Romaanos 3

Uvaʼs talt Paʼp uvaʼ kʼuqlebʼxh kʼuul u quBʼaal Tiuxh tiʼ taqʼt jaʼp u yol tiibʼa u aj paʼvom, jaʼlxhtuʼ, kʼuxh tij imam Israeel, atz kʼuxh jit tij imam Israeel

1Kamaletz at ex nik ebʼan kaʼl ekʼuul tiʼ inqʼa yol uvaʼ nik valeʼ. Tul ech nik etal vet s-eche: —Oqetz ech bʼanel taʼn inqʼa yole, tul yeʼxhkametzebʼ itxaʼk kʼuxh oʼxh tij imam Israeel, atz yeʼxhkametzebʼ atoʼk s-tuul kʼuxh qolel vet el inbʼeeq te u qutxhiʼoʼl, —kamal chich juunoq ex.

2Pet jitetz eche, tan sibʼe u qutxakunbʼal tiʼ kam kuxh s-tiʼilil, oʼ inqʼa tij imam Israeel. Tan aʼ u qutxakunbʼal s-bʼaxa, aʼe, uvaʼ taqʼ ka quBʼaal Tiuxh viyol xoʼl inqʼa kʼuy qumam tiʼ inimal viyol.

3Jololetz inqʼa kʼuy qumam yeʼ motx inima viyol uvaʼ tal vatz quBʼaal Tiuxh uvaʼs laʼ motx inima inqʼa bʼekʼbʼal. Ape kʼuxhetz jitxh kʼuqlebʼal kʼuul motx ibʼan vatz quBʼaal Tiuxh, pet ant kuxh kʼuqlebʼal kʼuul u quBʼaal Tiuxh toq ibʼan tiʼ inimat viyol uvaʼ alel taʼn, tiʼ taqʼt u bʼaʼnil s-qe, oʼ inqʼa tij imam Israeel, eche uvaʼ tal ka s-naʼya.

4Tan yeʼxhkam s-tiʼil laʼ iyaʼsavat quBʼaal Tiuxh inimal viyol uvaʼ alel taʼn, kʼuxh palsanxh yol inqʼa kʼuy qumam motx ibʼana. Tan inuqulxh iyolon quBʼaal Tiuxh. Pet ech koq jolol inqʼa tij imam Israeel, tan tzʼeqolaq tzij kuxhtuʼ. Tan ech val u yol tzʼibʼamal ka t-viyolbʼal quBʼaal Tiuxh s-eche:

—Tan laʼ bʼen te inqʼa xaol

uvaʼ jikxh vayoloneʼ.

Tul aʼ, axh laʼ oleʼv axh

kʼuxh laʼ aqʼax kuʼ yol tinuqul seʼe

taʼn inqʼa xaol,

inqʼa nik alon uvaʼ jit inuqul vayol,

—chich u yol.#Saalmo 51.4

5Tan tiʼ u qupalsan yol, oʼ inqʼa tij imam Israeel, tul tira nik ikʼutxheʼ uvaʼ jikxhte uvaʼ nik ibʼan quBʼaal Tiuxh tiʼ qukʼaxbʼisaleʼ. Tul yeʼ laʼ utxhi laʼ qala uvaʼ: —Kantxhaq vitxumbʼal quBʼaal Tiuxh nik ibʼan tiʼ ikʼutxht vikʼaʼnal, atz tiʼ qukʼaxbʼisaleʼ, kʼuxh oʼxh tij imam Israeel, —chaq koq oʼ. (Tul yiqxh sulaʼ xaol kuxh in, uvaʼ nik alon u yol uvaʼa.)

6Atz yeʼ laʼ utxh qaltaʼ uvaʼ yeʼl tokebʼal quBʼaal Tiuxh tiʼ ikʼaxbʼisal inqʼa tij imam Israeel. Tan oq yeʼl tokebʼal quBʼaal Tiuxh tiʼ qukʼaxbʼisaleʼ, tul yeʼlatetz tokebʼal quBʼaal Tiuxhe tiʼ taqʼt kuʼ yol tinuqul tiibʼa inqʼa xaol s-kaqaayil vatz txʼavaʼ.

7Kamaletz at juunoq ex ech nik etal s-eche: —Ape oqetz aʼ vet u tzʼeqo tzij nik inbʼaneʼ nik kʼutxhun uvaʼ inuqul quBʼaal Tiuxh tiʼ kam inqʼa nik ibʼaneʼ, tul aʼetzebʼ talaxe uvaʼ tiʼ u qupaʼvineʼ nik oksalik iqʼij quBʼaal Tiuxh. Ape keʼchetz laʼ taqʼt jaʼp quBʼaal Tiuxh yol bʼa s-qiibʼa tiʼ u qupaʼvineʼ. 8Pet aʼl tel qubʼant inqʼa yeʼbʼaʼn bʼa, echetz laʼ tul tel inqʼa bʼaʼnile s-qiibʼa, —kamal chich joloq ex.

Echetz kuxh nik itxhejsat jolol inqʼa xaol yole s-qiʼ, tiʼ talaxeʼ uvaʼ tira echxh uvaʼ nik qutxhuse. Poro tira ikʼulelxh inqʼa xaol inqʼae, uvaʼ laʼ aqʼax jaʼp u yol s-tiibʼa taʼn quBʼaal Tiuxh tiʼ itzʼeqt tzij s-qiʼ.#2 Luʼ 3.16

Uvaʼs talt Paʼp uvaʼ yeʼxhal invaʼq jik vatz quBʼaal Tiuxh

9¿Kametz vet quyol s-tiʼ, nik enatxheʼ? ¿Maq ech toq qal s-eche?: —Aʼ, oʼ inqʼa tij imam Israeel atoʼk quqʼij taʼn quBʼaal Tiuxh viʼ inqʼa jit tij imam Israeel, —maq toq qaleʼ. Yeʼle. Yeʼ laʼ utxhi ech laʼ qale. Tan qat vall sete uvaʼ kʼuxh tij imam Israeel, atz kʼuxh jit tij imam Israeel, tan vaʼl kuxh motx taqʼax jaʼp yol s-qiibʼa s-qukaqaayil tiʼ u qupaʼv. 10Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—Yeʼxhabʼil vaʼq jik vatz quBʼaal Tiuxh,

kʼuxh vaʼtoʼq kuxhtuʼ.

11Atz yeʼxhabʼil invaʼq nik ibʼen s-te

kam itxumbʼal laʼ ibʼan vatz quBʼaal Tiuxh.

Atz yeʼxhabʼil invaʼq nik bʼanon yaʼl

tiʼ tootzaqil quBʼaal Tiuxh.

12Pet vaʼlxh qat motx tel inqʼa xaol t-bʼey

vatz quBʼaal Tiuxh;

tul tira qat motx tzʼeqx titzʼabʼal.

Tul yeʼxhabʼil vet nik bʼanon u bʼaʼn;

kʼuxh vaʼtoʼq kuxhtuʼ.#Saalmo 14.1-3; 53.1-3

13Tan ech teluʼl u yol titziʼ inqʼa xaol,

eche teluʼl ixeval invaʼq kamnaʼq t-jul.

Tan nik motx teesa imol t-bʼey

tuchʼ vitzʼeqon tzij.#Saalmo 5.9

Tul eche itxhoʼn ichij itziʼ kan ikʼaxbʼisan

tuchʼ viyolon te vimol.#Saalmo 140.3

14Atz mamala kuxh yoqʼoʼm

nik teluʼl titziʼ inqʼa xaol,

atz mamala kuxh kʼayunchil at titziʼ.#Saalmo 10.7

15Tul nal kuxh nik motx iqʼex inqʼa xaol

tiʼ itxhokox txumbʼal tiʼ ixajsal ikaqal imol.

16Taletz uvaʼ nik motx palka,

tan mam txumlebʼal,

atz mam kantxhaq nik motx taqʼ ka.

17Tul tira yeʼ nik motx itxhabʼa tok bʼen,

tiʼ uvaʼ laʼ motx atin tibʼaʼnil tuchʼaq imol.#Isaiias 59.7-8

18Tul yeʼl inbʼeeq nik motx ixoʼv

tiʼ ibʼanax u yeʼbʼaʼn vatz quBʼaal Tiuxh,

—chich inqʼa yol.#Saalmo 36.1

19Tul qootzaq setuchʼ jankʼal uvaʼ nik ibʼekʼ ka inqʼa ibʼekʼbʼal quBʼaal Tiuxh, tan aʼ, oʼ inqʼa tij imam Israeel nik ibʼekʼ oʼ, oʼ inqʼa atoʼk oʼ jaqʼ inqʼa bʼekʼbʼal.#Eeksodo 24.3-8 Aloq jitetz kuxh vet taʼn oʼ inqʼa tij imam Israeel, pet at tokebʼal inqʼa bʼekʼbʼal tiʼ jankʼal inqʼa xaol s-kaqaayil. Echetz yeʼxhabʼil invaʼq laʼ oleʼv tiʼ talax yol tiʼ ikolt tibʼ vatz inqʼa ipaʼv. Pet laʼ kuxh itxʼaqmii vet taqʼax jaʼp u yol s-tiibʼa tiʼ inqʼa ipaʼv taʼn quBʼaal Tiuxh. 20Echetz yeʼxhal laʼ bʼen s-bʼaʼn vatz quBʼaal Tiuxh tiʼ vinimal inqʼa bʼekʼbʼal. Pet aʼl tiʼ qootzaqit inqʼa bʼekʼbʼal nik ibʼen s-qe uvaʼ, oʼ aj paʼvom vatz quBʼaal Tiuxh.#Saalmo 143.2; Gaalatas 2.16

Uvaʼs talt Paʼp uvaʼ taʼn kuxh vikʼuqbʼat inqʼa xaol ikʼuul tiʼ quBʼaal Jesuus, tul jit vet aj paʼvom laʼ ibʼan vatz quBʼaal Tiuxh

21Pet s-txheel, tan quBʼaal Tiuxh qat aqʼon qootzaqi vaʼt txumbʼal uvaʼ jit vet oʼ aj paʼvom vatz quBʼaal Tiuxh laʼ ibʼana. Tan jit vet tiʼ inimal inqʼa bʼekʼbʼal laʼ kuypik inqʼa qupaʼv. Tan ech uvaʼe nik tal inqʼa yol, inqʼa motx itzʼibʼa ka Moisees, atz uvaʼ motx itzʼibʼa ka inqʼa qʼexsan tetz viyol quBʼaal Tiuxh. 22Aʼetz u txumbʼal uvaʼ jit vet oʼ aj paʼvom vatz quBʼaal Tiuxh, aʼe, uvaʼ laʼ qukʼuqbʼa qukʼuul tiʼ quBʼaal JesuKriisto tiʼ vitxhojt inqʼa qupaʼv. Tan aʼ u quBʼaal Tiuxh qat jeqbʼan uvaʼ laʼ qeex u quBʼaal JesuKriisto taʼn inqʼa xaol. Echetz yeʼl nim, atz yeʼl txhʼoj vatz u quBʼaal Tiuxh tiʼ ibʼen inqʼa xaol s-jik.#Gaalatas 2.16{*}#3.22 Gaalatas 2.16. Aʼ nikich titzʼa inqʼa tij imam Israeel uvaʼ yek laʼich motx bʼen t-amlikaʼ kʼatz quBʼaal Tiuxh uvaʼs laʼich motx ikameʼ, tiʼ uvaʼ tan, tijaq imam Israeel s-vatz. Tan aʼ nikich motx taleʼ uvaʼ nikich motx inima inqʼa bʼekʼbʼal uvaʼ itzʼibʼa ka Moisees. Kʼuxhetz nikich motx inima s-kaqaayil, atz kʼuxh yeʼxh jankʼal nikich motx inima, poro nimamal vet jankʼal inqʼa bʼekʼbʼal taʼn nikich motx inatxheʼ. Bʼantan nikich ilotxh quBʼaal Tiuxh inqʼa tij imam Israeel, tetxhal topoon tu qʼij uvaʼs tul quBʼaal Jesuus vatz u txʼavaʼ. Poro tiʼetz u tulebʼal quBʼaal Jesuus, tul aʼ kʼaqel vet taʼn uvaʼ jankʼal inqʼa xaol at vet tokebʼal vatz quBʼaal Tiuxh, kʼuxh tij imam Israeel, atz kʼuxh jit tij imam Israeel. 23Tan jankʼal inqʼa xaol, tan vaʼl kuxh motx ipaʼvin s-kaqaayil. Tul tira yeʼ motx itxʼol topoon tiʼ tiqʼol viyolbʼal quBʼaal Tiuxh s-bʼaʼn, eche uvaʼ itzʼamich s-tiʼ taʼn quBʼaal Tiuxh. 24Pet tuchʼ kuxh vet vibʼaʼnil quBʼaal Tiuxh, tul qat bʼen vet inqʼa xaol s-jit aj paʼvom vatz quBʼaal Tiuxh. Pet jit kam invaʼq qat ibʼan inqʼa xaol tiʼ itxʼakaxeʼ. Pet aʼ u quBʼaal JesuKriisto qat txhoon teleʼl inqʼa xaol t-inqʼa kʼaxkʼo uvaʼ aqʼax jaʼp s-tiibʼa taʼn quBʼaal Tiuxh.{*}#3.24 Eche u yol ‹vibʼaʼnil quBʼaal Tiuxh,› nik tal tzitza, tan aʼetz u yole u ‹gracia› nik tal tu kastiiya. Tul ech nik elkaʼp u yole uvaʼ nik tal tu versiikulo uvaʼa. Aʼ nik tal u kuybʼal nik taqʼ quBʼaal Tiuxh te inqʼa xaol tiʼ vipaʼv, inqʼa nik qeon quBʼaal Jesuus. 25Tan aʼ u quBʼaal Tiuxh aqʼon tzaan u quBʼaal Jesuus tiʼ taqʼt tibʼ kamoq s-vaʼq oya uvaʼ laʼ yatzʼax ok vatz quBʼaal Tiuxh tiʼ itxhoox inqʼa ipaʼv inqʼa xaol, eche taqʼt tibʼ invaʼq u karneʼl uvaʼ nik itzʼeʼsal ok s-oya vatz quBʼaal Tiuxh. Echetz taʼn kuxh vet u quqejtaʼ uvaʼ kam u quBʼaal Jesuus, tul el vikaqal, tul jit vet oʼ aj paʼvom vatz quBʼaal Tiuxh laʼ ibʼana. Echetz qat ikʼutxhte u quBʼaal Tiuxh uvaʼ, tetxhal peqʼxeʼl u kaq tiʼ itxhoox inqʼa paʼv. Pet eche inqʼa pay ka tuulbʼal viqʼiil inimal inqʼa bʼekʼbʼal, tan nikich kuxh ikuy ipal paʼl vipaʼvin inqʼa xaol. Tan nikich kuxh ikotxʼ ivatz te inqʼa xaol. 26Echetz qat ibʼane u quBʼaal Tiuxh t-inqʼa qʼij s-txheel. Tan aʼ isaʼ laʼ ikʼutxhuxeʼ uvaʼ inuqulxh uvaʼ nik ibʼaneʼ. Echetz s-tiʼileʼ tinuqulxh laʼ ikuyvat quBʼaal Tiuxh ipaʼv, jal u xaol uvaʼ laʼ ikʼuqbʼa ikʼuul tiʼ quBʼaal Jesuus, tul jit vet aj paʼvom s-vatz laʼ ibʼana.

27Tul jit tiʼ inimal inqʼa bʼekʼbʼal, tul jit vet aj paʼvom inqʼa xaol vatz quBʼaal Tiuxh laʼ ibʼana. Echetz s-tiʼile yeʼ laʼ utxh talt inqʼa tij imam Israeel uvaʼ, tiʼ inimal inqʼa bʼekʼbʼal, tul jit vet aj paʼvom vatz quBʼaal Tiuxh. Tan ¿jabʼiste bʼekʼbʼal s-te inima, tul jit vet aj paʼvom vatz quBʼaal Tiuxh? Tan jit tiʼ inimal inqʼa bʼekʼbʼal tuchʼ inqʼa bʼanoʼm. Pet tiʼ vaʼt u bʼekʼbʼal uvaʼ qat ijeqbʼa ka quBʼaal Tiuxh tiʼ ikʼuqbʼat inqʼa xaol ikʼuul tiʼ u quBʼaal Jesuus. 28Echetz aʼ qoksa t-quviʼ qukʼuqbʼat qukʼuul tiʼ u quBʼaal Jesuus, tul jit vet oʼ aj paʼvom vatz quBʼaal Tiuxh laʼ ibʼana. Pet jit, tiʼ uvaʼ laʼ qubʼan inqʼa qejoʼm uvaʼ nik tal u bʼekʼbʼal. 29Echetz taʼn koq kuxh inqʼa tij imam Israeel laʼ alon u quBʼaal Tiuxh sitiuxh. Tul yeʼ koq laʼ utxh talt inqʼa jit tij imam Israeel. Pet laʼ utxhi laʼ tal inqʼa jit tij imam Israeel u quBʼaal Tiuxh sitiuxh. 30Tan vaʼl kuxh u quBʼaal Tiuxh s-qiibʼa. Tan jit vet aj paʼvom inqʼa tij imam Israeel laʼ ibʼan vatz quBʼaal Tiuxh, inqʼa qolel vet el inbʼiil te vitxhiʼoʼl, inqʼa laʼ qeon u quBʼaal Jesuus. Tul jitat vet aj paʼvom inqʼa jit tij imam Israeel laʼ ibʼan vatz quBʼaal Tiuxh, inqʼa laʼ qeon u quBʼaal Jesuus.

31Kamaletz at juunoq ex, inqʼa tij imam Israeel, uvaʼ ech nik etal s-eche: —Tiʼetzebʼ vet u quqejt u quBʼaal Jesuus, tul yeʼxhkametzebʼ vet itxaʼk u bʼekʼbʼal, —kamal chich ex. Yeʼletza. Pet tiʼ uvaʼ nik quqej u quBʼaal Jesuus, tul tzitzi nik qukʼutxhvat uvaʼ at iyakʼil inqʼa bʼekʼbʼal.

Currently Selected:

Romaanos 3: ixlC

Highlight

Copy