Apokaliipsis 12

Uvaʼs tilt Xhun val u ixoq tuchʼ val u mamaʼ yaabʼla txoo uvaʼ eela ibʼanax tuchʼ oʼan

1Yaʼne ajtxh vil itxhej val u mam etxhlal tu amlikaʼ uvaʼ at nik elkaʼpun. Tul tira kaebʼal aanima tilixeʼ. Tan vil val u ixoq uvaʼ sutimich ok val uvaʼ s-tiʼ, uvaʼ eche qʼij. Tul atich u ichʼ jaqʼ toq u ixoq. Tul atich jaʼ val u koroona tiviʼ uvaʼ atich ok kabʼlaval txʼumil s-tiʼ. 2Oybʼaltichetz vet u ixoq. Aʼetz itzʼeq vet tichʼilal u ixoq. Tul mam sichʼiʼm nikich ibʼan taʼn txhoʼm tiʼ talal vineʼ.

3Yaʼne ajtxh vil itxhej invaʼt u mam etxhlal tu amlikaʼ uvaʼ at nik elkaʼpun. Tan vil val u mamaʼ yaabʼla txoo, uvaʼ echich, eche oʼan, kaqich tiʼ. Tul juqvaʼlenich iviʼ. Atz lavalenich itukʼ. Tul jununil iviʼ atich jaʼ juunil ikoroona, tiʼ uvaʼ at tiqleʼm. 4Aʼetz vijej u mamaʼ yaabʼla txoo pal iqʼon vitoxtanul inqʼa txʼumil vatz amlikaʼ, te kaqaayil txʼumil. Tul lumil koʼp inqʼa txʼumil vatz txʼavaʼ taʼn vijej u mamaʼ yaabʼla txoo. Tul txakeʼv vet u mamaʼ yaabʼla txoo vatz u ixoq uvaʼ toqnaʼqich tala vet vineʼ. Tan aʼ nikich itxʼebʼ vet u mamaʼ yaabʼla txoo uvaʼ, taʼn laʼich alal u neʼ, tul yek laʼich itxhiʼa.

5Yaʼne tala vet u ixoq vineʼ. Tul xaakich u neʼ. Aʼetz u xaak laʼich bʼanon iqʼesalil tiibʼa jankʼal inqʼa mam tenam s-kaqaayil vatz txʼavaʼ tuchʼ kʼaʼnal, eche vaʼq mam iqʼesal uvaʼ atoʼk vaʼq txhʼitxhʼ bʼaara tiqʼabʼ. Yaʼne vil tiqʼol jaʼul u neʼ, vineʼ u ixoq, vatz quBʼaal Tiuxh tu amlikaʼ tal uvaʼ kʼuqlel quBʼaal Tiuxh t-vikʼuqeʼvbʼal tetz iqleʼm.#Isaiias 66.7; Saalmo 2.9

6Yaʼne itzʼeq vet tibʼ u ixoq. Tul yekich vet tu tzaqa txʼavaʼ. Tan tzitzi bʼanich vet tutxh tatibʼal u ixoq taʼn quBʼaal Tiuxh, tiʼ uvaʼ laʼich kʼuulal u ixoq taʼn inqʼa aanxel tuulbʼal vaʼl mil tuchʼ kaʼvaʼl sieen, atz tuchʼ oxkʼalt (1,260) qʼij.

7Yaʼnetze vil vet tutxh val u mam txhʼaʼo tu amlikaʼ. Imolichetz tibʼ u aanxel Meʼk tuchʼ inqʼa iaanxel tiʼ itxhʼaʼoil u mamaʼ yaabʼla txoo, uvaʼ eche oʼan. Tul nikich ikʼulelan u mamaʼ yaabʼla txoo tuchʼ inqʼa yaabʼla iaanxel tiʼ u txhʼaʼo te u aanxel Meʼk. 8Poro yeʼl u mamaʼ yaabʼla txoo tuchʼ inqʼa iaanxel oleʼv tiʼ u txhʼaʼo. Tul tira yeʼlaqich vet tokebʼal tiʼ tatin tu amlikaʼ taʼn quBʼaal Tiuxh. 9Pet tukimich tel bʼen u mamaʼ yaabʼla txoo, uvaʼ eche oʼan, tuchʼ inqʼa iaanxel tu amlikaʼ. Tul kʼonimich vet ikoʼp vatz u txʼavaʼ. Aʼetze u mamaʼ kan uvaʼ naʼy tzaan tatineʼ, uvaʼ ‹diaavlo,› chich eʼli, atz ‹Satanaas,› chich eʼl inpaqte. Atz aʼe, uvaʼ nik eesan inqʼa xaol t-bʼey s-kaqaayil.

10Yaʼne vabʼi val u qul tu amlikaʼ uvaʼ, aʼ ixhaakalile. Tul ech tal s-eche:

—Opoonyetz vet viqʼiil vichitp inqʼa niman tetz quBʼaal Tiuxh tiqʼabʼ u xotxhonal. Tan at iyakʼil quBʼaal Tiuxh tiʼ toksal viqʼesalil, tiʼ uvaʼ, aʼ vet u Kriisto, viChʼexoʼm, laʼ bʼekʼon tiibʼa inqʼa kam s-kaqaayil. Tan qat tukiliy vet el u xotxhonal uvaʼ qʼiil aqʼbʼal nik ixotxhon te quBʼaal Tiuxh tiʼ inqʼa qumol s-niman tetz Jesuus.{*}#12.10 ¿Kam xotxhoʼmil nik ibʼan u Satanaas vatz quBʼaal Tiuxh? Aʼ nik tal te quBʼaal Tiuxh uvaʼ yeʼlich koq laʼ ikuy quBʼaal Tiuxh vipaʼv inqʼa niman tetz Jesuus. Pet aʼ nik isaʼ Satanaas uvaʼ, aʼ koq u kʼaxkʼo laʼich aqʼax s-tiibʼa inqʼa niman tetz Jesuus tiʼ inqʼa ipaʼv. Joov 1.9-11; Sakariias 3.1 11Pet qatetz oleʼvy vet inqʼa qumol s-niman tetz Jesuus tiʼ tel iqʼij u xotxhonal. Qatetz motx oleʼvi, tan tiʼ uvaʼ, yeʼ qat yaʼ tiʼ ikʼuqbʼataq ikʼuul, tiʼ uvaʼ, aʼ u tel vikaqal JesuKriisto txhoon vipaʼv, JesuKriisto, uvaʼ ech tilix, eche chelem karneʼl. Atz qat oleʼv tuchʼ u talt tibʼ s-niman tetz Jesuus. Kʼuxh laʼich motx taqʼ tibʼ kamoq, tan tira yeʼ nikich motx titzʼa vet qʼij isaq vatz txʼavaʼ. 12Echetz chiibʼoq ex aanxel, jankʼal ex, uvaʼ at ex tu amlikaʼ, tiʼ tel iqʼij u mamaʼ yaabʼla txoo, uvaʼ eche oʼan. Pet koq ex, inqʼa xaol, inqʼa palsan yol, ex inqʼa at ex vatz txʼavaʼ, tan txumlebʼalxh evatz. Tan il vet u mamaʼ yaabʼla txoo koʼyaʼp sexoʼl tuchʼ u mam ikʼaʼnal, u mamaʼ yaabʼla txoo uvaʼ ‹diaavlo› chich eʼli. Tan tootzaqle uvaʼ bʼiil kuxh toq ibʼan taʼn quBʼaal Tiuxh tiʼ tulbʼel inqʼa xaol, —xeʼt isichʼin u qul.

13Bʼenetz vet te u mamaʼ yaabʼla txoo, uvaʼ eche oʼan, uvaʼ kʼonimich vet ikoʼp vatz u txʼavaʼ, tul xeʼt vet tiʼ tojqeʼlal u ixoq uvaʼ maʼtich talat u neʼ xaak. 14Yaʼne aqʼax vet kaʼvaʼl ixichʼ u ixoq uvaʼ ixichʼ mamaʼ xichʼ. Tul xichʼan vet bʼen u ixoq vatz u mamaʼ yaabʼla txoo, uvaʼ, eche kan, atz antxhte uvaʼ, eche oʼan. Tul sibʼ yekich vet u ixoq tu tzaqa txʼavaʼ vatz u mamaʼ yaabʼla txoo tal uvaʼ laʼich kʼuulalik u ixoq tuulbʼal oxvaʼl yaʼbʼ tuchʼ nikʼa.#Danieel 7.25; 12.7

15Yaʼne eluʼl val u aʼ titziʼ u mamaʼ yaabʼla txoo, uvaʼ eche kan. Tul toksa bʼen tiʼ u ixoq. Tul bʼen vet u aʼ s-xaomla aʼ. Aʼetz vet u aʼ laʼich pal juxun bʼen u ixoq uvaʼ titzʼa u mamaʼ yaabʼla txoo. 16Yeʼletz u ixoq juxul taʼn u aʼ, tan aʼ u txʼavaʼ lotxhon veteʼ. Tan jaqp vet val u jul tu txʼavaʼ. Tul yekich vet kuʼ u aʼ tuul u jul, u aʼ uvaʼ eluʼl titziʼ u mamaʼ yaabʼla txoo, uvaʼ, eche oʼan. 17Yaʼne lakp vet ikʼaʼnal u mamaʼ yaabʼla txoo, uvaʼ eche oʼan, tiʼ uvaʼ yeʼ oleʼv tiʼ u ixoq. Tul aʼ ibʼan vet tiʼ, uvaʼ, aʼ laʼich ibʼanvat vet txhʼaʼo tuchʼ jolt inqʼa tij imam u ixoq, inqʼa nikich niman inqʼa ibʼekʼbʼal quBʼaal Tiuxh, atz inqʼa nikich niman Jesuus.

18Tul txakeʼvetz kuxh vet u mamaʼ yaabʼla txoo titziʼ u maar.

Currently Selected:

Apokaliipsis 12: ixlC

Highlight

Copy

Compare