Apokaliipsis 20

Uvaʼs tilt Xhun ibʼant inqʼa niman tetz Jesuus iqʼesalil kʼatz u Kriisto tuulbʼal vaʼl mil (1,000) yaʼbʼ, tul ayaʼl yaʼbʼe qitzich kuxh Satanaas

1Yaʼne vil ikuʼl vaʼl u aanxel t-amlikaʼ. Tul iqʼomich vilaaveil vitziʼ u jul taʼn, u jul uvaʼ yeʼl iyaʼebʼal at bʼen. Tul iqʼomich val u mamaʼ kadeena tiqʼabʼ u aanxel. 2Yaʼne iqitz vet u aanxel u mamaʼ yaabʼla txoo, uvaʼ echiche oʼan. Aʼe uvaʼ diaavlo ibʼij, atz Satanaas paqte. Tul vaʼl mil (1,000) yaʼbʼ qitzich kuxh u yaabʼla txoo uvaʼe. Aʼe, uvaʼ taqʼ bʼen tibʼ s-kan uvaʼs ixeʼt tzaan u qʼij saq.#Jeenesis 3.1 3Yaʼne ilumi koʼp u aanxel u yaabʼla txoo tuul u jul uvaʼ yeʼl iyaʼebʼal at bʼen. Tul ijup vet ka u aanxel vitziʼ u jul. Tul toksa vet ka tetxhlal vitziʼ u jul. Echetz yeʼ teesat vet Satanaase inqʼa xaol t-bʼey. Tul vaʼl mil yaʼbʼ qitzix Satanaas. Tul xamteletz vet txhaqp Satanaas paqte tuulbʼal jolol qʼij.

4Tul vil jolol inqʼa kʼuqeʼvbʼal tetz iqleʼm. Tul vil ikʼuqeʼv jolol inqʼa xaol tu kʼuqeʼvbʼal, inqʼa atich tiqleʼm tiʼ taqʼax kuʼ yol tinuqul. Aʼetz inqʼae, motx kami. Tan tzokʼoxaq el iviʼ tiʼ ikʼutxhuxeʼ uvaʼs niman tetz Jesuus, atz tiʼ talax inuqul viyolbʼal quBʼaal Tiuxh. Aʼetz inqʼae, yeʼ motx natxhkʼuulan u qʼesal txooil maar. Atz yeʼ motx inatxhkʼuula vivatzibʼal. Atz aʼetz inqʼae, yeʼ motx kuyun tok tetxhlal u qʼesal txooil maar tipala, atz tiʼ iqʼabʼ. Pet itzʼeʼvaqetz vet inpaqte. Tul motx ibʼanaq vet iqʼesalil kʼatz u Kriisto tuulbʼal invaʼl mil (1,000) yaʼbʼ.#Danieel 7.9-10, 22 5Aʼetz u bʼaxa itzʼeʼvchile te inqʼa niman tetz Jesuus. Pet jolt inqʼa kamnaʼq, inqʼa yeʼ niman Jesuus, tan tzʼeq nalichetz vet invaʼl mil yaʼbʼ, yaʼne itzʼeʼvaq veteʼ. 6At vibʼaʼnil quBʼaal Tiuxh tiibʼa inqʼa niman tetz Jesuus, tan at qʼij isaq kʼatz quBʼaal Tiuxh. Tul yek laʼ motx itzʼeʼv tu bʼaxa itzʼeʼvchil. Echetz yeʼl vet tokebʼal u kamchil tiʼ ikʼaxbʼisaleʼ. Pet aʼetz vet inqʼae laʼ oksan iyol vatz quBʼaal Tiuxh, atz vatz u Kriisto. Echetz laʼ motx ibʼant iqʼesalile kʼatz u Kriisto tuulbʼal vaʼl mil yaʼbʼ.

7Laʼetz tzʼeq vet vaʼl mil yaʼbʼ, tul laʼ txhaqp vet jaʼul Satanaas tu jul tal uvaʼ qitzele. 8Tul laʼ xeʼt vet Satanaas tiʼ teesal inqʼa mam tenam t-bʼey tuulbʼal jankʼal vikaj xojbʼalil u vatz txʼavaʼ. Aʼetze u Goog tuchʼ u Magoog, inqʼa mam tenam uvaʼ tzʼibʼamal ka yol s-tiʼ.#Esekieel 38.1-16 Ayaʼletz inqʼae laʼ imol Satanaas tiʼ ibʼanax txhʼaʼo tuchʼ u Kriisto. Tul elom koq vet tiqʼot tibʼ inqʼa xaol laʼ ibʼana, atz yeʼl vet s-atxhel, eche tatin imusanil maar. 9Yaʼne vil vet itintotxh itzaj inqʼa mamala imol Satanaas. Tul tira txʼakich ivatz u txʼavaʼ taʼn. Tul motx isuti vet tiʼ u tatibʼal inqʼa niman tetz Jesuus, u mam tenam Jerusaleen, uvaʼ at taanima quBʼaal Tiuxh s-tiʼ.

Yaʼnetze taqʼ koʼp quBʼaal Tiuxh, uvaʼ tu amlikaʼ, val u mam xamal. Tul nal kuxh isotzeʼl inqʼa imol Satanaas vatz txʼavaʼ taʼn u mam xamal. 10Pet Satanaas, uvaʼ nikich eesan inqʼa xaol t-bʼey, tan lumimal vet ipal kuʼ tuul u xamal uvaʼ, eche naʼbʼ tilixeʼ, uvaʼ qʼolomaanxh toybʼeʼ. Antxhte u xamal uvaʼ atich vet koʼp u qʼesal txooil maar s-tuul tuchʼ vaʼt u qʼesal txooil txʼavaʼ, uvaʼ nikich tzʼeqon tzij tiʼ iqʼexsal inqʼa yol. Tul tzitzi toq motx kʼaxbʼisalik s-qʼiil s-aqʼbʼal uvaʼ yeʼl iyaʼebʼal imotxebʼal toq ibʼaneʼ.

Uvaʼs tilt Xhun taqʼax kuʼ yol tinuqul tiʼ inqʼa yeʼ niman Jesuus

11Yaʼne vil val u nimla vatz kʼuqeʼvbʼal tetz iqleʼm uvaʼ oqxhich isaqale, tetz mam iqʼesal. Tul vil u quBʼaal Tiuxh kʼuqlich s-tuul. Tul vila uvaʼ aqʼbʼil kuxh eleʼl u txʼavaʼ tuchʼ u amlikaʼ s-vatz. Tul tira yeʼxhtal atink veteʼ. 12Yaʼne vil inqʼa yeʼ niman Jesuus, inqʼa kamnaʼqich veteʼ, kʼuxh at tiqleʼm, atz kʼuxh yeʼl tiqleʼm; txaklichaq vet ok vatz quBʼaal Tiuxh uvaʼ kʼuqlich tu kʼuqeʼvbʼal tetz iqleʼm. Tul motx jaqp vet inqʼa uʼ, inqʼa tzʼibʼamich kam vibʼanoʼm inqʼa xaol s-tuul, inqʼa maʼtich ikameʼ. Atz jaqpat vaʼt u uʼ tal uvaʼ tzʼibʼamal vet ibʼij inqʼa xaol s-tuul uvaʼ at qʼij isaq kʼatz quBʼaal Tiuxh, inqʼa motx itzʼeʼv vet inpaqte, inqʼa maʼtich ikam vet tzitza vatz u txʼavaʼ. Tul taqʼ vet kuʼ quBʼaal Tiuxh yol tinuqul tiʼ kam vibʼanoʼm tzʼibʼamiche.

13Tul motx vil titzʼeʼv inqʼa kamnaʼq, inqʼa yeʼ niman quBʼaal Tiuxh, inqʼa talaq kuxh motx atin ka, kʼuxh tuul u maar atiche, atz kʼuxh talaq kuxh atibʼal uvaʼ yeʼ naʼl atiche, atz kʼuxh tu tatibʼal kamnaʼq. Ayaʼletz inqʼae motx taqʼ vet kuʼ quBʼaal Tiuxh yol tinuqul s-tiʼ, tiʼ kam inqʼa ibʼanoʼm. 14-15Echetz tilix vete jaʼl uvaʼ yeʼl ibʼij atich tuul u uʼ tetz qʼij saq vatz quBʼaal Tiuxh, tul lumimal ipal vet kuʼ tuul u xamal uvaʼ, eche naʼbʼ tilixeʼ. Aʼetz vet vikaʼv kamchile vatz quBʼaal Tiuxh.

Yaʼne el vet iqʼij u kamchil tuchʼ u tatibʼal kamnaʼq. Tan lumil vet bʼen tuul u xamal uvaʼ, eche naʼbʼ tilixeʼ.

Currently Selected:

Apokaliipsis 20: ixlC

Highlight

Copy

Compare