Romaanos 9

Uvaʼs talt Paʼp uvaʼ tira nikich isaʼ Paʼp uvaʼ jankʼal inqʼa imol s-tijaq imam Israeel laʼ ok s-niman tetz Jesuus

1Toqetz val inuqul sete kam uvaʼ nik tal u vaanima. Tan tira nik vatxhva tuchʼ vaanima uvaʼ jankʼal koqxh inqʼa inmol s-tijaq imam Israeel laʼ qeon u quBʼaal JesuKriisto. Tul tootzaq quBʼaal JesuKriisto uvaʼ nuqxh nik valeʼ; pet jit tzʼeqo tzij nik inbʼaneʼ. Atz tootzaq viTiuxhil Tiuxh inpaqte uvaʼ nuqxh nik valeʼ. 2Tul mam txumuʼm nik inbʼan tiʼ inqʼa inmol, inqʼa yeʼ nik qeon quBʼaal JesuKriisto. Atz tira nik itxumun vaanima s-tiʼ bʼenamen. 3Tan eche uvaʼ laʼ koq utxhi, tul aʼ, in laʼ tal quBʼaal Tiuxh yaabʼla yol s-viʼ. Atz aʼ koq in, laʼ jetxhon el in kʼatz quBʼaal JesuKriisto, tul aʼ koq vet inqʼa inmol, laʼ jetxhon ok kʼatz quBʼaal JesuKriisto sinvatzil, inqʼa vaʼl inxaʼnil s-tuchʼ, 4inqʼa tij imam Israeel.

Tan aʼ inqʼae, toksa

quBʼaal Tiuxh

s-kʼaol imeʼal s-naʼya.

Tul aʼ inqʼae, motx ilon u

nimla tatin

quBʼaal Tiuxh.#Eeksodo 24.15-18

Atz aʼ inqʼae, motx ijeqbʼa

quBʼaal Tiuxh

inqʼa iyol s-tuchʼ.

Tul aʼ inqʼae, motx kʼulun

inqʼa ibʼekʼbʼal

quBʼaal Tiuxh

uvaʼ taqʼ te Moisees.

Atz aʼ inqʼae, nikich tal

quBʼaal Tiuxh s-te

kam laʼ motx ibʼan

tiʼ inatxhkʼuulaneʼ

eche nik ibʼan

tu tostiuxh.

Atz aʼ inqʼae, altziil

nima vatzlen bʼaʼnil

s-te taʼn quBʼaal Tiuxh.

5Aʼetz inqʼa kʼuy qumame

itxaj quBʼaal Tiuxh

tiʼ ixeʼtisal u qutenam.

Atz aʼ inqʼae, antxh

pal ikʼulvat u Kriisto,

u tatin s-alam aanimail

xoʼl inqʼa tiyiʼil.

Tul aqʼax vet tiqleʼm u quBʼaal JesuKriisto, aʼetz vet u quBʼaal Kriistoe, iTxaj u quBʼaal Tiuxh, uvaʼ at tiibʼa inqʼa kam s-kaqaayil. ¡Echetz laʼ toksal iqʼije u quBʼaal JesuKriisto s-txheel, atz t-inqʼa jattanulxh yaʼbʼ uvaʼ yaʼn tuleʼ! Tul echxh laʼ ibʼane.

6Tul alelich ka taʼn quBʼaal Tiuxh taqʼax inqʼa nimla txhaq bʼaʼnil te inqʼa tij imam Israeel. Tul ¿kametz s-tiʼil yeʼ kʼulux u quBʼaal JesuKriisto taʼn inqʼa tij imam Israeel, vitenam quBʼaal Tiuxh? Echetz yeʼ laʼ utxhi laʼ qala uvaʼ: —Yeʼ nik itzoqpisa quBʼaal Tiuxh viyol te vitenam, —chaq koq oʼ. Pet ech bʼanel taʼn s-eche: Tan jit kaqaay inqʼa tij imam Israeel uvaʼ itenam koq quBʼaal Tiuxh. 7Atz echat kuxh inqʼa tij imam Avraʼaame. Tan jit jankʼal koqxh inqʼa tij imam Avraʼaam toksa quBʼaal Tiuxh s-tuul tiʼ ibʼen s-kʼaol imeʼal.

Pet aʼl echeen tal quBʼaal Tiuxh te Avraʼaam s-eche tiʼ jabʼile u kʼaol imeʼal laʼ ibʼana:

—Aʼ Isaak laʼ txhejsan

avij amam,

—xeʼt quBʼaal Tiuxh te Avraʼaam.#Jeenesis 21.12

8Echetz talax s-eche. Tan jit kuxh ayaʼl kʼaol imeʼal quBʼaal Tiuxh inqʼa tij imam Avraʼaam, kʼuxh itxhiʼoʼl ikaqal Avraʼaam. Pet taʼnxh tij imam Avraʼaam vatz quBʼaal Tiuxh, inqʼa ikʼaol, atz inqʼa tij Isaak, uvaʼ tal quBʼaal Tiuxh taqʼaxeʼ. 9Tan ech viyol quBʼaal Tiuxh tal te Avraʼaam s-eche:

—Ech vaʼt yaʼbʼ s-txheel,

tul laʼ ul insoli axh.

Tul at vet vaʼl tal Saara

laʼ ibʼana.

Tul xaak u neʼ

laʼ tala Saara,

—xeʼt quBʼaal Tiuxh te Avraʼaam.#Jeenesis 18.10, 14{*}#9.9 Jeenesis 18.10, 14. Atich vet vaʼl ikʼaol Avraʼaam, uvaʼ Ismaeelich ibʼij, uvaʼs talt quBʼaal Tiuxh itxhej vaʼt ikʼaol Avraʼaam tuchʼ Saara. Echetz ibʼen vete te Avraʼaam uvaʼ jitich aʼ Ismaeel tuchʼ tij imam laʼich kʼulun u bʼaʼnil uvaʼ tal quBʼaal Tiuxh taqʼax te inqʼa tij imam Avraʼaam.

10Poro jitetz kuxh taʼn yaʼk u yol tiʼ Isaak. Pet echatxh tal quBʼaal Tiuxhe te Reveeka uvaʼs iyan vet ikʼuul Reveeka tiʼ kaʼvaʼl inqʼa tal, inqʼa ikʼaol Isaak, u kʼuy qumam. 11-12Tan yeʼnaqich alaloq kaʼvaʼl inqʼa xaak, inqʼa xuʼmiche. Atz yeʼnaqich ibʼaneʼt inqʼa xaak invaʼq bʼaʼn atzoq invaʼq yeʼbʼaʼn, tul ech tal vet quBʼaal Tiuxh te Reveeka s-eche:

—Aʼ u atzika laʼ kʼulun

ibʼekʼbʼal u itzʼina,

—xeʼt quBʼaal Tiuxh.#Jeenesis 25.23

Tan vaʼl kuxh u xaak itxaj vet quBʼaal Tiuxh tiʼ ibʼen sitenam. Ibʼanetz quBʼaal Tiuxh s-eche, tan aʼich isaʼ laʼ telaʼpun kam uvaʼ kʼaqich taʼn. Pet quBʼaal Tiuxh nik saʼon jabʼil laʼ ichʼexa.

13Tan ech nik tal u yol uvaʼ tzʼibʼamal ka t-viyolbʼal quBʼaal Tiuxh s-eche:

—Aʼ Jakoov voksa

vaanima s-tiʼ.

Pet aʼ Esauu veesa viʼ

vaanima,

—chich u yol.#Malakiias 1.2-3

14¿Kametz vet quyol laʼ qal s-tiʼ? Tan kamal at juunoq ex, uvaʼ ech toq etal s-eche: —Jitetz bʼak vaʼl koq kuxh iqʼabʼ quBʼaal Tiuxh s-qiibʼa, —maq toq etaleʼ.

¡Yeʼle! ¡Yeʼ laʼ isaʼa ech laʼ etale! 15Tan ech tal quBʼaal Tiuxh te Moisees s-eche:

—Laʼ voybʼa ivatz u xaol

uvaʼ, in laʼ saʼon

toybʼal ivatz.

Atz laʼ intxum ivatz u xaol,

uvaʼ, in laʼ saʼon

itxumux ivatz,

—xeʼt quBʼaal Tiuxh.#Eeksodo 33.19

16Echetz jit aʼ nik ichʼexvat quBʼaal Tiuxh inqʼa xaol, tiʼ uvaʼ, aʼ u xaol laʼ saʼon, atz jit, tiʼ uvaʼ aʼxh nik aqʼon yaʼl tiʼ ibʼanax u bʼaʼn laʼ saʼaxik taʼn quBʼaal Tiuxh. Pet quBʼaal Tiuxh nik saʼon jaʼl laʼ itxum ivatz. 17Tan tzʼibʼamal ka viyol quBʼaal uvaʼ, ech tal te faraoon s-eche:

—In qat oksan axh

s-mam iqʼesal,

tiʼ uvaʼ toq inkʼutxh

u viqleʼm seʼe.

Echetz laʼ tootzaqit ine

jankʼal inqʼa tenam

vatz u txʼavaʼ,

—xeʼt quBʼaal Tiuxh.#Eeksodo 9.16

18Echetz quBʼaal Tiuxh laʼ saʼon jaʼl uvaʼ laʼ itxum ivatz. Atz laʼat itijbʼixsa quBʼaal Tiuxh taanima u xaol, jaʼl uvaʼ laʼ isaʼ s-te.

19Poro kamal at vaʼq xaol sexoʼl ech toq alon s-eche: —Ape. Oqetz quBʼaal Tiuxh nik bʼanon tiibʼa inqʼa xaol kam uvaʼ nik ibʼaneʼ, ¡jaʼletz koq laʼ oleʼv vet tiʼ imaqax quBʼaal Tiuxh, tiʼ uvaʼ nik ibʼaneʼ! Ape ¿kametz vet s-tiʼil bʼa nik tal oʼ quBʼaal Tiuxh s-aj paʼvom tiʼ inqʼa nik qubʼaneʼ? —kamal chiche.

20Pet toq val sete: Yeʼl qokebʼal tiʼ ijotxhʼil te u quBʼaal Tiuxh tiʼ kam uvaʼ nik ibʼaneʼ. Tan ech kuxh qatin vatz quBʼaal Tiuxh, eche vaʼq txʼavaʼ vaaso. Tan bʼane laʼ koq utxhi uvaʼ, ech laʼ tal invaʼq u txʼavaʼ vaaso te u bʼitol tetz s-eche: —¿Kam s-tiʼil qat aaqʼ txha vet bʼen in s-eche? —chaq koq.#Isaiias 29.16; 64.8

21Tan at tiqʼabʼ u bʼitol oq vaʼten txhan vet kam laʼ taqʼvat vet bʼen u txʼavaʼ vaaso. Tan at txʼavaʼ vaaso aʼ nik txakunk tiʼ bʼaʼnla kam; atz at txʼavaʼ vaaso aʼ nik txakunk tiʼ kam kuxh tiqleʼm uvaʼ yeʼ itxaʼk.

22Tul nik ikʼutxh quBʼaal Tiuxh vikʼaʼnal te inqʼa xaol, inqʼa nik ipaʼvineʼ. Tul nik ikʼutxh viyakʼil tiʼ ikʼaxbʼisal inqʼa palsan yol. Ape. Kʼuxhetz kʼaʼn u quBʼaal Tiuxh, pet qat ikotxʼ ivatz te inqʼa palsan yol, inqʼa ikʼulelxh veteʼ laʼ kʼaxbʼisali, atz inqʼa, aʼ kʼaqel vet taʼn uvaʼ laʼ sotzeʼl. 23Tan echetz qat ibʼan quBʼaal Tiuxhe, tul qat ikotxʼ quBʼaal Tiuxh ivatz tiʼ itxʼebʼt titzʼat tibʼ inqʼa nik ipaʼvineʼ. Tul echetz laʼ ikʼutxht quBʼaal Tiuxhe vimam bʼaʼnil tiʼ toybʼat ivatz inqʼa aj paʼvom, tul laʼ ikuy vipaʼv. Tan aʼ itzʼamal taʼn quBʼaal Tiuxh uvaʼ, tetxhal laʼ ikʼul inqʼa aj paʼvom u nimla tatin tu amlikaʼ.

24Aʼetz oʼe, inqʼa aj paʼvom inqʼaa, oʼ inqʼa qat isaʼ tzaan oʼ quBʼaal Tiuxh tiʼ inimal quBʼaal JesuKriisto. Tul jitetz kuxh taʼn oʼ, qat isaʼ tzaan oʼ xoʼl inqʼa tij imam Israeel, pet ant qat isaʼ tzaan jolt inqʼa jit tij imam Israeel.

25Tan ech val u yol nik tal tu uʼ uvaʼ itzʼibʼa ka Oseeas s-eche:

—Inqʼa xaol uvaʼ jit intenam

nik talaxeʼ,

tan laʼ vaqʼ bʼen sintenam.

Atz inqʼa xaol

uvaʼ yeʼl vaanima s-tiʼ,

tan at vet vaanima s-tiʼ

laʼ ibʼana,

—chich u yol.#Oseeas 2.23

26Tul echat tal Oseeas paqte s-eche:

—Tuulbʼal vaʼl tenam

uvaʼ ech talt quBʼaal Tiuxh

yol s-eche:

«Jit ex intenam,»

xeʼt quBʼaal Tiuxh s-te;

tul antetzxh tuulbʼal u tenam

uvaʼe laʼ alaxik ex

s-kʼaol imeʼal

u quBʼaal Tiuxh

uvaʼ yeʼxhkam vaʼq tzaʼl

s-vatz,

—xeʼt Oseeas.#Oseeas 1.10

27Tul itzʼibʼaat ka Isaiias kaʼt inqʼa yol tiʼ inqʼa tij imam Israeel uvaʼ sichʼiʼmxh ibʼan tiʼ talaxeʼ. Tul ech nik tal s-eche:

—Kʼuxh mam tenam tatin

inqʼa tij

imam Israeel,

eche vimusanil aʼ tziʼ

u maar

uvaʼ yeʼl s-atxhel,

poro jit ayaʼl inqʼae

laʼ ichʼexeʼl

quBʼaal Tiuxh

tiʼ ikolox el vatz u kʼaxkʼo

tiʼ inqʼa ipaʼv.

28Tan toq taqʼ kuʼ

quBʼaal Tiuxh

inqʼa yol tinuqul

tiibʼa inqʼa xaol vatz

u txʼavaʼ.

Tul tinuqulxh toq ibʼaneʼ.

Tul jit saʼ koq ibʼal tibʼ

quBʼaal Tiuxh

tiʼ telaʼpun,

—chich u yol.#Isaiias 10.22-23

29Tul ech vaʼt u yol maʼtich itzʼibʼat ka Isaiias s-eche:

—Poro itxum

quBʼaal Tiuxh ivatz

jolol inqʼa kʼuy qumam

s-naʼya,

inqʼa motx palsan iyol,

u quBʼaal Tiuxh

uvaʼ tira at tiqʼabʼ

s-kaqaayil.

Pet yeʼ koq ikuy

quBʼaal Tiuxh ipaʼv

inqʼa kʼuy qumam, atz

isotzsa koq el

quBʼaal Tiuxh,

tul yeʼletzebʼ oʼ s-txheel,

eche uvaʼ isotzsat el

quBʼaal Tiuxh

inqʼa xaol, inqʼa Sodooma

tuchʼ inqʼa Gomoora,

—chich u yol.#Isaiias 1.9

Uvaʼs talt Paʼp inuqul tiʼ visotz ikʼuul inqʼa tij imam Israeel, tiʼ yeʼ ibʼenaq s-te kam nik elkaʼp inqʼa bʼekʼbʼal

30¿Kametz vet quyol toq txheoq tiʼ inqʼa jit tij imam Israeel? Tan ant inqʼae, jit vet aj paʼvom vatz quBʼaal Tiuxh, kʼuxh jit txhʼuyichaq tiʼ itxhabʼal tiʼ ibʼen s-bʼaʼn vatz quBʼaal Tiuxh. Aʼetz nik val tiʼ inqʼa xaol, inqʼa qat ikʼuqbʼa ikʼuul tiʼ quBʼaal JesuKriisto, tul qat motx kuyux vipaʼv. Aʼetz inqʼae, jit vet aj paʼvom vatz quBʼaal Tiuxh.

31Petetz koq oʼ, inqʼa tij imam Israeel, tan aʼl yeʼ qat motx qoleʼv tiʼ inimal inqʼa bʼekʼbʼal uvaʼ jit vet oʼ aj paʼvom vatz quBʼaal Tiuxh laʼ ibʼana, kʼuxh aʼxh txhʼuyichaq oʼ tiʼ inimal inqʼa bʼekʼbʼal. 32Poro ¿kametz s-tiʼil yeʼ tal quBʼaal Tiuxh uvaʼ jit aj paʼvom vet inqʼa tij imam Israeel vatz quBʼaal Tiuxh tiʼ inimal inqʼa bʼekʼbʼal? Tiʼ uvaʼ yeʼ motx kʼuqeʼv ikʼuul uvaʼ, aʼ quBʼaal Tiuxh laʼ kuyun vipaʼv. Pet aʼ nikich motx titzʼa uvaʼ, aʼ laʼich motx aqʼon bʼen s-jit aj paʼvom vatz quBʼaal Tiuxh kam inqʼa nikich motx ibʼan tiʼ inimal inqʼa bʼekʼbʼal. Tan aʼ nikich motx titzʼa uvaʼ tuchʼ inqʼa ibʼanoʼm laʼich motx oleʼvik tiʼ ibʼen s-bʼaʼn vatz quBʼaal Tiuxh. Pet yeʼle. Jit taʼne. Pet motx ikʼ tiʼ yeʼ iqeex u quBʼaal JesuKriisto; aʼe u Sivan uvaʼ ikʼbʼal tatineʼ. Tan tira kuxh motx sotz ikʼuul s-te. Ech kuxh motx ibʼan vet, eche tajsat ok tibʼ vaʼq xaol tiʼ vaʼq sivan.

33Tan ech val u yol tzʼibʼamal ka t-viyolbʼal quBʼaal Tiuxh tiʼ u Kriisto s-eche:

—Toq intxhaq

vaʼl vinaq sexoʼl,

ex inqʼa tij imam Israeel,

ex inqʼa

tu tenam Sioon.

Tan jaʼl uvaʼ

laʼ ikʼuqbʼa ikʼuul s-tiʼ,

tul yeʼl paqul

laʼ eesal t-bʼey taʼn;

atz yeʼl paqul laʼ txhoʼn s-te

tiʼ vinimaleʼ.

Pet vatz inqʼa xaol,

tan eche invaʼq sivan

uvaʼ laʼ ikʼ vaʼq xaol

s-tiʼ,

atz laʼ ijoqpi tibʼ s-tiʼ,

—chich u yol.#Isaiias 8.14; 28.16{*}#9.33 Isaiias 8.14; 28.16. U yol ‹Sioon› tu kastiiya, tan aʼiche vibʼij vinikʼa u tenam Jerusaleen s-naʼya, eche nikich qalt u yol ‹Vatz Qʼantiuxh› s-naʼya tiʼ vinikʼa u qutenam. Pet xamtel ok vet u bʼij Sioon sibʼij inqʼa tij imam Israeel. ¿Kam s-tiʼil alax u Vinaq uvaʼ itxhaq tzaan quBʼaal Tiuxh, s-eche vaʼl sivan uvaʼ laʼich motx ikʼ inqʼa xaol s-tiʼ? Tiʼ uvaʼ tan, aʼ nikich iqej inqʼa tij imam Israeel uvaʼ yeʼlich u Kriisto laʼich kami. Pet kametz u quBʼaal Jesuus, uvaʼ itxhaq tzaan u quBʼaal Tiuxh, echetz motx isotz vet ikʼuule inqʼa tij imam Israeel tiʼ iqeexeʼ. Xaʼtetze nik ibʼan quBʼaal Jesuus eela tuchʼ vaʼq sivan uvaʼ laʼ ikʼ vaʼq xaol s-tiʼ. Danieel 2.44-45

Currently Selected:

Romaanos 9: ixlC

Highlight

Copy