Romaanos 7

Uvaʼs itxhust Paʼp inqʼa niman tetz Jesuus tiʼ itanbʼal ibʼanax jankʼal inqʼa bʼekʼbʼal tuchʼ inqʼa qejoʼm, inqʼa nimamal kuxh tzaan taʼn inqʼa tij imam Israeel

1Toqetz val kaʼl u yol sete, ex inmol s-niman tetz Jesuus, ex, uvaʼ ootzaqin tetz inqʼa bʼekʼbʼal. Tan etootzaqle uvaʼ taʼn kuxh atil tokebʼal inqʼa bʼekʼbʼal tiʼ u xaol uvaʼ itzʼlele. 2Jankʼal eche invaʼq u ixoq uvaʼ tzʼalonaʼql vet jaqʼ bʼekʼbʼal. Tan txeyel vet taʼn inqʼa bʼekʼbʼal, tiʼ uvaʼ kʼulel vet tibʼ tuchʼ vitzumel. Pet oqetz laʼ kam vet vitzumel u ixoq, tul yeʼletz vet u ixoqe txeyel taʼn inqʼa bʼekʼbʼal tiʼ vikʼult tibʼ tuchʼ vitzumel. Pet txhaqpumal vet u ixoq. 3Pet oqetz itzʼlel vitzumel u ixoq, tul laʼ tiqʼo invaʼtoʼq vinaq, tul yansa ibʼetz vete laʼ ibʼan u ixoq. Pet oqetz aʼ vitzumel u ixoq laʼ kami, tul yeʼletz vet u ixoqe txeyel taʼn inqʼa bʼekʼbʼal. Pet txhaqpumal vet u ixoq. Echetz bʼaʼn kuxhtuʼ, kʼuxh la tiqʼo u ixoq invaʼtoʼq vinaq, tan jitetz yansa ibʼe laʼ ibʼana.#2 Luʼ 1.6

4Echatichetz bʼanel taʼne vetatineʼ, ex inmol s-niman tetz Jesuus, tan nimamalichat inqʼa bʼekʼbʼal tuchʼ inqʼa qejoʼm qaʼn, oʼ inqʼa tij imam Israeel. Tan ech vete tira tzʼalonaʼqich oʼ s-tuchʼ. Petetz vet s-txheel, tan qat enima vet vikamebʼal u quBʼaal JesuKriisto. Tul aʼetz vet uvaʼe, qat chiton ex tiʼ venimat inqʼa bʼekʼbʼal, eche kamchil qat ebʼan vatz inqʼa bʼekʼbʼal. Tul qat ok vet ex s-niman tetz Jesuus. Tul ech vete tzʼaloʼm qat ebʼan tuchʼ vaʼte, aʼe u quBʼaal JesuKriisto, uvaʼ itzʼeʼv inpaqte kʼuxh maʼtich ikameʼ. Echetz qukʼutxhvaq vet u bʼaʼnil tiʼ u qatin kʼatz u quBʼaal JesuKriisto tuchʼ u bʼaʼnla txumbʼal uvaʼ nik ichiibʼ quBʼaal Tiuxh s-tiʼ, eche viʼoq tzeʼ uvaʼ nik ichiibʼ u xaol tiʼ iloʼox vivatz.{*}#7.4 At nik tal Paʼp ‹ex;› atz at nik tal u Paʼp ‹oʼ,› chiche. Nik kuxh iyuj Paʼp viyol tiʼ iyoloneʼ.

5Tan tuulbʼal uvaʼ jatxhaq tzaan, tan aʼ inqʼa oʼtla txhaq qutxumbʼal iqʼomich tzaan qaʼn tetz bʼano paʼv nikich bʼekʼon oʼ. Tul aʼetz nikich qubʼan inqʼa kantxhaqla atxhaʼv tetz u qutxhiʼoʼl, inqʼa atxhaʼv uvaʼ nikich tal u bʼekʼbʼal s-qe yeʼ laʼ qubʼana. Tul aʼ nikich qubʼan vet inqʼa txumbʼal uvaʼ kamchil vatz quBʼaal Tiuxh kʼaqich vet taʼn. 6Petetz vet uvaʼ s-txheel, tan chitel vet oʼ tiʼ yeʼ qunimat inqʼa bʼekʼbʼal tuchʼ inqʼa qejoʼm, inqʼa nikich tatxhʼon oʼ, tan ech vet qatin s-vatz, eche vaʼq kamnaʼq uvaʼ yeʼl vet tokebʼal inqʼa bʼekʼbʼal s-tiʼ. Pet s-txheel tan qat chitpiy vet el oʼ tiʼ inimal inqʼa bʼekʼbʼal uvaʼ tzʼibʼamich ka taʼn Moisees. Pet aʼ vet quBʼaal Tiuxh laʼ qunima tuchʼ inqʼa akʼla txumbʼal, inqʼa kʼulel vet qaʼn te viTiuxhil Tiuxh. Pet jit aʼ qat qukʼulvat viTiuxhil Tiuxh tiʼ inimal inqʼa oʼtla bʼekʼbʼal uvaʼ tzʼibʼamal ka.

Uvaʼs talt Paʼp inuqul tiʼ kam vibʼaʼnil inqʼa bʼekʼbʼal, atz inqʼa oʼtla txumbʼal tetz bʼano paʼv, inqʼa txhabʼamal kuxh tatin s-qukʼatza

7¿Kametz toq qal veteʼ? Kamaletz at juunoq ex, uvaʼ ech toq etal s-eche: —Bʼaʼnil iqʼomal taʼn inqʼa bʼekʼbʼal nik qaleʼ. Pet ¿kantxhaqetzebʼ inqʼa bʼekʼbʼal, tan aʼl nik qupaʼvin taʼn? —kamal toq etaleʼ.

Yeʼle. Yeʼl oʼ nik qupaʼvin taʼn. Pet aʼ nik ikʼutxh s-qe jabʼistee inqʼa paʼv, jankʼal eche uvaʼ nik tal vaʼl u bʼekʼbʼal, uvaʼ ech nik tal s-eche: —Yeʼ laʼ aatxhva kam tetz amol, —chiche. Yeʼletz koq u bʼekʼbʼal, tul kametz koq innatxhbʼe oq paʼv tatxhval kam tetz qumol. 8Pet, tiʼetz uvaʼ taqʼ u bʼekʼbʼal vootzaqi uvaʼ paʼve u atxhaʼv, tul tiraetz aʼl tul vet nima vatzul atxhaʼv sinkʼuul. Tan aʼ vet u vitzʼabʼal pal vet paʼl tiʼ tatxhval inqʼa kam, tiʼ uvaʼ vootzaqi u bʼekʼbʼal tiʼ yeʼ tatxhval inqʼa kam. Pet eche uvaʼ yeʼ koq vootzaqi uvaʼ paʼv u atxhaʼv, uvaʼ nik tal u bʼekʼbʼal, tul jitetzebʼ nima vatzul atxhaʼv laʼich ul sinkʼuul tiʼ inpaʼvineʼ.

9Tan tuulbʼal uvaʼ yeʼich vootzaq inqʼa bʼekʼbʼal, tul yeʼxhkam nikich vitzʼa tiʼ kam inqʼa nikich inbʼan tuulbʼal u vatineʼ, maq paʼv, atz maq jit paʼv nikich inbʼaneʼ. Pet vootzaqietz vet inqʼa bʼekʼbʼal, tul aʼl tul vet sinkʼuul ibʼanax kam kuxh paʼvil. Tul tzitzi ijaʼp vet u yol s-viibʼa, tiʼ uvaʼ yeʼ nikich inbʼaneʼ kam uvaʼ nik tal inqʼa bʼekʼbʼal. Tul bʼen vet s-ve uvaʼ, aʼ u kamchil kʼaqich vet vaʼn vatz quBʼaal Tiuxh. 10Tul vootzaqliche uvaʼ aqʼol qʼij saqich inqʼa bʼekʼbʼal. Pet xamtel bʼen vet s-ve uvaʼ kamchil bʼak kʼaqich vet vaʼn tiʼ inbʼant inqʼa paʼv uvaʼ nikich ikʼutxh inqʼa bʼekʼbʼal s-ve.

11Tan, tiʼ uvaʼ vootzaqi vet inqʼa paʼv taʼn inqʼa bʼekʼbʼal, tul isotzsa vet inkʼuul. Pet antetzxh vet u bʼekʼbʼal kʼutxhun s-ve uvaʼ yeʼlich bʼak vet qʼij insaq at vatz quBʼaal Tiuxh tiʼ ibʼanax u paʼv.

12Echetz aʼ vet quyol tiʼ inqʼa bʼekʼbʼal uvaʼ nik ilotxh oʼ tiʼ qujetxhtoʼk qibʼ kʼatz quBʼaal Tiuxh. Tul echat kuxh jolt inqʼa bʼekʼoʼme uvaʼ tal ka quBʼaal Tiuxh te Moisees, tan nik ilotxh oʼ tiʼ qujetxhon ok kʼatz quBʼaal Tiuxh. Tan jikxhtuʼ; atz inuqulxhtuʼ. 13Kʼuxhetz eche, tan kʼuxh bʼaʼn inqʼa bʼekʼbʼal nik valeʼ, poro antetzebʼxh inqʼa bʼekʼbʼal nik aqʼon bʼen in tu kamchil. ¡Yeʼleʼ! Jitetz aʼ inqʼa bʼekʼbʼale bʼanon s-ve, pet antxh u atxhaʼve uvaʼ atich sinkʼatza kʼoʼpin in tiʼ ibʼanax u paʼv. Tul aʼ kʼaqich vet vaʼn u kamchil vatz quBʼaal Tiuxh. Echetz ibʼen vete s-ve taʼn inqʼa bʼekʼbʼal uvaʼ tira kantxhaq uvaʼ pal vet iviʼ inpaʼvin vatz quBʼaal Tiuxh.

14Tul qootzaqle uvaʼ, aʼ itxaʼk inqʼa bʼekʼbʼal tiʼ u qujetxhtoʼk qibʼ kʼatz quBʼaal Tiuxh. Pet koq in, tan in kuxh vaʼl alam aanima bʼanol tetz tatxhaʼv vintxhiʼoʼl. Tul tira kuxh kʼayimal vet vibʼ tiʼ ibʼekʼt in u paʼv. 15Tan yeʼ nik ibʼen s-ve kam s-tiʼil nik inbʼan inqʼa paʼv. Tan jit aʼ nik inbʼan u bʼaʼn kam uvaʼ nik insaʼ ibʼanaxeʼ. Pet aʼl aʼ nik inbʼan u yeʼbʼaʼn uvaʼ tira yanebʼal kʼuul sinvatz. 16Oqetz aʼ kuxh nik inbʼan kam u yeʼbʼaʼn uvaʼ yeʼ insaʼ laʼ inbʼana, tul aʼetz vet uvaʼe nik bʼensan s-ve uvaʼ bʼaʼn kuxh inqʼa bʼekʼbʼal. 17Oqetz aʼ kuxh nik inbʼan kam u yeʼbʼaʼn uvaʼ yeʼ insaʼ laʼ inbʼana, aʼetz nik elkaʼpune uvaʼ jit vet aʼ u vitzʼabʼal nik alon inbʼant inqʼa paʼv. Pet aʼ kuxh vet inqʼa atxhaʼv nik bʼekʼon in tiʼ ibʼanax u paʼv. 18Tan vootzaqle uvaʼ, aʼ at sinkʼatza u oʼtla txumbʼal iqʼomich tzaan vaʼn u bʼano paʼv. Aʼetz uvaʼe, yeʼ nik kuyun inbʼant u bʼaʼn, tan aʼ txhabʼamal tatin sinkʼatza u oʼtla txumbʼal. Kʼuxhetz aʼ itzʼamal vaʼn ibʼanax u bʼaʼn, tul yeʼ nik voleʼv tiʼ ibʼanaxeʼ, tiʼ uvaʼ, aʼ u oʼtla txumbʼal nik bʼekʼon in tiʼ ibʼanax u paʼv. 19Tan jabʼiste u bʼaʼn nik insaʼ ibʼanaxeʼ, tul aʼl yeʼ nik inbʼantaʼ. Petetz u yeʼbʼaʼn uvaʼ yeʼ insaʼ laʼ inbʼana, tul aʼetz uvaʼe, nik inbʼane. 20Oqetz aʼ nik inbʼan jabʼiste uvaʼ yeʼ insaʼ laʼ inbʼana, poro jitetz vet ine nik saʼon ibʼanxeʼ, pet, tiʼ uvaʼ, aʼ u oʼtla txumbʼal tetz bʼano paʼv txhabʼamal tatin sinkʼatza.

21Echetz nik ibʼene s-ve uvaʼ at vaʼl nik bʼanon in, tiʼ uvaʼ nik inbʼan s-eche: Tan oq nik vitzʼa ibʼanax u bʼaʼn, tul tzum nik ex ikʼutxht vet tibʼ u bʼaʼn sinkʼatza tuchʼ u oʼtla txumbʼal uvaʼ txhabʼamal tatin sinkʼatza tiʼ ibʼanax u yeʼbʼaʼn. 22Pet tu vitzʼabʼal, tan tira nik itzaj u chiibʼichil tu vaanima tiʼ inimal inqʼa ibʼekʼbʼal quBʼaal Tiuxh. 23Poro nik ibʼen s-ve uvaʼ at invaʼt kantxhaq nik bʼanon in, tul aʼ uvaʼe, nik bʼekʼon txhaq vatzul vintxhiʼoʼl. Aʼetze inqʼa oʼtla txumbʼal inqʼa txhabʼamal tatin sinkʼatza tiʼ ibʼekʼt in tiʼ ibʼanax u paʼv. Aʼetz vet inqʼa nik bʼekʼon in tiʼ ibʼanax u paʼv, nik ibʼan txhʼaʼo tuchʼ u vitzʼabʼal uvaʼ nik saʼon ibʼanax u bʼaʼn. Echetz tira aʼ inqʼa oʼtla txumbʼal nik bʼekʼon txhaq vatzul vintxhiʼoʼl. 24¡Echetz tira txumlebʼal kuxh invatz tiʼ vatin taʼn u oʼtla txumbʼal uvaʼ nik bʼekʼon in! Tul ¿jaʼl koq laʼ chiton el in t-inqʼa kantxhaqla atxhaʼv nik tal vintxhiʼoʼl uvaʼ kamchil vet kʼaqel taʼn? 25Pet taʼntiuxh te quBʼaal Tiuxh uvaʼ at bʼak vaʼl laʼ chiton in tiqʼabʼ uvaʼ nik bʼekʼon vintxhiʼoʼl. ¡Aʼe JesuKriisto, u quBʼaal vet s-txheel!

Ape. Kametz toq kajk vet oʼ tiʼ inqʼa kam inqʼa nik qal s-eche: Tan aʼ at tu vitzʼabʼal uvaʼ laʼ voksa vibʼ tiʼ inimal vibʼekʼbʼal quBʼaal Tiuxh. Pet inqʼa oʼtla txumbʼal tetz bʼano paʼv uvaʼ txhabʼamal tatin sinkʼatza, tan aʼ uvaʼe, nik ibʼekʼon tiʼ ibʼanax inqʼa paʼv.

Currently Selected:

Romaanos 7: ixlC

Highlight

Copy