Apokaliipsis 21

Uvaʼs tilt Xhun tatin vet quBʼaal Tiuxh xoʼl inqʼa niman tetz

1Yaʼne vil vet vaʼt u akʼ amlikaʼ tuchʼ vaʼt u akʼ txʼavaʼ. Tan maʼtich isotz vet el u amlikaʼ uvaʼ iviinqixsa quBʼaal Tiuxh s-bʼaxa, tuchʼ u txʼavaʼ, atz tuchʼ u maar.#Isaiias 65.17; 66.2 2Yaʼne vil ikuʼl u akʼla tenam Jerusaleen tu amlikaʼ, uvaʼ quBʼaal Tiuxh txhaqon tzaan, u chʼexichla tenam. Tul tira josqʼilichxhtuʼ. Tan echichxh vet iviqix u akʼla tenam Jerusaleen, eche iviqix vaʼq ixvaak uvaʼ toqnaʼq tzʼalonoq vet tuchʼ itzumel.#Isaiias 52.1-2; 61.10

3Yaʼne vabʼi val u qul uvaʼ, aʼich ixhaakalil tel tzaan kʼatz u kʼuqeʼvbʼal tetz iqleʼm. Tul ech tal s-eche: —Il vet u tatibʼal quBʼaal Tiuxh koyaʼp xoʼl inqʼa xaol. Tul toq atinoq vet quBʼaal Tiuxh s-xoʼl. Tul itenam vet quBʼaal Tiuxh inqʼa xaol toq ibʼaneʼ. Tul taʼnxh vet quBʼaal Tiuxh, iTiuxh inqʼa xaol toq ibʼaneʼ.#Esekieel 37.27 4Tul tira yeʼl vet bʼeeq oqʼel tuchʼ txumuʼm toq ibʼan inqʼa xaol taʼn quBʼaal Tiuxh. Tul tira yeʼl vet taʼl ivatz laʼ motx eli. Tul yeʼl vet kamchil laʼ ibʼan s-xoʼl. Atz yeʼl vet txumuʼm. Atz yeʼxhkam vet vaʼq kʼaxbʼichil laʼ sichʼinsan. Atz yeʼl vet txhoʼm laʼ bʼanon. Tan qat pay vet ka jankʼal inqʼa itzaʼlal uvaʼ nikich motx palk tuulbʼal u qʼij isaq vatz txʼavaʼ, —xeʼt u qul uvaʼ vabʼi.#Isaiias 25.8; 65.19

5Yaʼne ech tal vet quBʼaal Tiuxh uvaʼ kʼuqlich t-vikʼuqeʼvbʼal tetz tiqleʼm s-eche: —In toq aqʼon bʼen inqʼa kam s-akʼ, —xeʼte.

Tul ech tal s-ve s-eche: —Tzʼibʼa inqʼa yol inqʼaa, tan kʼuqlebʼxh kʼuul uvaʼ toq utxhoq. Tul tinuqulxh toq elkaʼpun, —xeʼt s-ve. 6Tul ech tal inpaqt s-ve s-eche: —Qat inbʼaʼnixsal vet s-kaqaayil. Tan aʼ ine, vixeʼtebʼal jankʼal inqʼa kam. Tul aʼ ine, vitzoqpebʼal, eche u tzʼibʼ aalfa tuchʼ u tzʼibʼ omeega. Echetz jaʼl uvaʼ nik saʼon qʼij isaq yeʼl iyaʼebʼal imotxebʼal, tul uloq sinkʼatza, eche vaʼq xaol uvaʼ nik ikam tzaqa tziʼil. Tul in, laʼ aqʼon qʼij isaq uvaʼ jit txhoel laʼ ibʼana. Tan aʼ ine, vixeʼal u qʼij saq uvaʼ yeʼl iyaʼebʼal imotxebʼal, eche vaʼq titzʼebʼal aʼ uvaʼ nik aqʼon qʼij saq. 7Echetz jaʼl uvaʼ laʼ oleʼv tiʼ tel iqʼij inqʼa yeʼbʼaʼn, aʼetz uvaʼe, laʼ etzan inqʼa bʼaʼnil s-kaqaayil. Tul aʼ vet in iTiuxh laʼ ibʼana. Atz inkʼaol inmeʼal vet laʼ ibʼana. 8Pet inqʼa yeʼ nik tul sinkʼatza, tan een laʼ bʼen atink tuul u xamal uvaʼ, eche naʼbʼ tilixeʼ, uvaʼ qʼolomaanxh toybʼeʼ. Aʼe inqʼa nik ixoʼv tiʼ talt tibʼ s-niman tetz Jesuus; atz inqʼa yeʼ nik niman Jesuus; atz inqʼa nik bʼanon inqʼa kam uvaʼ txoqebʼal kʼuulla txumbʼal; atz inqʼa yatzʼol aanima; atz inqʼa nik motx iyansa tibʼ; atz inqʼa nik iqʼianeʼ; atz inqʼa nik natxhkʼuulan inqʼa bʼitichla tiuxh; atz jankʼalxh inqʼa tzʼeqolaq tzij. Aʼetz inqʼae, een bʼen atink tuul u xamal, uvaʼ eche naʼbʼ tilixeʼ, uvaʼ qʼolomaanxh toybʼeʼ. Aʼetz vet u kaʼv kamchile, —xeʼt quBʼaal Tiuxh uvaʼ kʼuqlich tu kʼuqeʼvbʼal tetz tiqleʼm.

Uvaʼs tilt Xhun u akʼla tenam Jerusaleen

9Yaʼne vil tul vaʼl u aanxel sinvatz. Antxh vaʼl uvaʼ xoʼl juqvaʼl inqʼa aanxel, inqʼa atich ok juunil koopa tiqʼabʼ uvaʼ nojnaʼqich kuʼ inqʼa kʼaxkʼo s-tuul uvaʼ itzoqpebʼalich veteʼ. Tul ech tal u aanxel s-ve s-eche: —¡Avuleʼ! Tul toq inkʼutxh inqʼa niman tetz Jesuus see, inqʼa toq atinoq s-bʼenamen tuchʼ JesuKriisto, uvaʼ ech tilix, eche chelem karneʼl. Tan ech toq tatin, eche vaʼq chelem ixvaak uvaʼ laʼ tzʼalon tuchʼ vaʼq chelem xaak, —xeʼt s-ve.

10Yaʼne ajtxh innatxh eenich vet in viʼ val u mamaʼ vitz taʼn viTiuxhil Tiuxh, val u vitz uvaʼ sibʼ atich jaʼ. Tul ikʼutxh vet u aanxel u loqʼola mam tenam Jerusaleen s-ve inpaqte uvaʼ aʼlich ikuul vet tu amlikaʼ, uvaʼ quBʼaal Tiuxh txhaqon tzaan. 11Tul litzʼkabʼinyichxh u mam tenam taʼn u tatin quBʼaal Tiuxh. Tul echichxh vilitzʼkabʼin u mam tenam, eche bʼaʼnla vatz sivan uvaʼ tira sibʼ ijaʼmil. Atz echichxh tilix, eche u sivan uvaʼ jaaspe. Atz echichxh tilix, eche txilkin saq, eche invaʼq kristaal. 12Tul sutimalich tiʼ u mam tenam taʼn val u mamaʼ tzʼach uvaʼ sibʼxh atich jaʼ. Tul kabʼlavalenich ijubʼalil u tzʼach. Tul junun jubʼal xeemich taʼn juunil aanxel. Tul tzʼibʼamich ok ibʼij txhaq junun tanul inqʼa tij imam inqʼa ikʼaol Israeel tiʼ junun jubʼal. 13Oxvaʼletz u jubʼal uvaʼ aʼl nikich isaqin bʼen tu tzaebʼ qʼij. Oxvaʼtetz u jubʼal aʼl nikich isaqin bʼen tu bʼenabʼ qʼij. Atz oxvaʼt u jubʼal aʼl nikich isaqin tuvaʼ aʼl ijaʼeʼ. Atz oxvaʼt u jubʼal aʼl nikich isaqin tuvaʼ aʼl ikuʼeʼ.#Esekieel 48.30-35

14Tul kabʼlavalenich sivan u tzaebʼ ixeʼ u tzʼach uvaʼ atich ok tiʼ u mam tenam. Tul tzʼibʼamich ok ibʼij txhaq juunil inqʼa apoostol tiʼ junun u sivan u tzaebʼ ixeʼ u tzʼach. Aʼe vibʼij junun inqʼa iapoostol JesuKriisto, uvaʼ ech tilix, eche chelem karneʼl.

15Atichetz ok val u aj tetz pajbʼal tiqʼabʼ u aanxel, uvaʼ sebʼtich iyolon s-ve. Tul eelaich ibʼanax u pajbʼal tuchʼ invaʼq aj. Tul ooroichxh u pajbʼal. Tan aʼ laʼich ipaj jankʼal ichʼij u mam tenam. Atz laʼich ipaj vijubʼalil. Atz laʼich ipaj u tzʼach uvaʼ sutimich ok tiʼ u mam tenam. 16Tul kajxojbʼalich ibʼanax u mam tenam. Tan eelaich kuxh u toq tuchʼ vivatz. Tan ipaj vet u aanxel u tenam tuchʼ u aj tetz pajbʼal. Tul kaʼvaʼl mil tuchʼ lajkʼalal (2,200) kiloometro ivatz ibʼana. Tul echatich kuxh u toq ibʼane. Tul echat kuxh uvaʼe atich jaʼ. 17Yaʼne ipaj vet u aanxel u tzʼach. Tul oʼvaʼl imutxʼ (65) meetro ipimal u tzʼach. Tul echatxh ipajt u aanxel u tzʼach, eche nik ipaon invaʼq xaol.

18Tul aʼ txakunsamalich tiʼ u tzʼach u bʼaʼnla sivan, u jaaspe, [uvaʼ txhaʼx ikaʼyeʼ]. Pet u mam tenam, tan ooroxh txakunsamich s-tiʼ. Tul echichxh itxilun, eche kristaal uvaʼ veqlelxh kam s-tuul. 19Tul bʼeeno xuʼmamich vixeʼtebʼal u tzʼach. Tul kabʼlavatzul bʼaʼnla sivan txakunsamich s-tiʼ. U bʼaxa sivan, u tzaebʼ ixeʼ u tzʼach, tan aʼich u bʼaʼnla sivan u jaaspe, [uvaʼ txilkin saq ikaʼyeʼ]. Tul vikaʼv s-txala, tan aʼich u bʼaʼnla sivan safiiro, [uvaʼ tiʼ xay ikaʼyeʼ]. Atz vitoxvaʼ s-txala, tan aʼich u bʼaʼnla sivan aagata, [uvaʼ txhaʼx ikaʼyeʼ]. Pet vikajv tzaebʼ ixeʼ, tikaʼpaqʼite, tan aʼich u bʼaʼnla sivan esmeraalda, [uvaʼ antichxh txhaʼx ikaʼyeʼ]. 20Atz vitoʼv s-txala, tan aʼich u bʼaʼnla sivan oonise, [uvaʼ saqso qʼeqmuk]. Atz vivaqaq s-txala, tan aʼich u bʼaʼnla sivan kornaliina, [uvaʼ kaqich ikaʼyeʼ]. Pet vijuqv tzaebʼ ixeʼ, titox paqʼite, tan aʼich u bʼaʼnla sivan krisoolito, [uvaʼ qʼanich ikaʼyeʼ]. Atz vivajxaq s-txala, tan aʼich u bʼaʼnla sivan veriilo, [uvaʼ txhaʼxich ikaʼyeʼ]. Atz vibʼelu s-txala, tan aʼich u bʼaʼnla sivan topaasio, [uvaʼ qʼanich ikaʼyeʼ]. Pet vilaav tzaebʼ ixeʼ, tikajv paqʼite, tan aʼich u bʼaʼnla sivan krisopraaso, [uvaʼ antichxh txhaʼx ikaʼyeʼ]. Atz vijunlaav s-txala, tan aʼich u bʼaʼnla sivan jasiinto, [uvaʼ tiʼ xayich ikaʼyeʼ]. Atz vikabʼlaav s-txala, tan aʼich u bʼaʼnla sivan amatiista, [uvaʼ moraado ikaʼyeʼ].

21Pet kabʼlaval inqʼa jubʼal, tan aʼ inqʼa bʼaʼnla txhaq saqso sivan, u peerla, txakunsamalich s-tiʼ. Tul mamala perla txakunsamich s-tiʼ. Echetz junun jubʼal peerlaichxhtuʼ. Pet u bʼey uvaʼ tu mam tenam, tan ooroxhtuʼ. Tul echichxh, eche vaʼq kristaal uvaʼ veqlelxh kam s-tuul.#Isaiias 54.11-12

22Tul yeʼl invaʼq tostiuxh vil tu mam tenam, tan aʼ vet u quBʼaal Tiuxh atin s-xoʼl uvaʼ yeʼxhkam vaʼq tzaʼl s-vatz, tuchʼ JesuKriisto, uvaʼ ech tilix, eche chelem karneʼl. 23Tul yeʼl vet qʼij, atz yeʼl vet ichʼ nikich isaʼon s-te tiʼ itxiquleʼ, tan aʼ vet vilitzʼkabʼin u tatin quBʼaal Tiuxh tuchʼ JesuKriisto, uvaʼ ech tilix, eche chelem karneʼl, nikich txiqun u mam tenam.#Isaiias 60.19 24Laʼetz atinaq vet jaqʼ vilitzʼkabʼin u tatin quBʼaal Tiuxh, jankʼal inqʼa mam tenam, inqʼa qat motx ikol tibʼ kʼatz quBʼaal Tiuxh. Atz laʼat motx tiqʼo tzaan jankʼal inqʼa iqʼesal oksabʼ qʼij tuchʼ jankʼal txʼijbʼal qʼij tu mam tenam tiʼ toksal iqʼij quBʼaal Tiuxh, atz tiʼ toksal iqʼij JesuKriisto. 25Tul yeʼl inpaqul laʼ juptxʼ inqʼa ijubʼalil u mam tenam jun kuʼebʼal qʼij, tan jitoq laʼ qʼeqx veteʼ. Pet qʼiil kuxh vet laʼ ibʼana. 26Atz jankʼalxh inqʼa txijbʼal iqʼij inqʼa tenam tuchʼ inqʼa nik toksal iqʼij s-tiʼ, tan aʼ uvaʼe, laʼ tiqʼo inqʼa xaol. Tul laʼ toksa vatz quBʼaal Tiuxh.#Isaiias 60.11

27Pet yeʼl invaʼq xaol uvaʼ bʼanol tetz paʼv laʼ paloʼk tu mam tenam. Atz yeʼl invaʼq bʼanol tetz txoqebʼal kʼuul laʼ paloʼk tu mam tenam. Atz yeʼl invaʼq tzʼeqol tzij laʼ paloʼk tu mam tenam. Pet taʼn kuxh laʼ motx paloʼk tu mam tenam kʼatz quBʼaal Tiuxh inqʼa xaol, inqʼa at qʼij isaq kʼatz quBʼaal Tiuxh, inqʼa tzʼibʼamal ibʼij tu uʼ tal uvaʼ tzʼibʼamal vibʼij inqʼa niman tetz JesuKriisto, uvaʼ ech tilix, eche chelem karneʼl.

Currently Selected:

Apokaliipsis 21: ixlC

Highlight

Copy

Compare