Apokaliipsis 7

Uvaʼs tok tetxhlal oʼkʼalal tuchʼ kajvaʼl toxkʼal mil (144,000) inqʼa taqʼonvil quBʼaal Tiuxh

1Maʼtichetz vabʼit vet inqʼa yol, atz vilt inqʼae, tul vil vet kajvaʼl inqʼa aanxel uvaʼ txaklich t-junun ixojbʼal u txʼavaʼ. Tul nikich imaq inqʼa aanxel u kaqiqʼ t-junun ixojbʼal u txʼavaʼ, tul yeʼ laʼ ul u kaqiqʼ tiibʼa u txʼavaʼ tiʼ iyansaleʼ; atz yeʼlich laʼ ul tiibʼa u maar, atz tiibʼa inqʼa tzeʼ. 2Yaʼne vil tel tzaan vaʼt u aanxel tu tzaebʼ qʼij. Tul iqʼomich viseeyo quBʼaal Tiuxh taʼn, u quBʼaal Tiuxh uvaʼ nik aqʼon qʼij qusaq. Tul jankʼalxh tiʼ iqul u aanxel sichʼin tiʼ talax yol te kajvaʼl inqʼa aanxel, inqʼa txaklich t-junun ixojbʼal u txʼavaʼ, inqʼa maʼtich taqʼax tiqleʼm tiʼ ikʼaxbʼisal inqʼa xaol vatz txʼavaʼ, atz tiʼ iyansal kam uvaʼ nik ibʼan u maar. 3Tul ech tal u aanxel te kajvaʼl inqʼa aanxel s-eche: —Yeʼ laʼ etaqʼ u kaqiqʼ tiibʼa txʼavaʼ tiʼ iyansaleʼ. Atz yeʼ laʼ etaqʼ u kaqiqʼ tiibʼa u maar tiʼ iyansaleʼ. Atz yeʼ laʼ etaqʼ u kaqiqʼ tiibʼa inqʼa tzeʼ tiʼ iyansaleʼ. Pet toq nal qoksa tetxhlal inqʼa xaol tipala, inqʼa taqʼonvil quBʼaal Tiuxh. Yaʼnetze laʼ etaqʼ vet u kaqiqʼ, —xeʼt u aanxel.

4Yaʼne vabʼi talax tatxhul inqʼa ok tetxhlal uvaʼ ech tal s-eche:

—Oʼkʼalal tuchʼ kajvaʼl toxkʼal mil (144,000) inqʼa qat ok tetxhlal, inqʼa chʼexex el xoʼl ixaʼnil inqʼa tij imam kabʼlaval inqʼa ikʼaol Israeel.

5Kabʼlaval mil (12,000) qat chʼexex el xoʼl ixaʼnil tanul tijaq imam Judaa qat ok tetxhlal taʼn u aanxel.

Kabʼlaval mil (12,000) qat chʼexex el xoʼl ixaʼnil tanul tijaq imam Ruveen qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Gaad qat ok tetxhlal.

6Kabʼlaval mil (12,000) qat chʼexex el xoʼl ixaʼnil tanul tijaq imam Aseer qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Neftalii qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Manasees qat ok tetxhlal.

7Kabʼlaval mil (12,000) qat chʼexex el xoʼl ixaʼnil tanul tijaq imam Simeoon qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Levii qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Isakaar qat ok tetxhlal.

8Kabʼlaval mil (12,000) qat chʼexex el xoʼl ixaʼnil tanul tijaq imam Savuloon qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Xhuʼl qat ok tetxhlal.

Kabʼlaval mil (12,000) qat chʼexex el xoʼl ixaʼnil tanul tijaq imam Venjamiin qat ok tetxhlal, —xeʼt vabʼit tutxh u yol.

Uvaʼs tilt Xhun toksal iqʼij quBʼaal Tiuxh taʼn mam tenam, atz taʼn inqʼa aanxel

9Maʼtichetz vabʼit vet inqʼa yol inqʼae, tul mam tenam vila uvaʼ yeʼxhabʼil invaʼq laʼich oleʼv tiʼ tatxhaxeʼ. Aʼ tzajnaʼqich t-jankʼal inqʼa mam tenam vatz u txʼavaʼ; atz jankʼal inqʼa kamaqich kuxh ixaʼnilil; atz jankʼal inqʼa kamaq kuxh xaolil; atz jankʼal inqʼa kamaqich kuxh iyolbʼal. Tul aʼaq atich vatz quBʼaal Tiuxh uvaʼ kʼuqlich t-vikʼuqeʼvbʼal tetz iqleʼm. Atz aʼ atich vatz JesuKriisto, uvaʼ ech tilix, eche chelem karneʼl. Tul saqaqichxh toksaʼm inqʼa tenam atich ok. Tul ataqich ok xaq paalma tiqʼabʼ. 10Tul vaʼlxh nikich motx taqʼt jaʼ tiʼ iqul tiʼ isichʼineʼ. Tul ech nikich motx tal s-eche:

—¡Taʼn kuxh u quBʼaal Tiuxh qat eesan tzaan oʼ vatz u kʼaxbʼichil vatz u txʼavaʼ, u quBʼaal Tiuxh uvaʼ kʼuqlel t-vikʼuqeʼvbʼal tetz iqleʼm! Tul ¡taʼnat kuxh JesuKriisto, uvaʼ ech tilix, eche chelem karneʼl, qat eesan tzaan oʼ! —chichichaq isichʼineʼ.

11Tul jankʼalxh inqʼa aanxel txakunyich tiʼeʼl vinaq kajvaʼl inqʼa iqʼon iviʼ, atz tiʼeʼl kajvaʼl inqʼa itzʼlich viinqixsaʼm. Tul sutimich tiʼ vikʼuqeʼvbʼal tetz iqleʼm quBʼaal Tiuxh taʼn. Tul motxaq iqajbʼa vet tibʼ tiʼ inatxhkʼuulal Tiuxh, tetxhal ikoʼpaq ivatz t-txʼavaʼ vatz quBʼaal Tiuxh uvaʼ kʼuqlich t-vikʼuqeʼvbʼal tetz iqleʼm.

12Tul echaq motx tal vet s-eche:

—Echxhte. Tan taʼn kuxh u quBʼaal Tiuxh laʼ natxhkʼuulali. Taʼn kuxh quBʼaal Tiuxh laʼ oksal iqʼij. Taʼn kuxh quBʼaal Tiuxh sibʼ tootzaqibʼal tiibʼa jankʼal s-kaqaayil. Taʼn kuxh quBʼaal Tiuxh laʼ aqʼax taʼntiuxh s-te. Taʼn kuxh quBʼaal Tiuxh laʼ aqʼax bʼen s-nim. Taʼn kuxh quBʼaal Tiuxh at tiqleʼm tiibʼa jankʼal s-kaqaayil. Taʼn kuxh quBʼaal Tiuxh sibʼ iyakʼil tiibʼa jankʼal s-kaqaayil s-txheel, atz tinjattant inqʼa yaʼbʼ uvaʼ bʼenaʼl kuxh ibʼen toq tuleʼ. Tul echxh laʼ ibʼane, —chichichaqe.

13Yaʼne yolon vaʼl u iqʼon iviʼ. Tul ech tal s-ve s-eche: —¿Nik kol ibʼen see jaʼbʼilaqetze inqʼa saqaqxh toksaʼm atoʼk? Tul ¿ootzaq kol talaq tzajnaʼqle? —xeʼt s-ve.

14Tul ech val s-te s-eche: —Inqʼesal, yeʼ vootzaqle. Antebʼxh axh ootzaqin tetz, —xeʼt in s-te.

Tul ech tal vet s-ve s-eche: —Aʼetz inqʼa xaole, inqʼa eesal tzaan vatz u mam kʼaxkʼo vatz u txʼavaʼ. Atz antxh inqʼa xaole uvaʼ txʼael vet taanxelal vatz quBʼaal Tiuxh, eche itxʼax oksaʼm. Tul tira yeʼxhkam vet vaʼtoʼq tzʼilla paʼv tu taanxelal taʼn vikamebʼal JesuKriisto, uvaʼ ech tilix, eche chelem karneʼl. Echetz tira saq vet u taanxelal, eche vaʼq oksaʼm uvaʼ tira yeʼl tzʼil s-tiʼ.

15Echetz s-tiʼile ilaqe at vatz u quBʼaal Tiuxh uvaʼ kʼuqlel t-vikʼuqeʼvbʼal tetz iqleʼm. Tul qʼiil aqʼbʼal nik inatxhkʼuulal Tiuxh taʼn tu tostiuxh. Tul aʼ vet quBʼaal Tiuxh, uvaʼ kʼuqlel t-vikʼuqeʼvbʼal tetz iqleʼm, laʼ kutxun tuchʼ vibʼaʼnil. 16Echetz yeʼl inpaqt laʼ til vaʼy. Atz yeʼlat inpaqt laʼ kam t-tzaqatziʼil. Atz jitoq laʼ tzʼeʼsal taʼn qʼij. Atz jitoq laʼ tzʼaʼbʼ taʼn. 17Tul xeemalaq vet taʼn JesuKriisto laʼ ibʼana, uvaʼ ech tilix, eche chelem karneʼl. Ech laʼ ibʼan JesuKriisto tiʼ ixeeleʼ, atz tiʼ taqʼax qʼij isaq, eche vaʼq xeen karneʼl uvaʼ nik tiqʼo inqʼa ikarneʼl ukʼoq aʼ tu titzʼebʼal xaomla aʼ. Tul aʼ JesuKriistoe uvaʼ at kʼatz u kʼuqeʼvbʼal tetz iqleʼm tal uvaʼ kʼuqlel quBʼaal Tiuxh. Tul tira yeʼl vet itxumuʼm laʼ ibʼan taʼn quBʼaal Tiuxh, eche nik isujteʼl u txutxa taʼl ivatz vineʼ uvaʼ nik toqʼeʼ, —xeʼte.

Currently Selected:

Apokaliipsis 7: ixlC

Highlight

Copy

Compare