Romaanos 6

Uvaʼs talt Paʼp uvaʼ yeʼ laʼ paʼvin vet inqʼa niman tetz Jesuus

1¿Kametz vet toq qal siyaʼebʼal quyol, tiʼ uvaʼ aʼl sibʼ vet vibʼaʼnil quBʼaal Tiuxh nik taqʼ tiʼ ikuyux inqʼa paʼv? Tan kamal at joloq ex ech toq alon s-eche: —Kʼuxhetzebʼ sebʼtoq tel kuxh oʼ tiʼ ibʼanax inqʼa paʼv, tul aʼl teletz toq ikuyt oʼ quBʼaal Tiuxhe, —kamal chich ex.

2¡Yeʼletza! Tan ¡yeʼ laʼ utxh vet qupaʼvineʼ! Tan tira qat qutanbʼal vet ibʼanax u paʼv, tan yeʼl vet oʼ nik qaqʼ qibʼ ibʼekʼ u paʼv, eche vaʼq kamnaʼq uvaʼ yaʼtel koq laʼ ibʼekʼex taʼn u paʼv. 3Pet maqetz yeʼ etootzaqle uvaʼ, aʼ u qukuʼ xeʼ aʼ qat kʼutxhun, tul vaʼl vet quyol s-quvatzaqil, tiʼ uvaʼ, oʼ vet niman tetz Jesuus. Atz vaʼt nik elkaʼpun uvaʼ, aʼ nik qiqʼo tzaan vikamebʼal quBʼaal JesuKriisto, tiʼ uvaʼ qat qukuʼ xeʼ u aʼ. 4Echetz aʼ nik elkaʼp vet u qukuʼ xeʼ aʼ uvaʼ, eche tzum qat qukam tuchʼ u quBʼaal JesuKriisto tiʼ qutanbʼat ibʼanax inqʼa paʼv. Atz aʼetz nik elkaʼp u qujaʼul xeʼ aʼ uvaʼ, ech vet nik qitzʼeʼv, eche uvaʼ titzʼeʼv u quBʼaal JesuKriisto taʼn quBʼaal Tiuxh uvaʼ sibʼ tiqleʼm. Tul aʼetz laʼ qubʼan vet vaʼl akʼla txumbʼal tuulbʼal uvaʼ itzʼleʼl vet oʼ.

5Tiʼetz uvaʼ vaʼl vet qat qeleʼl t-inqʼa paʼv tiʼ vikamebʼal quBʼaal JesuKriisto, tul yeʼletz laʼ qubʼan vet kaʼl qukʼuule, s-tiʼ uvaʼ vaʼl vet laʼ motx qitzʼeʼv inpaqte, eche uvaʼ titzʼeʼv quBʼaal JesuKriisto inpaqte. 6Tul qootzaqle uvaʼ, aʼ vikamebʼal quBʼaal JesuKriisto vatz kurus qat oleʼv tiʼ tel iqʼij u kantxhaqla txumbʼal uvaʼ nikich qubʼan s-jatxhaq tzaan. Echetz qat tel iqʼije inqʼa tatxhaʼv u qutxhiʼoʼl, tul jit vet aʼ laʼ palan tetze s-qukʼatza. Atz jit vet aʼ inqʼa tatxhaʼv u qutxhiʼoʼl laʼ bʼekʼon oʼ tiʼ ibʼanax inqʼa paʼv. 7Tan ech kuxh nik qubʼan vet, eche vaʼq kamnaʼq uvaʼ yeʼ laʼ utxh vet ibʼekʼex tiʼ ibʼanax u paʼv taʼn inqʼa atxhaʼv, tan yeʼl vet atxhaʼv nik inatxheʼ. Echetz laʼ qubʼane tiʼ yeʼ qaqʼt qibʼ bʼekʼloq taʼn inqʼa paʼv, tan aʼ u quBʼaal JesuKriisto qat chiton oʼ tiʼ yeʼ qubʼant vet u paʼv.

8Tiʼetz uvaʼ vaʼl qat qeleʼl t-inqʼa paʼv tiʼ vikamebʼal quBʼaal JesuKriisto, tul kʼuqloqetz vet qukʼuul uvaʼ laʼ itzʼeʼv oʼ inpaqte, tul bʼenxh atinoq oʼ s-kʼatza. 9Kʼuxhetz maʼtich ikam vet u quBʼaal JesuKriisto, tan itzʼeʼv inpaqte. Tul qootzaqle uvaʼ tuchʼ u titzʼeʼv inpaqte, tul yeʼl vet tokebʼal u kamchil s-tiʼ. Tul yeʼletz vet inpaqt laʼ kam u quBʼaal JesuKriisto. 10Tan tuulbʼaletz uvaʼs maʼtich ikam vet u quBʼaal JesuKriisto, tul tzitzi itanatxh vet tetxhbʼul ikuʼ t-paʼv. Pet tiʼetz vet uvaʼ itzʼeʼv quBʼaal JesuKriisto inpaqte, tul aʼ vet quBʼaal Tiuxh nik toksal iqʼij s-tiʼ.

11Echatetz uvaʼe ebʼane, tul yeʼl tokebʼal u paʼv uvaʼ, aʼ laʼ bʼekʼon tel ex, eche vaʼq kamnaʼq uvaʼ yaʼtel koq laʼ ibʼekʼex taʼn u paʼv. Pet itzʼloq ex tiʼ toksal iqʼij u quBʼaal Tiuxh, tiʼ uvaʼ vaʼl vet eyol tuchʼ u quBʼaal JesuKriisto. 12Pet echetz s-eche, yeʼ ekuyeʼ uvaʼ, aʼ u paʼv laʼ bʼanbʼen vetxhiʼoʼl uvaʼ at ikamebʼal. Atz yeʼ ekuyeʼ uvaʼ, aʼ inqʼa kantxhaqla tatxhaʼv vetxhiʼoʼl laʼ bʼekʼon ex. 13Tul yeʼ etaqʼ inqʼa etxhiʼoʼl ibʼanbʼe u paʼv. Yeʼ etaqʼ bʼanbʼeloq tiʼ ibʼanax inqʼa yaabʼla txumbʼal, eche laʼ ibʼanbʼel joloq kam tiʼ u kantxhaq. Pet aʼ ebʼan uvaʼ, aʼ etaqʼvat etibʼ te quBʼaal Tiuxh. Tul ech ebʼan vet tiʼ etaqʼt etibʼ te quBʼaal Tiuxh, eche laʼ ibʼan vaʼq xaol uvaʼ kamnaʼql veteʼ, tul laʼ itzʼeʼv inpaqte. Echetz aʼ laʼ etaqʼvat vet kaqaayil vetxhiʼoʼl ibʼanbʼe inqʼa jikla txhaq txumbʼal. 14Echetz yeʼ laʼ ekuyt vet toleʼve inqʼa paʼv tiʼ ebʼekʼexeʼ. Pet oq ant tel kuxh nik ebʼan inqʼa bʼekʼbʼal, tul antetz tel toleʼve inqʼa paʼv tiʼ ebʼekʼexeʼ. Pet aʼetz vet ebʼane uvaʼ kuyvaq uvaʼ, aʼ vet u quBʼaal Tiuxh laʼ bʼekʼon ex, tul laʼ ilotxh ex tuchʼ vibʼaʼnil tiʼ etanbʼat ibʼanax inqʼa paʼv.

Uvaʼs talt Paʼp uvaʼ, aʼ laʼ ikʼayivat tibʼ inqʼa niman tetz Jesuus tiʼ ibʼanax u jik

15¿Kametz vet toq qaleʼ bʼa? ¿Maq aʼ toq qale uvaʼ aʼl tel toq qupaʼvineʼ? Atz ¿maq laʼ paʼvin tel oʼ tiʼ uvaʼ jit vet aʼ inqʼa bʼekʼbʼal toq qunima, tan aʼ vet vibʼaʼnil quBʼaal Tiuxh at s-qiibʼa tiʼ ikuyux inqʼa qupaʼv? ¡Yeʼle! ¡Yeʼ laʼ isaʼa laʼ qubʼan tel u paʼv! 16Tan oq aʼ tel kuxh u paʼv laʼ qubʼana, tul echetz vet qok tiqʼabʼ u paʼv, eche vaʼq xaol uvaʼ tira kʼayimal vet tibʼ te invaʼq bʼaal aqʼon tiʼ inimaleʼ. Yeʼetz kol nik ibʼen sete uvaʼ echat kuxh bʼanele taʼn vekʼayit etibʼ tiʼ ebʼekʼex taʼn u paʼv, atz maq vekʼayit etibʼ tiʼ inimal quBʼaal Tiuxh tiʼ ibʼanax u jik. Tan oq aʼ laʼ ekʼayivat etibʼ tu paʼv, tul aʼetz vet u kamchil kʼaqel etaʼn vatz quBʼaal Tiuxh. Pet oq aʼ laʼ ekʼayivat etibʼ tiʼ inimal u quBʼaal Tiuxh, tul aʼetz vet vibʼanax u jike kʼaqel etaʼn.

17Pet taʼntiuxh te quBʼaal Tiuxh uvaʼ yeʼl vet ex kʼayimal ok etibʼ tiʼ ibʼanax u paʼv, eche uvaʼ s-jatxhaq tzaan. Pet tuchʼxh vet etaanima qat enima kam inqʼa txhusbʼal uvaʼ qat txhusux sete, atz qat bʼekʼex ex tiʼ inimaleʼ. 18Tan chitel vet ex t-inqʼa paʼv. Tul aʼ qat ekʼayivat vet ok etibʼ tiʼ ibʼanax u jik.

19Jankʼale inqʼa yol uvaʼ qat val sete, tan aʼ qat viqʼo tzaan u qatin vatz txʼavaʼ tiʼ vikʼayit tibʼ vaʼq xaol te invaʼq bʼaal aqʼon. Tan ant kuxh vetetz iqʼomal etaʼn, pet jit aʼ viyolbʼal quBʼaal Tiuxh nik etabʼi s-bʼaʼn.

Pet ech bʼanelich taʼn vetatin s-jatxhaq tzaan uvaʼs yeʼnaqich etootzaqit quBʼaal Tiuxh s-eche: Tan aʼ nikich etaqʼvat vetxhiʼoʼl bʼekʼloq tiʼ ibʼanax inqʼa txoqebʼal kʼuulla txumbʼal, tul aʼl tel kuxh nikich iyakʼin u yaabʼla txumbʼal sekʼatza.

Pet s-txheel, aʼetz etaqʼvat vet etibʼ bʼekʼloq tiʼ ibʼanax inqʼa jikla txumbʼal uvaʼ txhaqtan ejetxhon ok kʼatz quBʼaal Tiuxh taʼn. 20Tan tuulbʼal uvaʼs kʼayimalich ok etibʼ tiʼ ibʼanax u paʼv, tul yeʼlich tokebʼal u jikla txumbʼal tiʼ ebʼekʼexeʼ. 21Poro yeʼxhkametz vaʼq ibʼaʼnil u paʼv qat taqʼ sete. Pet taʼn kuxh u kamchil vatz quBʼaal Tiuxh qat taqʼ sete. Aʼetz vet u paʼve uvaʼ nik echʼixv vet s-te s-txheel. 22Pet qatetz chitpiy vet el ex tiqʼabʼ inqʼa paʼv uvaʼ kʼayimich ok etibʼ s-tiʼ, tul aʼ qat etaltziivat vet etibʼ tiʼ inimal u quBʼaal Tiuxh. Tan sibʼ vet ibʼaʼnil qat taqʼ sete, tiʼ uvaʼ jetxhel vet ok etibʼ kʼatz quBʼaal Tiuxh qat ebʼana, atz, tiʼ uvaʼ, aʼ kʼaqel vet etaʼn u qʼij saq uvaʼ yeʼl iyaʼebʼal imotxebʼal. 23Tan oq aʼ u paʼv laʼ bʼanaxi, tul kamchil bʼen taqʼ vatz quBʼaal Tiuxh. Pet vibʼaʼnil u quBʼaal Tiuxh uvaʼ nik toya, tan qʼij saq uvaʼ yeʼl iyaʼebʼal imotxebʼal bʼen taqʼ tiʼ inimal u quBʼaal JesuKriisto.

Currently Selected:

Romaanos 6: ixlC

Highlight

Copy