Apokaliipsis 19

Uvaʼs tabʼit Xhun inatxhkʼuulal Tiuxh tu amlikaʼ taʼn u mam tenam, inqʼa niman tetz

1Maʼtichetz vabʼit vet inqʼa yol inqʼae, tul jankʼalxh tiʼ iqul val u mam tenam nikich isichʼin tu amlikaʼ. Tul vabʼi uvaʼ ech nikich motx tal s-eche:

—¡Qoksavaq iqʼij quBʼaal Tiuxh!, tan aʼ u quBʼaal Tiuxhe qat eesan el oʼ t-inqʼa mam txumlebʼal. Echetz qoksavaq iqʼij quBʼaal Tiuxh. Tul qaqʼvaq bʼen s-nim, tan yeʼxhkam vaʼq tzaʼl ibʼanax s-vatz. 2Tul qoksavaq iqʼij quBʼaal Tiuxh, tan jikxh u quBʼaal Tiuxh. Atz aʼxh nik ibʼan vinuqul tiʼ taqʼax u kʼaxkʼo tiibʼa inqʼa ikʼulelxh laʼ aqʼax s-tiibʼa. Qatetz taqʼ quBʼaal Tiuxh u kʼaxkʼo tiibʼa u palsan yolla tenam Vaviloonia, tiʼ uvaʼ qat ibʼoqo jolt inqʼa tenam tuchʼ vikantxhaqla txumbʼal, eche nik ibʼokʼtziit vaʼq lampaqʼla ixoq vaʼq vinaq tiʼ teesat tibʼ t-bʼey s-tuchʼ. Qatatetz taqʼ quBʼaal Tiuxh ichʼexel s-tiibʼa, tiʼ uvaʼ qat motx xaon ikaqal inqʼa taqʼonvil quBʼaal Tiuxh taʼn, —xeʼt u mam tenam.#Deuteronoomio 32.43; Saalmo 28.4

3Yaʼne vabʼi viqul u mam tenam paqte. Tul ech tal s-eche:

—¡Qoksavaq iqʼij quBʼaal Tiuxh! —chichich u mam tenam.

Tan inuqulxhte uvaʼ nik ibʼan quBʼaal Tiuxh. Tan qat taqʼ kʼaxbʼichil tiibʼa inqʼa palsan yol, tinjattant inqʼa yaʼbʼ uvaʼ bʼenaʼl kuxh ibʼen toq tuleʼ. Aʼetz nik elkaʼpe visibʼel u kʼaxbʼichil uvaʼ nik taqʼ u quBʼaal Tiuxh s-tiibʼa.#Isaiias 34.10

4Tul motx qajeʼv vet vinaq kajvaʼl inqʼa iqʼon iviʼ tetxhal ikoʼpaq ivatz t-txʼavaʼ. Atz inatxhkʼuula vet Tiuxh uvaʼ kʼuqlel t-vikʼuqeʼvbʼal tetz iqleʼm. Tul echat kuxh ibʼan kajvaʼt inqʼa itzʼlich viinqixsaʼme. Tul echaq nikich motx tal s-eche:

—Antxhte uvaʼ nik etaleʼ. Qoksavaq iqʼij quBʼaal Tiuxh, —chichichaqe.

5Yaʼne vabʼi iyolon tzaan vaʼt u qul tal uvaʼ kʼuqlich quBʼaal Tiuxh. Tul ech tal s-eche:

—¡Natxhkʼuulavaq u quBʼaal Tiuxh, jankʼal ex, ex inqʼa taqʼonvil quBʼaal Tiuxh, atz ex inqʼa nik exoʼv tiʼ ibʼanax u paʼv s-vatz, atz kʼuxh ex, inqʼa at etiqleʼm, atz kuxh ex, inqʼa yeʼl etiqleʼm! —xeʼt u qul.

6Yaʼne vabʼi inqʼa qul uvaʼ, eche ivulun mam tenam, atz eche ivulun invaʼq mam aʼ, atz eche toqʼ raaya. Tul ech nikich tal s-eche:

—¡Qoksavaq iqʼij u quBʼaal Tiuxh! Tan aʼ u quBʼaal Tiuxh nik bʼanon iqʼesalil xoʼl inqʼa tenam s-kaqaayil, u quBʼaal Tiuxh uvaʼ yeʼxhkam invaʼq tzaʼl ibʼanax s-vatz.#Esekieel 1.24 7Tul ¡chiibʼoqvaq oʼ s-qukaqaayil! Atz ¡txuqʼtxunoq oʼ s-qukaqaayil! Atz ¡qoksavaq iqʼij u quBʼaal Tiuxh! Tan opoony vet viqʼiil uvaʼ toq atinoq vet JesuKriisto, uvaʼ ech tilix, eche chelem karneʼl, s-bʼenamen tuchʼ inqʼa niman tetz, inqʼa yeʼ qat motx kuyun ipaʼvin vatz quBʼaal Tiuxh, eche laʼ itzʼalon vaʼq chelem xaak tuchʼ vaʼq chelem ixvaak uvaʼ bʼeeno vet bʼanel tutxheʼ. 8Tan quBʼaal Tiuxh qat aqʼon te inqʼa niman tetz vibʼen s-bʼaʼn s-vatz, atz vijetxhteʼl tibʼ kʼatz paʼv. Tul kuyel vet vipaʼv qat ibʼana. Echetz qat taqʼax vet val u bʼaʼnla oksaʼme s-te uvaʼ bʼaʼnla liinoxhtuʼ, atz litzʼkabʼinyxhtuʼ, atz uvaʼ yeʼl tzʼil s-tiʼ, eche laʼ iviqix vaʼq ixvaak tuchʼ bʼaʼnla txhaq oksaʼm. Tiʼetz uvaʼ qat taqʼ bʼen quBʼaal Tiuxh inqʼa niman tetz s-bʼaʼn s-vatz, inqʼa jetxhel vet el tibʼ kʼatz paʼv, tul aʼetz nik ibʼan vet inqʼa bʼaʼnla bʼanoʼm, —xeʼt u qul.

Tan aʼ nik elkaʼpun u bʼaʼnla liino tiʼ inqʼa bʼaʼnla ibʼanoʼm inqʼa niman tetz Jesuus.

Uvaʼs tabʼit Xhun inqʼa yol tiʼ tutxh val u txʼix tiʼ val u tzʼaloʼm

9Yaʼne ech tal u aanxel s-ve s-eche: —Tzʼibʼa u yol uvaʼa: At vibʼaʼnil quBʼaal Tiuxh tiibʼa inqʼa xaol uvaʼ bʼekʼel vet tiʼ tatin s-bʼenamen tuchʼ JesuKriisto uvaʼ ech tilix, eche chelem karneʼl. Tan ech toq ibʼan, eche ibʼanax vaʼq txʼix s-kuʼebʼal qʼij tiʼ itzʼalon vaʼq chelem xaak tuchʼ vaʼq chelem ixvaak, —xeʼt u aanxel.

Yaʼne vabʼi iyolon u aanxel paqte. Tul ech tal s-ve s-eche: —Aʼetz viyol quBʼaal Tiuxhe uvaʼ inuqulxhtuʼ, —xeʼt u aanxel s-ve. 10Yaʼne qael inkuʼ vatz u aanxel, tetxhal ikoʼp invatz t-txʼavaʼ tiʼ inatxhkʼuulaleʼ.

Tul ech tal s-ve s-eche: —Yeʼl in laʼ anatxhkʼuula in, tan ant kuxh in vaʼl taqʼonvil quBʼaal Tiuxh, eche axh. Atz ant kuxh in vaʼl niman tetz Jesuus, eche inqʼa yeʼ nik motx tanbʼan inimal inqʼa yol uvaʼ tal ka JesuKriisto. Pet aʼ quBʼaal Tiuxh anatxhkʼuula. Tan echat kuxh nik taqʼonv viTiuxhil Tiuxh t-taanima inqʼa niman tetz Jesuus, eche uvaʼ nikich taqʼonv viTiuxhil Tiuxh t-taanima inqʼa qʼexsan tetz viyol quBʼaal Tiuxh. Tan aʼ nik motx taleʼ uvaʼ, aʼ u Kriistoe u Jesuus, —xeʼt u aanxel.

Uvaʼs tilt Xhun uvaʼ atich jaʼ quBʼaal Jesuus tiʼ val u saqiʼ chej, tul aʼ quBʼaal Jesuus oleʼv tiʼ tel iqʼij kaʼvaʼl inqʼa yaabʼla txoo

11Yaʼne vila uvaʼ jaqlich vet u amlikaʼ. Tul vil vaʼl u saqiʼ chej. Tul aʼich ibʼij uvaʼ atich jaʼ tiʼ u chej, ‹Jikxhtuʼ,› atz ‹Vinuqul.› Aʼichetze JesuKriisto. Tan jikxh nik taqʼt kuʼ inqʼa yol tinuqul tiʼ inqʼa xaol. Tul tiʼ vinuqul nik ibʼanvat txhʼaʼo. 12Tul echichxh inqʼa bʼaqʼ ivatz, eche taqʼ xamal. Tul mamala koroona atich jaʼ tiviʼ. Tul tzʼibʼamich val vibʼij uvaʼ yeʼxhabʼil invaʼq ootzaqin tetz. Pet taʼnichxh ootzaqin tetz vibʼij s-junal.#Danieel 10.6 13Tul atich ok val u oksaʼm, s-tiʼ uvaʼ tzʼajich kuʼ xeʼ kaq. Tul aʼich ibʼij ‹alol tetz inuqul tiʼ u tatin qubʼaal tiuxh.›{*}#19.13 Eche u yol: ‹Alol tetz inuqul tiʼ u tatin quBʼaal Tiuxh,› chiche, tan a uvaʼe, ‹Verbo› tu kastiiya. Tan aʼ quBʼaal Jesuus ul alon vinuqul tiʼ u tatin quBʼaal Tiuxh. Tul eela u yol u ‹Verbo› nik tal tu Xhun 1.1 tuchʼ 14 tuchʼ u 1 Xhun 1.1. 14Tul mamala tenam tu amlikaʼ txhʼuyich s-tiʼ. Tul bʼaʼnla txhaqxh oksaʼm atichaq ok taʼn. Tan bʼaʼnla liinoxhtuʼ uvaʼ oqxh isaqale, atz yeʼl tzʼil s-tiʼ. Tul ataqich jaʼ tiʼ saqaqiʼ chej. 15Tul nikich teluʼl val u espaada uvaʼ aʼxiyichxh tej titziʼ, u Alol tetz inuqul u tatin quBʼaal Tiuxh. Tul aʼich itxaʼk ikʼaxbʼisal inqʼa mam tenam s-kaqaayil, inqʼa palsan yol. Tul aʼ laʼ bʼanon iqʼesalil tiibʼa inqʼa mam tenam tuchʼ iyakʼilal iyoloneʼ, eche tok txhʼitxhʼ tiqʼabʼ vaʼq iqʼesal tiʼ toksal joloq xaol s-jik. Tul aʼ laʼ bʼanon ivatzil quBʼaal Tiuxh, uvaʼ yeʼxhabʼil invaʼq laʼ oleʼv s-tiʼ. Tul aʼ laʼ oleʼv tiʼ tel iqʼij inqʼa nik itxhiʼan s-tiʼ, eche nik ipatxhʼax el taʼlil uuva tu tatibʼal. Echetz laʼ taqʼt quBʼaal Tiuxh vikʼaʼnale tiʼ vipaʼvin inqʼa xaol, inqʼa palsan yol.#Saalmo 2.9; Isaiias 63.3; Joeel 3.13 16Tul atich val u yol tzʼibʼamich ok tiʼ u toksaʼm, atz vatz ikux inpaqte. Tul ech nikich tal s-eche:

—ine u mam iqʼesal tiibʼa inqʼa mam iqʼesal, atz ine u mam iqʼesal uvaʼ palnaʼq tiqleʼm tiibʼa inqʼa bʼaala, —chichich u tzʼibʼ.

17Yaʼne vil vaʼt u aanxel uvaʼ aʼ txaklich nuqul u qʼij. Tul jankʼalxh tiʼ iqul sichʼini. Tul isikʼle inqʼa txoo uvaʼ nik ixichʼan vatz u amlikaʼ. Tul ech tal s-eche: —Etulvaq. Tul molvaq tzaan etibʼ tiʼ itxhiʼix inqʼa mamala etxhibʼ uvaʼ toq taqʼ quBʼaal Tiuxh sete. 18Uloq etxhiʼ vitxhiʼoʼl inqʼa kamaq kuxh xaolil, inqʼa palsan yol: Itxhiʼoʼl inqʼa mam iqʼesal, itxhiʼoʼl inqʼa iqʼesal sol, itxhiʼoʼl inqʼa sol, inqʼa sibʼxh iyakʼil, itxhiʼoʼl inqʼa chej, itxhiʼoʼl inqʼa ataq jaʼ tiʼ chej tiʼ ibʼanax txhʼaʼo, itxhiʼoʼl inqʼa xaol, inqʼa jit loqʼel tok tiʼ aqʼon, itxhiʼoʼl inqʼa xaol, inqʼa loqʼel tok tiʼ aqʼon, itxhiʼoʼl inqʼa yeʼl tiqleʼm, itxhiʼoʼl inqʼa ataq tiqleʼm, —xeʼt u aanxel te inqʼa txoo.#Esekieel 39.17-20

19Yaʼne vil u qʼesal txooil maar molich tibʼ tuchʼ inqʼa mam iqʼesal vatz u txʼavaʼ, atz tuchʼ inqʼa isol. Tul molelichaq vet tibʼ tiʼ itxhʼaʼoil u JesuKriisto, uvaʼ atich jaʼ tiʼ u saqiʼ chej, atz tiʼ itxhʼaʼoil inqʼa mam tenam uvaʼ txhʼuyichaq tiʼ JesuKriisto. 20Yaʼne txeyp vet u qʼesal txooil maar. Tul txeyp vaʼt u qʼesal txooil txʼavaʼ, uvaʼ nikich tzʼeqon tzij tiʼ iqʼexsal inqʼa yol. Tan aʼ u qʼesal txooil txʼavaʼe uvaʼ kam kuxh nikich ibʼan vatz vaʼt u qʼesal txooil maar tiʼ ikʼutxhux inqʼa kaebʼal aanima vatz inqʼa xaol tiʼ teesalaq t-bʼey. Aʼetz inqʼa xaole uvaʼ motx ikuy vet tok tetxhlal u qʼesal txooil maar s-tiʼ. Tul motx inatxhkʼuula vet vivatzibʼal u qʼesal txooil maar. Aʼetz kaʼvaʼl inqʼa txooe uvaʼ lumimal ipal kuʼ tuul val u xamal uvaʼ, eche naʼbʼ, tul qʼolomaanyichxh toybʼeʼ. 21Pet jolt inqʼa imol u qʼesal txooil maar, inqʼa txhʼuyich s-tiʼ, tan yatzʼelaq motx tel taʼn inqʼa yol uvaʼ nikich teluʼl titziʼ JesuKriisto. Tan eelaich viyolon JesuKriisto tuchʼ viyatzʼon u espaada, JesuKriisto uvaʼ atich jaʼ tiʼ u saqiʼ chej.

Antetzxhtuʼ. Tan jankʼalxh vet inqʼa xichʼomla txoo motx pal iviʼ inoj vet el tiʼ itxhiʼix vitxhiʼoʼl inqʼa imol u qʼesal txooil maar.

Currently Selected:

Apokaliipsis 19: ixlC

Highlight

Copy

Compare