tiuxh. Tan laʼetz aqʼbʼ vet vatz quBʼaal Tiuxh, tul yeʼletz vet ixoʼval tiʼ ipaloʼk s-kʼatza. Echetz yeʼl Satanaas laʼ oleʼv tuchʼ vixotxhoneʼ, eche uvaʼ ibʼan te Joov. Tan kʼuxh oleʼv Satanaas tiʼ ikʼaxbʼisal vitxhiʼoʼl Joov, poro yeʼ oleʼv tiʼ teleʼl Joov kʼatz quBʼaal Tiuxh, tan nuqxh nikich tal Joov tiʼ inimal quBʼaal Tiuxh. Eche uvaʼ nik tal tu uʼ Joov 2.1-10. 34Tan sebʼ tel kuxh toksat tibʼ quBʼaal JesuKriisto s-qiʼ vatz u quBʼaal Tiuxh tiʼ ijaqax kuya tiʼ inqʼa qupaʼv. Echetz yeʼxhabʼil laʼ aqʼon vet jaʼp u yol s-qiibʼa. Tan antxh u quBʼaal JesuKriistoe uvaʼ kami, atz antxhte uvaʼ itzʼeʼv inpaqte, tul ile at vet tisebʼal u quBʼaal Tiuxh tiʼ ibʼant iqʼesalil, atz tiʼ toksat quyol vatz quBʼaal Tiuxh.

35Echetz yeʼxhkam invaʼq laʼ eesan el taanima quBʼaal JesuKriisto s-tiʼ. Tan kʼuxh mam itzaʼlal laʼ palk oʼ, atz kʼuxh laʼ pal oʼ t-kʼayunchil, atz kʼuxh laʼ bʼanax tzaan qiʼ, tiʼ qukʼaxbʼisaleʼ, atz kʼuxh laʼ pal oʼ t-vaʼy, tan ant kuxh atil taanima quBʼaal JesuKriisto s-qiʼ. Atz kʼuxh mij vet qoksaʼm, atz kʼuxh laʼ pal oʼ t-invaʼq kaebʼal aanima uvaʼ xoʼvebʼal, atz kʼuxh laʼ yatzʼax el oʼ, tan ant kuxh atil taanima quBʼaal JesuKriisto s-qiʼ.

36Tan ech val u yol tzʼibʼamal ka t-viyolbʼal quBʼaal Tiuxh s-eche:

—Tan seʼe kuxhtuʼ,

tul jun kuxh qʼij tetxh

quyatzʼax el.

Tul ech kuxh vet qatin

s-vatz, eche vaʼq karneʼl

uvaʼ, aʼ kuxh vet u kamchil

txʼebʼel taʼn

tiʼ itoqʼox el,

—chich u yol.#Saalmo 44.22

37Pet kʼuxh mamala itzaʼlal nik palk oʼ, tan aʼ u quBʼaal JesuKriisto nik lotxhon oʼ uvaʼ sibʼxh taanima s-qiʼ. Xaʼtetze tetxhal kuxh laʼ oleʼv oʼ tiʼ qupal paʼl t-inqʼa itzaʼlal. 38Echetz tira txhabʼamal tok tinviʼ uvaʼ yeʼxhkam vaʼq laʼ oleʼv tiʼ teleʼl u taanima quBʼaal Tiuxh s-qiʼ: Tan jitoq kamchil, atz jitoq inqʼa itzaʼlal tiʼ u qatin vatz txʼavaʼ, atz jitoq inqʼa aanxel, atz jitoq inqʼa demoonio, atz jitoq inqʼa nik tutxh s-txheel, atz jitoq inqʼa yaʼn toq utxhoq, atz jitoq inqʼa at tiqleʼm, 39atz jitoq inqʼa at jaʼp tu kaqiqʼ vatz amlikaʼ, atz jitoq inqʼa at koʼp tu txʼavaʼ, atz jitoq invaʼq kam uvaʼ viinqixsamal taʼn quBʼaal Tiuxh laʼ oleʼv tiʼ teleʼl u saʼoʼm t-taanima quBʼaal Tiuxh s-qiʼ. Tan sibʼxhte u taanima s-qiʼ, tiʼ uvaʼ at qatin tuchʼ u quBʼaal JesuKriisto.

Currently Selected:

Romaanos 8: ixlC

Highlight

Copy