Romaanos 4

Uvaʼs itxhusun Paʼp, tiʼ uvaʼ, aʼ vikʼuqbʼat Avraʼaam ikʼuul tiʼ quBʼaal Tiuxh, tul jitich vet aj paʼvom vatz quBʼaal Tiuxh

1Toqetz qabʼi, atz toq qileʼ kame uvaʼ ibʼan Avraʼaam u kʼuy qumam, tiʼ uvaʼ jitich vet aj paʼvom vatz quBʼaal Tiuxh. 2Tan tiʼ koq vaʼq vibʼanoʼm Avraʼaam, tul jitich koq vet aj paʼvom vatz quBʼaal Tiuxh, bʼantan laʼichetz utxh taqʼt bʼen tibʼ Avraʼaam s-nim vatz inqʼa xaol tiʼ vibʼanoʼm. Pet jitich tiʼ vaʼq vibʼanoʼm Avraʼaam, tul tal quBʼaal Tiuxh uvaʼ jitich vet aj paʼvom Avraʼaam. Echetz yeʼlich laʼ isaʼ toksat Avraʼaam iqʼij vatz quBʼaal Tiuxh. 3Tan ech nik tal viyolbʼal quBʼaal Tiuxh uvaʼ tzʼibʼamal ka s-eche:

—Ikʼuqbʼa Avraʼaam ikʼuul

tiʼ quBʼaal Tiuxh,

tul aʼ uvaʼe, toksa quBʼaal

Tiuxh s-tuul

tiʼ uvaʼ jitich vet aj paʼvom

Avraʼaam

vatz quBʼaal Tiuxh,

—chich u yol.#Jeenesis 15.6

4Echetz bʼanel taʼn s-eche: Tan jaʼl u xaol uvaʼ aqʼon laʼ ibʼana, tul yeʼletz u txhojbʼal tetz laʼ alax s-oya. Pet txʼoq vet u txhojbʼal tetz laʼ alaxi. Jitetz ech uvaʼe ibʼan Avraʼaam. Tan jit aqʼon koq ibʼan tiʼ ikʼulux vibʼaʼnil quBʼaal Tiuxh. 5Pet echetz koqe, tan jaʼl u xaol uvaʼ yeʼ laʼ aqʼonvi, tul laʼ aqʼax vaʼq oya s-te, tul yeʼletz laʼ utxh taltaʼ uvaʼ, aʼ qat txʼakon tuchʼ taqʼonveʼ uvaʼ qat oyal s-te. Aʼetz nik elkaʼpun tiʼ u aj paʼvom uvaʼ nik iqejeʼ uvaʼ, aʼ u quBʼaal Tiuxh nik kuyun vipaʼv. Aʼetz u xaole uvaʼ jit vet aj paʼvom vatz quBʼaal Tiuxh laʼ ibʼana tiʼ viqejtaʼ.

6Tul echatxh tal Daviide. Tan jaʼl u xaol uvaʼ oy kuxh qat ikuyvat quBʼaal Tiuxh vipaʼv, tul nik ichiibʼ tiʼ quBʼaal Tiuxh. Tul jit, tiʼ uvaʼ, aʼ qat txʼakon vikuyux taʼn quBʼaal Tiuxh tiʼ invaʼq ibʼanoʼm. 7Tan ech tal Daviid s-eche:

—At ibʼaʼnil quBʼaal Tiuxh

kʼatz inqʼa xaol,

inqʼa kuyel vet inqʼa ipaʼv

taʼn quBʼaal Tiuxh,

atz inqʼa yeʼl vet vipaʼv

laʼ tulsa quBʼaal Tiuxh s-kʼuul.

8Atz at vibʼaʼnil quBʼaal Tiuxh

kʼatz u xaol, uvaʼ yeʼl vet inqʼa ipaʼv

qat toksa quBʼaal Tiuxh s-tuul,

—chich u yol.#Saalmo 32.1-2

9Echetz jit kuxh taʼn inqʼa tij imam Israeel, inqʼa qolel el inbʼeeq te vitxhiʼoʼl, at vibʼaʼnil quBʼaal Tiuxh s-kʼatza, tiʼ uvaʼ jit vet aj paʼvom vatz quBʼaal Tiuxh. Pet ant inqʼa jit tij imam Israeel, at vibʼaʼnil quBʼaal Tiuxh s-kʼatza, kʼuxh yeʼ qolel el inbʼeeq te vitxhiʼoʼl. Tan qat qootzaqilaʼ uvaʼ tiʼ vikʼuqbʼat Avraʼaam ikʼuul tiʼ quBʼaal Tiuxh, tul bʼen vet s-jit aj paʼvom vatz quBʼaal Tiuxh.

10Poro ¿kametz tuul, tul jitich vet aj paʼvom Avraʼaam vatz quBʼaal Tiuxh nik enatxheʼ? ¿Maq aʼ uvaʼs, maʼtich iqolox el inbʼeeq te vitxhiʼoʼl Avraʼaam? Pet ¿maq aʼ uvaʼs, yeʼxnaqiche? Aʼetz uvaʼs, yeʼxnaqich qolel el inbʼiil te vitxhiʼoʼl Avraʼaam, tul jitich vet aj paʼvom Avraʼaam vatz quBʼaal Tiuxh. 11Tan aʼ bʼaxich ikʼuqbʼat Avraʼaam ikʼuul tiʼ quBʼaal Tiuxh, tiʼ uvaʼ jit vet aj paʼvom Avraʼaam laʼich ibʼan vatz quBʼaal Tiuxh uvaʼs yeʼnaqich qolel el inbʼiil te vitxhiʼoʼl. Xamtichetz vet tal quBʼaal Tiuxh te Avraʼaam viqolteʼl inbʼiil te vitxhiʼoʼl. Tan aʼ vet viqolpeʼl inbʼiil te vitxhiʼoʼl Avraʼaam bʼen s-tetxhlal tiʼ toksat quBʼaal Tiuxh s-tuul vikʼuqbʼat Avraʼaam ikʼuul tiʼ quBʼaal Tiuxh.

Aʼetz nik elkaʼp veteʼ uvaʼ, aʼ vet Avraʼaam iqʼon bʼey vatz jolt inqʼa xaol, tiʼ uvaʼ tan, ikʼuqbʼa Avraʼaam ikʼuul tiʼ quBʼaal Tiuxh tiʼ ikuyux inqʼa ipaʼv. Tul echetz vete bʼaala tatin Avraʼaam vatz inqʼa laʼ motx kʼuqbʼan ikʼuul tiʼ quBʼaal Tiuxh. Echetz jaʼl vet u xaol laʼ kʼuqbʼan ikʼuul tiʼ quBʼaal Tiuxh, tiʼ uvaʼ jit vet aj paʼvom laʼ ibʼan vatz quBʼaal Tiuxh, tul aʼetz nik okk vet bʼene tiʼ vitxumbʼal Avraʼaam. Tul aʼetz vet inqʼa xaole uvaʼ laʼ kʼulun u kuybʼal tiʼ inqʼa ipaʼv, tul kʼuxh yeʼ qolel el bʼeeq te vitxhiʼoʼl. 12Tul iqʼon bʼeyat Avraʼaam vatz inqʼa xaol, inqʼa qolel el inbʼeeq te vitxhiʼoʼl, atz inqʼa nik kʼuqbʼan ikʼuul tiʼ quBʼaal Tiuxh, tiʼ uvaʼ jit vet aj paʼvom laʼ ibʼan s-vatz. Tan aʼ nik tilvat inqʼa xaol tetz kʼatz Avraʼaam, eche invaʼq u xaol uvaʼ antxh nik kuʼk toq t-tatibʼal toq vaʼq u iqʼon ibʼey s-vatz. Tan kʼuqlichxh vet ikʼuul Avraʼaam tiʼ quBʼaal Tiuxh kʼuxh yeʼnaqich qolel el inbʼeeq te vitxhiʼoʼl.

Uvaʼs talt Paʼp tiʼ vikʼuqbʼat Avraʼaam ikʼuul tiʼ quBʼaal Tiuxh, tul taltzii quBʼaal Tiuxh val u mam bʼaʼnil uvaʼ jit vet aj paʼvom Avraʼaam laʼ ibʼana

13Tul atetz vaʼte. Tan tal quBʼaal Tiuxh taqʼax val u mam bʼaʼnil te Avraʼaam tuchʼ jankʼal inqʼa tij imam, aʼe, uvaʼ laʼ tetza Avraʼaam u vatz txʼavaʼ. Pet jit, tiʼ uvaʼ inima koq Avraʼaam inqʼa bʼekʼbʼal. Pet tiʼ vikʼuqbʼat Avraʼaam ikʼuul tiʼ inimat inqʼa iyol u quBʼaal Tiuxh, echetz s-tiʼile toksa vet quBʼaal Tiuxh s-tuul uvaʼ jit vet aj paʼvom laʼ ibʼan s-vatz. 14Pet jit aʼ inqʼa laʼich niman inqʼa bʼekʼbʼal laʼich kʼulun u mam bʼaʼnil. Tan eche uvaʼ aʼich koq inqʼae laʼich kʼulun u mam bʼaʼnil, tul yeʼxhkametz itxaʼke vikʼuqbʼat inqʼa xaol ikʼuul tiʼ viyol quBʼaal Tiuxh uvaʼ tal te Avraʼaam. 15Tan mam yol sevatz vinimal inqʼa bʼekʼbʼal. Pet toq val sete uvaʼ laʼ taqʼ quBʼaal Tiuxh vikʼaʼnal tiibʼa inqʼa xaol, inqʼa yeʼ laʼ motx niman inqʼa bʼekʼbʼal s-kaqaayil. Pet taʼn kuxh uvaʼ oq yeʼl bʼekʼbʼal vatz inqʼa xaol laʼ alaxi, tul bʼantan echetze yeʼl vet paʼv nik ibʼan vatz quBʼaal Tiuxh nik inatxheʼ.

16Echetz nik valte sete uvaʼ tiʼ u kʼuqlebʼ kʼuul tiʼ quBʼaal Tiuxh, tul taltziivat taqʼax u mam bʼaʼnil, tiʼ uvaʼ jit vet aj paʼvom inqʼa xaol vatz quBʼaal Tiuxh laʼ ibʼana. Aleletz vet ka taʼn quBʼaal Tiuxh uvaʼ, tetxhalxh laʼ taqʼ u mam bʼaʼnil te jankʼal inqʼa tij imam Avraʼaam. Tul oy kuxh laʼ taqʼvat. Tul jitetz kuxh taʼn vet tanul xaol laʼ kʼulun u mam bʼaʼnil, inqʼa nimamal inqʼa bʼekʼbʼal taʼn, pet tzum vet laʼ motx ikʼult inqʼa xaol u mam bʼaʼnil tuchʼ inqʼa nik kʼuqbʼan ikʼuul tiʼ quBʼaal Tiuxh kʼuxh jit tij imam Avraʼaam. Tan antxh vet nik motx ibʼan, eche uvaʼ ibʼan Avraʼaam. Tan eela kuxh vet nik motx ikʼuqbʼataq ikʼuul tiʼ quBʼaal Tiuxh, eche vikʼuqbʼat Avraʼaam ikʼuul tiʼ quBʼaal Tiuxh. Tul echetz vet tatin Avraʼaam, eche vaʼq bʼaala s-quvatz s-qukaqaayil.#Luk 1.54-55; 19.9 17Tul ech uvaʼ tzʼibʼamal ka t-viyolbʼal quBʼaal Tiuxh s-eche:

—Toq vaqʼ bʼen axh sibʼaal

mamala vatzul tenam,

inqʼa yaʼn toq txheoq vatz u txʼavaʼ,

—xeʼt quBʼaal Tiuxh te Avraʼaam.#Jeenesis 17.5

Tul ikʼuqbʼa Avraʼaam ikʼuul tiʼ quBʼaal Tiuxh, uvaʼ nik aqʼon qʼij isaq inqʼa kamnaʼq, atz u quBʼaal Tiuxh, uvaʼ tuchʼ kuxh talt viyol, tul nik iviiqixsa inqʼa kam uvaʼ kʼuxh yeʼxhkam ati poro at vet s-vatz.{*}#4.17 Nik tal u versiikulo uvaʼa, uvaʼ: —Toq vaqʼ bʼen axh sibʼaal mamala vatzul tenam, —chiche. Aʼ nik elkaʼpun uvaʼ, aʼ Avraʼaam laʼ iqʼon bʼey vatz mamala xaol tiʼ ikʼuqbʼat ikʼuul tiʼ quBʼaal Tiuxh tiʼ ibʼen s-bʼaʼn vatz quBʼaal Tiuxh. Kʼuxhetz tij imam Israeel, atz kʼuxh jit tij imam Israeel, tan tiʼ vet vikʼuqbʼat ikʼuul tiʼ quBʼaal Tiuxh, tul motx bʼen vet s-bʼaʼn vatz quBʼaal Tiuxh. Pet jit uvaʼ Avraʼaam koqxh vet kʼaolan inqʼa xaol s-kaqaayil nik taleʼ. Nikat tal u versiikulo uvaʼa, uvaʼ: —Nik aqʼon qʼij isaq inqʼa kamnaʼq, —chiche. Aʼ nik tiqʼo tzaan Paʼp tuul viyol, u toksat Avraʼaam vikʼaol vatz quBʼaal Tiuxh, aʼe Isaak. Tul ech laʼich toksat, eche vaʼq oya uvaʼ laʼ tzʼeʼsal ok vatz Tiuxh, ech uvaʼe nik tal tu Jeenesis 22.9-18. Tan vatz Avraʼaam, tan kamnaʼqich vet Isaak, vikʼaol. Pet tiʼ vikʼuqbʼat Avraʼaam ikʼuul tiʼ quBʼaal Tiuxh, tul yeʼl Isaak kami. Tan maʼtich iqejt vet Avraʼaam uvaʼ kamnaʼqich vet vikʼaol. Pet quBʼaal Tiuxh yeʼ kuyun vet ikam Isaak, tan itzʼeʼv paqte. Xaʼtetze vatz Avraʼaam, aʼ quBʼaal Tiuxh itzʼeʼvsan vet Isaak inpaqte. Atz nikat tal u versiikulo uvaʼa, uvaʼ iqej Avraʼaam u quBʼaal Tiuxh uvaʼ nik alon uvaʼ —...kʼuxh yeʼxhkam ati, poro at vet s-vatz, —chiche. Aʼetz nik tiqʼo tzaan Paʼp viqejt Avraʼaam viyol quBʼaal Tiuxh uvaʼ: —Toq vaqʼ bʼen axh sibʼaal mamala vatzul tenam, —xeʼt quBʼaal Tiuxh, kʼuxh yeʼl Avraʼaam nikich initxaʼineʼ. Tan aʼ uvaʼe, nik tal tu Jeenesis 15.18.

18Iqejetz Avraʼaam viyol quBʼaal Tiuxh, tul itxʼebʼ Avraʼaam telaʼpun kam viyol quBʼaal Tiuxh uvaʼ tal s-te tiʼ itxhej ikʼaol, kʼuxh nikich til veteʼ uvaʼ yeʼlich laʼ utxh itxhej vet initxaʼa. Echetz tiʼ vitxʼebʼt Avraʼaam, tul tetxhal bʼen Avraʼaam sibʼaal mamala vatzul tenam. Tul antxhtuʼ. Tan ex elaʼpunoq kam uvaʼ tal quBʼaal Tiuxh s-te. Tan ech tal quBʼaal Tiuxh s-te s-eche:

—Tul yeʼl s-atxhel inqʼa avij amam laʼ ibʼana,

—xeʼt quBʼaal Tiuxh te Avraʼaam.#Jeenesis 15.5

19Poro tira yeʼ itanbʼa Avraʼaam ikʼuqeʼv ikʼuul tiʼ quBʼaal Tiuxh, kʼuxh nikich ibʼen te Avraʼaam uvaʼ yeʼlich vet iyakʼil vitxhiʼoʼl. Tan kamal oʼ kʼalalich (100) vet iyaʼbʼ Avraʼaam. Atz kʼuxh Saara, tan yeʼlich laʼ utxh vet tilt invaʼq al. Tan yeʼlatich vet iyakʼil vitxhiʼoʼl. 20Tul jitoq ibʼan Avraʼaam kaʼl ikʼuul tiʼ iqeex kam u yol uvaʼ tal quBʼaal Tiuxh s-te tiʼ itxhej vaʼl ikʼaol. Pet aʼl inuqtxakbʼat Avraʼaam u kʼuqlebʼal ikʼuul tiʼ quBʼaal Tiuxh. Tul toksa Avraʼaam iqʼij quBʼaal Tiuxh. 21Tan tira txhabʼamich vet ikʼuqeʼv ikʼuul Avraʼaam tiʼ quBʼaal Tiuxh, tiʼ uvaʼ yeʼxhkam invaʼq tzaʼl ibʼanax vatz quBʼaal Tiuxh tiʼ inimal kam uvaʼ laʼ tala. 22Echetz aʼ u kʼuqlebʼal ikʼuul Avraʼaam, tiʼ uvaʼ: —Toksa quBʼaal Tiuxh s-tuul, tul jitich vet aj paʼvom Avraʼaam vatz quBʼaal Tiuxh.—#Jeenesis 15.6

23Eche inqʼa yol inqʼaa: —Aʼ toksa quBʼaal Tiuxh s-tuul vikʼuqbʼat Avraʼaam ikʼuul, —chiche, jitetz tiʼ kuxh Avraʼaame tzʼibʼamal ka inqʼa yol. 24Pet antxh s-qiʼe tzʼibʼamal ka inqʼa yol. Tan aʼat u qukʼuqbʼat qukʼuul tiʼ quBʼaal Tiuxh, laʼ toksa quBʼaal Tiuxh s-tuul, tiʼ uvaʼ jit vet oʼ aj paʼvom s-vatz laʼ ibʼana. Tan nikat quqejeʼ uvaʼ quBʼaal Tiuxh itzʼeʼvsan Jesuus, u quBʼaal, kʼuxh maʼtich ikam veteʼ. 25Tan tiʼ itxhoox inqʼa qupaʼv, tul ikuyvat quBʼaal Tiuxh toksal u quBʼaal JesuKriisto tiqʼabʼ inqʼa xaol tiʼ iyatzʼax el. Tul tiʼ uvaʼ jit vet oʼ aj paʼvom vatz quBʼaal Tiuxh laʼ ibʼana. Tul titzʼeʼvsa quBʼaal Tiuxh u quBʼaal Kriisto, kʼuxh maʼtich ikam veteʼ.#Isaiias 53.4-5

Currently Selected:

Romaanos 4: ixlC

Highlight

Copy