Apokaliipsis 6

Uvaʼs tilt Xhun teesal el inqʼa lakʼubʼ tetz u uʼ

1Yaʼne vil teesat JesuKriisto, uvaʼ ech tilix, eche chelem karneʼl, vaʼl u lakʼubʼ tetz u uʼ. Eletz kuxh vet u lakʼubʼ tetz u uʼ, tul vabʼi vet iyolon vaʼl u itzʼlich viinqixsaʼm, uvaʼ echxhte toqʼ raaya ibʼana. Tul ech tal s-eche: —Avuleʼ. Tul saqi, —xeʼt s-ve.

2Insaqietz veteʼ, tul vil tul val u saqiʼ chej. Tul atich jaʼ val u vinaq s-tiʼ. Tul atich ok val u aarko tiqʼabʼ u vinaq tetz bʼanbʼal txhʼaʼo. Tul aqʼax vet jaʼ vaʼl ikoroona tiviʼ taʼn quBʼaal Tiuxh, tiʼ uvaʼ mam iqʼesal. Tul tira kʼaqich tibʼ u vinaq tiʼ teesal iqʼij jaʼl uvaʼ laʼich xeʼt s-kʼatza.

3Taʼnetz kuxh teesa JesuKriisto, uvaʼ ech tilix, eche invaʼq chelem karneʼl, vikaʼv lakʼubʼ tetz u uʼ, tul vabʼi vet iyolon vikaʼv itzʼlich viinqixsaʼm. Tul ech tal s-eche: —Avuleʼ. Tul saqi, —xeʼt s-ve.

4Tul vil tul vaʼt u kaqiʼ chej. Tul atich jaʼ val u vinaq s-tiʼ. Tul aqʼax vet val u nimla espaada te u vinaq taʼn quBʼaal Tiuxh. Tul aqʼax vet tiqleʼm u vinaq tiʼ teesal vet el u bʼaʼnil uvaʼ atich xoʼl inqʼa xaol s-vatzaq tzitza vatz u txʼavaʼ. Tul laʼich iyatzʼaq vet tibʼ s-vatzaq.

5Taʼnetz kuxh teesa JesuKriisto, uvaʼ ech tilix, eche chelem karneʼl, vitoxv lakʼubʼ tetz u uʼ, tul vabʼi vet iyolon vitoxv itzʼlich viinqixsaʼm. Tul ech tal s-eche: —Avuleʼ. Tul saqi, —xeʼt s-ve.

Insaqietz veteʼ, tul vil tul val u qʼeqiʼ chej. Tul atich jaʼ val u vinaq s-tiʼ. Tul atich ok val u peexhu tiqʼabʼ u vinaq. 6Tul vabʼi iyolon eluʼl val u qul xoʼl kajvaʼl inqʼa itzʼlich viinqixsaʼm. Tul ech tal te u vinaq uvaʼ atich jaʼ tiʼ chej s-eche: —Kaʼvaʼl kuxh vet liivra triigo laʼ aaqʼ tiʼ txhojbʼal tetz invaʼl iqʼij u aqʼonvil laʼ ibʼana. Atzoq vajqil kuxh liivra sevaada laʼ aaqʼ tiʼ txhojbʼal tetz invaʼl iqʼij u aqʼonvil laʼ ibʼana. Pet u aseeite tuchʼ u qʼuʼich taʼl uuva, tan txakloq kuxh s-eche, —xeʼt u qul.

7Taʼnetz kuxh teesa JesuKriisto, uvaʼ echiche invaʼq chelem karneʼl, vikajv lakʼubʼ tetz u uʼ, tul vabʼi vet iyolon vikajv itzʼlich viinqixsaʼm. Tul ech tal s-eche: —Avuleʼ. Tul saqi, —xeʼt s-ve.

8Insaqietz veteʼ, tul vil tul val u qʼaniʼ chej. Tul atich jaʼ val u vinaq s-tiʼ. Tul aʼich ibʼij u vinaq ‹Yatzʼonal.› Tul txhʼuyichat tzaan vaʼt vinaq s-tiʼ, uvaʼ aʼich ibʼij ‹Tatibʼal taanxelal kamnaʼq.› Tul aqʼax tiqleʼm kaʼvaʼl inqʼa vinaq inqʼae tiʼ iyatzʼax vikajv tanul inqʼa xaol vatz u txʼavaʼ. Tul laʼich iyatzʼeʼl inqʼa xaol tuchʼ espaada tuchʼ vaʼy tuchʼ yaabʼil tuchʼ txhiʼomla txoo.

9Taʼnetz kuxh teesa JesuKriisto, uvaʼ ech tilix, eche invaʼq chelem karneʼl, vitoʼv lakʼubʼ tetz u uʼ, tul vil vet inqʼa taanxelal inqʼa xaol xeʼ toq u natxhkʼuulabʼ tetz Tiuxh, inqʼa xaol, inqʼa yatzʼich motx tel tiʼ inimal viyolbʼal quBʼaal Tiuxh, atz tiʼ ipaxsaleʼ. 10Tul jankʼalxh tiʼ iqul nikich motx isichʼineʼ. Tul ech nikich motx tal s-eche: —¡Kam s-tiʼil nik kuxh iyaʼ savatz, quBʼaal! Tul ¡yeʼx aaqʼeʼt kuʼ u yol tinuqul; atz yeʼx aaqʼeʼt ichʼexel tiibʼa inqʼa xaol, inqʼa motx yatzʼon el oʼ vatz u txʼavaʼ! Tan taʼn axhe, uvaʼ yeʼl invaʼq apaʼv; atz taʼn axhe vinuqul, —chichich inqʼa taanxelal inqʼa xaol. 11Tul motx aqʼax vet toksaʼm uvaʼ oqxh isaqale. Tul alax s-te uvaʼ laʼich txʼebʼon tele, tan tzʼeq nalich opoon tatxhul viyatzʼax el inqʼa imol s-niman tetz Jesuus, atz viyatzʼax el inqʼa imol s-aqʼonvil tiʼ inimal viyolbʼal quBʼaal Tiuxh. Yaʼne laʼich taqʼ kuʼ quBʼaal Tiuxh inqʼa yol tinuqul.

12Yaʼne insaqi vet teesat JesuKriisto vivaqaq lakʼubʼ tetz u uʼ. Eletz kuxh vet vivaqaq lakʼubʼ tetz u uʼ, tul ajtxh vabʼi ipal val u mam kabʼnaano. Tul yekich qʼeqbʼ ivatz u qʼij, eche iqʼeqal invaʼq bʼuʼq tetz txumuʼm. Atz kʼuxh u ichʼ, tan yekich kaqaxun vet ikaʼyeʼ, eche ikaqal xaol. 13Atz tira motx elbʼen inqʼa txʼumil vatz amlikaʼ. Tul motx koʼp vatz txʼavaʼ, eche itilp ivatz inviʼoq tzeʼ uvaʼ laʼ tiʼnsal taʼn invaʼq mam kaqiqʼ. 14Atz kʼuxh u vatz amlikaʼ, tan tira elat vet el, eche ibʼalqʼul tzʼuʼm uvaʼ tzʼibʼamal yol s-tuul. Tul jankʼal inqʼa vitz tiʼneʼl tu tatibʼal. Tul echat kuxh ibʼane inqʼa txʼavaʼ uvaʼ at okaʼp tuul u maar.

15Tul jankʼalxh vet inqʼa xaol, inqʼa palsan yol vatz u txʼavaʼ, motx imuqaq vet tibʼ tuulaq jul, atz tuulaq sivan, atz t-inqʼa vitz. Motx imuq tibʼ inqʼa iqʼesal. Motx imuq tibʼ inqʼa sibʼaq tiqleʼm. Motx imuq tibʼ inqʼa txʼiol iqʼij. Motx imuq tibʼ jankʼal inqʼa iqʼesal sol. Motx imuq tibʼ inqʼa sibʼaq itial. Motx imuq tibʼ inqʼa sulaʼ xaol kuxhtuʼ. Atz kʼuxh inqʼa loqʼel tok tiʼ aqʼon, tan motx imuq tibʼ. Atz kʼuxh inqʼa jit loqʼel tok tiʼ aqʼon, tan motx imuq tibʼ. 16Tul echaq nikich motx tal te inqʼa vitz, atz te inqʼa sivan s-eche: —Eloq tzaan ex s-qiibʼa. Tul muqvaq oʼ vatz Tiuxh, uvaʼ kʼuqlel tu kʼuqeʼvbʼal tetz iqleʼm, atz vatz u kʼaxkʼo uvaʼ toq taqʼ JesuKriisto, uvaʼ ech tilix, eche chelem karneʼl. 17Tan opoony vet iqʼiil taqʼt u kʼaxkʼo s-qiibʼa. Tul yeʼxhabʼil vet invaʼq laʼ txʼolon tatin vatz u kʼaxkʼo, —chichichaq veteʼ.

Currently Selected:

Apokaliipsis 6: ixlC

Highlight

Copy

Compare